ვაველის სასახლე

TOP 10 საინტერესო ადგილი, რომელთა მონახულება ღირს კრაკოვში

უძველესი ქალაქი, რომელიც თითქოს ზღაპრების ილუსტრაციებიდან გაცოცხლდა, კრაკოვი ტყუილად როდი ითვლება მსოფლიოს ერთ-ერთ ყველაზე პოპულარულ და მოგზაურთა საყვარელ ადგილად. ჩვენ  იმ ადგილების შესახებ გიამბობთ, რომლებიც აუცილებლად უნდა იხილოთ კრაკოვში

ერთნი კრაკოვს რამდენიმე დღით სტუმრობენ, მეორენი პოლონეთში მოგზაურობისას გავლით  ჩამოდიან, ზოგიც კი ევროპის სხვა ქალაქებში მგზავრობის დროს მას გადასაჯდომ პუნქტად იყენებს, მაგრამ პოლონეთის ქალაქებიდან კრაკოვი მაინც ყველაზე მეტი პოპულარობით  სარგებლობს. ამგვარად, რა შეიძლება მოვინახულოთ კრაკოვში და  რომელი საინტერესო ადგილებით დავიწყოთ ქალაქის შესწავლა?

1. ბაზრის მოედანი

ადრე აქ უამრავი სავაჭრო რიგი იყო განთავსებული, დღეს კი ეს არის ერთ-ერთი ადგილი, სადაც კრაკოვის მოქალაქეები და ტურისტები  სასეირნოდ მოდიან, შეხვედრებს ნიშნავენ და უბრალოდ ისვენებენ. სხვათა შორის, აქედან მოხერხებულია ქალაქის დათვალიერების დაწყება, რადგან ბაზრის მოედანი მის შუაგულში მდებარეობს.

ბაზრის მოედანი, კრაკოვი

სეირნობა კი აქ მდებარე ტანსაცმლის დარბაზიდან (Sukiennice), რატუშის კოშკიდან  და წმინდა მარიამის ეკლესიიდან დაიწყეთ.

2. ბაზარი „ტანსაცმლის დარბაზი“

ეს არის 1257 წელს აშენებული კრაკოვის (შესაძლოა მთელი ევროპის) უძველესი ბაზარი, რომელიც ზღაპრულ კოშკს მოგაგონებთ. დღევანდელი ტანსაცმლის დარბაზი ნამდვილი მექაა იმ ტურისტებისთვის, რომელთაც კრაკოვის სუვენირების შეძენა სურთ. აქ ყველაფერს იპოვით – ბარათებიდან დაწყებული ქარვით, მაქმანით და ხალხური კოსტიუმებით დამთავრებული, თანაც საკმაოდ ხელმისაწვდომ ფასებად.

ტანსაცმლის ბაზარი

სად მდებარეობს: ტანსაცმლის დარბაზის პოვნა მარტივია, იგი ბაზრის მოედანზე ძველ ქალაქში მდებარეობს.

სამუშაო საათებია: ორშაბათიდან შაბათის ჩათვლით – 10:00 საათიდან 18:00 საათამდე, კვირა – 10:00 საათიდან 16:00 საათამდე.

როგორ ვიმგზავროთ: #123, 129, 130, 105/405, 601, 605, 608, 609 ავტობუსით ან #12, 13 და 18 ტრამვაით.

3. ვაველის სასახლე

ეს არის კრაკოვის ერთ-ერთი ყველაზე საინტერესო ადგილი, რომლის მონახულებაც ნამდვილად ღირს. ძველ დროში ვაველის სასახლე სამეფო რეზიდენციას წარმოადგენდა, დღეს კი ტურისტებს და ყველა იმ მსურველს იღებს, ვისაც ამ ძველი დროის ატმოსფეროს შეგრძნება სურს.

ვაველის სასახლე

როგორ ვიმგზავროთ: #162, 124, 113, 434, 412, 101 ავტობუსით ან #1, 8, 9, 13, 18 ტრამვაით.

უფასო ვიზიტი: ორშაბათობით 1 აპრილიდან 31 ოქტომბრის ჩათვლით (09:30 საათიდან 13 საათამდე) და კვირაობით 1 ნოემბრიდან 31 მარტამდე (10:00 საათიდან 16:00 საათამდე), მაგრამ თუ მუზეუმების დათვალიერება გსურთ, გადახდა მოგიწევთ.

ფასები: სამეფო დარბაზებსა და საგანძურში შესვლის საფასური 4.5 ევროა (თითოეული), სამეფო პალატში – €6, საკათედრო ტაძრის მუზეუმში – €3 (ტაძარში შესვლა უფასოა).

რჩევა:  „არა სეზონზე“ ბილეთების საფასური თითქმის ნახევრდება.

4. „კრაკოვის პლანტის“ პარკი

კრაკოვის დათვალიერების დროს არ გამოგრჩეთ მისი ცნობილი კრაკოვის პლანტის პარკი. ეს შესანიშნავი ადგილია მათთვის, ვისაც ქალაქის ხმაურისა და ფუსფუსისგან დასვენება სურს: ფართო ჩრდილიანი ხეივნები სასეირნოდ გიხმობთ, დატკბით ადგილობრივი ბუნების სილამაზითა და შადრევნების სიგრილით. პარკში შესვლა უფასოა.

პლანტის პარკი კრაკოვში

მდებარეობა: კრაკოვის პლანტის პარკი  წმინდა მარიამის ეკლესიის მახლობლად მდებარეობს.

როგორ ვიმგზავროთ: #7, 10, 13, 19, 24, 40 ტრამვაი (გაჩერება Poczta Glowna).

5. წმინდა მარიამის ეკლესია

სავარაუდოდ ეს არის ქალაქის ყველაზე ცნობადი შენობა და კრაკოვის სავიზიტო ბარათი. ამ ადგილს აუცილებლად უნდა ეწვიოთ – თუ არქიტექტურული სილამაზის გამო არა, ვიტა სტვოშის მიერ მოჩუქურთმებული ულამაზესი საკურთხევლის  სანახავად მაინც. და რა თქმა უნდა, იმ განთქმული მელოდიის მოსასმენად, რომელიც დღეში ოთხჯერ ისმის ეკლესიის კოშკიდან.

წმინდა მარიამის ეკლესია

სამუშაო საათებია: ორშაბათიდან შაბათის ჩათვლით 11:30 საათიდან 18:00 საათამდე, კვირა – 14:00 საათიდან 18:00 საათამდე.

ფასები: შესვლის საფასური 1.5 ევროა.

6. ბარბაკანი

კრაკოვის გმირულ წარსულს რომ გაეცნოთ, ბარბაკანში გაემართეთ. ეს სადარაჯო კოშკი მტრის თავდასხმისგან იცავდა ქალაქს და მღელვარე დროში ქალაქის კედლებს მიღმა მოხვედრის ერთადერთი გზა იყო. დღეს კი ბარბაკანი ქალაქის კულტურული მემკვიდრეობის და მისი ისტორიის ცოცხალი ნაწილია, რომელსაც აუცილებლად უნდა ეწვიოთ კრაკოვში. დღეს აქ ისტორიული მუზეუმის ფილიალი მდებარეობს და ფარიკაობისა და  ისტორიული რეკონსტრუქციის ტურნირები იმართება.

ბარბაკანი

ფასები: ბარბაკანში შესასვლელად ბილეთი უნდა შეიძინოთ (მისი საფასურია €9 და თავდაცვითი კედლების მონახულებასაც მოიცავს). ბილეთის შეძენა შემდეგ მისამართზე შეგიძლიათ:  Sukiennice, Rynek Główny, 1.

მისამართი: ul. Basztowa, Planty.

სამუშაო საათებია: აპრილი-ოქტომბერი ყოველდღე – 10:30 საათიდან 18:00 საათამდე. დაკეტილია ყოველი თვის მეორე ორშაბათს და ნოემბრიდან მარტის ჩათვლით პერიოდში.

7. წმინდა ფლორიანის ეკლესია

ეს არის კრაკოვის ერთ-ერთი საგანძური, რომელმაც მნიშვნელოვანი როლი ითამაშა ქალაქის ცხოვრებაში. სწორედ აქედან იწყებოდა სამეფო გზა, რომელზეც ყველა საზეიმო და სამგლოვიარო პროცესია მიმდინარეობდა.

გირჩევთ ეკლესიაში შეხვიდეთ, რათა მისი მდიდრული და დახვეწილი ინტერიერით დატკბეთ, ასევე იხილოთ 1686 წელს დახატული პოლონეთის მფარველი წმინდანის სურათი.

მისამართი: Warszawska, 1b (კრაკოვის ცენტრალური რკინიგზის სადგურთან ახლოს).

8. მაიუსის კოლეგია

მაიუსის კოლეგია იაგელონის უნივერსიტეტის შენობაა, რომელიც პოლონეთის უძველესი საუნივერსიტეტო ნაგებობაა. არ გამოტოვოთ შესაძლებლობა შუა საუკუნეების სტუდენტების ცხოვრება შეიგრძნოთ: გაისეირნეთ გოთიკური ქვის დერეფნებში, შეიარეთ ეზოში, სადაც  თაღოვანი გალერეა მდებარეობს, და აუცილებლად მოინახულეთ ნამდვილი ალქიმიის ოთახი, სადაც კოპერნიკის ხელსაწყოები ინახება.

მაიუსის კოლეგია

კოლეგიის სამუშაო საათებია: აპრილიდან ოქტომბრის ჩათვლით სამშაბათი, ხუთშაბათი – 10:00 საათიდან 18:00 საათამდე, ნოემბრიდან მარტის ჩათვლით – 10:00 საათიდან 16:00 საათამდე. მთელი წელი ორშაბათი-პარასკევი – 10:00 საათიდან 15:00 საათამდე, შაბათი – 10:00 საათიდან 14:00 საათამდე. შესვლის საფასურია €3.

მისამართი:  Jagiellońska, 15. შეგიძლიათ იმგზავროთ #123, 129, 130, 105/405, 601, 605, 608, 609 ავტობუსით ან №13, 2, 18 ტრამვაით.

იაგელონის უნივერსიტეტში ყოფნის დროს, გირჩევთ ადგილობრივ ბოტანიკურ ბაღს ესტუმროთ, თუ დრო ამის საშუალებას გაძლევთ. მხოლოდ 2 ევროს საფასურად თქვენ შესანიშნავი ბუნების გარემოცვაში აღმოჩნდებით: აქ თქვენ იხილავთ როგორც ტროპიკული ტყეების „მობინადრეებს“, ისე ფიჭვებსა და ნაძვებს. შეეცადეთ ბაღის ყველზე ძველი მობინადრე იპოვოთ –  იაგელონის მუხა, რომელიც უკვე 200 წლისაა.

სამუშაო საათებია: აპრილი, ოქტომბერი – ყოველდღე 09:00 საათიდან 19:00 საათამდე (შემოდგომაზე – 17:00 საათამდე).

მისამართი: Mikołaja Kopernika, 27.

9. ვოლსკის ტყე

გსურთ ნამდვილ ტყეში მოხვდეთ? არაფერია უფრო ადვილი! კრაკოვში  სწორედ ასეთი ტყე მდებარეობს – ვოლსკის ტყე, 400 ჰექტარზე გაშლილი ქვეყნის უმსხვილესი ბუნებრივი ტყეპარკი.

ვოლსკის ტყე

მაგრამ არ შეგეშინდეთ, გზა არ დაგებნევათ. ტყეში ყველა ბილიკი მარკირებულია, დამონტაჟებულია მაჩვენებლები. ეს იდეალური ვარიანტია მთელი დღის ბუნებაში გასატარებლად: ტყეში უამრავი აღჭურვილი ავტოსადგომია, ციცაბო ბილიკები კი შესანიშნავი ვარჯიში იქნება აქტიური დასვენების მოყვარულთათვის.

როგორ ვიმგზავროთ:  №102 და 134 ავტობუსებით.

10. კრაკოვის ისტორიული მუზეუმი

სად შეიძლება კრაკოვის ისტორიას გავეცნოთ, თუ არა ისტორიულ მუზეუმში? კრაკოვის ისტორიულ მუზეუმში, რომელიც Rynek Główny, 35 ქუჩაზე მდებარეობს, თქვენ ნახავთ თუ როგორი  იყო შუა საუკუნეების ცხოვრება კრაკოვში, დაათვალიერებთ  ქალაქის უძველეს რუკებს, მოქალაქეების იმ დროის სამკაულებსა და ტანსაცმელს, ასევე საყოფაცხოვრებო  და მრავალ სხვა ნივთს.

სამუშაო საათებია: მუზეუმი ღიაა ყოველდღე 10:00 საათიდან 19:00 საათამდე.

მისამართი: Rynek Główny, 35, ძველი ქალაქი (ბარბაკანის მახლობლად).

 

წაიკითხეთ ასევე:

 

ყველაზე იაფი ავიაბილეთები Tbilisi-დან Krakow-მდე 1 წლის განმავლობაში

გაფრენის თარიღი დაბრუნების თარიღი გაჩერება ავიაკომპანია ბილეთების მოძებნა

28.03.2019

04.04.2019

1 stop

ფასი 575

20.04.2019

25.05.2019

1 stop

ფასი 494

01.05.2019

31.05.2019

1 stop

ფასი 637

03.08.2019

17.08.2019

1 stop

ფასი 672

 

Posted in ბლოგი, კრებულები and tagged , , .