წარმოიდგინეთ პორტოფინო, სადაც მეზობელ მაგიდასთან შეიძლება ცნობილი მომღერალი ან ქარიზმატული მილიონერი იჯდეს . ხუთი ფერადი მეთევზეთა სოფლისგან შემდგარი ჩინკვე-ტერეს ეროვნული პარკის თვალწარმტაცი პეიზაჟები . გენუა, რომელმაც მსოფლიოს კოლუმბი, პაგანინი და სოუსი „პესტო“ აჩუქა . ეს ყველაფერი ლიგურიაა — იტალიის ჩრდილოეთ ნაწილის მრავალფეროვანი და მომაჯადოებელი რეგიონი.

ჩვენ შევადგინეთ საბაზისო მარშრუტი სპეციიდან სანრემომდე მათთვის, ვინც სანაპიროზე ავტომობილით მოგზაურობას გეგმავს . შეიძინეთ ავიაბილეთები, დაჯავშნეთ მანქანა და გაემგზავრეთ თავგადასავლების შესახვედრად ! ასეთი მოგზაურობის დასაგეგმად პირველი ნაბიჯი, რა თქმა უნდა, ავტომობილის შერჩევაა . იტალიაში მანქანის დაქირავება საკმაოდ მარტივი პროცესია . შეგიძლიათ ისარგებლოთ საერთაშორისო პლატფორმით, როგორიცაა [Discouver Cars], სადაც სხვადასხვა კომპანიის ფასებს შეადარებთ და თქვენთვის იდეალურ ავტომობილს წინასწარ დაჯავშნით, ან იხემძღვანელეთ ჩვენს მიერ მომზადებული პოსტით მანქანის ქირაობა საზღვარგარეთ: სასარგებლო რჩევები . პროცედურისთვის, როგორც წესი, დაგჭირდებათ მართვის მოწმობა და საკრედიტო ბარათი . მეტი ინფორმაციისთვის, თუ როგორ იქირაოთ ავტომობილი იტალიაში, ეწვიეთ ამ ბმულს.

სპეცია

მარშრუტის საწყის წერტილთან ყველაზე ახლოს ფლორენციის აეროპორტია, თუმცა რომიდან და ვენეციიდან აქ ჩამოსვლაც უპრობლემოდ შეგიძლიათ .

გადმოიწერე ჩვენი მობილური აპლიკაცია!

მოიძიე ავიაბილეთები და სასტუმროები ყველაზე იაფად!

APP გადმოწერა

იტალიის მიწაზე დაშვებისთანავე, ჩასხედით ავტომობილში და გაემართეთ საპორტო ქალაქ სპეციასკენ — ამავე სახელწოდების პროვინციის ადმინისტრაციულ ცენტრში . აქედან ძალიან მოსახერხებელია მიმდებარე ღირსშესანიშნაობების მონახულება, ამიტომ გირჩევთ, 2-3 დღით გაჩერდეთ.

რჩევა: თუ თქვენს სასტუმროს პარკინგი არ აქვს, მანქანის დატოვება შეგიძლიათ სადგომებზე: S1 (Via Fiume 143), S2 (Via XV Giugno 637) ან S3 (Via della Pianta, 114) . მეორე და მესამე უფასოა, პირველის მომსახურების ღირებულება კი €3-დან €20-მდე მერყეობს, დროის მიხედვით.

პირველი დღე დაუთმეთ ქალაქში სეირნობას, სადაც თავის დროზე დანტეს, შელის და ჟორჟ სანდს უყვარდათ დროის გატარება (ამ ადგილებს „პოეტების ყურეს“ უწოდებენ) . თქვენს პროგრამაში შეიტანეთ სპეციის მთავარი ღირსშესანიშნაობები: წმინდა გიორგის ციხესიმაგრე (XIII საუკუნე), რომლის ტერიტორიაზეც ახლა არქეოლოგიური მუზეუმია; ამადეო ლიას მუზეუმი XVII საუკუნის ფრანცისკანელთა მონასტრის შენობაში და Museo Navale La Spezia — მსოფლიოს ერთ-ერთი საუკეთესო სამხედრო-საზღვაო მუზეუმი . როცა დაიღლებით, ნებისმიერ პიცერიაში ჩამოჯექით და შეუკვეთეთ პიცა „ფორინატა“ — ბარდის ფქვილისგან დამზადებული ადგილობრივი დელიკატესი, რომელიც გარეგნულად ბლინს წააგავს.

პორტოვენერე

მომდევნო დღეს „სამოთხის კუთხეში“ გაატარებთ — ქალაქ პორტოვენერეში, რომელიც სიყვარულის ქალღმერთის პატივსაცემად დაერქვა, რადგან ოდესღაც აქ მისი ტაძარი იდგა.

რჩევა: აქ მოსახვედრად ისარგებლეთ საზოგადოებრივი ტრანსპორტით: ავტობუსით (€5) ან კატერით (€8 ერთი გზა, €12 ორივე გზა) . მანქანის სპეციაში დატოვება სჯობს, რადგან პორტოვენერეს ცენტრი საფეხმავლო ზონაა, სეზონზე კი პარკინგის ადგილის პოვნა ურთულესია.

აუცილებლად გაისეირნეთ ცენტრალურ კაპელინის ქუჩაზე, რომელზეც 1113 წელს აგებული ქალაქის კარიბჭიდან მოხვდებით . აქ პორტოვენერეს რესტორნების, ბარებისა და მაღაზიების უმრავლესობაა თავმოყრილი . ასევე გირჩევთ, მოინახულოთ 1198 წელს აგებული წმინდა პეტრეს ეკლესია (ქალაქის ერთ-ერთი სავიზიტო ბარათი) და წმინდა ლორენცოს ტაძარი, შემდეგ კი აიარეთ დორიას ციხესიმაგრის (XII-XIV საუკუნე) ტერასაზე, საიდანაც ქალაქის ულამაზესი ხედი იშლება.

ჩინკვე-ტერე

ჩინკვე-ტერეს („ხუთი მიწა“) ეროვნული პარკი, რომელიც იუნესკოს მსოფლიო მემკვიდრეობის სიაშია შეტანილი, ხუთი კოლორიტული მეთევზეთა სოფლისგან შედგება: რიომაჯორე, მანაროლა, კორნილია, ვერნაცა და მონტეროსო . ისინი ერთმანეთთან დაკავშირებულია რკინიგზითა და ტურისტული ბილიკების ქსელით . თუ საკუთარ ძალებში დარწმუნებული ხართ, აირჩიეთ ფეხით გასეირნება — ნამდვილად არ ინანებთ!

რჩევა: ოთხ სოფელში ავტომობილით მოძრაობა აკრძალულია, მეხუთეში კი — შეზღუდული . ამიტომ, უმჯობესია მანქანა სპეციაში დატოვოთ და რიომაჯორეში მატარებლით 10 წუთში ჩახვიდეთ (ბილეთი დაახლოებით €4 ღირს).

რიომაჯორე: პირველი სოფელი, რიომაჯორე, პატარაა . თვალწარმტაცი შემოგარენის გარდა, აქ გელოდებათ იოანე ნათლისმცემლის (XIV ს.), მონტენეროს ღვთისმშობლის (VIII ს.) და სანტა-მარია-ასუნტას (XV-XVI ს.) უძველესი ეკლესიები, ასევე რიომაჯორეს ციხესიმაგრე.
მანაროლა: აქედან მანაროლაში მიდის ცნობილი „სიყვარულის ბილიკი“ . შეგიძლიათ მატარებლითაც იმგზავროთ (2 წუთი, ბილეთი დაახლოებით €4 ღირს) ან ბეკარას გზით ფეხით გაისეირნოთ (დაახლოებით ერთი საათი) . მანაროლას მთავარი ღირსება სანაპიროდან ქალაქზე გადაშლილი „საფოსტო ბარათის“ ხედია.
კორნილია: ჩინკვე-ტერეს ყველაზე პატარა და მაღლა (ზღვის დონიდან 100 მეტრზე) მდებარე სოფელია . საინტერესოა 1334 წელს აგებული წმინდა პეტრეს ეკლესია და გენუის ციხესიმაგრის ნანგრევები.
ვერნაცა: ტურისტების უმრავლესობა ვერნაცას ხუთი სოფლიდან ულამაზესად მიიჩნევს . აქ, ალბათ, ყველაზე მეტი ღირსშესანიშნაობაა (ასევე რესტორნები და მაღაზიები).
მონტეროსო: ჩინკვე-ტერეს უდიდესი და უძველესი სოფელია . აქ მდებარეობს სანაპიროს ყველაზე დიდი პლაჟი და უამრავი საინტერესო ადგილი . გირჩევთ, მოინახულოთ წმინდა ჯოვანი ბატისტას გოტიკური ეკლესია (XIII-XIV ს.), კაპუცინების მონასტერი (XVII ს.) და სოვიორეს ტაძარი — ყველაზე ძველი ლიგურიაში.

სესტრი-ლევანტე

შემდეგი დანიშნულების პუნქტი ლიგურიის ერთ-ერთი ყველაზე თვალწარმტაცი კურორტია, სადაც სპეციიდან მანქანით დაახლოებით ერთ საათში მოხვდებით . სესტრი-ლევანტე ნახევარკუნძულზე მდებარეობს და სამი მხრიდან ხმელთაშუა ზღვა აკრავს . მრავალკილომეტრიანი პლაჟები, განვითარებული ინფრასტრუქტურა, არქიტექტურული შედევრები და ულამაზესი ბუნება — აი, მიზეზები, რის გამოც ეს ქალაქი ასეთი პოპულარულია.

პორტოფინო

ქალაქი, რომელიც უყვართ შეძლებულ დამსვენებლებს (აქ ისვენებენ მადონა, შერონ სტოუნი, სილვესტერ სტალონე, დემი მური, ჯორჯ კლუნი და სხვა ცნობილი სახეები), მხატვრებსა და რეჟისორებს . აქ პირველად მოხვედრისას, მიზეზს თავადაც მიხვდებით — სილამაზე მართლაც აღუწერელია . სესტრი-ლევანტედან პორტოფინომდე მანქანით მგზავრობა დაახლოებით ერთ საათს წაგართმევთ.

რჩევა: ზაფხულში პორტოფინოში ჩამოსვლა უყვართ მდიდრებსა და ცნობილებს, რის გამოც ფასები თითქმის ყველაფერზე მკვეთრად იზრდება . თუ ამ დროს ქალაქის მონახულებას გადაწყვეტთ, შეგიძლიათ ახლომდებარე სოფლებში დაბინავდეთ.

გენუა

ლიგურიის რეგიონის მთავარი ქალაქი, იტალიისა და ევროპის ერთ-ერთი უმნიშვნელოვანესი პორტი, საუნივერსიტეტო და სამეცნიერო ცენტრი . აქ პორტოფინოდან მანქანით ერთ საათში ჩახვალთ.

რჩევა: საღამოს ძველ ქალაქში და პორტის რაიონში სეირნობა არ ღირს — ეს უსაფრთხო არ არის.

გენუაზე იმდენად კონტრასტული მოსაზრებები არსებობს, რომ ღირს ერთი დღით დარჩენა, რათა საკუთარი აზრი ჩამოიყალიბოთ . გაისეირნეთ ისტორიულ ცენტრში, რომელმაც XIV საუკუნის ატმოსფერო შეინარჩუნა, დაათვალიერეთ წმინდა ლავრენტის საკათედრო ტაძარი და აუცილებლად შეიხედეთ ძველ პორტში.

ალბენგა

ჩვენი მარშრუტის შემდეგი წერტილია „ასი კოშკის ქალაქი“ ალბენგა, რომელიც გენუიდან მანქანით დაახლოებით საათ-ნახევრის სავალზეა . ალბენგას ისტორიული ცენტრი ლიგურიაში ერთ-ერთი საუკეთესოდ შემონახულია . ციხის კედელი კოშკებით, ვიწრო, ბნელი ქუჩები — თუ ფანტაზიას მოიშველიებთ, შორეულ წარსულში გადაინაცვლებთ.

სან-რემო

კურორტმა პოპულარობა XIX საუკუნეში მოიპოვა, რადგან აქ უყვარდა დასვენება იმპერატრიცა მარია ფიოდოროვნას, ნიკოლოზ II-ის დედას . მის პატივსაცემად დაერქვა ბულვარს Corso Imperatrice, რომელიც იმპერატრიცას მიერ ნაჩუქარი პალმებითაა დამშვენებული . თებერვლის ბოლოსა და მარტის დასაწყისში სან-რემოში იმართება ცნობილი საესტრადო სიმღერის ფესტივალი, რომელში მონაწილეობითაც დაიწყო ეროს რამაზოტის კარიერა.

რჩევა: სან-რემოდან ნიცისკენ მიმავალ გზაზე შეიარეთ „ყვავილების ქალაქ“ ვენტიმილიაში, რომელიც საზღვრიდან 7 კილომეტრში მდებარეობს . მისი მთავარი ღირსშესანიშნაობაა გენბერის ბოტანიკური ბაღი.

მარშრუტის საბოლოო წერტილიდან ნიცაში მოხვედრა ძალიან მოსახერხებელია (მატარებლით ან მანქანით ერთი საათის სავალზე).

ლიგურიული დელიკატესები, რომლებიც აუცილებლად უნდა გასინჯოთ:

სოუსი „პესტო“ (Pesto alla Genovese): დააგემოვნეთ გენუის სავიზიტო ბარათი . წარმოიდგინეთ ახალი რეჰანის, ფიჭვის თხილის, ნივრისა და პარმეზანის სურნელოვანი, ზურმუხტისფერი ნაზავი, რომელიც იდეალურად ერწყმის ადგილობრივ პასტას, „ტროფიეს“ . ეს უბრალოდ სოუსი კი არა, მთელი ლიგურიის გემოა ერთ თეფშზე.
სუპი Minestrone alla genovese.
პასტა კაკლის სოუსით Salsa di noci, განსაკუთრებით რავიოლის სახეობასთან, Pansotti-სთან ერთად.
ხბოს ხორცის გუფთები Tomaxelle.
ლიგურიული პიცა Sardenaira პომიდვრით, ხახვითა და ნივრით.
ბრტყელი პური Focaccia: დააგემოვნეთ კლასიკური, ზეითუნის ზეთითა და მარილით შეზავებული ფოკაჩა, ან აღმოაჩინეთ ნამდვილი საოცრება — Focaccia di Recco, უთხელეს ცომში მოქცეული გამდნარი, ნაზი სტრაკინოს ყველით . ის ხრაშუნა, არომატული და დაუვიწყარია.
ნებისმიერი კერძი თევზისა და ზღვის პროდუქტებისგან.
ადგილობრივი თეთრი ღვინოები.