10 მიზეზი შვეიცარიის შესაყვარებლად

საიმედო ბანკების, ზუსტი საათების, გემრიელი ყველისა და შოკოლადის ქვეყანა. მსოფლიოს ერთერთი ყველაზე ძვირადღირებული ქვეყანა. ოთხი სახელმწიფო ენა. სამი ეროვნების ხალხთა კულტურის შერწყმა: იტალიელების, ფრანგებისა და გერმანელების. უნიკალური ტერიტორია, სადაც თავბრუდამხვევი მთის მწვერვალები, უკიდეგანო მდელოები, გამჭვირვალე ტბები, ჩანჩქერები და შუასაუკუნეების ქალაქებია. ეს ყველაფერი შვეიცარიაა.

მსხვილი კურორტებისა და ძირითადი ღირსშესანიშნაობების შესახებ ბევრი დაწერილა, ამიტომ ჩვენ სხვა გზას მივყევით – შევადგინეთ სია 10 პუნქტით, რომელთა შესრულებით, თქვენ ეს ქვეყანა გარანტირებულად შეგიყვარდებათ. მაშ ასე, დავიწყოთ!

1. „შოკოლადის მატარებლით“ გაისეირნეთ

იგი მონტრესა და ქალაქ ბროკს შორის კურსირებს, სადაც მდებარეობს დღეს მოქმედი შვეიცარიის შოკოლადის ქარხანათაგან უძველესი – Cailler-Nestlé. მატარებლის შემადგენლობაში შედის 1915 წლის ვინტაჟური ვაგონები, რომელთა მგზავრებს გზად ყავით, კრუასანებითა და ყველის ფონდიუთი უმასპინძლდებიან.

დანიშნულების პუნქტში მოხვედრისას, თქვენ ქარხანაში ექსკურსიაზე გაემგზავრებით, გაეცნობით ბრენდის ისტორიასა და შოკოლადის წარმოების ტექნოლოგიას, შემდეგ კი ამ ოსტატობას შეისწავლით ბრენდის საუკეთესო შოკოლადის მწარმოებლების ხელმძღვანელობით. ხელნაკეთი ტკბილეული შესანიშნავი სუვენირი იქნება მეგობრებისა და ახლობლებისთვის!

როდის? მაისის დასაწყისიდან ოქტომბრის შუა რიცხვებამდე.

რა ღირს? მატარებლის ბილეთის საფასური 90 ევროა, ვიზიტი შოკოლადის ქარხანაში და შოკოლადის დამზადების მასტერ-კლასი – 10-დან 70 ევრომდე.

როგორ ჩავიდეთ? ბერნიდან მონტრეში ჩასვლა მატარებლით შეგიძლიათ, ლოზანაში გადაჯდომით. მგზავრობის ხანგრძლივობა დაახლოებით საათნახევარია.

2. ეწვიეთ იმ მხატვრის მუზეუმს, რომელმაც ფილმი „უცხოს“ სახეები შექმნა

იგი მდებარეობს შუასაუკუნეების პატარა ქალაქ გრიუიერში, იმ სახლში, სადაც ჰანს გიგერი ცხოვრობდა და მოღვაწეობდა. უცხოპლანეტელი ურჩხულების ფიგურებით მორთულია არა მხოლოდ მუზეუმი, არამედ მის გვერდით მდებარე პოპულარული კაფე. ასევე გირჩევთ ეწვიოთ ციხე-სიმაგრეს (ერთ-ერთი ყველაზე ცნობილი ქვეყანაში) და ნებისმიერ რესტორანს ამ ოლქში, სადაც ადგილობრივი ყველის გრიუიერის ფონდიუს მოგართმევენ.

როდის? მთელი წლის განმავლობაში.

რა ღირს? გიგერის ციხე-სიმაგრესა და მუზეუმში შესასვლელი ერთიანი ბილეთის საფასური 18 ევროა.

როგორ ჩავიდეთ? ყველაზე მოსახერხებელია – ავტომობილით მონტრედან, ბერნიდან ან ციურიხიდან. ძველ ქალაქში ავტომობილით შესვლა არ არის დაშვებული, მაგრამ იქვე, გორაკის ძირში, უფასო სადგომია. ციურიხთან და ჟენევასთან პირდაპირი სარკინიგზო მიმოსვლა არ არის.

3. ეწვიეთ ავენტიკუმს – „რომაული შვეიცარიის” დედაქალაქს

დაახლოებით 20 000 მოსახლე, აყვავებული ვაჭრობა, მდიდრული სახლები, რომლებიც საიმედოდაა დაცული ხუთ კილომეტრიანი კედლითა და 70 კოშკით – ეს იყო ჰელვეციის ყველაზე მსხვილი ქალაქი ავენტიკუმი (ამჟამად ვოს კანტონში მდებარე ავანში) დაახლოებით 2000 წლის წინ.

დღემდე შემორჩენილია ქალაქის აღმოსავლეთ კარიბჭე, ერთ-ერთი კოშკი, აბანოსა და ტაძრის ნანგრევები, სიგონიერის სამლოცველო და ამფითეატრი, რომელიც 16 000-მდე ადამიანს იტევს (აქ პერიოდულად ოპერის მომღერლები ასრულებენ პარტიებს). რომის მუზეუმში დაცულია ორიგინალი მოზაიკის ფრაგმენტები, იმპერატორ მარკუს ავრელიუსის ოქროს ბიუსტის ასლი და ავენტიკუმის ტერიტორიის გათხრების დროს ნაპოვნი საყოფაცხოვრებო ნივთები.

მრავალი წლით უკან დაბრუნებაში დაგეხმარებათ 3D-შოუ «The Great History of Aventicum». კოსტიუმები, მსახიობების თამაში, განათება, სპეცეფექტები – ეს ყველაფერი დაგავიწყებთ თუ რომელი საუკუნეა დღეს.

როდის? მთელი წლის განმავლობაში.

რა ღირს? ექსკურსია უძველეს ქალაქში რომის მუზეუმის მონახულებით დაახლოებით 55 ევრო ღირს ჯგუფისთვის, ბილეთი 3D-წარმოდგენაზე – 25 ევროდან 60 ევრომდე.

როგორ ჩავიდეთ? ციურიხიდან მატარებლით მგზავრობას ორი-სამი საათი დასჭირდება მინიმუმ ერთი გადაჯდომით. სხვა ქალაქებიდან (მაგალითად, ფრიბურიდან) ავტობუსით შეგიძლიათ ჩამოსვლა.

4. ადით „ევროპის მწვერვალზე“ – იუნგფრაუიოხზე

თუ ინტერლაკენში ან მის შემოგარენში აღმოჩნდით, არ გამოტოვოთ შესაძლებლობა გაისეირნოთ მატარებლით, რომლის ბოლო გაჩერება ევროპის ყველაზე მაღალმთიანი სადგურია (ზღვის დონიდან 3454 მეტრი). მსოფლიოში სხვაგან არსად არის ადგილი, რომელიც მსგავს სიმაღლეზე მდებარეობს, სადაც მიღწევა ალპინისტური აღჭურვილობის გარეშეც შესაძლებელია.

გზა 1912 წელს გაიხსნა, სამშენებლო სამუშაოები 16 წელი მიმდინარეობდა! გვირაბების გავლით, რომელთაგან ერთ-ერთი მთა აიგერში გადის, ძნელი წარმოსადგენია, თუ რამდენად მასშტაბური იყო ეს პროექტი იმ დროს.

მაშინაც კი, თუ იუნგფრაუზე ასვლა ზაფხულში გადაწყვიტეთ, თან იქონიეთ თბილი ტანსაცმელი და ფეხსაცმელი. სიმაღლეთა სხვაობა დიდია, ამიტომ ზემოთ ტემპერატურა გაცილებით დაბალია, ვიდრე ინტერლაკენში. აუცილებლად წარმოიღეთ სათვალე – თოვლის ზედაპირიდან არეკლილი მზის სხივები თვალს ჭრის და უარყოფითად მოქმედებს თვალის ბადურაზე.

იუნგფრაუიოხ

კენწეროზე მდებარეობს პატარა მუზეუმი, რომლის ექსპოზიცია რკინიგზის მშენებლობის პროცესს ეძღვნება, გასული საუკუნის 30-იან წლებში აგებული ყინულის სასახლე ყინულის ქანდაკებებით და ალეჩის მყინვარი, სადაც ციგაობა შეგიძლიათ. თუ ამინდში არ გაგიმართლათ და ღრუბლებმა ირგვლივ არსებული სილამაზე დამალეს (რაც ხშირად ხდება), ეწვიეთ Jungfrau Panorama დარბაზს და ისიამოვნეთ ვიდეოზე გადაღებული პეიზაჟებით.

როდის? მთელი წლის განმავლობაში.

რა ღირს? ინტერლაკენიდან იუნგფრაუმდე მგზავრობა დაახლოებით 200 ევრო დაგიჯდებათ (ორი გზა, მეორე კლასი).

როგორ ჩავიდეთ? გზაში დაახლოებით ორ საათს გაატარებთ, ამიტომ, რაც შეიძლება ადრე უნდა გაემგზავროთ. ჯერ მატარებლით უნდა იმგზავროთ ინტერლაკენიდან Lauterbrunnen-ში, შემდეგ კი Kleine Scheidegg-ში, იქიდან კი იუნგფრაუში. გადაჯდომები ხანმოკლეა, დაახლოებით 10 წუთი. არ შეგეშინდეთ, რომ მატარებლები აგერევათ ან ვერ მოასწრებთ – თითოეულ სადგურზე არიან თანამშრომლები, რომლებიც სიტუაციას აკონტროლებენ და მგზავრებს ეხმარებიან.

5. ღამე ნამდვილ ციხე-სიმაგრეში გაათიეთ

ოცნებობდით, რომ თავი სამეფო პირად გეგრძნოთ? ლუცერნში მდებარე სასტუმრო Hotel Chateau Gutsch-ში, ზღაპარი რეალობად იქცევა. ეს კერძო რეზიდენცია 1898 წელს აშენდა ცნობილი ბავარიული ნოიშვანშტაინის ნიმუშის მიხედვით. სასტუმრო 490 მეტრის სიმაღლის გორაკზე დგას, რომლის წყალობითაც ფანჯრიდან ლუცერნის ტბისა და მთების დაუვიწყარი ხედები იშლება. მრავალი გამოცდილი მოგზაური, რომლებმაც მთელი ევროპა მოიარეს, ამ სასტუმროს ყველაზე რომანტიკულ და მოხერხებულად განლაგებულ ადგილად მიიჩნევენ.

როდის? მთელი წლის განმავლობაში.

რა ღირს? სეზონზე ნომერი Superior საუზმით დღეში დაახლოებით 260 ევრო დაგიჯდებათ.

როგორ ჩავიდეთ? ციურიხიდან ლუცერნამდე ავტომობილით, ავტობუსით ან მატარებლით დაახლოებით ერთ საათში ჩახვალთ. ჟენევიდან რკინიგზით მგზავრობას დაახლოებით სამი საათი სჭირდება.

6. დატკბით ევროპის ყველაზე დიდი ჩანჩქერით

რაინის ჩანჩქერი შაფჰაუზენის მახლობლად მდებარეობს. წყლის დონე დამოკიდებულია იმაზე, თუ რამდენად თოვლიანი იყო ზამთარი (ზოგჯერ გაზაფხულზე მიმდებარე დასახლებები ოდნავ იტბორება), მაგრამ ეს სანახაობა ნებისმიერ შემთხვევაში დაუვიწყარია.

ჩანჩქერის ზემოთ სათვალთვალო მოედნებია, რომლებიც საშუალებას გაძლევთ მაქსიმალურად მიუახლოვდეთ ბუნების ამ ძლიერ ქმნილებას, საკუთარი თავის საფრთხეში ჩაგდების გარეშე. გვერდით მდებარეობს საბავშვო მოედნები, საფეხმავლო ბილიკები, ისტორიული მუზეუმი. შეგიძლიათ ჩანჩქერის გასწვრივ ნავით გაისეირნოთ.

როდის? მთელი წლის განმავლობაში.

რა ღირს? ტერიტორიაზე შესვლა უფასოდ ან 5 ევროდ შეგიძლიათ (ორი შესასვლელია). ნავით სეირნობა 2 ევროდან 40 ევრომდე ღირს (დამოკიდებულია ხანგრძლივობაზე).

როგორ ჩავიდეთ? ციურიხიდან Neuhausen Rheinfall-ის სადგურამდე პირდაპირი მატარებელი მოძრაობს (გზის ხანგრძლივობა დაახლოებით ერთი საათია). შაფჰაუზენიდან და ნოიჰაუზენიდან ჩანჩქერამდე პატარა სასეირნო ორთქმავლით შეგიძლიათ მოხვდეთ.

7. იბანავეთ ღია აუზში დათოვლილი მწვერვალების ხედით

ამისათვის, თქვენ უნდა იყოთ ენეტბიურგენში მდებარე სასტუმრო Villa Honegg-ის სტუმარი. მისი მფლობელები ირწმუნებიან, რომ ხედი მათი აუზიდან (ისევე როგორც შალეს ტერასიდან) მსოფლიოში ყველაზე ლამაზია. შეკამათება ძნელია – აუზში ბანაობისას თქვენ ლუცერნის ტბისა და მის უკან აღმართული მთების ხედებით დატკბებით. შენობა 1905 წელს აშენდა, 2011 წელს კი მას რეკონსტრუქცია ჩაუტარდა და სტუმრებისთვის გაიხსნა.

როდის? მთელი წლის განმავლობაში (არ ინერვიულოთ, აუზის წყალი თბება).

რა ღირს? სეზონზე ორადგილიან ნომერს ტბის ხედით 680-1400 ევროდ იქირავებთ.

როგორ ჩავიდეთ? ყველაზე მოსახერხებელია – ავტომობილით. ციურიხის აეროპორტიდან მგზავრობას დაახლოებით ერთი საათი სჭირდება, ჟენევის აეროპორტიდან – დაახლოებით სამი საათი, ბერნის რკინიგზის სადგურიდან – საათნახევარი. მათ, ვინც მგაზვრობას საზოგადოებრივი ტრანსპორტით ამჯობინებს, სასტუმრო სთავაზობს ტრანსფერს უახლოესი ავტობუსის სადგურიდან Ennetbürgen Post bus stop.

8. ეწვიეთ შვეიცარიის უდიდეს ნაკრძალს

სოფელი ცერნეცი, რომელიც ქვემო ენგადინის ხეობაში მდებარეობს, ქვეყნის უდიდესი ეროვნული პარკის მთავარ კარიბჭეს წარმოადგენს. ამ უზარმაზარი ნაკრძალის მონახულებისას (მისი ფართობი 172 კვადრატული კილომეტრია!), თქვენ ნახავთ თუ როგორი იყო ალპები, სანამ მათ აქტიურ ათვისებას დაიწყებდნენ. აქ შეხვდებით მყინვარებსა და მდელოებს, ტყის მონაკვეთებსა და ჩანჩქერებს და თუ გაგიმართლათ, ადგილობრივი ფაუნის წარმომადგენლებსაც კი: არჩვებს, კლდის თხებსა და ვირზაზუნებს.

პარკი აღჭურვილია საფეხმავლო და ველო-ბილიკებით, არის მარშრუტები სკანდინავიური სიარულის მოყვარულთათვის, ფიტნეს-ბილიკი ღია ცის ქვეშ მდებარე სპორტული მოედნით, ველნეს-ცენტრი და გოლფის მოედანი.

არ დაგავიწყდეთ ეწვიოთ შვეიცარიის ეროვნულ პარკში მდებარე ინფოცენტრს ცერცენში, რომ იხილოთ ვივარიუმი შხამიანი გველებით და შეიხედოთ სოროში, სადაც თრიები ბინადრობენ. აქ შეგიძლიათ მიიღოთ პასუხი ნებისმიერ კითხვაზე და ნაკრძალის ინტერაქტიული რუკა შეისწავლოთ.

როდის? მთელი წლის განმავლობაში.

რა ღირს? მოზრდილთათვის შესასვლელი ბილეთის საფასური 6 ევროა.

როგორ ჩავიდეთ? ციურიხიდან ცერნეცამდე ჩასვლა შეგიძლიათ მატარებლით Landquart სადგურზე გადაჯდომით. გზის ხანგრძლივობა დაახლოებით ორ საათნახევრია.

9. დროში იმოგზაურეთ

ამისათვის საკმარისია შაფჰაუზენს ეწვიოთ (რომელიც ჩვენ უკვე ვახსენეთ, გვერდით რაინის ჩანჩქერი მდებარეობს). მთავარი ღირსშესანიშნაობებია – ძველი ქალაქი, რომელსაც ერკერული ფანჯრების მქონე შენობები ამშვენებს, და მუნოტის ციხე-სიმაგრე, რომელიც მაცხოვრებლების სიმშვიდეს მე-16 საუკუნიდან იცავს. ოდესღაც შაფჰაუზენი სავაჭრო გემების საბოლოო დანიშნულების ადგილი იყო, რადგან მათ შემდგომ გზას ჩანჩქერი ეღობებოდა. გადიოდა წლები, მაგრამ ქალაქის იერსახე არ იცვლებოდა – მხოლოდ მაღაზიები, ელექტროგანათება და მაცხოვრებლების თანამედროვე ტანსაცმელი შეგახსენებთ, რომ გარეთ 21-ე საუკუნეა.

როდის? მთელი წლის განმავლობაში.

რა ღირს? უფასო.

როგორ ჩავიდეთ? ციურიხიდან აქ პირდაპირი მატარებელი მოძრაობს, გზაში 40 წუთიდან ერთ საათამდე გაატარებთ.

10. დაიპყარით მთის მწვერვალები

საას-ფე, რომელსაც სამართლიანად ეწოდა „ალპების მარგალიტი“, შვეიცარიის ერთ-ერთი ყველაზე ცნობილი სამთო-სათხილამურო კურორტია. იგი მყინვარის პირას, ზღვის დონიდან 1800 მეტრის სიმაღლეზე მდებარეობს და გარშემორტყმულია 13 „ოთხი ათასწლიანი“ მთით. ზამთრის სპორტის სახეობების მოყვარულებს აქ დახვდებათ სირთულის სხვადასხვა დონის 150 კილომეტრი სიგრძის ტრასა გარანტირებული საფარით. მათ, ვინც აქ წელიწადის თბილ დროს ჩამოდის, ელოდებათ 350 კილომეტრიანი საფეხმავლო ბილიკები, სათავგადასავლო პარკი თოკის ტრასებით, „ზიპლაინითა“ და საცოცი კედლებით. აქვეა აღჭურვილი ბილიკები ველოსიპედითა და თვითმგორავით სეირნობისთვის და ტობოგანინგის (მარხილით სეირნობის) ტრასა.

იანვარში საას-ფეში იმართება ჩემპიონატი Ice Climbing World Cup, რომლის მსვლელობისას სხვადასხვა ქვეყნიდან ჩამოსული გამოცდილი მთამსვლელები 30 მეტრიან ყინულის კედელს იპყრობენ. ივლისში კი ფოლკლორული ფესტივალის Alpine Music Festival სტუმარი შეგიძლიათ გახდეთ, რომელშიც მონაწილეობას იღებენ მუსიკოსთა ჯგუფები მთელი მსოფლიოს მასშტაბით .

მის მახლობლად, Mittelallalin-ის მყინვარზე მდებარეობს მსოფლიოში ყველაზე მაღალმთიანი მბრუნავი რესტორანი (სრულ ბრუნს იგი ერთ საათში ასრულებს). როგორც ამბობენ, საკვები ჩვეულებრივია, მაგრამ რა ხედია! ვახშმის დროს შეგიძლიათ დატკბეთ Mischabel-ის მთის მწვერვალებით (ყველაზე მაღალი შვეიცარიაში), ვალისის ხეობით, იუნგფრაუსა და ბერნის ალპების სხვა მწვერვალებით. აქვე მდებარეობს მსოფლიოში ყველაზე დიდი ყინულის მღვიმე, რომლის ფართობი 5500 კვადრატული მეტრია (შეტანილია გინესის მსოფლიო რეკორდების წიგნში). სამ წუთში Metro Alpin ზემოთ აგიყვანთ, რომელიც მსოფლიოში ყველაზე მაღალმთიანი მეტროა (მისი ქვედა სადგური Felskinn-ში მდებარეობს, სადაც საას-ფედან გონდოლით შეგიძლიათ ახვიდეთ). უბრალოდ წარმოიდგინეთ, რამდენი „საუკეთესო ობიექტის“ თავმოყრის ადგილია!

როდის? მთელი წლის განმავლობაში.

რა ღირს? დამოკიდებულია იმაზე, თუ რით დაკავდებით

როგორ ჩავიდეთ? ბერნიდან საას-ფემდე შეგიძლიათ მატარებლით იმგზავროთ ერთი გადაჯდომით, მგზავრობას დაახლოებით ორი საათი სჭირდება.

ჩვენი რჩება: შვეიცარიაში იაფად ჩასაფრენად ისარებლეთ ქუთაისის აეროპორტის ფრენით. ქუთაისი ბაზელი

პირდაპირი ფრენები Kutaisi-დან Mulhouse-მდე

გაფრენის თარიღიდაბრუნების თარიღიავიაკომპანიაბილეთების მოძებნა

08.11.2019

11.11.2019

ფასი 194

ასევე წაიკითხეთ:

Posted in ბლოგი, კრებულები and tagged , .