მოგზაურობა მალტაში: 5 ადგილი, 5 საინტერესო ფაქტი, 5 რჩევა - Aviabiletebi.org
მთავარი » ბლოგი » პირადი გამოცდილება » მოგზაურობა მალტაში: 5 ადგილი, 5 საინტერესო ფაქტი, 5 რჩევა

მოგზაურობა მალტაში: 5 ადგილი, 5 საინტერესო ფაქტი, 5 რჩევა

მალტა ხამანწკების კოლონიას ჰგავს, სადაც ქალაქები და დასახლებები ერთმანეთს მჭიდროდ ეკვრის და მიწის თითოეულ ნაკვეთს ეჭიდება. ამ ნაავდრალ, მარილით გაჟღენთილ კლდეზე დასახლება მხოლოდ წყალწაღებულ მეკობრეებს ან გამოუსწორებელ რომანტიკოსებს თუ შეეძლოთ. მალტელი რაინდები – კი სწორედ „ორი ერთშია“. ამიტომაც მათ ასეთი უჩვეულო ქვეყანა გამოუვიდათ.

მალტას 5 შესანიშნავი ადგილი:

1. ვალეტა

ვალეტაზე ლამაზი ქალაქებიც არსებობს, მაგრამ არ არსებობს მისი მსგავსი. ასეთ ქალაქს შტურმით ვერ აიღებთ. წარმოიდგინეთ 16-სართულიანი სახლი, რომელიც მიწაშია ჩაფლული, მაგრამ ზედაპირზე მხოლოდ 3-4 სართულის სიმაღლის მონუმენტური კენწერო მოჩანს. დაახლოებით ასე გამოიყურება დღეს ციხე-ქალაქი ცენტრალური კარიბჭის მხრიდან. დანარჩენი სამი მხრიდან კი ერთი შეხედვით ქვიშიანი, მაგრამ ჯერ კიდევ ძლიერი, მთის ქანთან შერწყმული კედლები, ზღვით არის გარშემორტყმული. კედლების სიგანე არანაკლებ შთამბეჭდავია, ვიდრე სიმაღლე. სიგანე საკმარისი აღმოჩნდა, რომ ციხის ქიმზე ორზოლიანი ავტოტრასა მოეწყოთ. კედელთან რამდენიმე ლამაზი სკვერი და პარკი მდებარეობს, რომელთაგან ყველაზე კარგად მოვლილია ბაღები „Barrakka” – ზემო და ქვემო.

შიგნით არსებული ლანდშაფტი ცალკე თემაა. როდესაც ვალეტას შუაგულისკენ მიემართებით, თითქოს ადამიანის მიერ შექმნილი ვულკანის კრატერში ვარდებით. კედლები მისი ნაჭუჭია, ქუჩები კი – ღარები, რომლებიც ცენტრალური ღრმულისკენ ხან მდოვრედ, ხან ციცაბოდ ეშვება. 10 წუთში თქვენ უკვე ქვის ძაბრის ფსკერზე აღმოჩნდებით, საიდანაც ცა წერტილივით მოჩანს. ეს ეფექტი განსაკუთრებით იგრძნობა სადღაც Old Bakery და Old Theater გზაჯვარედინზე, თუმცა იგივე შეგრძნება დაგეუფლებათ მეზობლად მდებარე გზაჯვარედინებზეც.

ზოგადად კი, ვალეტა ცოტათი უწესრიგოა. მაგრამ წმინდა იოანეს ტაძარი დიდუბულების თვალსაზრისით არა მხოლოდ ვატიკანს, არამედ თავად ელდორადოსაც არ ჩამოუვარდება. ყველაფერი, რაც ჯვაროსნულ ლაშქრობებშია მოხვეჭილი, რაინდებმა თავიანთ ტაძარში მოახდინეს ინვესტირება. შიგნით მოოქროვილი მალტური ჯვრების თვალისმომჭრელი სილამაზე დაგხვდებათ. ინვესტიციების ანაზღაურების მიზნით, ტაძარში შესვლისთვის ტურისტებისგან 10 ევროს საფასურს იღებენ.

ტაძრის უკანა მხარეს, Triq Il-Merkanti-ზე, რესტორანში Luciano შეგიძლიათ გონივრულ ფასად საკმაოდ გემრიელად წაიხემსოთ. დამატებითი ბონუსი არის ის, რომ აქ სლოვაკიიდან თუ სლოვენიიდან ოფიციანტთა მთელი გუნდი მუშაობს, რომელიც მომსახურებაში ბევრად უფრო მარჯვეა, ვიდრე მალტის მუდამ აუჩქარებელი მკვიდრნი.

მალტასთან სამახსოვრო გაცნობისთვის გირჩევთ გაემგზავროთ ექსკურსიაზე „კეთილი იყოს თქვენი მობრძანება მალტაზე!“, სადაც თავს ისტორიული ფაქტებით კი არ მოგაბეზრებენ, არამედ მხოლოდ მალტის რეალურ, თანამედროვე ცხოვრებას გაგაცნობენ.

2. მდინა

აქ საერთოდ არ არის ზღვა. მდინა კუნძულის ცენტრშია ამოწვერილი, თითქოს ამ პაწაწინა მიწის უპე ან მაღრიბის ხალი იყოს მალტის ქრისტიანულ ნაწილში. უდავოდ არაბთა კვალი მთელ ქვეყანაში იგრძნობა, სადღაც მათი შეხება მხოლოდ მსუბუქი შტრიხ-პუნქტირის სახით დარჩა, მაგრამ მდინაში მათი ყოფნა ძალზე შესამჩნევია. ქუჩის თხელი სანიაღვრე რუები, ხმაურიანი, ბრწყინვალებამდე გათელილი ქვაფენილი, ბუგენვილეას ბუჩქი, რომელიც თეთრ კედელს მჭიდროდ აკრავს გარს – მდინას მალტის ერთ-ერთ ულამაზეს ქალაქს უწოდებენ.

აქ სიცარიელეა. მხოლოდ გახუნებული აბრები თუ მიგანიშნებთ, რომ აქ ვიღაც მაინც ცხოვრობს: არ იხმაუროთ, შესვლა აკრძალულია, ნუ შეგვაწუხებთ უახლოესი 500 წლის განმავლობაში. მაგრამ რა ადამიანებზე ვსაუბრობთ, თუ მდინას მთლიანი მოსახლეობა 400 ადამიანს შეადგენს – კატების ჩათვლით.

უბრალო მოსახლეობა უკვე დიდი ხანია რაბათში გადავიდა. ეს მეზობელი ქალაქია – გზის გადაღმა. რაბათში ცხოვრება ჩქეფს, თუ ასე შეიძლება ვთქვათ მალტური ცხოვრების მოდუნებულ სტილზე. ვერანდაზე მოხუცები ყავას მიირთმევენ და შაშს თამაშობენ, საცხობებიდან ცხელი ფუნთუშეულის სურნელი ტრიალებს, კატაკომბებიდან კი – ნესტის. რაბათში კარგად იყო შემონახული მიწისქვეშეთი, სადაც პირველი ქრისტიანები იკრიბებოდნენ, კერძოდ კი წმინდა პავლე. ახლა ის მუზეუმის ობიექტია. მართალია, მისი მუშაობის გრაფიკი, როგორც ჩვენი გამოცდილებიდან ჩანს, საკმაოდ პირობითად არის დაცული. კოშკებში ოფიციალურ დახურვამდე ერთი საათით ადრე მოვხვდით. ამიტომ, კატაკომბებში მოხვედრის უფრო მეტი შანსი გექნებათ, თუ აქ დღის პირველ ნახევარში ჩამოხვალთ.

მაგრამ უკაცრიელ მდინაში მშიერი ნამდვილად არ დარჩებით. მაღაზიები და რესტორნები გამართულად მუშაობენ. ჩვენ მოგვეწონა Rosmarino-ში პალაცო ფალცონთან ახლოს Triq IL Villegaignon-ზე. დაწესებულება ძალიან მოხერხებულადაა განთავსებული: ერთი დარბაზი – ეს არის პატიო ქვის ტუბუსში სახურავის გარეშე, შადრევნითა და ვაზონებით – გრილი, სასიამოვნო, დამამშვიდებელი; მეორე – ჩვეულებრივი შიდა დარბაზია; მესამე კი – ტერასაა ქალაქის კედელზე, სადაც უბადლო ხედით ტბობისას 5 წუთში მომაკვდინებელი სიცხისგან შეწუხდებით.

3. ბუჯიბა

ბუჯიბა მხოლოდ კურორტია და არა ანტიკვარიატის მაღაზია. ამ სიტყვის კარგი გაგებით. იგი არ არის გადატვირთული დიდი სასტუმროებით – ეს მეზობელი ქალაქი აურას პრეროგატივაა. არცთუ ისე ახალგაზრდული-კლუბურისთვის – პაჩევილში უნდა გაემგზავროთ. ბუჯიბაში სანაპიროზე პენსიონრები ერთობიან, ვინ იცის ჩარლსტონი თუ ფოქსტროტია. მეორე მხარეს ჯანმრთელობის ბილიკია ქუჩის სავარჯიშო მოწყობილობებით. მახლობლად მდებარეობს ყურე, სადაც, თქმულების თანახმად, წმინდა პავლე გადმოვიდა, როდესაც მისი ხომალდი დაიღუპა. ბუჯიბაში მზის ჩასვლა განსაკუთრებით ლამაზია. აქ ხშირად ქვის ნაპირში ამოკვეთილი მართკუთხა აბანოები შეგხვდებათ. ეს არ არის სპა – მათში ადრე რომაელები ზღვის მარილს ხდიდნენ. მოკლედ ქალაქს ყველაფერი აქვს სასიამოვნო დასვენებისთვის, რამდენიმე ქვიშიანი პლაჟიც კი, რაც მალტისთვის იშვიათობაა. ვინაიდან ბუჯიბა ქვეყნის ერთ-ერთი უმსხვილესი საავტობუსო კვანძია, მას აქვს შესანიშნავი სატრანსპორტო კავშირი აქვს ყველა ღირსშესანიშნაობასთან, დედაქალაქთან და აეროპორტთან.

გირჩევთ ბუჯიბაში საკვები ეძებოთ სან-ანტინის ქუჩაზე. ეს არის ერთ-ერთი სხივი ცენტრალური მოედნიდან. რაც უფრო შორს ხართ ცენტრიდან, მით უფრო დაბალია ფასები და უფრო გემრიელია საკვები. გზად შეგიძლიათ შეიძინოთ უგემრიელესი ნაყინი ჯელატერიაში Sottozero, ხოლო ქუჩის ბოლოს (De Niro ბარი), ძირითადად კერძებს თავისიანებისთვის ამზადებენ, მაგრამ, რასაკვირველია, ტურისტსაც მოემსახურებიან.

4. მოსტა

ბუჯიბადან მდინასკენ მიმავალ გზაზე გირჩევთ მოსტაში შეიაროთ. ერთჯერადი ავტობუსის ბილეთი 120 წუთის განმავლობაში მოქმედებს, ქალაქში კი მხოლოდ ერთი რამ უნდა ნახოთ – როტონდა, მაგრამ აუცილებლად. როტონდას უწოდებენ მოსტას უზარმაზარ კოლონადებიან ეკლესიას, რომელსაც მსოფლიოში სიდიდით მესამე გუმბათი აქვს რომისა და ლონდონის შემდეგ. შიგნით აუცილებლად გიჩვენებენ ადგილს, სადაც გერმანული ბომბი ჩამოვარდა მეორე მსოფლიო ომის დროს. იგი კედელში გაეჭედა, მაგრამ არ აფეთქდა. იმ დროს ტაძარში რამდენიმე ათასი მორწმუნე იმყოფებოდა, რომელთა ლოცვამაც იმოქმედა. ყველაზე ეფექტურია საღამოობით განათებული როტონდა. შუქი თითქოს შიგნიდან, გუმბათის ქვეშ მოედინება.

როტონდა

ეკლესიის მახლობლად მდებარე ავტობუსის გაჩერებასთან (Triq Il-Kostituzzjoni. 29) მდებარეობს ძალიან პატარა, მაგრამ საოჯახო კაფე Mellows. აქ შეგიძლიათ შეუკვეთოთ საფირმო პიცა „როტონდა“, რომელშიც, როგორც ჩანს, ყველაფერს ამატებენ, რაც სამზარეულოში იპოვეს. მაგრამ ეს პიცა არა მხოლოდ გემრიელი, არამედ დაუჯერებლად ნოყიერია. თუკი დროში შეზღუდული ბრძანდებით, მაშინ შეგიძლიათ უბრალოდ ადგილობრივი ლუდის Cisk (შედევრი არ არის, მაგრამ სასმელად ვარგისია) ან გაზიანი წყლის Kinnie ჭიქით შემოიფარგლოთ. ეს უკანასკნელი მწარე ფორთოხლისა და ბალახეულისგან მზადდება. ამიტომ პირველი ყლუპი გაოცებას იწვევს, მესამე კი – მიჩვევას.

 5. სლიმა

ქალაქი მალტაში ერთადერთი ცათამბრჯენით და აქედან გამომდინარე ყველა შედეგით. ბიზნესი, შოპინგი, უნისექსი – აქ ყველაფერია. პერიმეტრის ირგვლივ გარშემორტყმულია უსასრულოდ მიხვეულ-მოხვეული სანაპირო, რომელიც თანამედროვე ქანდაკებებით არის მოფენილი.

გასეირნება შეგიძლიათ დაიწყოთ ბალუტას მოედნიდან (ფორმალურად ეს უკვე ქალაქი სენტ-ჯულიენსია). მისი ნიშანი გრძელი საუცხოო ნაგებობაა არტ-ნუვოს სტილში, სამი ფიგუროვანი პასაჟით. იგი საინტერესო, თუმცა უცნაურია – თითქოს სადღაც ბრიუსელში ან ვენაში მიჰქონდათ, მაგრამ გზაში დაკარგეს. შენობის ქვემოთ ზღვის პატარა უბეა, რომლის პლაჟი, გასაბერ აუზზე ოდნავ უფრო დიდია. სანაპიროს მეორე ბოლო სავაჭრო ცენტრით Point სრულდება, ყველა ევროპული ბრენდის სრული ნაკრებით. ამიტომ სანამ სავაჭრო ცენტრამდე მიხვალთ, შეგიძლიათ სლიმას ვალეტასთან დამაკავშირებელ საბორნე გადასასვლელისკენ მშვიდად გაუხვიოთ. სწორედ ამ მხრიდან იშლება მალტის დედაქალაქის ყველაზე ფოტოგენური პროფილი. თქვენ 15 წუთი გაქვთ, რომ ვალეტას საუკეთესო კადრები გადაიღოთ – ბორნით დაახლოებით ამდენ ხანს იმგზავრებთ. მთავარია ზედა გემბანზე მოხერხებული მდებარეობა დაიკავოთ. ფოტოსესიის ანუ ერთი მგზავრობის ბილეთის ღირებულება 1,5 ევროა.

სლიმას რესტორანული ცხოვრება დიდი ქალაქის კანონებს ექვემდებარება. ამიტომ აქ ყველაფერი ცოტა უფრო ძვირია, ვიდრე საშუალო და უფრო სტანდარტულია, ვიდრე სულიერი. სავარაუდოდ შეგვიძლია გირჩიოთ მხოლოდ U Bistrot ზემოხსენებულ ბალუტას უბეში – უფრო ზღვის ლამაზი ხედის და არა სამზარეულოს გამო. ფასებიც აქ არ არის ისეთი მაღალი, როგორც კონკურენტებთან.

5 საინტერესო რამ, რაც მალტაზე უნდა იხილოთ:

1. მალტის ორდენი

რაინდები მალტაზე არსად წასულან. მხოლოდ ტანისამოსი გამოიცვალეს და ჯაჭვის პერანგი კოსტიუმებით შეცვალეს. მაგრამ მალტის ორდენი დღემდე არსებობს. მიუხედავად იმისა, რომ დღეს მისი შტაბ-ბინა რომში მდებარეობს, იგი საკმაოდ გავლენიანი რჩება თავის ისტორიულ სამშობლოში. შეხედეთ რაინდთა რეზიდენციას ვალეტაში, ჟან დე ვალეტას მოედანზე (პირველი მაგისტრი). ასეთ მიუვალ ბუნკერში ბირთვულ შეტევასაც კი გაუძლებთ. მალტის ორდენის საქმიანობა ერთგვარი საიდუმლოებით არის მოცული. ვიღაც მათ მეცენატებად მიიჩნევს, ვიღაც მასონებად. მაგრამ ტურისტებისთვის – ეს ძირითადად მრავალფეროვანი სუვენირები და კოსტიუმირებული წარმოდგენებია. ყველაზე დიდებულია In Guardia აღლუმი, რომელიც ტრადიციულად ივნისში იმართება.

2. ფესტები

გარდა რაინდულისა, მალტაზე ასევე ძალიან პოპულარულია სხვადასხვა რელიგიური მსვლელობაფესტები. შეიძლება იფიქროთ, რომ კუნძულებზე ცხოვრება – უსასრულო დღესასწაულია. ყოველ შაბათ-კვირას, ზოგჯერ სამუშაო დღეებშიც კი, მალტის რომელიმე სოფელში სწორედ ეს ფესტა იმართება. მოქმედება ეძღვნება ადგილობრივ ან მსოფლიო წმინდანს, ხოლო ღონისძიებისთვის მომზადება ერთი ან ორი კვირის განმავლობაში ქალაქის ცხოვრების კამერტონი ხდება.

დღესასწაულის დაწყებამდე რამდენიმე დღით ადრე ახოვან მამაკაცებს ცენტრალურ მოედანზე ძალიან მძიმე 3-მეტრიანი ფიგურები გადააქვთ, კიდებენ დროშებსა და ილუმინაციებს, კამათობენ და პაბში შესარიგებლად დადიან – მოკლედ, სახლში რომ არ ისხდნენ. ხოლო როდესაც მთელი ანტურაჟი მზად არის, ქუჩებში ათასკაციანი მსვლელობა გამოდის სათავეში ყველაზე დიდი ქანდაკებით, ორკესტრითა და გუნდით. ყველაფერი კი მასპინძლობითა და სალუტით სრულდება. ყველა მნიშვნელოვანი რაინდთა აღლუმებისა და ფესტივალების ზუსტი სია თარიღებისა და პუნქტების მითითებით აქ კალენდარში შეგიძლიათ იხილოთ.

3. აივნები

მალტელებს რომ შეეძლოთ, სახლის აშენებას აივნიდან დაიწყებდნენ და ამით დაასრულებდნენ. ქოხებსაც კი ხშირად ფიგურებიანი ლოჯიები აქვთ წინა მხარეს. აივნები ვალეტას არქიტექტურულ იერსახეს განსაზღვრავენ (სხვა ქალაქებში ის ცოტა უფრო თავშეკავებულია). ისინი მერცხლის ბუდეების მსგავსად გარს აკრავს სახლებს და ყელსაბამის მსგავსად ქუჩებს გასწვრივ მიჰყვება. ასეთი აივნების ქვეშ სერენადების მღერას მოისურვებთ სამხრეთის მთელი ღამის განმავლობაში. მდინაში კი თითქმის იგივე თავგამოდებით კარის სახელურებს აღმერთებენ. ზოგჯერ ტაფის ზომისაც კი შეგხვდებათ და თითოეული მათგანი მეტალში შესრულებული მთელი ინსტალაციაა.

4. ლუცუ

ასე უწოდებენ ნაირფერ მალტურ ნავებს. ყველაზე გავრცელებული ფერთა შეხამებაა – ლურჯ-ყვითელი. თითოეულს ცხვირზე ტრადიციული თილისმა აქვს: ჰორუსის თვალი. ითვლება, რომ ადგილობრივი მეთევზეები ეგვიპტურ სიმბოლოს თავიანთ ნავებზე იმ დროიდან ხატავენ, როდესაც მალტაზე ფინიკიელები დაცურავდნენ. 2 ათასწლეულის მანძილზე „ლუცუში“ ბევრი არაფერი შეცვლილა. მხოლოდ შიდა წვის ძრავა დაამატეს. საღამოობით „ლუცუ“ ნავები თევზი ნემოს მსგავსად გუნდურად ზღვის ყურეებსა და უბეებში მიედინებიან. მათი ყველაზე დიდი რაოდენობა მარსაშლოკსა და მსიდაშია.

5. ბოცვერი

ბოცვერი არა მხოლოდ ძვირფასი ბეწვი, არამედ ყველაზე დიდი ცოცხალი არსებაა, რომელიც მალტაზე ბინადრობს. უფრო მსხვილი პირუტყვი აქ ვერ გადარჩება წყლისა და ბალახის გარეშე. შესაბამისად, მალტელებს კურდღლის მომზადების უამრავი რეცეპტი დაუგროვდათ და გირჩევთ ერთ-ერთი მაინც დააგემოვნოთ. კურდღელს მალტის თითქმის ყველა რესტორანი შემოგთავაზებთ.

5 რჩევა:

1. როგორ ჩავიდეთ

ერთადერთი საერთაშორისო აეროპორტი ქვეყნის დედაქალაქ ვალეტადან 5 კილომეტრში მდებარეობს. თბილისიდან ტრანზიტული რეისის ორივე გზის ბილეთის ფასი 240 ევროდან იწყება, სხვა შემთხვევაში უფრო ბიუჯეტურად იმგზავრებთ WizzAir-ით ქუთაისიდან ათენში და შემდეგ იქიდან დაბალბიუჯეტიანი Ryanair-ით გაფრინდებით მალტაში, სეზონის პერიოდში ივნისი-სექტემბერი ინიშნება პირდაპირი ჩარტერული რეისები მალტის მიმართულებით, პირდაპირი რეისებს ასრულებს ავიაკომპანია ეარმალტა ავიაბილეთის ღირებულება კი 800 ლარიდან იწყება. თუ ბილეთებზე წინასწარ იზრუნებთ (მაგალითად, გაზაფხულზე ზაფხულისთვის), მაშინ უფრო იაფ რეისებს იპოვით. სეზონზე კი, რომელიც ოქტომბრის ჩათვლით გრძელდება, იაფ ბილეთებს ვერ ნახავთ. ზამთრისთვის ფასები ისევ ეცემა. მართალია, ზამთარში ზღვაში ვერ იბანავებთ, მაგრამ მალტის სილამაზე არსად ქრება. თუმცა ზამთარში ამინდი ლატარიის მსგავსია. შესაძლოა მშვენიერი მზიანი +15 დაგხვდეთ, და შესაძლოა გამყინავი ქარი და წვიმა.

ყველაზე იაფი ავიაბილეთები Tbilisi-დან Luqa-მდე 1 წლის განმავლობაში

გაფრენის თარიღი დაბრუნების თარიღი გაჩერება ავიაკომპანია ბილეთების მოძებნა

26.09.2019

03.10.2019

1 stop

ფასი 1 043

11.10.2019

16.10.2019

1 stop

ფასი 917

22.12.2019

28.12.2019

1 stop

ფასი 983

30.04.2020

08.05.2020

1 stop

ფასი 995

Unfortunately we don't have actual data for flights from Tbilisi to Luqa. Find tickets from Tbilisi to Luqa

2. ავტობუსები

მალტის საავტობუსო მიმოსვლა ნამდვილი ადგილობრივი სასწაულია. 15×30 კილომეტრის ფართობზე ასზე მეტი სხვადასხვა მარშრუტია და ისინი საათივით ფუნქციონირებენ (თუ არ არის საცობები). ქვეყანაში ერთადერთი სატრანსპორტო კომპანია მუშაობს და გირჩევთ მის ვებ-გვერდს ჩამოსვლამდე ეწვიოთ, რათა კუნძულზე გადაადგილების საორიენტაციო გეგმა შეიმუშავოთ. სავარაუდოდ, ბილეთების შეძენისას ჯიხურში ყველა საავტობუსო ხაზის უფასო რუკასაც გადმოგცემენ – ესეც შეუცვლელი რამაა. ორსაათიანი მგზავრობის ბილეთი გადაჯდომის ნებისმიერი რაოდენობით ზაფხულის სეზონზე 2 ევრო ღირს, 12 მგზავრობის – 15 ევრო, მოზრდილთათვის ერთკვირიანი შეუზღუდავი ბილეთი – 21 ევრო. ბილეთების კომპოსტირება მძღოლთან უნდა მოახდინოთ, ამიტომ ავტობუსში შესვლა მკაცრად წინა კარიდან ხორციელდება. სხვათა შორის, ყველა ავტობუსი კონდიციონერით არის აღჭურვილი, ამიტომ იგი არა მხოლოდ სატრანსპორტო საშუალება, არამედ მალტური სიცხისგან კომფორტული თავის დაღწევის საშუალებაა.

3. პლაჟები

არსებობს მოსაზრება, რომ მალტა არ არის საუკეთესო ქვეყანა პლაჟზე დასვენებისთვის. ეს ნაწილობრივ სიმართლეა. ეს არ არის კვიპროსი და არც მალდივის კუნძულები. სამაგიეროდ აქ გაცილებით საინტერესოა. ამასთან მალტაზე ქვიშიანი პლაჟებიც არის (კიდევ უფრო მეტი კი მეზობელ კუნძულ გოზოზე). ნიუანსი იმაში მდგომარეობს, რომ მათგან ყველაზე დიდი პლაჟები ცივილიზაციისგან შორს მდებარეობს. თუ იგი არც კი გჭირდებათ, კუნძულის დასავლეთით გაემგზავრეთ, იქ ქვიშიანი პლაჟების მთელი მწკრივია გადაჭიმული. აღმოსავლეთი – პორტი და სამრეწველო ზონაა. ჩრდილოეთი – ძირითადად ბეტონის ფილებია, განსაკუთრებით ვალეტას ორივე მხარეს. გამონაკლისია მელიხა, სადაც ადგილობრივი სტანდარტებით უზარმაზარი ქვიშიანი პლაჟია, მაგრამ აქედან ქალაქამდე მანძილი 3 კილომეტრზე მეტია. საუკეთესო კომპრომისია ზემოხსენებული ბუჯიბა და აურა. აქ ბეტონის ნავმისადგომებს პატარა ქვიშიანი ჩანართები ენაცვლებათ. ამასთან მალტის პლაჟების უმეტესი ნაწილი მუნიციპალური, უფასო და სუფთაა, მაგრამ მოწევა დაშვებულია. თუ პლაჟის პერსონალი თქვენს ხელში სიგარეტს დაინახავს, დაუყოვნებლივ ქაღალდის საფერფლეს მოგაწოდებთ, რომ ნამწვი უეცრად ქვიშაზე არ დააგდოთ.

4. მარცხენა საჭე

1964 წელს დამოუკიდებლობის მოპოვებამდე მალტა ბრიტანეთის პროტექტორატის ქვეშ იმყოფებოდა 150 წელზე მეტი ხნის განმავლობაში. გარკვეულწილად ამან ქვეყანას სარგებელიც კი მოუტანა. აქ წესრიგი არ არის ისეთი შეფარდებითი, როგორც მეზობელ იტალიაში. ბრიტანელებისგან ქვეყანაში ჯერ კიდევ შემორჩენილია წითელი სატელეფონო ჯიხურები და მარცხენა მხარეს მოძრაობა. თავიდან ეს ძალიან დამაბნეველია. გზის გადაკვეთისას მუდამ არასწორი მიმართულებით გაიხედავთ და შეეცდებით ჩასხდეთ საპირისპირო მიმართულებით მოძრავ ავტობუსში, ვიდრე გჭირდებათ. მაგრამ 2-3 დღეში შეეჩვევით.

5. წყალი

მალტას არ აქვს საკუთარი წყაროები, ამიტომ წყლის უმეტეს ნაწილს საკუთარი საჭიროებისთვის იგი გამტკნარების გზით იღებს. საბოლოო ჯამში, ონკანში ყოველთვის არის წყალი, შეგიძლიათ იბანაოთ, საკვები მოამზადოთ და დალიოთ კიდეც, მაგრამ როდესაც ჩამოსვლის დღეს მისგან ყავის გაკეთება ვცადეთ – მომლაშო საძაგლობა გამოვიდა. ამიტომ, სასმელი წყლის შეძენა არ იქნება ძალიან დამამძიმებელი ბიუჯეტისთვის და მალტაზე დარჩენისთვის სავალდებულო ხარჯს წარმოადგენს. დააკვირდით თუ საიდან მიაქვთ მალტელებს წყალი სახლში – ეს ნიშნავს, რომ იმ სუპერმარკეტში აქცია აქვთ.

ავიაბილეთები ამ თვეში Tbilisi-დან Luqa-მდე

გაფრენის თარიღი დაბრუნების თარიღი გაჩერება ავიაკომპანია ბილეთების მოძებნა

23.09.2019

30.09.2019

1 stop

ფასი 1 164

25.09.2019

02.10.2019

2 stops

ფასი 1 193

26.09.2019

03.10.2019

1 stop

ფასი 1 043

ასევე წაიკითხეთ:

Posted in ბლოგი, პირადი გამოცდილება and tagged , , , , , , , , , , .

მობილური აპლიკაცია

მოიძიეთ და დაჯავშნეთ იაფი ავიაბილეთები პირდაპირ თქვენი სმარტფონებიდან, მიიღეთ უფრო მეტი სიამოვნება თქვენი მომავალი დასვენებისთვის.

გადმოწერა