ათენი

ათენი უბრალოდ დედაქალაქი როდია . სწორედ აქ დაიბადა კლასიკური საბერძნეთი, რაც ნიშნავს, რომ აქ ზოგადად დასავლური ცივილიზაციის დასაბამია . პირველი ისტორიამდელი დასახლება აქ დაახლოებით ჩვ.წ.-აღ-მდე 3000 წელს გაჩნდა . მრავალი საუკუნის მანძილზე ათენს ბევრი რამ გადახდა თავს, მათ შორის დაცემის პერიოდები . ძნელი წარმოსადგენია, მაგრამ 1830-იან წლებში, როდესაც  ოსმალთა ბატონობის შემდეგ ქალაქმა, როგორც დამოუკიდებელი საბერძნეთის დედაქალაქმა, აღორძინება დაიწყო, ათენი მხოლოდ პატარა პროვინციული სოფელი იყო. 

როგორ ვიმგზავროთ ათენამდე

ათენი დაკავშირებულია საჰაერო ტრანსპორტით, თბილისთან და ქუთაისთან პირდაპირი რეისებით . ბათუმიდან ათენში გაფრენა შესაძლებელია მხოლოდ სტამბულის გავლით . თბილისის მაცხოვრებლებს აქვთ 2 საშუალება ათენში მოსახვედრად თვითმფრინავი და ავტობუსი, ფასით თითქმის არ განსხვავდება თუმცა დროის ხანგრძლივობით ნამდვილად განსხვავდება.

თბილისიდან ათენის მიმართულებით პირდაპირ ავიარეისებს ახორციელებს ავიაკომპანია ეგეოსის ავიახაზები , ქუთაისიდან პირდაპირ დაფრინავს დაბალბიუჯეტიანი ავიაკომპანია ვიზეარი . ავიაბილეთების ფასი არასეზონის პერიოდში 100 ლარიდან იწყება, შუასეზონზე კი ფასი იმატებს.

ათენი მოიცავს ძველ ქალაქს, ცენტრალურ უბნებს, გარეუბნებს, ასევე პირეოსის ნავსადგურს . ცენტრში ორი ბორცვია: აკროპოლისის ბორცვი პართენონითა და ძველი ტაძრებით, და ლიკაბეტის ბორცვი (ლიკავიტოსი) მწვერვალზე წმინდა გიორგის თვალწარმტაცი ეკლესიით.

ათენში მთელი თვეც კი შეგიძლიათ გაატაროთ ძველი ძეგლებისა და ნანგრევების, ისტორიულ ცენტრში მომხიბვლელი ნეოკლასიკური შენობებისა და მუზეუმების დეტალურად შესწავლაში.  მაგრამ გაითვალისწინეთ, რომ ქალაქის შუაგულშიც კი არის ისეთი ადგილები, რომლებსაც ჯობს მოერიდოთ . მაგალითად, ემიგრანტებით სავსე ომონიას კვარტალი, რომელსაც გირჩევთ დღის შუქზეც კი აუაროთ გვერდი. 

ათენის რაიონები

საბერძნეთის დედაქალაქი 7 ოლქად და რამდენიმე ათეულ უბნად და კვარტლად იყოფა .

ზოგიერთი მათგანი საინტერესოა ტურისტული თვალსაზრისით, ზოგი საერთოდ არ არის ყურადსაღები, ზოგის მონახულებას კი გირჩევთ საერთოდ მოერიდოთ, თუ ამის საჭიროება არ გაქვთ . ერთ-ერთი მათგანი ზემოხსენებული ომონიას კვარტალია, რომელიც ემიგრანტებითაა დასახლებული . აქ დღისითაც კი  საკმაოდ სახიფათოა.

ქალაქის სტუმრებს შორის ყველაზე პოპულარული რაიონია აკროპოლისი . ეს ისტორიული ცენტრია და სწორედ აქ მდებარეობს ძველბერძნული არქიტექტურის ძეგლები – თავად აკროპოლისი, რომლის ტერიტორიაზე დიონისეს და ჰეროდე ატიკუსის თეატრი მდებარეობს, სადაც დღემდე  კონცერტები, სპექტაკლები და სხვა კულტურული ღონისძიებები იმართება.

რადგან აკროპოლისი ქალაქის ცენტრია, ბიუჯეტური საცხოვრებლის პოვნა აქ არცთუ ისე მარტივია, სასტუმროს ნომერში ერთი ღამის განთავსების ღირებულება 60 ევროდან იწყება . ფასები ვებ-გვერდზე მითითებულია 2018 წლის აგვისტოს მდგომარეობით.

ათენის მეორე ცნობილი რაიონია პლაკა . აქ რამდენიმე საინტერესო მუზეუმი მდებარეობს, მათ შორის აღსანიშნავია საბავშვო და ხალხური მუსიკალური ინსტრუმენტების მუზეუმი, აგრეთვე სამლოცველო პოეტური სახელწოდებით „ქარის კოშკი“ და მიტროპოლის ტაძარი . გარდა ამისა, ტურისტების უმრავლესობა პლაკას უბანში ჩერდება . აქ სხვადასხვა ფასის კატეგორიის სასტუმროებია, თუმცა ბიუჯეტური (20-30 ევრო ღამეში) საკმაოდ ცოტაა . ტურისტებს მთავარი ღირსშესანიშნაობების სიახლოვე და სუვენირების მაღაზიების სიმრავლე იზიდავს. 

სამახსოვროდ სუვენირებისა და ძველებური ნივთების შეძენა მონასტირაკის უბანში მდებარე ბაზარში შეგიძლიათ . აქვე მდებარეობს ძველი მეჩეთი და წმინდა ღვთისმშობლის ტაძარი . ქალაქის ამ ნაწილში რამდენიმე იაფი სასტუმროც მდებარეობს (20 ევროდან ღამეში), მაგრამ სასტუმროების უმრავლესობის ღირებულება 100 ევროდან იწყება. 

თუ ქალაქს ზემოდან 200 მ სიმაღლიდან გსურთ გადმოხედოთ, გირჩევთ კოლონაკის უბანში გაემართოთ . ლიკაბეტის მთაზე ასვლა ფეხით ან ფუნიკულიორით შეგიძლიათ . ამ უბანში მრავალი სადღეღამისო გასართობი დაწესებულებაა, ასე რომ  საბერძნეთის დედაქალაქის ღამის ცხოვრებასთან გაცნობის სურვილის შემთხვევაში, გირჩევთ საცხოვრებელი სწორედ აქ მოძებნოთ . მართალია ეს იაფი არ დაგიჯდებათ, რადგან კოლონაკი ათენის ყველაზე ძვირი უბანია.

ტრანსპორტი

ათენის საზოგადოებრივი ტრანსპორტის სისტემა მეტროს, ტრამვაისა და ავტობუსს მოიცავს . მეტრო 5:00 საათიდან შუაღამემდე მუშაობს და გადასაადგილებლად ძალიან მოხერხებულია: სულ სამი ხაზია (ვერ დაიბნევით), საკმაოდ იაფი მგზავრობის საფასური (1,40 ევრო) და უაღრესად საინტერესო მუზეუმ-სადგურები . მეტროში მკაცრად იკრძალება დანაგვიანება, სასმელისა და საკვების მირთმევა, რომ აღარაფერი ვთქვათ კედლებზე წარწერების გაკეთებაზე . ტრამვაის სამი ხაზი ათენის ცენტრს ქალაქის სამხრეთ უბნებთან აკავშირებს . ტრამვაით მოხერხებულია სანაპიროებზე გამგზავრება . ღამის ავტობუსები კი „ღამის ცხოვრების“ უბნებიდან  შუაღამის შემდეგ დასაბრუნებლად შეუცვლელია.

საზოგადოებრივი ტრანსპორტის ბილეთები 1,40 ევრო ღირს და 90 წუთის განმავლობაში მოქმედებს გადაჯდომების რაოდენობის შეუზღუდავად . არსებობს 24-საათიანი (4,50 ევრო) და 5-დღიანი (9 ევრო) სამგზავრო ბილეთები . მათ ყველა სახის ტრანსპორტზე იყენებენ – ავტობუსში, ტროლეიბუსში, მეტროში და ელექტრომატარებელში, გამონაკლისია აეროპორტამდე მიმავალი მარშრუტები და ხაზი Express X80, რომელთა მგზავრობის ღირებულება 4,50 ევროა.

ტურისტებისთვის სპეციალური სამგზავრო ბილეთი არსებობს . იგი 22 ევრო ღირს და აეროპორტიდან  და აეროპორტში მგზავრობასაც მოიცავს, და ასევე ყველა სახის ტრანსპორტით შეუზღუდავ მგზავრობას 3 დღის განმავლობაში.

ათენის ყვითელი ფერის ტაქსებში  ჩასხდომის ტარიფი 1,20 ევროა და შემდეგ კი  0,60 ევრო კმ დღისით (ღამით – 1,20 ევრო) . მგზავრობის მინიმალური ღირებულება 3,10 ევროა . ჩასხდომის შემდგომ ყურადღება მიაქციეთ, რომ მძღოლმა მრიცხველი ჩართოს .  

ძირითად ღირსშესანიშნაობებთან, მეტროს სადგურებთან, პარკებთან და სკვერებთან ახლოს 70-ზე მეტი ველოსიპედის ქირაობის მუნიციპალური პუნქტია განთავსებული . ველოსიპედის მთელი დღის განმავლობაში ქირაობის საფასური (5 ევრო) დაუყოვნებლივ უნდა გადაიხადოთ, საათობრივი ტარიფი არ არსებობს . ტრანსპორტის გამოყენებისთვის პლასტიკური ბარათი ჯიხურში, მეტროპოლიტენის სალაროში ან კაფეში უნდა შეიძინოთ და მისი მეშვეობით ის დახლი განბლოკოთ, რომელზეც ველოსიპედია მიმაგრებული .  

კავშირი და Wi-Fi

ათენში ჩამოსვლისთანავე უმჯობესია იზრუნოთ, რომ კავშირზე იყოთ . რა თქმა უნდა, შეგიძლიათ  არ შეცვალოთ თქვენი სიმ-ბარათი და როუმინგული მომსახურება გამოიყენოთ, მაგრამ თუ ტელეფონით ბევრი საუბარი გიწევთ, ძვირი დაგიჯდებათ . ამ შემთხვევაში, ერთ-ერთი ადგილობრივი ოპერატორის სიმ-ბარათი დანაზოგის გაკეთების საუკეთესო საშუალებაა . შეგიძლიათ შეიძინოთ პირდაპირ აეროპორტში ან ქალაქის სალონებში და საფირმო მაღაზიებში . საბერძნეთში სულ 3 ფიჭური კომპანიაა – Vodafone, Wind და Cosmote . თითოეულ მათგანს სპეციალური შეთავაზებები აქვს ტურისტებისთვის – წინასწარ გადახდილი ტარიფები საერთაშორისო ზარებზე ხელსაყრელი ფასებით . ყველაზე საინტერესოა Frog (Costome) и Q (Wind).

საბერძნეთში ნებისმიერი სიმ-ბარათის შეძენისას თან უნდა იქონიოთ პირადობის დამადასტურებელი დოკუმენტი.

ათენში უფასო უკაბელო ინტერნეტის წვდომის წერტილები ყველგან გვხვდება . ჩვეულებრივი სასტუმროების, კაფეებისა და რესტორნების გარდა, Wi-Fi ხელმისაწვდომია ბევრ მოედანზე, მათ შორის სინტაგმას მთავარ მოედანზე, ისევე როგორც მეტროში, ტრამვაიში, პირეოსის ნავსადგურში და ქალაქის სხვა წერტილებში.

სასტუმროები ათენში

ათენში ტურისტული სეზონის პიკი ივლისსა და აგვისტოში დგება . ამ დროს სასტუმროში ადგილის პოვნა არ არის ადვილი და ფასებიც იზრდება . საცხოვრებელზე უმჯობესია წინასწარ  იზრუნოთ – უფრო მეტი შანსი გექნებათ ნორმალურ ფასად კარგი ვარიანტი იპოვოთ . ბიუჯეტური განთავსების ობიექტები წარმოდგენილია მცირე რაოდენობის ჰოსტელებითა და 2* სასტუმროებით . ფასები დაახლოებით ერთნაირია – 20-50 ევრო ნომერში . არანაირი ფუფუნება, მხოლოდ ყველაზე აუცილებელი.

ოდნავ უკეთესი მომსახურება სამვარსკვლავიან სასტუმროებშია . თუმცა ისინიც უფრო შესაფერისია მათთვის, ვინც სასტუმროში მხოლოდ დასაძინებლად მიდის, ზოგჯერ ფასში შედის საუზმე, ყველაზე ხშირად – შვედური მაგიდა . ერთი ნომრის ღირებულება ღამეში 50-100 ევროა, რაც უბანზეა დამოკიდებული.

მათ, ვისაც უთუოდ ცენტრში ცხოვრება სურს, ყურადღება მიაქციეთ პლაკასა და მონასტირაკის უბნებს . აქ რამდენიმე იაფი ჰოსტელი და სასტუმრო მდებარეობს.

რეკომენდირებული სასტუმროები ჩვენგან

ელიტარული ფონდი 4 და 5* სასტუმროებითაა წარმოდგენილი . მომსახურების დონე დიდად არ განსხვავდება, თუმცა ფასები საკმაოდ მაღალია . თუ 4* სასტუმროში ნომრის ღირებულება 70-დან 150 ევრომდე ღირს, ქალაქის ყველაზე ძვირადღირებულ სასტუმროებში ფასები ღამეში 400 ევრომდე იზრდება.

სტატიები ჩვენი ბლოგიდან ათენის შესახებ

• რა შეიძლება მოვინახულოთ ათენში: TOP 20 საინტერესო ადგილი
• უფასო ათენი: ვისვენებთ ბიუჯეტისთვის ზიანის მიყენების გარეშე
• საბერძნეთის TOP-8 თვალწარმტაცი კუნძული: ვირჩევთ დასვენების ადგილს
• ათენის არდადეგები: რჩევები მოგზაურებს