რა შეიძლება მოვინახულოთ ათენში: TOP 20 საინტერესო ადგილი

ათენი – საბერძნეთის უძველესი კულტურული ცენტრი და უბრალოდ ძალიან ლამაზი და თვითმყოფადი ქალაქია. დღეს ჩვენს გზამკვლევში ათენის ყველაზე საინტერესო ადგილების შესახებ გიამბობთ, რომლებიც აქ გატარებულ არდადეგებს დაუვიწყარ ზღაპრად აქცევს.

უბანი პლაკა

ათენი – ანტიკური ქალაქია, ამიტომ მისი გაცნობა ყველაზე „ხნიერი“ ღირსშესანიშნაობებით დაიწყეთ. ერთ-ერთი ასეთი ადგილია უბანი პლაკა.  ქალაქის უძველესი ისტორიული უბანი არანაკლებ ძველი აკროპოლისის ბორცვის ჩრდილქვეშ მდებარეობს. მცენარეებითა და ყვავილებით მორთული ვიწრო ჩრდილიანი ქუჩების ლაბირინთები უცნაურ მოხატულობაში იხლართება, დროს ანელებს და წარსულში გადაგიყვანთ. გირჩევთ ძველ ტრადიციულ ბერძნულ სახლებს შორის იხეტიალოთ, შემდეგ კი ერთ-ერთ პატარა ტავერნაში შეიხედოთ, რათა ბერძნულ სტუმართმოყვარეობაში დარწმუნდეთ.

აკროპოლისი

პლაკაზე სეირნობის შემდეგ, ნუ დაიზარებთ და აკროპოლისზე ადით. სავარაუდოდ ყველა იცნობს ამ ბრტყელი მწვერვალის მქონე კლდეს, რომელსაც კლასიკური ბერძნული ტაძარი ამშვენებს. შორეულ წარსულში იგი მრავალი ტაძრითა და ქანდაკებით იყო მორთული, მაგრამ დღეს ამ საუცხოობიდან მხოლოდ ნიკე აპტეროსის ტაძარი, ერექთეიონი და ცნობილი პართენონი დარჩა.

კლდიდან ქალაქის უმშვენიერესი, თითქოს მიმოფანტული ხედი იშლება, მისი ტაძრები კი შესანიშნავი ადგილია ძველი საბერძნეთის კულტურისა და ისტორიის შესასწავლად.

აკროპოლისი ღიაა ყოველდღე 08:00 საათიდან 15:00 საათამდე, ბილეთის საფასურია  €12 (სრული). 18 წლამდე ასაკის ახალგაზრდებისათვის შესვლა უფასოა (ასაკი უნდა დაადასტუროთ). აკროპოლისს შეგიძლიათ უფასოდ ეწვიოთ 6 მარტს, 5 ივნისს, 18 აპრილსა და 18 მაისს (სადღესასწაულო დღეები), სექტემბრის ბოლო შაბათ-კვირას და ყოველი თვის პირველ კვირა დღეს 1 ნოემბრიდან 31 მარტის ჩათვლით.

მათ, ვისაც ანტიკური ობიექტების ისტორიის უფრო ღრმად შესწავლა სურთ, აუცილებლად მოეწონებათ ექსკურსია ათენის ისტორიულ ცენტრში.

ბორცვი არეოპაგი

გსურთ ათენი სიმაღლიდან იხილოთ? არაფერია უფრო ადვილი! უბრალოდ არეოპაგის ბორცვზე ადით, რომელიც აკროპოლისის ჩრდილო-დასავლეთ ნაწილში მდებარეობს. ოდესღაც იგი ათენის საზოგადოებრივი ცხოვრების ცენტრი იყო, დღეს კი არესის ბორცვი (მისი დასახელება სწორედ ასე ითარგმნება) ტურისტების საყვარელ ადგილად იქცა, რადგან აქედან ქალაქის გასაოცარი ხედი იშლება!

არეოპაგში შეგიძლიათ მეტროთი იმგზავროთ (სადგური Thissia 1-ელ ხაზზე დ ა და Monastiraki  მე-3 ხაზზე).

ათენის არქეოლოგიური მუზეუმი

ზოგადად საბერძნეთს, კერძოდ კი ათენს, სამართლიანად შეიძლება ეწოდოს ერთი დიდი მუზეუმი ღია ცის ქვეშ. და მაინც, ელადის უმდიდრესი არქიტექტურული და სკულპტურული მემკვიდრეობისა შესასწავლად, გირჩევთ ათენის არქეოლოგიურ მუზეუმს ეწვიოთ. აქ სხვადასხვა ეპოქის  20 000-ზე მეტი ექსპონატია დაცული, ადრეული ცივილიზაციებიდან ანტიკურ ხანამდე. უძველესი კერამიკა, ქანდაკებები, საყოფაცხოვრებო ნივთები, ბრინჯაოს ნაკეთობები, სამკაულები  – ყველაფერს ვერ ჩამოვთვლით. ასე რომ, საკმარისი დრო დაუთმეთ და – გასწიეთ წინ,  სათავისკენ!

არქეოლოგიური მუზეუმი მდებარეობს პატისიონის ქუჩაზე #44.

სამუშაო საათებია: სამშაბათი-კვირა – 08:00 საათიდან 15:00 საათამდე, ორშაბათი – 13:30 საათიდან 20:00 საათამდე. ბილეთის საფასურია €7 (სრული), €3 – სტუდენტებისთვის, 19 წლამდე ასაკის ვიზიტორებისთვის კი შესვლა  უფასოა.

ბენაკის მუზეუმი

საბერძნეთის კულტურისა და ისტორიის გაცნობა არასრული იქნება, თუ ბენაკის მუზეუმს თქვენს „ტურისტულ სიაში“ არ ჩართავთ. დიახ, იგი არქეოლოგიისადმია მიძღვნილი (რა გასაკვირია, თუ საბერძნეთი  თავისი არქეოლოგიური აღმოჩენებითაა ცნობილი?). მაგრამ მისი უმდიდრესი კოლექცია ნამდვილად არ დაგტოვებთ გულგრილს, რადგან აქ წარმოდგენილი არტეფაქტები პალეოლითიდან დაწყებულ პერიოდს მოიცავს!

მუზეუმში შეგიძლიათ გაეცნოთ არა მხოლოდ ბერძნული, არამედ ანდური, ისლამური და ჩინური კულტურების მემკვიდრეობას. ქანდაკებები, ნახატები, ხატები, სამკაულები და ჭურჭელი – ეს ყველაფერი წარსულში დაგაბრუნებთ და ძველი დროის ხიბლს გიჩვენებთ.

მუზეუმი მუშაობს: ოთხშაბათი, პარასკევი – 09:00 საათიდან 17:00 საათამდე; ხუთშაბათი, შაბათი – 09:00 საათიდან 24 საათამდე და კვირა – 09:00 საათიდან 15:00 საათამდე. მუზეუმი დაკეტილია ორშაბათობით, სამშაბათობით და დღესასწაულებზე.

შესვლის საფასურია – €7. ყოველ ხუთშაბათს და 18 მაისს (მუზეუმების საერთაშორისო დღე) შესვლა უფასოა.

მუზეუმში შეგიძლიათ იმგზავროთ #022, 060, 200, 203, 204, 211, 222 – 224, 235 ავტობუსით ან # 3, 7, 8, 13 ტროლეიბუსით.

ეროვნული ბაღი

დაღლილი ტურისტისთვის არაფერია ისეთი სასურველი, როგორც დასვენება სიჩუმესა და სიმშვიდეში. ამისათვის ათენში საუკეთესო ადგილია – ეროვნული ბაღი. მისი პოვნა არ გაგიჭირდებათ: ბაღი სინტაგმას მოედანთან ახლოს მდებარეობს, პარლამენტის შენობის უკან.

ჩრდილიანი ხეივნები სიცხისგან დაგიცავთ, აუზი კი გაგაგრილებთ. ამასთან, ბაღში ანტიკური ნანგრევები, სვეტებისა და უძველესი მოზაიკის ნაშთებია შემორჩენილი. აქ ასევე მდებარეობს მინი ზოოპარკი და ბოტანიკური მუზეუმი, ასე რომ ნამდვილად არ მოიწყენთ.

ბერძნული ხალხური შემოქმედების მუზეუმი

საბერძნეთი მხოლოდ ანტიკური ქანდაკებები და ტაძრები როდია. ეს ქვეყნა უფრო უკეთ რომ გაიცნოთ, აუცილებლად ეწვიეთ ბერძნული ხალხური შემოქმედების მუზეუმს. სწორედ აქ არის დაცული ხალხური ხელობის ყველა ნიმუში! აქ იხილავთ ჩუქურთმებითა და ინკრუსტაციებით მორთულ ხის, ლითონის და თიხის ნაკეთობებს, ასევე ტრადიციული საკარნავალო კოსტიუმებისადმი მიძღვნილ მთელ დარბაზს. აქვეა წარმოდგენილი ვერცხლის ნაკეთობებისა და იარაღის ექსპოზიცია, ასევე შეგიძლიათ იხილოთ ეროვნული თეატრის კარაგიოზისის თოჯინები, რომლებიც ათენის ყოველდღიური ცხოვრების სცენებს ასახავენ.

მუზეუმი მდებარეობს ქუჩაზე Kydathinaion Str.  #17, პლაკა. სამუშაო საათებია – 08:00 საათიდან 15:00 საათამდე. ბილეთის საფასურია €2.

შენიშვნა: რადგან მუზეუმის ხელმძღვანელობა ექსპოზიციის ახალ შენობაში გადატანას გეგმავს, შესაძლებელია ცვლილება სამუშაო დროში/დღეებში.

დიონისეს თეატრი

რასაკვირველია, ბევრს სმენია ცნობილი ბერძნული ამფითეატრების შესახებ, მაგრამ ცოტამ თუ იცის, რომ უძველესი მათგანი ათენში მდებარეობს. დიონისეს თეატრი ჯერ კიდევ ჩვ.წ.აღ.-მდე V საუკუნეში აშენდა! სწორედ  აქ დგამდნენ ესქილეს, სოფოკლისა და არტისტოფანეს ნაწარმოებებს,  თეატრი 17 ათას მაყურებელს იტევდა.

დღეს ტურისტების საყვარელი გასართობი თეატრის ფანტასტიკური აკუსტიკის შემოწმებაა: თუ ერთი ადამიანი ორკესტრში დარჩება და ისაუბრებს, ხოლო მეორე ყველაზე მაღალ რიგზე ავა, იგი ყველა სიტყვას გაიგონებს. ნუ დაიზარებთ და თავად შეამოწმეთ!

თეატრი არეპაგიტუს ქუჩაზე მდებარეობს. აქ მეტროთი შეგიძლიათ იმგზავროთ (წითელი ხაზი, სადგური „აკროპოლისი“). ბილეთის საფასურია €12. თეატრი ღიაა ყოველდღე 08:30 საათიდან 18:00 საათამდე.

აიოს-ელეფთერიოსის ტაძარი

აიოს-ელეფთერიოსის ტაძარი თავიდან შეიძლება ვერც შენიშნოთ და გვერდი აუაროთ. და ამაოდ. XII საუკუნის ეს პატარა ეკლესია ქალაქის ერთ-ერთ ულამაზეს ტაძრად ითვლება. კედლებზე უცნაური ჩუქურთმებით მორთული მარმარილოს შენობა საოცარი სიმშვიდის განცდას მოგიტანთ.

სინტაგმას მოედნიდან შეგიძლიათ №025-027 ავტობუსით იმგზავროთ (სინტაგმას გაჩერებიდან მიტრიპოლის გაჩერებამდე). ეკლესია ქუჩის მოპირდაპირე მხარეს მდებარეობს.

კიკლადური ხელოვნების მუზეუმი

ეს ადგილი კიდევ ერთი სავალდებულო პუნქტია მათთვის, ვინც თავის ცხოვრებას ვერ წარმოიდგენს ახალი ცოდნის მიღების გარეშე. კიკლადური ხელოვნების მუზეუმში თქვენ იმ ცივილაზაციების ყოფისა და კულტურის შესახებ შეიტყობთ, რომლებიც  ეგეოსის ზღვისა და კვიპროსის სანაპიროზე ცხოვრობდნენ. განსაკუთრებით საინტერესოა ყოველდღიური ცხოვრების ამსახველი სცენების ფიგურების კოლექცია: ნადირობა,  სცენები ოჯახური ცხოვრებიდან, ყოველდღიური საქმიანობა და ა.შ. აქ კვიპროსის იშვითი ანტიკვარიატიც შეგიძლიათ იხილოთ: ოქროსა და ვერცხლის, ბრინჯაოსა და მინის საოცარი ნაკეთობები.

ძირითადი კოლექცია შემდეგ მისამართზე მდებარეობს: Neophytou Douka, 4, დროებითი გამოფენები  სტაფატოს სასახლეში ეწყობა (Vassilissis Sophias/Herodotou, 1 გზაჯვარედინი).

ქარის კოშკი

სინამდვილეში ასეთი რომანტიკული სახელწოდების კოშკს საკმაოდ პროზაული დანიშნულება აქვს – დღეს აქ მეტეოროლოგიური სადგურია განთავსებული. მაგრამ მისი მონახულება მაინც ღირს: კოშკში ჰიდრავლიკური საათი მუშაობს, რომელიც დროს მზის მიხედვით  გვიჩვენებს, თავად შენობაც კი ცოცხალი არქიტექტურული ძეგლია (აგებულია ჩვ.წ.აღ.-მდე I საუკუნეში). განსაკუთრებით საინტერესოა კოშკის ფრიზი, რომელზეც ქარის ღმერთებია გამოსახული. მათი ფიგურების ქვეშ ციფერბლატის ნიშნულები შეგიძლიათ დაინახოთ, რადგან კოშკს იყენებდნენ როგორც გიგანტურ საათს.

ეს სასწაული პლაკას უბანში მდებარეობს, აგორას მოედანთან ახლოს. კოშკის აგორასთან ერთად მონახულების ბილეთის საფასურია €3.

ათენის ცენტრიდან პლაკას უბნამდე მგზავრობას #025 ავტობუსით ან მეტროთი შეძლებთ (სადგური Monastiraki).

კერამიკის უბნის მუზეუმი

ამ მუზეუმს ტყუილად როდი უწოდეს კერამიკის უბნის მუზეუმი. ამავე სახელწოდების უბანში ადრე მეთუნეები და მოქანდაკეები ცხოვრობდნენ და მუშაობდნენ, მოგვიანებით კი აქ ბევრი საინტერესო აღმოჩენა გააკეთეს.

მუზეუმში დაცულია ანტიკური პერიოდის ქანდაკებების, სკულპტურული ჯგუფებისა და კომპოზიციების უდიდესი კოლექცია. მუზეუმის ეზოში  კოლექციის მარგალიტს იხილავთ – დიონისეს ხარის ქანდაკებას (340 წ. ჩვ. წ.აღ.-მდე). და, რა თქმა უნდა, – უამრავი უძველესი კერამიკის ნაკეთობა, სამკაული და საყოფაცხოვრებო ნივთი.

მუზეუმი მდებარეობს ერმუს ქუჩაზე #148. ზამთარში ღიაა 08:30 საათიდან 15:00 საათამდე, ზაფხულში – 08:00 საათიდან 19:30 საათამდე. ბილეთის საფასურია – €2.

ჰეროდე ატიკელის ოდეონი

უძველესი დროიდან საბერძნეთი განთქმული იყო თავისი მუსიკისადმი სიყვარულით: სწორედ ამიტომ იყო ამფითეატერები ამდენად პოპულარული ელადაში. ერთ-ერთი მათგანი ჯერ კიდევ ფუნქციონირებს.

ოდეონი, აგორას სამხრეთ ფერდობზე მდებარე ამფითეატრი, მუსიკალური ღონისძიებების ჩატარების უძველესი მოედანია, რომელმაც დღემდე შეინარჩუნა თავისი ფუნქცია. ეს დიდებული შენობა შესანიშნავად არის შენახული და დღეს ათენის ცენტრალურ კულტურულ სცენას წარმოადგენს. აქ იმართება ფესტივალები, კონცერტები და თეატრალური წარმოდგენები (მაგალითად, ყოველწლიური ათენის ფესტივალი მაისიდან ოქტომბრის ჩათვლით ტარდება).

ამფითეატრამდე შეგიძლიათ ფეხით მიხვიდეთ დიონისე არეოპაგიტის ქუჩით ან №230 ავტობუსით იმგზავროთ (გაჩერება პირდაპირ ოდეონის წინ მდებარეობს). ოდეონის ხილვა მხოლოდ მაშინ შეგიძლიათ, თუ აქ კონცერტი ან ფესტივალი იმართება, ამიტომ ღონისძიების ბილეთის შეძენა მოგიწევთ ოდეონის სალაროებში ან ათენის ფესტივალის ოფიციალურ  წარმომადგენლობებში.

ჰეფესტოსის ტაძარი

ტურისტებისთვის ათენი  კოხტა ანტიკურ ტაძრებთან ასოცირდება, მაგრამ  შეცდომით მიიჩნევენ, რომ ისინი ყველა ერთნაირად გამოიყურება. თითოეული ტაძარი თავისებურად უნიკალურია,  ამ ტაძრების მონახულებით ამაში თავად შეძლებთ დარწმუნებას.

ამისათვის გირჩევთ ჰეფესტოსის ტაძარი მოინახულოთ – ძველი საბერძნეთის ერთ-ერთი ყველაზე კარგად შემონახული ტაძარი.  უძველეს სალოცავში რომ მოხვდეთ, შეგიძლიათ აკროპოლისის კომპლექსური ბილეთი შეიძინოთ  (12 ევროდ), რომელშიც სხვა ღირსშესანიშნაობების მონახულებაც შედის, როგორიცაა აგორა, ზევსის ტაძარი ან ადრიანის ბიბლიოთეკა. ასევე შეგიძლიათ უფასოდ  შეხვიდეთ: ნოემბრიდან მარტის ჩათვლით ყოველ კვირა დღეს ტაძარში შესვლა უფასოა.

ტაძრამდე შეგიძლიათ #227 ავტობუსით ან მეტროთი იმგზავროთ (გაჩერებაSt. Thisiou). ტაძარი ღიაა ყოველდღე 08:00 საათიდან 18:00 საათამდე.

პირეის პორტი

საბერძნეთი ზღვის გარეშე წარმოუდგენელია, რადგან ქვეყნის ისტორია მჭიდროდ არის დაკავშირებული ამ ძლიერ სტიქიასთან. ამიტომ ნუ მოიკლებთ ამ სიამოვნებას და ათენის პირეის პორტს ეწვიეთ. პირეის პორტში ფეხმავალი ექსკურსიით გაისეირნეთ. ნავსადგური არა მხოლოდ ზღვის ჰაერსა და დიდებულ ხედებს, არამედ თავის საინტერესო ისტორიასა და თანამედროვე ცხოვრების ნაწილს გაგიზიარებთ. სანაპიროდან ქალაქის ხედი უბრალოდ ჯადოსნურია: მიმოფანტული თეთრი სახლები ლურჯი ცისა და ლაჟვარდოვანი ზღვის ფონზე  პირველი შეხედვისთანავე თქვენს აღფრთოვანებს გამოიწვევს!

აქ შეგიძლიათ მეტროთი (მწვანე ხაზი პირდაპირ პორტთან მთავრდება) ან ავტობუსით იმგზავროთ (ომონიას მოედნიდან #049 ან სინტაგმას მოედნიდან #040, კოტზიას მოედანზე ჩამოდით).

მონასტირაკის ბაზრობა

გსურთ ათენის ცხოვრების ნათელ  და მოფუსფუსე ატმოსფეროში ჩაერთოთ? აუცილებლად ეწვიეთ მონასტირაკის ბაზრობას – ქალაქის უძველეს სავაჭრო მოედანს. დღეს ეს დიდი ძველმანების ბაზრობაა, სადაც ნებისმიერი იპოვის მისთვის სასურველ ნივთს. ყოველდღე 8:00 საათიდან  აქ ხატოვანი მოქმედება ეწყობა, რომელსაც „ბერძნული ვაჭრობა“ ეწოდება. თუნდაც არ გეგმავდეთ რაიმეს შეძენას, აუცილებლად გაისეირნეთ გამყიდველებს შორის, თვალყური ადევნეთ ცოცხალ ვაჭრობას და  ათენის ნამდვილი ცხოვრების ატმოსფერო შეიგრძენით.

მონასტირაკის ბაზრობა მდებარეობს ჰეფესტოსის ქუჩაზე #28. მუშაობს ყოველდღე: ​​ანტიკვარიატი 08:00 საათიდან 15:00 საათამდე, მთელი ბაზრობა – გვიან საღამომდე.

ერექთეიონის ტაძარი

აკროპოლისზე ყოფნის დროს, არ გაუშვათ ხელიდან ერექთეიონის ტაძრის მონახულების შანსი, სადაც ძველი ბერძნები თაყვანს სცემდნენ პოსეიდონსა და ათენას. დღეს ძველი დიდებულებისგან ცოტა რამაა შემორჩენილი,  მაგრამ ტაძარი მაინც არ კარგავს თავის სიდიადესა და სილამაზეს. განსაკუთრებულ ყურადღებას ქალი კარიატიდების ქანდაკებები იმსახურებს, რომლებიც ერთ-ერთი პორტიკს ამშვენებენ.

ტაძარი აკროპოლისის ტერიტორიაზე მდებარეობს, ასე რომ აქ მოსვლა იმავე მარშრუტით შეგიძლიათ, მაგალითად, მეტროთი მონასტირაკის სადგურამდე. ხოლო  აკროპოლისის ტერიტორიის დასათვალიერებლად 4 დღიანი კომპლექსური ბილეთის შეძენის შემთხვევაში, მეზობლად მდებარე ღირშესანიშნაობების ნახვასაც შეძლებთ. 18 მაისს (მუზეუმების საერთაშორისო დღეს) აქ შესვლა, ისევე როგორც ათენის სხვა მუზეუმებში, უფასოა.

აკროპოლისის მუზეუმში ბილეთის შეძენა აქ შეგიძლიათ.

კონცხი სუნიონი

თუ თქვენ „მოწოდებით“ რომანტიკოსი ბრძანდებით, ათენში ერთ ადგილს შემოგთავაზებთ, რომელიც უთუოდ მოგეწონებათ! საუბარია სუნიონის კონცხზე. შეიძლება იკითხოთ, რა აზრი აქვს მთელი საათი ვიმგზავროთ ათენიდან რაღაც კონცხის სანახავად?

აზრი კი იმაშია, რომ სწორედ აქ შეძლებთ ნახოთ ენით აუწერელი სილამაზის მზის ჩასვლას პოსეიდონის ტაძრის რუინებთან, მით უმეტეს, რომ შესვლა ყოველდღე შეუზღუდავია. ათენში დაბრუნებამდე კი თქვენი სანუკვარი სურვილი ჩაიფიქრეთ – ამბობენ, რომ ნამდვილად აგისრულდებათ!

სუნიონის კონცხამდე შეგიძლიათ ავტობუსით იმგზავროთ. ამისათვის ათენში მოძებნეთ მეტროს სადგური „ვიქტორია“, აქედან 28 ოქტომბრის ქუჩით პატისიონისა და ალექსანდრას გამზირების კვეთამდე  იარეთ, შემდეგ ატიკას რაიონის გაჩერება იპოვეთ (KTEL Attikis). თქვენ ჩალისფერ- ნარინჯისფერი ავტობუსი გჭირდებათ, რომელიც სამხრეთ ატიკაში მოძრაობს.

ბორცვი ლიკავიტოსი

სავარაუდოდ ათენის ყველაზე ხატოვანი და ფართო პანორამა სწორედ აქედან იშლება – ბორცვიდან  ლიკავიტოსი (ან ლიკაბეტი), ქალაქის შემოგარენის უმაღლესი წერტილი. შთამბეჭდავი ხედვის გარდა, მწვერვალზე მდებარეობს წმინდა გიორგის სამლოცველო და თეატრი ღია ცის ქვეშ, სადაც მუსიკალური წარმოდგენები და კონცერტები იმართება.

ბორცვზე ასვლა  ფუნიკულიორით შეგიძლიათ (ზაფხულში ღიაა 08:45 საათიდან 00:45 საათამდე, ზამთარში – 08:45 საათიდან 00:15 საათამდე). თავად ბორცვამდე კი მეტროთი შეგიძლიათ იმგზავროთ, მე-3 ხაზი, სადგური Megaro Moussikis.

ილიას ლალაუნის სახელობის საიუველირო მუზეუმი

გაინტერესებთ, თუ რა სამკაულები იყო საბერძნეთში მოდაში სხვადასხვა ეპოქაში? არაფერია უფრო ადვილი! ეწვიეთ ილიას ლალაუნის სახელობის საიუველირო მუზეუმს და საკუთარი თვალით იხილეთ.

მუზეუმის კოლექციაში 4000-ზე მეტი ექსპონატია  წარმოდგენილი: სამკაულები, ძვირფასი ლითონების დეკორატიული ნივთები და პატარა ქანდაკებები. ეს არ არის ყველაფერი – მუდმივი ექსპოზიცია მოიცავს მუზეუმის დამფუძნებლის, იუველირი ილიას ლალაუნის ნაკეთობებს, ხოლო დროებითი გამოფენა მსოფლიოს ოქრომჭედლობის ისტორიის შესახებ მოგვითხრობს.

მუზეუმის მისამართია: Kallisperi ქუჩა #12. მუზეუმი ღიაა სამშაბათიდან შაბათის ჩათვლით 09:00 საათიდან 15:00 საათამდე. კვირას – 11:00 საათიდან 16:00 საათამდე. ბილეთის საფასურია €5, სტუდენტებისთვის, პენსიონრებისთვის და ჯგუფებისათვის (10-ზე მეტი ადამიანი) – €4.

ასევე წაიკითხეთ:

ათენის არდადეგები: რჩევები მოგზაურებს

უფასო ათენი: ვისვენებთ ბიუჯეტისთვის ზიანის მიყენების გარეშე

საბერძნეთის TOP-8 თვალწარმტაცი კუნძული: ვირჩევთ დასვენების ადგილს

ათენის ავიაბილეთები