ნიუ-იორკი

როგორ ვიმგზავროთ ნიუ-იორკამდე

თბილისიდან ნიუ-იორკის მიმართულებით პირდაპირი ავიარეისები არ სრულდება . ფრენები ხელმისაწვდომია მხოლოდ გადაჯდომით ტრანზიტულ აეროპორტებში, ძირითადად ნიუ-იორკში ჩასაფრენად გამოიყენება შემდეგი ქალაქის ტრანზიტული აეროპორტები: სტამბოლი, ბაქო, დოჰა, მიუნხენი, პარიზი . საშუალოდ არასეზონურ პერიოდში ავიაბილეთის ფასი იწყება 1600 ლარიდან, შუა სეზონზე კი ფასმა შესაძლოა 2500 ლარსაც კი გადააჭარბოს . ნიუ-იორკის მიმართულებით დაფრინავენ შემდეგი ავიაკომპანიები: ყატარის ავიახაზები, თურქეთის ავიახაზები, ლუფთანზა . მგზავრობის საშუალო ხანგრძლივობა 15 საათი გადაჯდომების ჩათვლით . ფრენები თბილისის და ბათუმის აეროპორტებიდან სრულდება . არასეზონურ პერიოდზე ავიაკომპანიები ხშირად გვთავაზობენ აქციებს ნიუ იორკის მიმართულებით ამ პერიოდში ერთი გზის ბილეთის ფასი 700 ლარიდან იწყება.

იხილეთ გვერდი თუ გაინტერესებთ როგორ მივიღოთ ამერიკის ტურისტული ვიზა?
ასევე გაეცანით 20 ადგილი, რომელთა მონახულება ღირს ნიუ-იორკში

თუ ნიუ-იორკში მიემგზავრებით, არ გქონდეთ იმედი, რომ ადგილზე გაარკვევთ  თუ რატომ უწოდებენ მას „დიდ ვაშლს“ – თავად ნიუ-იორკელებიც კი ვერ გიპასუხებენ . როგორც ყოველთვის, ასეთ შემთხვევებში უამრავი ერთიმეორეზე აბსურდული ვერსია არსებობს . უმჯობესია  იმისთვის მოემზადოთ, რომ ამერიკის შეერთებული შტატების ერთ-ერთი ყველაზე ცნობილი ქალაქის ქუჩებში თქვენ ადვილად გამოგელაპარაკებიან და პრაქტიკულად ყველა საუბარს საკრალური კითხვით დაიწყებენ  „Where are you from?“, რომ ყველა სკვერი ან გზაჯვარედინი ნაცნობი მოგეჩვენებათ (რომელიღაც ფილმში ნამდვილად ნანახი გექნებათ), რომ ამ ფუტკრების სკის მსგავს მეგაპოლისში მარტო დარჩენა ან მინიმუმ შედარებით ნაკლებად ხალხმრავალ ადგილზე აღმოჩენა არ გამოგივათ . მაგრამ იმ შემთვევაშიც კი, თუ ათასობით კომენტარს წაიკითხავთ და მრავალ ღირებულ რჩევას ფურცელზე ამოიწერთ, ნიუ-იორკთან შეხვედრისთვის მომზადებას მაინც ვერ შეძლებთ – ულტრადინამიკური, მუდმივად მოძრავი ქალაქი  საგონებელში ჩაგაგდებთ, მოგხიბლავთ და მრავალფეროვნებისა და მრავალმხრივი ემოციების მორევში ჩაგითრევთ .

ერთი სიტყვით, welcome to New York, baby!

ნიუ-იორკის რაიონები

ნიუ-იორკი 5 რაიონისგან შედგება, თითოეულ მათგანს თავისი ცხოვრების რიტმი, სული და საკუთარი განუმეორებელი ხასიათი აქვს.

მანჰეტენი ნიუ-იორკის ყველაზე ცნობილი რაიონი და ამერიკის სავიზიტო ბარათია . აქ თავმოყრილია ცათამბჯენები, საერთაშორისო კორპორაციების ოფისები, ბუტიკები და ძვირადღირებული რესტორნები, ისევე როგორც ყველაზე პრესტიჟული აპარტამენტები . მანჰეტენი, თავის მხრივ, 3 „ქვერაიონად“ იყოფა: დაუნთაუნი, მიდლთაუნი და აფთაუნი . ადგილობრივი ღირსშესანიშნაობების სიაში შედის ბროდვეი, უოლ სტრიტი ფედერალ ჰოლისა და ნიუ იორკის საფონდო ბირჟის შენობებით, ჩაინა-თაუნი, ბრუკლინის ხიდი, ცათამბჯენები „ბრტყელი უთო“, ემპაირ სტეიტ ბილდინგი და მოედანი ტაიმზ-სკვერი.

როდესაც ნიუ-იორკელები „the city“ (ქალაქს) ამბობენ, ისინი, როგორც წესი, მხოლოდ მანჰეტენს გულისხმობენ . ნიუ-იორკის სხვა რაიონებს გარეს რაიონებს უწოდებენ („the outer boroughs“).

ბრუკლინი ნიუ-იორკის ერთ-ერთი სამხრეთ რაიონია, რომელშიც მანჰეტენიდან ბრუკლინის ხიდით ფეხით შეგიძლიათ მოხვდეთ . ქალაქის მოსახლეობის უმრავლესობა აქ ცხოვრობს, მაგრამ მაღალი შენობები თითქმის არ არის: რაიონი სიგანეში გაიზარდა . ბრუკლინი ცნობილია, როგორც მხატვრებისა და სხვა შემოქმედებითად მოაზროვნე ნიუ-იორკელთა დასახლების ადგილი, ასევე თავისი საკონცერტო მოედნებითა და პლაჟებით . სწორედ ბრუკლინის ფარგლებში მდებარეობს კონი-აილენდის კუნძულის ატრაქციონების პარკი და ბრაიტონ-ბიჩის პლაჟი (შეთავსებით კი ყოფილი სსრკ-ს ფარგლებს გარეთ არსებული ყველაზე დიდი რუსული საზოგადოება) .

თუ ამერიკის შეერთებულ შტატებს მსოფლიოს „სადნობ ქვაბს“ უწოდებენ, მაშინ მანჰეტენიდან აღმოსავლეთით მდებარე რაიონი – ქუინსი უთუოდ ნიუ იორკის „სადნობი ქვაბია“ . აქ 170 ენაზე საუბრობენ, ქუჩები სავსეა ყველაზე საკვირველი აბრებით, ხოლო სხვადასხვა რასისა და ეროვნების წარმომადგენელთა სიმრავლე ნოესაც კი შეშურდებოდა . ქუინსში ნიუ-იორკის ორი საერთაშორისო აეროპორტი მდებარეობს, ქალაქის სიდიდით მეორე ჩაინა-თაუნი, ასევე ცალკე კინოთეატრი, რომელშიც მხოლოდ ბოლივუდის ფილმების ჩვენება მიმდინარეობს . თუ ქუინსში მოხვდით, გირჩევთ ეწვიოთ თანამედროვე ხელოვნების ცენტრს P.S . 1, ექსკურსიით „სტეინვეის“ როიალის ფაბრიკას, სოკრატეს ქანდაკებების პარკში გაისეირნოთ და აფრიკის ხელოვნების მუზეუმის ექსპოზიციები დაათვალიეროთ.

მანჰეტენის ჩრდილოეთ მეზობელია ბრონქსი, რომელიც ასოცირდება შავკანიან რეპერებთან  ბეისბოლის კეპებითა და მსხვილი ოქროს „ჯაჭვებით“ . მიუხედავად იმისა, რომ ბრონქსში ნიუ-იორკის უღარიბესი მოსახლეობის ჯურღმულები მდებარეობს, ეს  არის ქალაქის მწვანე რაიონი, რომლის მეოთხედი ტერიტორია პარკებითა და ბაღებითაა დაფარული . ადგილობრივი ექსკურსიის მარგალიტებია ბრონქსის ზოოპარკი და იანკის ბეისბოლის სტადიონი . ასევე გირჩევთ დაათვალიეროთ ბოტანიკური ბაღი, რომელიც  48 (!) ცალკეული თემატური ბაღისგან შედგება, ედგარ ალან პოს  სახლ-მუზეუმსა და გემთმშენებელთა მუზეუმს ეწვიოთ და დიუკ ელინგტონის ხსოვნას მიაგოთ პატივი ვუდლონის სასაფლაოზე.

სტეიტენ-აილენდი ნიუ-იორკის ყველაზე სამხრეთ რაიონია, სადაც საბორნე მიმოსვლით ან ხიდით შეძლებთ მოხვედრას . აქ ბევრი სიმწვანე, შედარებით სიმშვიდე და  ემიგრანტების დიდი რაოდენობაა მსოფლიოს თითქმის ყველა წერტილიდან . სტეიტენდ-აილენდზე გირჩევთ პორტ-რიჩმონდს ეწვიოთ – ლათინოამერიკული კულტურის გულისცემას, ულამაზეს პარკ-ჰილში გაისეირნოთ და სნაგ-ჰარბორის კულტურის ცენტრში გამოფენაზე შეიაროთ.

მიუხედავად იმისა, რომ ნიუ-იორკმა აშშ-ს კრიმინალური დედაქალაქის „საპატიო“ წოდება მრავალტანჯულ დეტროიტს დაუთმო და დღეს ქვეყნის  ერთ-ერთ ყველაზე უსაფრთხო მეგაპოლისად მიიჩნევა, რასაკვირველია,  უმჯობესია აქ არ მოდუნდეთ . ყველაზე უსაფრთხო რაიონი მანჰეტენია თავისი ელიტარული საცხოვრებელი სახლებითა და  ფართობის ერთეულზე პოლიციის მაღალი კონცენტრაციით . ამასთან, აქაც კი არ არის რეკომენდებული ნივთების უყურადღებოდ დატოვება,  ფასეულობა და დოკუმენტები კი უმჯობესია სასტუმროს სეიფში შეინახოთ . არ უნდა ისეირნოთ ჰარლემში სიბნელეში . მთავარი უსიამოვნება, რომელსაც ტურისტები შესაძლოა წააწყდნენ ქალის ხელჩანთებისა და საფულეების ქურდობაა . ქალაქში არის უბნები, სადაც არ უნდა იყოთ მარტო ან პატარა ჯგუფებით, განსაკუთრებით კი მზის ჩასვლის შემდეგ, ესენია: ბედფორდ-სტიუვესანტი და ისთ-ნიუ-იორკი ბრუკლინში, სამხრეთ ბრონქსი, ჰანტს-პოინტი და მოტს-ჰეივენი (ყველა ბრონქსში) და უბანი იამაიკა ქუინსში.

შეგახსენებთ, რომ ნიუ-იორკის საზოგადოებრივ ადგილებზე მოწევა აკრძალულია და ეს არა მხოლოდ რესტორნებს, კაფეებსა და ბარებს, არამედ პარკებსაც ეხება . დარღვევა სოლიდური ჯარიმით შეიძლება დასრულდეს.

ტრანსპორტი

ნიუ-იორკის საზოგადოებრივი ტრანსპორტი წარმოადგენილია მეტროთი, ქალაქის ავტობუსებით, საბაგირო გზით რუზველტის კუნძულზე (რომელსაც აქ  ტრამვაის უწოდებენ), საბორნე მიმოსვლით სტეიტენ-აილენდზე და ასევე ნიუ-იორკის ლეგენდარული ყვითელი ტაქსით – „ქებით“.

მეტრო

ნიუ-იორკის მეტრო – ქალაქში გადაადგილების ყველაზე სწრაფი, მოხერხებული და იაფი საშუალებაა . მოგზაურობისთვის Metro Card  ბარათი დაგჭიდებათ – მისი შეძენა არა მხოლოდ მეტროს სადგურებში (სალაროებში და აპარატებში), არამედ ჩვეულებრივ სასურსათო და საყოფაცხოვრებო ნივთების მაღაზიებშიც შეგიძლიათ – ბარათის ემბლემა აბრებზე ეძებეთ . ერთი მგზავრობის ბარათის ღირებულება 3 აშშ დოლარია და მოქმედებს შეძენიდან ორი საათის განმავლობაში . შევსებად ბარათზე თანხის დამატება 5,50-დან 80 აშშ დოლარამდე შეგიძლიათ;  მეტროში ან ქალაქის ავტობუსზე თითოეული მგზავრობის დროს მას 2,75 აშშ დოლარი ჩამოეჭრება . ამ ბარათითვე შეგიძლიათ გადაიხადოთ მგზავრობა კენედის სახელობის აეროპორტში „ეართრეინით“ (5 აშშ დოლარი).

ფასები ვებ-გვერდზე მითითებულია 2018 წლის ოქტომბრის მდგომარეობით.

ასევე არსებობს 7 დღიანი (31 აშშ დოლარი) ან 30 დღიანი (116,50 აშშ დოლარი) ბარათები შეუზღუდავი რაოდენობის მგზავრობისთვის – პირველი ვარიანტი განსაკუთრებით მოსახერხებელი იქნება, თუ ნიუ-იორკში ცოტა ხნით რჩებით და ქალაქის ფარგლებში ხშირად   გეგმავთ მგზავრობას .

ნიუ-იორკის მეტრო 24 საათის განმავლობაში მუშაობს, ასე რომ შეგიძლიათ გვიანობამდე მშვიდად დარჩეთ სტუმრად ან ბარში და არ გქონდეთ შიში, რომ ბოლო მატარებელს ვერ მიუსწრებთ . თუმცა, გაითვალისწინეთ, რომ ღამის მატარებლები უფრო იშვიათად მოძრაობენ და ზოგიერთი სადგური დაკეტილია.

ნიუ-იორკის მეტროს კიდევ ერთი თავისებურება არის ის, რომ ბევრი ხაზი (26-დან, იხილეთ ნიუ-იორკის მეტროპოლიტენის რუკა) ერთმანეთის დუბლირებას ახდენს . გარდა ამისა, ზოგიერთი მატარებელი ყველა გაჩერებაზე ჩერდება, ზოგიც კი მხოლოდ საკვანძო სადგურებზე.

ავტობუსები

ავტობუსის მარშრუტების ვრცელი ქსელი მთელს ნიუ-იორკშია სამხრეთ ბრუკლინიდან ჩრდილოეთ ბრონქსამდე . ზოგიერთი ავტობუსი მხოლოდ ერთი რაიონის ფარგლებში მოძრაობს, ზოგიც კი რაიონებს შორის კურსირებს (მათ შორის, საბორნე მიმოსვლასთან ერთად სტეიტენ-აილენდზეც მიდის) – ავტობუსის საქარე მინაზე მარშრუტის სახელის წინ განთავსებული ასო ნიშნავს: M მანჰეტენისთვის, Bx ბრონქსისთვის და ა.შ . მგზავრობა იგივე თანხა – 2,75 დოლარი დაგიჯდებათ, გადახდა Metro Card ბარათით შეგიძლიათ ავტობუსის ასასვლელში ვალიდატორზე გატარებით ან მძღოლისთვის წვრილი ფულის გადაცემით.

ნიუ იორკში ასევე არსებობს ავტობუსი-ექსპრესი, რომელიც მანჰეტენიდან ქალაქის შორეულ რაიონებში მოძრაობს, იქ, სადაც მეტროს ჯერ არ მიუღწევია . ნაკლებად სავარაუდოა, რომ ტურისტებს დასჭირდეთ, მაგრამ თუ უეცრად დაგჭირდათ, გაითვალისწინეთ, რომ მგზავრობის ღირებულება 6 დოლარს შეადგენს.

მანჰეტენის სამხრეთისკენ მიმავალ ყველა ავტობუსს აქვს წინსართი downtown, ჩრდილოეთისკენ – uptown . ავტობუსებს, რომლებიც აღმოსავლეთიდან დასავლეთისკენ და პირიქით მოძრაობენ — crosstown . „ქროსთაუნი“ მანჰეტენის ჰორიზონტალურად გადაკვეთის ყველაზე მოსახერხებელი საშუალებაა, მაგალითად, ცენტრალური პარკიდან მეტროპოლიტენის მუზეუმამდე ან ამერიკის ბუნების ისტორიის მუზეუმამდე.

ტაქსი

ნიუ იორკში თითქმის 13,000 ტაქსი გადაადგილდება – მათი კანარის ყვითელი ფერი, რკინის ბალთა-მედალიონი ბრუკლინის ხიდის გამოსახულებით და „მაშუქა“ სახურავზე უკვე დიდი ხანია ქალაქის ერთ-ერთ სიმბოლოდ იქცა . ტაქსი შეგიძლიათ ქუჩაში გააჩეროთ (მხოლოდ იმ შემთხვევაში, თუ „მაშუქა“ ანთია), ტელეფონით თავად გამოიძახოთ ან სასტუმროს მისაღებში თხოვნით მიმართოთ (მომსახურებისთვის მიღებულია 1 აშშ დოლარის დატოვება) . ჩასხდომის საფასური – 2,50 აშშ დოლარია, თითოეული კილომეტრი 1,50 დოლარი დაგიჯდებათ . უმოკლეს მანძილზე მოგზაურობის მინიმალური ღირებულება  10 აშშ დოლარს შეადგენს, საშუალოდ კი 20-30 აშშ დოლარის გადახდა უნდა ივარაუდოთ . ღამით და პიკის საათებში ფიქსირებული გადასახადი ემატება . გზის ფასიან მონაკვეთებზე გავლის შემთხვევაში საფასურს მგზავრი იხდის . მძღოლს მთლიანი ღირებულების 15-20% უნდა დაუტოვოთ „ჩაისთვის“.

საბაგირო გზა რუზველტის კუნძულზე

ტრამვაისა და საბაგირო გზის უნიკალური ჰიბრიდი, უაჩქარებლად, მაგრამ მიდამოების განსაცვიფრებელი ხედებით, ტურისტებს რუზველტის კუნძულამდე ქვინსბოროს ხიდით (უფრო სწორად კი ხიდის ქვეშ) ჩაიყვანს . წითელი ვაგონები 1900 წლიდან ახდენენ მგზავრების ტრანსპორტირებას, ასე რომ რუზველტში სწორედ ასეთი გზით ჩამოსვლა – ისტორიისთვის პატივის მიგებისა და ულამაზესი პანორამით ტკბობის შესაძლებლობაა . საბაგირო ტრამვაის სადგური მანჰეტენში მდებარეობს 59-ე ქუჩისა და მე-2 ავენიუს კვეთაზე, მოგზაურობა მხოლოდ 4-5 წუთი გრძელდება და 2,75 აშშ დოლარი დაგიჯდებათ (შეგიძლიათ Metro Card ბარათით გადაიხადოთ) . კუნძულზე მგზავრობა Q102 ავტობუსის ხაზითა და F ხაზის მეტროთიც შეგიძლიათ, მაგრამ ეს სულაც არ არის რომანტიკული.

ბორანი სტეიტენ-აილენდზე

ბორანი, რომელიც 1905 წლიდან კურსირებს მანჰეტენსა და სტეიტენ-აილენდს შორის, შესანიშნავი საშუალებაა არა მხოლოდ კუნძულზე მოსახვედრად, არამედ თავისუფლების ქანდაკების, ნიუ იორკის ნავსაყუდელისა და ქვემო მანჰეტენის სულისშემკვრელი ხედების შესაფასებლად . დამატებითი სასიამოვნო მომენტი – საბორნე მიმოსვლა უფასოა . დღისით ბორანი ყოველ 30 წუთში გადის ბეტერი-პარკთან მდებარე პირსიდან და სტეიტენ-აილენდზე დაახლოებით 25 წუთში ჩადის . სტეიტენისკენ მიმავალ გზაზე, უმჯობესია მარცხენა მხარეს დასხდეთ, უკანა გზაზე – მარჯვენა მხარეს.

ტურისტული ავტობუსები

ღირშესანიშნაობების დათვალიერებას, პირობითად სუფთა ჰაერით სუნთქვას და უბრალოდ იმის გახსენებას, თუ საიდან მოდის ამერიკა,  ტურისტულ hop-on — hop-off ავტობუსებზე შეძლებთ, რომლებიც ნიუ-იორკში კლასიკური წითელი ორსართულიანი ავტობუსებითაა წარმოდგენილი . წრიული მარშრუტი დაუნთაუნში გადის და მოიცავს 20 გაჩერებას ირგვლივ არსებული ასზე მეტი ღირსშესანიშნაობის მახლობლად . მთელი მოგზაურობა 2,5 საათი გრძელდება . ავტობუსები 8:00 საათიდან 18:00 საათამდე მოძრაობენ . 24 საათიანი ბილეთის ღირებულება მოზრდილისთვის 54 დოლარს შეადგენს, 11 წლამდე ასაკის ბავშვისთვის – 44 დოლარს . ავტობუსებში ხელმისაწვდომია აუდიოგიდი რუსულ ენაზე.

კავშირი და Wi-Fi

როგორც ერთ-ერთი ყველაზე მოწინავე ქვეყნის არაოფიციალურ დედაქალაქს შეეფერება, ნიუ-იორკს ინტერნეტის უამრავი უფასო წვდომის  წერტილით შეუძლია დაიკვეხნოს . საზოგადოებრივი ადგილების უმეტეს ნაწილში Wi-Fi უფასოა . ნიო-იორკელებსა და ტურისტებს შორის პოპულარულია „Starbucks“-ის ყავის ქსელი, ნიუ-იორკის საჯარო ბიბლიოთეკის განყოფილებები, ცენტრალური პარკი და იუნიონ-სკვერი . უფასო Wi-Fi-ის ყველაზე მეტი წერტილია მანჰეტენის დაუნთაუნში: ბროდვეის დასაწყისი, უოლ სტრიტის აღმოსავლეთი ნაწილი და ყველა ქუჩა უოტერ სტრიტის სამხრეთ-აღმოსავლეთით ქალაქის სტუმრებს უსადენო კავშირს სთავაზობს . ნიუ-იორკის პარკებში სეირნობის დროსაც არ შეგექმნებათ კავშირის პრობლემა: 20 პარკზე მეტი უფასო Wi-Fi ფლობს.

ნიუ-იორკის სასტუმროებში კი Wi-Fi ყოველთვის არ არის უფასო . თუ თქვენთვის ამ საკითხს პრინციპული მნიშვნელობა აქვს, გირჩევთ იგი სასტუმროს დაჯავშნამდე დააზუსტოთ. 

Wi-Fi კავშირის წვდომის მიუხედავად,   ქსელში ჩართვა პლანშეტით შეგიძლიათ თუ სიმ-ბარათის ანალოგს შეიძენთ მობილური მოწყობილობებისთვის, რომელსაც data pass უწოდებენ . მომსახურების ტარიფები 5 აშშ დოლარიდან იწყება დღეში 250 მბ-ისთვის,  ხოლო 50 დოლარიდან თვეში – 5 გბ-ისთვის. 

ნიუ-იორკის სასტუმროები

ნიუ-იორკის სასტუმროს არჩევანი ბევრად დამოკიდებულია იმაზე, თუ რა მიზნით ეწვიეთ ქალაქს . თუ თანამედროვე ხელოვნების შესწავლა გსურთ ჩელსის გალერეებში, სწორედ აქ ცხოვრებაა გონივრული . „შოპოჰოლიკებს“ ვურჩევთ სოჰოში ან მიდთაუნში გაჩერდნენ . ვინც ღამის ცხოვრებით და წვეულებებითაა დაინტერესებული, „Meatpacking District“-ზე უკეთეს უბანს ვერ იპოვის . თუ ნიუ-იორკში მუზეუმების დასათვალიერებლად ან ბავშვებთან ერთად მიემგზავრებით, გირჩევთ უფრო მშვიდ ადგილას განთავსდეთ ცენტრალური პარკის მახლობლად, მაგალითად ზემო ვესტ-საიდში.

იაფი სასტუმროები ნიუ-იორკში

აუცილებელად გაითვალისწინეთ, რომ სასტუმროს ნომრის ღირებულება მანჰეტენში მსოფლიოში ერთ-ერთი ყველაზე მაღალია: 50 დოლარად ჰოსტელში ადგილს მიიღებთ,  100-150 აშშ დოლარი დაგიჯდებათ უბრალო ნომერი (სართულზე კეთილმოწყობილი), ხოლო 200 დოლარად მიიღებთ მხოლოდ პატარა, მინიმალურად კეთილმოწყობილ ოთახს . თუმცა, აქ არ არსებობს შეთავაზებების დეფიციტი: მანჰეტენზე ყველა წამყვანი ამერიკული და მსოფლიო ქსელების სასტუმროებია განთავსებული, მათ შორის Hilton, Hyatt, Marriott და Holiday Inn.

სასტუმროში განთავსების ხარჯების მნიშვნელოვნად დაზოგვას შეძლებთ თუ საცხოვრებელს  ბრუკლინში (იგი კარგად არის დაკავშირებული მანჰეტენთან სატრანსპორტო მიმოსვლით),  „Queens Long Island City“ უბანში (მანჰეტენის ხიდის მეორე მხარეს) ან ახლომდებარე ქალაქებში ნიუ-ჯერსში და ნიუარკში იპოვით – ფასები აქ 2-3-ჯერ დაბალია .

რა დავაგემოვნოთ

გარდა კლასიკური ამერიკული საკვებისა – ჰოთ-დოგი, კარტოფილი ფრი, ჰამბურგერი, ქათმის ფრთები და სტეიკი – აქ „დიდ ვაშლში“ მცხოვრები თითქმის 170 ეროვნების კერძები შეგიძლიათ დააგემოვნოთ . დავიწყოთ კლასიკიდან: ამერიკელების აზრით, ნიუ-იორკში, პირველ რიგში უნდა დავაგემოვნოთ ლეგენდარული ფუნთუშა „ბეიგლი“, მეორეც, არანაკლებ ლეგენდარული ჩიზქეიქი ნაღების ყველითა და ათქვეფილი კვერცხის გულით, და მესამე, სხვადასხვაგვარად შემწვარი ნამდვილი საქონლის ხორცის სტეიკები (თუმცა თავად ამერიკელები ირწმუნებიან, რომ სტეიკის მირთმევით უნდა დატკბეთ სადღაც მინდორში მობალახე ძროხების მახლობლად, მაგალითად, კანზასში) . ყველაზე „სწორ“ ბეიგლს ბრუკლინში  და მე-3 ავენიუზე მიდთაუნში აცხობენ, თუმცა ისინი დილით ადრე,  ღუმელიდან ახალ გამოღებული უნდა შეიძინოთ.  ჩიზქეიქი კი უნდა დააგემოვნოთ პირველ თემატურ „ჩიზქეიქურ“ კაფეში „ჯიუნიორს“ – სადაც ბევრი სახელგანთქმული პირიც კი დადის . რაც შეეხება სტეიკებს, მათი შეკვეთა ამერიკული სამზარეულოს ნებისმიერ რესტორანში შეგიძლიათ – სხვათა შორის, ეს არ არის იაფი სიამოვნება, ორ პერსონაზე ვახშამში 120-150 აშშ დოლარის გადახდა მოგიწევთ .

ასევე წაიკითხეთ:

• ადგილობრივი მაცხოვრებლების ვერსიით მსოფლიოს საუკეთესო ქალაქები დასახელდა
• 20 ადგილი, რომელთა მონახულება ღირს ნიუ-იორკში
• სიმშვიდე და მხოლოდ სიმშვიდე: აეროფობიასთან გამკლავების 7 ხერხი
• ფრენა გადაჯდომით კატარში: რით შეიძლება გაერთოთ, რა შეიძლება დააგემოვნოთ, როგორ უნდა მოიქცეთ

სტატიები ჩვენი ბლოგიდან