ფრენა გადაჯდომით კატარში: რით შეიძლება გაერთოთ, რა შეიძლება დააგემოვნოთ, როგორ უნდა მოიქცეთ

უამრავი მგზავრი Qatar Airways რეისებით მიფრინავს თბილისიდან აზიისა და არაბულ ქვეყნებში კატარის გავლით. ჩვენ დეტალური მასალა მოვამზადეთ თუ რა შეიძლება მოინახულოთ გადაჯდომით ხანგრძლივი მოგზაურობის დროს, რა წესები უნდა დაიცვათ, რათა თავიდან აიცილოთ კანონთან დაკავშირებული პრობლემები და რა ბონუსები შეიძლება მიიღოთ გადამზიდველისგან.

Qatar Airways მგზავრთა უპირატესობები

როდესაც რეისებს შორის 5-დან 12 საათამდე დრო გაქვთ, შეგიძლიათ  დოჰაში უფასო ექსკურსიის ვაუჩერი მიიღოთ.

33 ადამიანზე გათვლილი ავტობუსი დღეში 4-ჯერ მიემგზავრება. მონაწილეთა რეგისტრაცია  6:00 საათზე იწყება და, როგორც წესი, ადგილები სწრაფად ივსება. თქვენ Doha City Tour-ის დახლს უნდა მიმართოთ B დარბაზში, Mont Blanc და WH Smith  მაღაზიებს შორის.

ექსკურსიის ხანგრძლივობა 2 საათი და 45 წუთია, ტარდება ინგლისურ ენაზე. მარშრუტი  შემდეგ ღირსშესანიშნაობებს მოიცავს:

  • Katara Cultural Village;
  • Souq Waqif ბაზარი;
  • ისლამური ხელოვნების მუზეუმი.

გადაჯდომით ხანგრძლივი მოგზაურობის დროს ზოგიერთ მგზავრს  სასტუმროს უფასო ნომერს სთავაზობენ.

ამისათვის ორი კრიტერიუმის დაკმაყოფილებაა საჭირო:

  • დოჰაში ხანგრძლივი, 8-დან 24 საათამდე გადაჯდომა არის იძულებითი, ანუ არ არის ხელმისაწვდომი Qatar Airways ის რეისები, რომლებითაც თქვენ უფრო ადრე შეძლებდით ფრენას.
  • მარშრუტში არ შედის აბუ-დაბი, ბაჰრეინი, დუბაი, ქუვეითი, მასკატი, რას-ელ-ჰაიმი და შარჯა.

შემოგთავაზებენ თუ არა სასტუმროს ნომერს ასევე  მომსახურების კლასსა და ტარიფზეა დამოკიდებული. გირჩევთ ავიაკომპანიის წარმომადგენელთან წინასწარ დააზუსტოთ ინფორმაცია.

საჭიროა თუ არა ვიზა ქალაქში გასასვლელად

საქართველოს მოქალაქეებს ვიზა არ სჭირდებათ, ისინი აეროპორტში უფასოდ მიიღებენ შტამპს, რომელიც მათ ქვეყანაში 30 დღემდე დარჩენის უფლებას აძლევს. მოთხოვნები მინიმალურია: საზღვარგარეთის პასპორტის ქონა, რომლის მოქმედების ვადა 6 თვეზე მეტია და ბილეთი რეისზე კატარიდან.

იმ ქვეყნების მოქალაქეებს, რომლებთანაც კატარს არ აქვს გაფორმებული შეთანხმება უვიზო მიმოსვლის შესახებ, Qatar Airways რეისებზე ბილეთის შეძენის დროს უფასო ტრანზიტული ვიზის გაფორმება შეუძლიათ (თუ რეისებს შორის 5 საათზე მეტი დრო გაქვთ). განაცხადის გაკეთება ავიახაზების ვებ-გვერდზე ონლაინ შეგიძლიათ.

ღირს თუ არა ქალაქში გოგონების გასვლა თანხლების გარეშე?

ვინაიდან კატარი მუსულმანური ქვეყანაა, ეს კითხვა უამრავ ადამიანს აღელვებს. მაგრამ, რეალურად შეშფოთების არავითარი საფუძველი არ არსებობს: კატარი მსოფლიოს ხუთი ყველაზე უსაფრთხო ქვეყნის სიაში შედის, ტურისტებს, სქესის მიუხედავად,  შეუძლიათ არ იდარდონ, მაქსიმუმი, რასაც შეიძლება პროვოცირება გაუკეთოთ (მაგალითად, ქალაქის ცენტრში მოკლე შორტებით გამოჩნდეთ) არის – შენიშვნა. თუ არ გსურთ საზოგადოებრივი ტრანსპორტის გამოყენება, გამოიძახეთ ტაქსი, რომელიც აქ შედარებით იაფია.

ტრანსპორტი დოჰაში

ტურისტებისთვის დედაქალაქში გადაადგილების ყველაზე მოსახერხებელ საშუალებას ტაქსი წარმოადგენს (ადგილობრივი მოსახლეობა პირად ავტომობილებს ანიჭებს უპირატესობას). ღირებულება: €0.9 პლუს €0.3 ერთ კილომეტრზე. ტელეფონით შეკვეთისას, დამატებითი საფასურია €0.9.

ალტერნატიული ვარიანტია ავტომობილის დაქირავება (დღეში 15 ევროდან). დაგჭირდებათ საკრედიტო ბარათი, პასპორტის ასლი და ეროვნული ან საერთაშორისო სტანდარტის მართვის მოწმობა. უმჯობესია დაიცვათ მოძრაობის წესები, რადგან ჯარიმები ძალიან მაღალია: მაგალითად, საჭესთან მობილურით საუბარი ჯარიმდება €45, წითელ შუქზე გავლა კი – €660.

საზოგადოებრივი ტრანსპორტი მხოლოდ ავტობუსებითაა წარმოდგენილი – სუფთა, ახალი, კონდიცირებით. ქალაქის ფარგლებში მოგზაურობის საფასურია €0.7-დან € 2-მდე, მანძილის მიხედვით.

Hamad International აეროპორტიდან ცენტრში შეგიძლიათ ტაქსით 30 წუთში იმგზავროთ. მგზავრობის სტანდარტული  ღირებულებაა: €6 პლუს €0.3 ერთ კილომეტრზე 5:00 საათიდან 21:00 საათამდე (დანარჩენ დროს – €0.4  ერთ კილომეტრზე). მეორე ვარიანტია  ქალაქის ერთ-ერთი ავტობუსი, რომელიც აეროპორტს  დოჰას სხვადასხვა უბანთან აკავშირებს. მგზავრობის საფასურის გადახდა Karwa Smartcard მეშვეობით ხორციელდება, რომლის შეძენა  Mowasalat საინფორმაციო დახლთანაა შესაძლებელი ბარგის მიღების ზონაში ან მძღოლისგან. €2.3 ღირს ბარათი, რომელიც ქალაქის ფარგლებში 2-ჯერ მგზავრობის საშუალებას მოგცემთ 24 საათის განმავლობაში, ხოლო ქალაქის ავტობუსებზე 24 საათის განმავლობაში შეუზღუდავი სამგზავრო ბილეთის ღირებულებაა €4.5. ბარათი ორჯერ უნდა გაატაროთ აპარატთან დადასტურებისთვის: ავტობუსში ჩასხდომის და ჩამოსვლის დროს.

ვალუტა და მისი გაცვლა

სახელმწიფო ვალუტაა – კატარული რიალი, რომლის საორიენტაციო კურსი 08.11.18 წ. მდგომარეობით შეადგენს: 100 QAR = €24. აეროპორტში ან ბანკის ნებისმიერ ფილიალში, საჭიროების შემთხვევაში, შეგიძლიათ თქვენი ბარათიდან რიალები გაანაღდოთ  (ბარათები ფართოდ გამოიყენება, ნაღდი ფული ფაქტიურად მხოლოდ ბაზარზე დაგჭირდებათ). ბანკომატებში ჩვეულებრივ  ორი ენაა ხელმისაწვდომი: არაბული და ინგლისური.

რიალების შეძენა შეგიძლიათ ბანკებში, ვალუტის გადამცვლელ პუნქტებში აეროპორტსა და ქალაქის ცენტრში, ზოგიერთ სასტუმროში. გაითვალისწინეთ, რომ ბანკები, როგორც წესი,  მხოლოდ სამუშაო დღეებში მუშაობენ, ისინი ადრე იწყებენ მუშაობას (7:30-8:30) და სადილობის ხანგრძლივი შესვენება აქვთ. კატარში დასვენების დღეებია პარასკევი და შაბათი, სამუშაო კვირა კი კვირას იწყება.

რა შეიძლება მოინახულოთ დოჰაში

თუ დედაქალაქში მხოლოდ ერთი დღით იმყოფებით, ქალაქის დათვალიერების ოპტიმალური ვარიანტია ორგანიზებული ექსკურსია ან მანქანის დაქირავება მძღოლთან ერთად. გთავაზობთ ძირითადი ღირსშესანიშნაობების სიას, რომლებსაც აუცილებლად უნდა ეწვიოთ:

  • სანაპირო. 7 კილომეტრი სიგრძის საქვეითო ზონა სპარსეთის ყურის გასწვრივაა გადაჭიმული, აქედან კარგად ჩანს ცათამბრჯენები, ისლამური ხელოვნების მუზეუმი და ქალაქის უამრავი სხვა საინტერესო შენობა.

  • Pearl-Qatar – დაახლოებით 4 მილიონი მ² ფართობის  ხელოვნური კუნძული. აქ  უამრავი ძვირადღირებული ბუტიკი (Roberto Cavalli, Alexander McQueen, Giorgio Armani, Kenzo, Balenciaga და სხვ.) და რესტორანი მდებარეობს, სადაც იტალიური, ლიბანური, ფრანგული, ამერიკული, იაპონური თუ სხვა სამზარეულოა წარმოდგენილი.

  • Katara Cultural Village (West Bay Lagoon area) – ეთნო-სოფელი, რომლის ტერიტორიაზე  თეატრები, კინოთეატრები და გალერეებია განთავსებული. აქ კატარელი მხატვრების ნამუშევრებია  წარმოდგენილი.  მუსიკოსები და საცეკვაო კოლექტივები საღამოებს აწყობენ, ზოგჯერ კი ტრადიციული ხელობის მასტერ-კლასებიც იმართება. შესვლა უფასოა, კომპლექსის ტერიტორია 24 საათის განმავლობაშია ღია.

  • ისლამური ხელოვნების მუზეუმი (Corniche). მის კედლებში 14 საუკუნის განმავლობაში შექმნილი შედევრები ინახება: ნახატები, კერამიკა, ხელნაწერები, ქსოვილები. აქ ხშირად დროებითი გამოფენები ეწყობა, რომელთა მოსანახულებლად ბილეთი უნდა შეიძინოთ. მუდმივ გამოფენაზე შესვლა უფასოა. მუზეუმი ღიაა 8:30 საათიდან 19:00 საათამდე (პარასკევს 14:00 საათიდან 19:00 საათამდე).

  • თანამედროვე ხელოვნების მუზეუმი Mathaf. კოლექციაში დაახლოებით 6000 საგანია, რომელიც  ისლამური ხელოვნების განვითარების ტენდენციებს ასახავს 1840 წლიდან დღემდე. მუზეუმის სამუშაო საათებია 9:00-დან 19:00 საათამდე (პარასკევს 13:30 საათიდან 19:00 საათამდე). შესვლა უფასოა.

მათთვის, ვინც დოჰას რამდენიმე დღით ეწვია და მზად არის გასცდეს დედაქალაქის ფარგლებს, ვურჩევთ ეწვიონ:

  • Al Zubarah – XVIII საუკუნის აღდგენილი ციხე, რომელიც  იუნესკოს მსოფლიო მემკვიდრეობის ძეგლთა სიაში შედის. დედაქალაქიდან დაშორებულია 106 კილომეტრით, მდებარეობს ქვეყნის ჩრდილო-დასავლეთ სანაპიროზე. ოდესღაც ეს დასახლება სპარსეთის ყურის ერთ-ერთ უმნიშვნელოვანეს   სანაოსნო და სავაჭრო ცენტრად ითვლებოდა.

  • Khor Al Adaid – ბუნების ნაკრძალი უნიკალური ეკოსისტემით დოჰადან 60 კილომეტრში. საინტერესოა იმით, რომ ეს არის ერთ-ერთი ადგილი დედამიწაზე, სადაც ზღვა უდაბნოს ხვდება. ამ ადგილის მოსანახულებლად, თქვენ ქვიშის დიუნები უნდა გადალახოთ.

  • უდაბნო. თუ დრო შეზღუდული გაქვთ, შეგიძლიათ ერთ-ერთ ექსპრეს-ტურზე ჩაეწეროთ, რომელიც  აეროპორტიდან დღეში ორჯერ გადის: 9:00 და 14:00 საათზე. ექსკურსიის ხანგრძლივობა 2.5 საათია, ღირებულება – 250 QAR (€57) ერთი ადამიანზე. შეგიძლიათ ადგილი ტურის დაწყებამდე საათნახევრით ადრე დაჯავშნოთ Discover Qatar დახლთან B დარბაზში.  ხოლო 1250 (€285) კატარულ რიალად ქვიშის დიუნებში პრივატულ საფარი-ტურს შემოგთავაზებენ დედაქალის გარშემო.
  • Dahl Al Misfir მღვიმე 40 მეტრის სიღრმეზე, რომლის კედლები სუსტ ფოსფორესცენტულ ნათებას ასხივებს. დოჰადან ავტომობილით მგზავრობის ხანგრძლივობა 45 წუთია.

სად შეიძლება ბანაობა

დოჰაში ზღვა არის, მაგრამ, მაგრამ სულ რამდენიმე ხელმისაწვდომი პლაჟია, რადგან უმრავლესობა სასტუმროებს ეკუთვნის. ერთ-ერთი ყველაზე პოპულარულია Katara Beach, რომელიც Katara Cultural Village-ის ტერიტორიაზე იმყოფება. 25 კატარულ რიალად (€6) ნებისმიერ მსურველს შეუძლია ესტუმროს, 16 წლამდე ასაკის ბავშვებისთვის შესვლა უფასოა. პლაჟი 10:30 საათიდან 22:00 საათამდეა ღია, მზის ჩასვლის შემდეგ ბანაობა აკრძალულია. ქალებს შორტები და მაისური უნდა ეცვათ, მამაკაცებსაც ასევე შორტები უნდა ეცვათ, საცურაო ტრუსით და ბიკინით ბანაობა აკრძალულია. ხელმისაწვდომია წყლის გასართობი საშუალებები: გონდოლებით, კაიკებით, „ბანანით“ და კატამარანით გასეირნება, წყლის თხილამურები, ვეიკბორდინგი, პარასეილინგი და სხვ. აქვეა  სათამაშო ზონა ბავშვებისთვის.

ზოგიერთი სასტუმრო თავის პლაჟებს და აუზებს სთავაზობს მათ, ვინც არ არიან მათი სტუმრები. მაგალითად, Doha Marriott Hotel-ში თქვენ  დღეში 139 QAR (€32) გადაიხდით, Crowne Plaza Doha-ში – 150-200 QAR (€35-45), InterContinental Doha The City-ში – 150-250 QAR (€35-57). ფასში შეიძლება შედიოდეს სპორტული დარბაზითა და საუნით სარგებლობა, კოქტეილები და საკვებიც კი – დეტალებს შეგიძლიათ ოფიციალურ ვებ-გვერდებზე გაეცნოთ.

რა შეიძლება დააგემოვნოთ დოჰაში

ადგილობრივი სამზარეულო ინდური, ირანული, სირიული, პალესტინური, ჩრდილო-აფრიკული სამზარეულოების ელემენტებს შეიცავს – თქვენ აუცილებლად იპოვით რაიმე საინტერესოს. გთავაზობთ გურმანებისთვის საინტერესო რამდენიმე  კერძს:

  • machboos – ცხარე ბრინჯი ზღვის პროდუქტებით ან ხორცით;
  • hummus – მუხუდოსგან დამზადებული კერძი სეზამის მარცვლების პასტის (ტაჰინი), ზეითუნის ზეთისა და ლიმონის წვენის დამატებით;
  • ghuzi – შემწვარი ბატკანი ბრინჯითა და თხილით;
  • motabel – ბადრიჯნის კერძი ნივრითა და ტაჰინით;
  • birani – ბრინჯი ქათმის ან ბატკნის ხორცით.

დესერტად ადგილობრივ ხილს, ჰალვას ან ფენოვან ღვეზელს – Umm Ali მოგართმევენ.

სად შეიძლება მიირთვათ დოჰაში

თუ ბიუჯეტი შეზღუდული გაქვთ, ქუჩის  ჯიხურები დაგეხმარებათ: სენდვიჩები, შაურმა და ფალაფელი. მაგალითად, Al Adhamiyah Iraqi Restaurant-ში ბაზარზე Souq Waqif. ქაბაბის ღირებულებაა 9 ევროდან, ხოლო სალათის – 4 ევროდან.

დოჰაში ასევე საერთაშორისო ქსელების დაწესებულებებსაც იხილავთ: McDonald’s, KFC, Burger King, Pizza Hut და სხვ. ისინი სავაჭრო ცენტრებშია თავმოყრილი Doha’s C-Ring-სა და Salwa Road-ის კვეთაში.

დოჰას მოსახლეობის დიდი უმრავლესობა ექსპატია, სწორედ ამ მიზეზითაა აქ წარმოდგენილი  მრავალი ქვეყნის ეროვნული სამზარეულო. მაგალითად, Yee Hwa (Al-Kinana Street, Doha Downtown Hotel Apartments) შეგიძლიათ დააგემოვნოთ იაპონური და კორეული დელიკატესები, Yum Yum (Al Ghanim Street, K108 Hotel) ფრანგულ სამზარეულოს, ხოლო New York Steakhouse (Al Wahda Street, West Bay City Center) – ამერიკულ სამზარეულოს შემოგთავაზებენ.

ზედა ეშელონების დაწესებულებებს შორის აღსანიშნავია Market by Jean-Georges (W Hotel, West Bay), რომლის შეფმზარეული სამი მიშლენის ვარსკვლავის მფლობელია, და ასევე Gordon Ramsay (St. Regis, West Bay), რომელმაც 2013 წელს „საუკეთესო რომანტიკული რესტორნის“ წოდება მიიღო.

ალკოჰოლი

ალკოჰოლის შეძენა ტურისტებს შეუძლიათ მხოლოდ ერთ-ერთ ლიცენზირებულ კლუბში, სასტუმროსა თუ ბარში. ეს ძვირადღირებული სიამოვნებაა – ლუდის ერთი კათხის ფასი 10 ევროდან იწყება. თან უნდა იქონიოთ პირადობის დამადასტურებელი მოწმობა ფოტოთი, ვინაიდან ალკოჰოლის შეძენა მხოლოდ 21 წელზე მეტი ასაკის ადამიანებს შეუძლიათ.

გთავაზობთ დედაქალის რამდენიმე პოპულარულ ბარს:

  • Trader Vic’s (Hilton Hotel Westbay). კოქტეილებისა და ღვინოს გარდა აქ მსუბუქ (თაქო, შემწვარი კრევეტები, ქათმის მწვადი,  სენდვიჩები, ბურგერები, სალათები) და მთავარ კერძებსაც (სტეიკები, ზღვის პროდუქტები და თევზი, ბატკნის ხორცი) შემოგთავაზებენ. ფანჯრებიდან ზღვის ხედი იშლება, ხოლო გვერდით მდებარე ნავმისადგომზე – კუნძული Pearl-Qatar.
  • Irish Harp (1 Al Corniche St). მენიუშია:  კერძები ლუდთან (მაგალითად, ქათმის ფრთები €17 ან ხახვის რგოლები €9), ბურგერები €19 და ძირითადი კერძები 15 ევროდან. აქ რეგულარულად იმართება წვეულებები, მანდილოსნებისთვის შესვლა ჩვეულებრივ უფასოა.

  • Crystal Lounge (W Doha Hotel & Residences, Diplomatic St). ეს არის ღამის კლუბი, სადაც დიჯეები უკრავენ და თემატური წვეულებები იმართება.  ყოველ კვირას ქალბატონებს შეუზღუდავი რაოდენობის კოქტეილებს სთავაზობენ.

სუპერმარკეტებში ალკოჰოლური სასმელები არ იყიდება, აკრძალულია მათი ქუჩაში მიღება და არაფხიზელ მდგომარეობაში ქუჩაში ყოფნა (დამრღვევების წინააღმდეგ მკაცრი სანქციებია დაწესებული,  დეპორტაციამდეც კი). ასევე აკრძალულია ქვეყანაში ალკოჰოლური სასმელების შეტანა, თუ დოჰაში ტრანზიტულად მგზავრობთ, ალკოჰოლური სასმელები აეროპორტის ტერიტორიაზე, ბარგის სახით უნდა დატოვოთ.

როგორ უნდა ჩაიცვათ საზოგადოებრივ ადგილებში

სახელმწიფო რელიგია ისლამია, მოსახლეობის 77%  ისლამის აღმსარებელია. ზედმეტად ღია ტანსაცმლით შემოსილ ტურისტებს ქუჩაში არავინ შეაწუხებს, მაგრამ ადგილობრივი ტრადიციების პატივისცემის მიზნით უმჯობესია უფრო მოკრძალებულად ჩაიცვათ: ქალბატონებისთვის რეკომენდებულია – გრძელი ქვედაბოლოები ან კაბები ღრმა დეკოლტეს გარეშე, მამაკაცებისთვის – შარვალი და პერანგი. ზოგიერთ დაწესებულებაში დრეს-კოდი მოქმედებს და შესაძლებელია არ შეგიშვან შორტებით, მაისურითა თუ სანდლებით.

თუ თქვენ აკვაპარკს ან საცუარო აუზს გადაწყვიტეთ ესტუმროთ, უმჯობესია საცურაო კოსტიუმიც დახურული შეარჩიოთ.

რა ენაზე შეიძლება ისაუბროთ

ოფიციალური ენა არაბულია, მაგრამ დედაქალაქის ბევრი მაცხოვრებელი  ინგლისურად საუბრობს. მომსახურების სფეროში ძირითადად უცხოელები მუშაოებენ, ინდოეთიდან და სხვა ქვეყნებიდან ჩამოსულები, რომლებსაც ინგლისურად საუბარი მოეთხოვებათ.

სად შეიძლება  წახვიდეთ საყიდლებზე

დოჰაში მდებარეობს კატარის ერთ-ერთი ყველაზე მსხვილი სავაჭრო ცენტრი – City Centre Mall (4th Street). ის აეროპორტიდან 25 წუთის სავალ მანძილზე იმყოფება, ღიაა 10:00-დან 22:00 საათამდე (24:00). აქ წარმოდგენილია პოპულარული საერთაშორისო და ადგილობრივი ბრენდები, სულ 350 მაღაზია 5 სართულზე. აქ ასევე მდებარეობს კინოთეატრი, ბოულინგი, საციგურაო მოედანი, 38 რესტორანი, ბავშვთა გასართობი ცენტრი, ბანკების ფილიალები და ვალუტის გადამცვლელი პუნქტები, სილამაზის სალონები.

დოჰას ყველაზე ცნობილი ბაზარია Souq Waqif (Al-Souq და Grand Hamad ქუჩებს შორის), სადაც ტრადიციული ტანსაცმლით, თავსაბურავით და სამკაულით, სუნამოთი და სანელებლებით ვაჭრობენ. მის ტერიტორიაზე ასევე განთავსებულია ავთენტური რესტორნები, სადაც იაფად და გემრიელად შეგიძლიათ მიირთვათ.

პრაქტიკული რჩევები

თან წაიღეთ სიცხის დასაწევი საშუალებები. ჰაერის ტემპერატურა მაღალია, ამიტომ აეროპორტში და სხვა შენობებში კონდიციონერები გამოიყენება.  ტემპერატურის ამგვარმა ცვალებადობამ შესაძლებელია გაციების პროვოცირება გამოიწვიოს.

თუ კატარში  რამადანის წმინდა თვის დროს იმყოფებით (2019 წელს: 6 მაისიდან 4 ივნისის ჩათვლით), თავი შეიკავეთ მზის ჩასვლამდე საზოგადოებრივ ადგილებში საკვებისა და სასმელის მიღებისგან, ასევე  მოწევისგან.

ძვირადღირებულ რესტორნებში, მომსახურების საფასური ანგარიშში შედის, ამიტომ არ არის აუცილებელი ზედმეტის დატოვება, მაგრამ სხვა შემთხვევაში, თუკი მომსახურება მოგეწონათ, შეგიძლიათ თანხა 5-10%-ით გაზარდოთ.

არ გადაიღოთ ადგილობრივი მოსახლეობის (განსაკუთრებით ქალების) სურათები  მათი ნებართვის გარეშე. ფრთხილად იყავით თუ სამხედრო ობიექტებსა და აეროპორტის შენობებს სამახსოვროდ უღებთ, შეიძლება პრობლემები გქონდეთ პოლიციასთან.

დენის ჩამრთველები კატარში ძირითადად ბრიტანული სტანდარტისაა (სამი საშტეფსელო ბუდით), ბევრ სასტუმროს გადამყვანი აქვს.

შეგიძლიათ ონკანის წყალი დალიოთ, მაგრამ რეკომენდებულია ბოთლის წყლის დალევა  – ის უფრო გემრიელია.

პირდაპირი ფრენები Tbilisi-დან Doha-მდე

გაფრენის თარიღი დაბრუნების თარიღი ავიაკომპანია ბილეთების მოძებნა

13.02.2019

20.02.2019

ფასი 961

წაიკითხეთ მსგავსი სტატია:

ჩემი ოცნების ფრენა გადაჯდომით: მსოფლიოს 7 ყველაზე საინტერესო აეროპორტი

sastumroebi
Posted in ბლოგი and tagged , , , , , .

მალხაზ კევლიშვილი