მთავარი » ბლოგი » იდეები მოგზაურობისთვის » სად გავემგზავროთ ხავერდოვან სეზონზე: მოგზაურობის 11 იდეა
თურქეთი

სად გავემგზავროთ ხავერდოვან სეზონზე: მოგზაურობის 11 იდეა

ჯერ კიდევ არ ყოფილხართ ზღვაზე? ეცადეთ ეს დანაკლისი ხავერდოვან სეზონზე აანაზღაუროთ. ჩვენ იმ ადგილების სია შევადგინეთ, სადაც ამ პერიოდში განსაკუთრებით კარგია.

ესპანეთი

მიუხედავად იმისა, რომ სექტემბრის ბოლოსთვის ესპანეთში პირველი შემოდგომის წვიმები იწყება, იგი ხავერდოვან სეზონზე დასასვენებლად ერთ-ერთ ყველაზე მიმზიდველ ქვეყნად რჩება. ალიკანტეს პროვინციაში, წყლისა და ჰაერის ტემპერატურა შესანიშნავია პლაჟზე დასასვენებლად (იდეალურია კოსტა-ბლანკა). ასევე, თამამად შეგიძლიათ გაემგზავროთ, ვთქვათ ბენედორმში, კალპეში, ტორევიეხაში ან გვარდემარში – აქ ზღვა ოქტომბრის შუა რიცხვებამდე თბილია (+26-28 გრადუსი), ხოლო რეგიონში ჰაერის ტემპერატურა +30-32 გრადუსია. ასევე შეგიძლიათ მზეზე გაირუჯოთ კოსტა-დორადაზე, კოსტა-ბრავასა და კოსტა დე ვალენსიაზე.

ესპანეთში შემოდგომაზე ტურისტების ნაკადი მცირდება, ამიტომ პლაჟზე დასვენება ღირსშესანიშნაობების მონახულებასთან შეგიძლიათ შეათავსოთ. ხავერდოვანი სეზონი საუკეთესო დროა ბარსელონაში მოგზაურობისთვის.

თურქეთი

თურქეთს ხშირად ზაფხულის დასვენებისთვის ირჩევენ, ამიტომ შემოდგომის თვეებში აქ ბევრი ტურისტი არ ჩამოდის. სხვათა შორის, ამაოდ. შავი ზღვის წყლები, უდავოდ, სექტემბრის შუა რიცხვებში შეიძლება ცოტა გრილი მოგეჩვენოთ, მაგრამ მარმარილოსა და ხმელთაშუა ზღვის სანაპიროები უბრალოდ იდეალურია. ასევე სწორედ ამ დროს, თურქეთის მრავალი სასტუმროს მფლობელი დამსვენებლებს შთამბეჭდავ ფასდაკლებას სთავაზობს.

სექტემბერში ჰაერის საშუალო ტემპერატურაა +32, ზღვის – +26 გრადუსი. ოქტომბერში, ეს მაჩვენებლები შესაბამისად +27 და +25 გრადუსამდე იკლებს, ამიტომ თურქეთი იდეალური ვარიანტია მათთვის, ვინც სიცხეს ცუდად იტანს.

მიუხედავად იმისა, რომ ტურისტული აქტიურობა იკლებს, არ იფიქროთ, რომ თურქეთში ხავერდოვან სეზონზე მოსაწყენი იქნება. კვლავ შეგიძლიათ დაკავდეთ დაივინგით ან წყლის თხილამურებით ისეირნოთ, კურორტის კლუბებსა და ბარებშიც ღამის ცხოვრება ჩქეფს და ქვეყნის მდიდარი კულტურული მემკვიდრეობა თქვენს დასვენებას მხოლოდ ელფერს შემატებს. შემოდგომაზე დასვენების ყველაზე ოპტიმალური ადგილებია – მარმარისი, ქუშადასი, ბოდრუმი, ანტალია, ბელეკი და ალანია.

კვიპროსი და საბერძნეთი

თუ ხავერდოვან სეზონზე ბავშვებთან ერთად დასასვენებლად მიემგზავრებით, მაშინ ნაკლებად სავარაუდოა, რომ კვიპროსზე უკეთესი ადგილი იპოვოთ. რბილი კლიმატისა და უსაფრთხო მზიანი პლაჟების გარდა, იგი ასევე განთქმულია წყლის ატრაქციონების სიუხვითა და მრავალფეროვნებით. პლაჟის დასვენების მოყვარულებმა ყურადღება უნდა მიაქციონ კვიპროსის ისეთ კურორტებს, როგორიცაა ლარნაკა, პროტარასი და კირენია. მარტო და ოჯახური დასვენებისთვის შესანიშნავი ვარიანტია ლიმასოლი თავისი განთქმული შავი პლაჟებით, განვითარებული ინფრასტრუქტურით, ოპტიმალური კლიმატითა და ძირითად საექსკურსიო ადგილებთან შედარებით მოსახერხებელი ადგილმდებარეობით – პაფოსთან, ტროოდოს მთის მასივთან და მართლმადიდებელ სალოცავებთან.

შემოდგომაზე კვიპროსზე მდიდარი კულტურული პროგრამაა: სექტემბერში აია-ნაპაში კულინარული ფესტივალი იმართება, ხოლო ლიმასოლში – აგვისტოში დაწყებული ღვინის ფესტივალი გრძელდება.

საბერძნეთში ჰაერის ტემპერატურა ასევე მაღალ ნიშნულზე ნარჩუნდება. ამასთან, ზაფხულის დასასრულს ადგილობრივ კურორტებზე ფასები მნიშვნელოვნად მცირდება. შემოდგომის პირველ თვეში საბერძნეთის მონახულების კიდევ ერთი მიზეზია – ყოველგვარი დღესასწაული და ფესტივალი. მაგალითად, შეგიძლიათ ეწვიოთ ფესტივალს Street Mode Festival და დიჯეის მუსიკაზე იცეკვოთ ან ელექტრონული მუსიკის ფესტივალს Reworks Festival (ყველაფერი სალონიკში, 2019 წლის 1-3 სექტემბერს და 19-22 სექტემბერს ტარდება).

მონტენეგრო

მონტენეგროში ტურების ფასები, რომლებიც ზაფხულში უზომოდ მაღალი მოგეჩვენებათ, სექტემბრიდან ვარდნას იწყებს. სექტემბერში აქ ჯერ კიდევ საზაფხულო ამინდია, ამიტომ იდეალურად დასვენებას შეძლებთ. სუფთა ადრიატიკის ზღვა და საოცარი პეიზაჟები, შესანიშნავი ღვინოები და სამზარეულო ადგილობრივი მოსახლეობის სტუმართმოყვარეობასთან ერთად კიდევ დიდხანს გემახსოვრებათ.

ზღვაზე დასვენება მონტენეგროში მრავალი პლაჟითაა წარმოდგენილი: სასტუმროების ფასიანი და მუნიციპალური უფასო პლაჟებით. არჩევანი უზარმაზარია. კლდოვანი პლაჟები მდებარეობს ჰერცეგნოვის რივიერაზე, კენჭიანი პლაჟები – ბუდვას რივიერაზე, მაგრამ კარგი პლაჟები ვულკანური ქვიშით მდებარეობს ქალაქ ულცინის მახლობლად, ქვეყნის სამხრეთ ნაწილში.

მონტენეგრო კულტურული პროგრამითაც გასიამოვნებთ: თქვენს დასვენებას სასიამოვნოდ გაამდიდრებს უძველესი მონასტრები, ციხე-სიმაგრეები და მღვიმეები ულამაზეს ბუნებასთან და აქტიური დასვენების ფართო არჩევანთან შეთავსებით (კაიტინგი, დაივინგი, ლაშქრობა და სხვ.).

ხოლო თუ სიმშვიდე და სიწყნარე გსურთ, პეტროვაცს ან სუმოტომს ეწვიეთ. ამ ზღვისპირა ქალაქების განუმეორებელი მშვიდი ატმოსფერო სულიერი დასვენების საშუალებას მოგცემთ.

მონტენეგროში ადრეულ შემოდგომაზე ადგილობრივი ხილის უმეტესი ნაწილი მწიფდება, ამ დროს ბაზრებზე მათ სასაცილო ფასად შეიძენთ.

მალტა

მალტა ძალიან პატარა კუნძულოვანი სახელმწიფოა, მაგრამ ხავერდოვან სეზონზე აქ ბევრი დამსვენებელი ჩამოდის. შემოდგომის დასაწყისში თერმომეტრი ამაყად დგას +25°C ნიშნულზე, ხოლო სანაპირო წყლები ზაფხულის მზის შემდეგ გაცივებას ვერ ასწრებს. წყალი საოცრად სუფთაა და პრაქტიკულად არ წვიმს. მალტა უთუოდ შედის ბავშვებთან ერთად დასვენების საუკეთესო ვარიანტების სიაში, ამიტომ შეგიძლიათ დაიწყოთ ოჯახური მოგზაურობის დაგეგმვა.

აქვე წაიკითხეთ მალტას შესახებ: საუკეთესო გზამკვლევი მალტაში

ისრაელი

ხავერდოვან სეზონზე დასვენებისთვის ისრაელიც ძალიან კომფორტულია. შემოდგომის დასაწყისში ჰაერისა და წყლის ტემპერატურა გარკვეულ მომენტში ერთმანეთს უტოლდება – დაახლოებით +25°C, ხოლო ჰაერი ბოლოს და ბოლოს უფრო ტენიანი ხდება. გამოცდილი მოგზაურები სწორედ შემოდგომაზე გვირჩევენ ისრაელის პოპულარულ ექსკურსიებზე წასვლას, რათა მაქსიმალური სიამოვნება და შთაგონება მივიღოთ.

იორდანია

შემოდგომის დასაწყისისთვის იორდანიის ამინდი იდეალურია ბანაობისთვის და სანაპიროზე სეირნობისთვის – ტემპერატურის მაჩვენებლები იშვიათად ეცემა +25°C-ზე დაბლა და აქ პრაქტიკულად არ წვიმს. ასევე, ჩვეულ რეჟიმში აგრძელებს ფუნქციონირებას მრავალი გამაჯანსაღებელი ცენტრი და სპა-კომპლექსი, რომლებიც მკვდარი და წითელი ზღვის სანაპირო ზოლის გასწვრივ მდებარეობს.

იტალია

იტალიაც უამრავ ვარიანტს სთავაზობს მათ, ვისაც შემოდგომის დასაწყისში გარუჯვა სურს. ამ მიზნისთვის შესანიშნავია ისეთი ზღვისპირა კურორტები, როგორიცაა ლიდო დი ეზოლო (კარგია ბავშვებთან ერთად დასვენებისთვის, საცურაო სეზონი ოქტომბრის დასაწყისამდე გრძელდება), ლინიანო, რიმინი (პლაჟის სეზონი სექტემბრის ბოლომდე გრძელდება) და სიცილია (პლაჟები და ზღვა „საცურაო“ მდგომარეობაშია ოქტომბრის ბოლომდე). ქვეყანაში ამინდი ამ დროს ძალიან კომფორტულია: ჰაერის ტემპერატურა იშვიათად ადის +27 გრადუსზე მაღლა, ხოლო ზღვის წყლის ტემპერატურა ჯერ კიდევ შესანიშნავია საბანაოდ (+22-25 გრადუსი).

შემოდგომა იტალიაში ასევე გასტრონომიული ტურების დროა. სწორედ ამ დროს იღებენ ხილისა და კენკრის, მათ შორის ყურძნის მოსავალს, ასე რომ შეგიძლიათ ახალგაზრდა ღვინის დეგუსტაციაზე მოხვდეთ ადგილობრივ მარანსა და საწნეხელში.

პორტუგალია

პორტუგალიის მონახულება ნამდვილად ღირს. აქ ზაფხულში ცხელა, მაგრამ სექტემბრისთვის სასიამოვნო თბილი ამინდია +23-25°С-დან. ამასთან, მზიანი დღე 9 საათზე მეტხანს გრძელდება. პლაჟებზე კვლავ ხალხმრავლობაა, მაგრამ ეს აბსოლუტურად არ შეგიშლით ხელს, რომ თქვენი დასვენებით ისიამოვნოთ. პორტუგალია შესანიშნავი ვარიანტია როგორც რომანტიკული, ისე სოლო მოგზაურობისთვის. შემოდგომის დასაწყისში ძირითადად ჯავშნიან ტურებს ქვეყნის სამხრეთ სანაპიროზე, ალგარვეს პროვინციაში ან მადეირაზე.

ტაილანდი

ტაილანდში ტურისტული სეზონის პიკი სწორედ შემოდგომის თვეებზე მოდის, რადგან ამ დროს წვიმების სეზონი სრულდება, ამინდი შედარებით სტაბილურია და სიცხე აღარ არის ისეთი დამქანცველი, როგორც ზაფხულში. სექტემბერში ჰაერის ტემპერატურა +25-32 გრადუსამდე აღწევს, ხოლო წყლის – +27, ოქტომბერში კი ჰაერის ტემპერატურა – +22–დან +31 გრადუსამდეა, წყლის კი +26 გრადუსამდე. აქ ნებისმიერი ნიუანსი ულამაზესი ბუნებით, განსხვავებული კულტურითა და რბილი კლიმატით ნაზღაურდება, რასაც თან ერთვის კარგად განვითარებული მომსახურება და ინფრასტრუქტურა. ტაილანდის ყველაზე პოპულარული მიმართულებებია ფუკეტი და პატაია.

ინდონეზია

ბალიზე წლის ნებისმიერ დროს შეგიძლიათ გამგზავრება – ზღვა ყოველთვის თბილია (საშუალოდ +27 გრადუსი), ხოლო ჰაერი +30 გრადუსამდე თბება. მაგრამ სწორედ ხავერდოვან სეზონზე ნალექის მინიმუმი მოდის, კლიმატი და ამინდი კი შესანიშნავია. გარდა ამისა, შემოდგომაზე შეგიძლიათ არა მხოლოდ პლაჟზე დაისვენოთ, არამედ კუნძულზე გაემგზავროთ, ადგილობრივ ტაძრებს ეწვიოთ, ბალის ღამის ცხოვრებაში მიიღოთ მონაწილეობა ან ადგილობრივი სამზარეულო დააგემოვნოთ.

შემოდგომის თვეები ასევე კარგი დროა ევროპაში ოჯახთან ერთად დასვენებისთვის, ან მარტო საექსკურსიო მოგზაურობისთვის, მაგალითად, ჩეხეთში, შვედეთში, ნორვეგიაში ან დიდ ბრიტანეთში. კულტურული და გასართობი პროგრამების მრავალფეროვნება, მუზეუმები და გამოფენები და ბავშვების თემატური პარკები თქვენს ოჯახურ დასვენებას დაუვიწყარ გახდის.

Posted in ბლოგი, იდეები მოგზაურობისთვის and tagged , , , , , , , , , , , .

მობილური აპლიკაცია

მოიძიეთ და დაჯავშნეთ იაფი ავიაბილეთები პირდაპირ თქვენი სმარტფონებიდან, მიიღეთ უფრო მეტი სიამოვნება თქვენი მომავალი დასვენებისთვის.

გადმოწერა