ზაფხულო დაბრუნდი: ოქტომბერში პლაჟზე დასვენების 5 იდეა

სად უნდა გაემგზავროთ შვებულებაში შემოდგომის შუა რიცხვებში, თუ თურქეთის კურორტები უკვე მოგწყინდათ ? ჩვენ მოგზაურთა მიმოხილვას გავეცანით, შევისწავლეთ ამინდის პროგნოზი და მზად ვართ გაგიზიაროთ მინი-კვლევის შედეგები!

1 . სიცილია (იტალია)

ჰაერის ტემპერატურა ოქტომბერში: +30°C-მდე

ხმელთაშუა ზღვის წყლის ტემპერატურა: +22°C-მდე.

იონიის ზღვის წყლის ტემპერატურა: +24°C-მდე.

ტირენიის ზღვის წყლის ტემპერატურა: +23°C-მდე

საბანაო სეზონი მაისიდან ოქტომბრის ჩათვლით გრძელდება.

კუნძულის პლაჟები სამ ჯგუფად იყოფა: მუნიციპალურ, სადაც ფულს მხოლოდ ქოლგებსა და შეზლონგებში გადაიხდით, კერძო – ფასიანი შესასვლელით და „ველური“ – ცივილიზაციის უმცირესი ნიშანწყლის გარეშე.

სიცილიის ტირენიის სანაპირო (პალერმოდან მესინამდე) – ეს არის სან-ვიტო-ლო-კაპო (ტურისტების აზრით კუნძულის საუკეთესო პლაჟი), ბავშვებთან ერთად მოგზაური ოჯახებისთვის იდეალურად შესაფერისი მონდელო და ჩეფალუ, კენჭიანი კამპოფელიჩე დი როჩელა და კაპოს კონცხზე მდებარე ვინდსერფერთა საყვარელი პლაჟი.

აღმოსავლეთ სანაპირო, რომელსაც იონიის ზღვა აკრავს გარს – ეს არის მესინას პლაჟები, რომელთა სიგრძე დაახლოებით 200 კილომეტრია, ტაორმინასა და კატანიას მოდური კურორტები . ტაორმინას პლაჟი პატარა და ძალიან ხალხმრავალია და იქ მისვლა არცთუ ისე მოსახერხებელია . სამაგიეროდ ახლა ყველა მსურველს შეუძლია მოხვდეს ლიდო მაცაროს ყურეში, სადაც ადრე მხოლოდ ჰოლივუდის ვარსკვლავები ისვენებდნენ . კურორტის შემოგარენში პოპულარულობით სარგებლობს ჯარდინი ნაქსოსისა და ლეტოიანის პლაჟები . მესინას დასავლეთით მდებარეობს ეოლიის კუნძულები, რომლებიც იუნესკოს მსოფლიო მემკვიდრეობის ძეგლთა დაცვის სიაშია შეტანილი.

კუნძულის სამხრეთ-აღმოსავლეთით მდებარე პოპულარული კურორტებია: ფონტანე-ბიანკე (აქ ლამაზი პლაჟია, წვრილი თეთრი ქვიშით, მაგრამ ძალიან პატარა) და ნოტო პლაჟ ლიდო დი ნოტოსთან ერთად.

სიცილიის ხმელთაშუა ზღვის სანაპირო ერთ-ერთი საუკეთესო ადგილია პლაჟზე დასასვენებლად . ძირითადი კურორტებია: რაგუზა (ყველაზე პოპულარული პლაჟები თავმოყრილია მარინა დი რაგუზას ზონაში), აგრიჯენტო (რომლის მიდამოებში, სკალა დელ ტურჩის კლდის ორივე მხარეს, კუნძულის რამდენიმე ულამაზესი პლაჟი მდებარეობს), მარსალა (საბანაოდ არ არის შესაფერისი, მაგრამ იდეალურია კაიტინგისა და ვინდსერფინგისთვის), ეგადის კუნძულები.

კუნძულზე ბევრი ღირსშესანიშნაობაა, გთავაზობთ რამდენიმეს, რომლებიც აუცილებლად უნდა მოინახულოთ:

• აქტიური ვულკანი ეტნა (უდიდესი ევროპაში, 3300 მეტრი ზღვის დონიდან);
• ტაძრების ხეობა – კომპლექსი, რომლის ტერიტორიაზეც შემონახულია ჩვ.წ . აღ.-მდე V-IV საუკუნეების საკულტო შენობები, რომელთაგან ყველაზე ცნობილია ოლიმპიური ზევსის ტაძარი;
• სირაკუზის ანტიკური ძეგლები: ბერძნული თეატრი, რომაული ამფითეატრი, ეურიალოს ციხე;
• სამეფო სასახლე პალერმოში.

რა უნდა დააგემოვნოთ: შემწვარი ბრინჯის ბურთულები სხვადასხვა შიგთავსით (arancini), კვერები მუხუდოს ფქვილისგან (panelle), სენდვიჩი ელენთით (panino con la milza), სპაგეტი ბადრიჯნით და რიკოტა ყველით pasta alla norma), სპაგეტი ზღვის ზღარბით (pasta con I ricci), მასკარპონეს ან რიკოტას ყველისგან დამზადებული კრემიანი ხვეულები (canolli), ტორტი ხილით ან მარციპანით (cassata), დამსხვრეული ხილის ყინული (granita), კანფეტები ნუგით და ფისტით (torroncini) . პოპულარული ალკოჰოლური სასმელებია: ღვინო (ყველაზე ცნობილია მაგარი სადესერტო მარსალა), ლიქიორები Mandarincello და Limoncello.

შესვლის რეჟიმი ქართველებისთვის: უვიზო (ბიომეტრიული პასპორტების მფლობელებისთვის) .

იტალიაში ტურისტული მიზნით ყოფნა შესაძლებელია მაქსიმუმ 90 დღე ნახევარ წელიწადში.

როგორ ჩავიდეთ: საჰაერო გზით (საერთაშორისო აეროპორტები მდებარეობს პალერმოსა და კატანიაში, შიდა რეისები ასევე ხორციელდება ტრაპანიში, პანტელერიასა და ლამპედუზაში) ან ზღვით (საბორნე მიმოსვლა არსებობს რომთან, ნეაპოლთან, გენუასთან, სალერნოსთან და კონტინენტური იტალიის სხვა ქალაქებთან, რომლის მეშვეობითაც მგაზვრები ჩადიან პალერმოში, ტრაპანიში, პოცალოში, კატანიასა და მესინაში).

2 . სარდინია (იტალია)

ჰაერის ტემპერატურა ოქტომბერში: +26°C-მდე

ხმელთაშუა ზღვის წყლის ტემპერატურა: +20°C-მდე.

ტირენიის ზღვიდ წყლის ტემპერატურა: +23°C-მდე

საბანაო სეზონი მაისის ბოლოდან ნოემბრის ბოლომდე გრძელდება.

კუნძულზე 250-ზე მეტი პლაჟია, რომელთა სიგრძე 1800 კილომეტრია . ზოგიერთ მათგანზე ხმელეთით მოხვედრა ადვილი არ არის, მაგრამ ტურისტებს ცხოვრებას წყლის ტრანსპორტი უმარტივებს: იახტები, ნავები და კატარღები.

კოსტა სმერალდას რეგიონი (ზურმუხტის სანაპირო) შესაფერისია მათთვის, ვინც მიჩვეულია ფუფუნებასა და კომფორტს, ეს კუნძულის ელიტარული კუთხეა მომთხოვნი სტუმრებისთვის . იგი მოიცავს არცაკენას, პორტო ჩერვოს, პოლტუ კვატუსა და კაპრიჩოლის კურორტებს.

ალგერო (მარჯნის რივიერა) სასარის პროვინციაში იდეალური კურორტია ბავშვებთან ერთად დასასვენებლად . იგი მოიცავს 90 კილომეტრიან სანაპირო ზოლს, ყველაზე პოპულარული პლაჟია ქვიშიანი ლიდო დი ალგერო წყალში დამრეცი შესასვლელით . ადგილობრივი მოსახლეობა ლე ბომბარდეს ნაკლებად ხალხმრავალ პლაჟზე დასვენებას ანიჭებს უპირატესობას, რომელიც ფიჭვის ხეებითაა გარშემორტყმული.

ორისტანო ასევე შესაფერისია მოზარდი დამსვენებლებისა და მათი მშობლებისთვის . კურორტი სარდინიის ერთ-ერთ ულამაზეს კუთხეში მდებარეობს, მისგან რამდენიმე კილომეტრშია მარი ერმისა და ის არუტას პლაჟები, რომელიც დაფარულია ბრინჯის მარცვლების მსგავსი თეთრი კვარცის პატარა ნატეხებით .

ეს „ველური“ პლაჟებია, რომელთა მახლობლად არ არის არც რესტორნები და არც სასტუმროები . შემოგარენში არის კარგი ადგილი სერფინგისტებისთვის – ქვიშიანი პლაჟი პუტცუ იდუ.

კალიარი სარდინიის ადმინისტრაციული ცენტრია, მას ირჩევენ ისინი, ვისაც პლაჟის დასვენების საექსკურსიო პროგრამასთან შეთავსება სურს . ქალაქის მთავარი პლაჟი პოეტო სეზონზე ძალიან ხალხმრავალია, რის გამოც წყალი ხშირად მღვრიეა, მაგრამ ალტერნატივაც არსებობს: ცისფერი დროშით დაჯილდოვებული კოსტა რეი და თვალწარმტაცი ვილასიმიუსი.

გამონახეთ დრო კალიარის ღირსშესანიშნაობების დასათვალიერებლად: რომის ამფითეატრი (ჩვ.წ.აღ.-ის I-II სს.), სანტა-მარიას ტაძარი, სან-რემის ბასტიონი, რომლის ტერასიდან ქალაქის საუკეთესო ხედი იშლება და პარკი Parco di Molentargius, სადაც ვარდისფერი ფლამინგოები ბინადრობენ.

რა უნდა დააგემოვნოთ: თევზის წვნიანი თინუსითა და კეფალის ხიზილალით (sa cassola), შემფურზე შემწვარი გოჭის ხორცი (porceddu), მოხრაკული ცხვრის ხორცი, ზღვის პროდუქტები გრილზე, ზეთში შემწვარი რავიოლი ყველით . ალკოჰოლური სასმელების მოყვარულებს ვურჩევთ დააგემოვნონ ადგილობრივი ღვინო, რომელიც ნაკლებადაა ცნობილი კუნძულის საზღვრებს გარეთ, ასევე ნაყენი და ლიქიორი: Amaro di cardo, Corbezzolo, Filu eferru, Mirto და Limone.

შესვლის რეჟიმი ქართველებისთვის: უვიზო (ბიომეტრიული პასპორტების მფლობელებისთვის) . იტალიაში ტურისტული მიზნით ყოფნა შესაძლებელია მაქსიმუმ 90 დღე ნახევარ წელიწადში.

როგორ ჩავიდეთ: საჰაერო გზით (აეროპორტები მდებარეობს კალიარიში, ოლბიასა და ალგეროში) ან ზღვით (ბორნით ლივორნოს, პიომბინოს, ჩავიტავეკიას, გენეას, ნეაპოლის, პალერმოსა და ტრაპანის პორტებიდან).

3 . ეილათი (ისრაელი)

ჰაერის ტემპერატურა ოქტომბერში: +29°C-მდე.

ხმელთაშუა ზღვის წყლის ტემპერატურა: +26°C-მდე.

აქ ბანაობა მთელი წლის განმავლობაში შეგიძლიათ, წყლის ტემპერატურის ნიშნული +21°C-ზე ქვემოთ არ ეცემა.

კურორტი იდეალურია ბავშვებთან ერთად მოგზაური ოჯახებისთვის (ამას ხელს უწყობს თბილი ზღვა და ქვიშიანი პლაჟები), აგრეთვე სნორკელინგისა და დაივინგის მოყვარულთათვის – ეილათის სანაპიროსთანს საზღვაო ნაკრძალი მდებარეობს.

სანაპირო ზოლი 12 კილომეტრზეა გადაჭიმული, ყველაზე პოპულარული პლაჟია მიგდალორი უფასო შეზლონგებითა და შესანიშნავი ბარით . აქ ქვიანი ფსკერია, ამიტომ წყალი ყოველთვის გამჭვირვალეა, ხოლო მარჯნის რიფი პირდაპირ ნაპირიდან შეუიარაღებელი თვალით ჩანს.

უამრავ სასტუმროს საკუთარი პლაჟი აქვს, რომლებზეც შესვლა სტუმრებისთვის უფასოა . ისინი ქალაქის ფარგლებში მდებარეობს და საუკეთესოდ შეეფერებათ პატარებს . მინუსი – აქ ვერ ნახავთ მარჯნებსა და თევზებს.

იდეალური ადგილები აკვალანგით მყვინთავებისთვის ეილათის სამხრეთით მდებარეობს . კურორტის ამ ნაწილის ერთ-ერთ ყველაზე პოპულარულ პლაჟზე – დელფინების რიფზე შესასვლელად თანხის გადახდა მოგიწევთ.

ეილათში წყალქვეშა ობსერვატორია „მარჯნის სამყარო“ ფუნქციონირებს, სადაც შეგიძლიათ გაიგოთ ყველაფერი წითელი ზღვის მცენარეულობისა და ბინადრების შესახებ . კიდევ ერთი საინტერესო ღირსშესანიშნაობაა: ტიმნას ხეობა, სადაც ჯერ კიდევ ჩვ.წ.აღ.-მდე X საუკუნეში სპილენძს მოიპოვებდნენ (ადგილობრივ მაღაროებს „მეფე სოლომონის მაღაროებს“ უწოდებენ) . ტერიტორიაზე ათობით საფეხმავლო, საავტომობილო და საველოსიპედო მარშრუტია მოწყობილი, რომლებიც მნიშვნელოვანი არქეოლოგიური აღმოჩენების ადგილებს აკავშირებს.

ბავშვებთან ერთად მოგზაურ ოჯახებს ვურჩევთ ეწვიონ თემატურ კომპლექსს „მეფეთა ქალაქი“ და გასართობ პარკს „დელფინების რიფი“, სადაც შეგიძლიათ იხილოთ აფალინა-დელფინები და ასევე გაისეირნოთ გამჭვირვალე ფსკერის მქონე იახტით ან გემით.

რა უნდა დააგემოვნოთ: შაურმა და ფალაფელი ქუჩის ერთ-ერთ ჯიხურში, მაროკოს წვნიანი ბრინჯით, მუხუდოთი და ოსპით, ბოსტნეულის პუდინგი „კუგელი“, ერბო-კვერცხი ბოსტნეულით „შაკშუკა“, ისრაელის ღვინო, ლიქიორი „საბრა“ და ანისის არაყი „არაკი“.

შესვლის რეჟიმი ქართველებისთვის: უვიზო . ისრაელში ტურისტული მიზნით ყოფნა შესაძლებელია მაქსიმუმ 90 დღე ნახევარ წელიწადში.

როგორ ჩავიდეთ: ქალაქის ცენტრში მდებარეობს საერთაშორისო აეროპორტი, სადაც შეგიძლიათ ჩამოფრინდეთ თბილისიდან თელ-ავივში გადაჯდომით . მეორე ვარიანტია პირდაპირი ფრენა „თბილისი – თელ-ავივი”, შემდეგ კი ეილათამდე ავტობუსით მგზავრობა (დაახლოებით ხუთი საათი).

4 . კვიპროსი

ჰაერის ტემპერატურა ოქტომბერში: +28°C-მდე.

ხმელთაშუა ზღვის წყლის ტემპერატურა: +24°C-მდე.

საბანაო სეზონი მაისიდან ოქტომბრის ჩათვლით გრძელდება, მაგრამ ზაფხულში აქ ძალიან ცხელა – დღისით შეჩვეული ადგილობრივებიც კი თავს არიდებენ ქუჩაში გამოჩენას.

კუნძულზე დაახლოებით 90 პლაჟია, მრავალი მათგანი ცისფერი დროშითაა დაჯილდოვებული სისუფთავისა და უსაფრთხოებისთვის . პლაჟების უმეტესობა შესაფერისია ბავშვებისთვის ქვიშიანი სანაპიროსა და წყალში დამრეცი შესასვლელის გამო.

საინტერესო ფაქტი: კვიპროსის ყველა პლაჟი მუნიციპალურია, შეგიძლიათ თქვენთვის სასურველ ნებისმიერ მათგანზე უფასოდ დაისვენოთ (თუნდაც ეს სასტუმროს ტერიტორია იყოს) . მხოლოდ შეზლონგისა და ქოლგის საფასურის გადახდა მოგიწევთ.

აია-ნაპა – ახალგაზრდული, „საწვეულებო“ და საკმაოდ ძვირადღირებული კურორტია . მაგრამ ეს მხოლოდ ზაფხულში – შემოდგომაზე თამამად შეგიძლიათ ბავშვებთან ერთად ჩამოხვიდეთ . ითვლება, რომ აქაური პლაჟები (ნისი-ბიჩი, სენდი ბეი, მაკრონისოსი, ლანდა) კვიპროსზე ყველაზე ლამაზი პლაჟებია, გარდა ამისა, აქ უამრავი გასართობი და ღირსშესანიშნაობაა ნებისმიერი გემოვნების ადამიანისთვის . ბავშვებთან ერთად მოგზაურ ოჯახებს ვურჩევთ ეწვიონ აკვაპარკს WaterWorld, რომელიც მორთულია ძველი საბერძნეთის მითების მოტივებზე, და დელფინარიუმს, ხოლო ყველა გამონაკლისის გარეშე უნდა ეწვიოს მონასტერს, „გრეკოს კონცხის“ ეროვნულ პარკს და ნავით სანაპიროს გასწვრივ გაისეირნოს.

ლარნაკა შესაფერისია მათთვის, ვისაც კარგად დასვენება სურს და თანაც შეზღუდული ბიუჯეტის ფარგლებში . აქ პლაჟები ძირითადად ქვიშიანი და კენჭიანია, მათგან საუკეთესოდ ითვლება მაკენზი და დეკელია . კურორტის მთავარი ღირსშესანიშნაობებია: წმინდა ლაზარეს ტაძარი, ფინიკუდესის სანაპირო და სტავროვუნის მოქმედი მონასტერი, სადაც ჯვრის ის ნაწილი ინახება, რომელზეც იესო ქრისტე აცვეს ჯვარს . საბავშვო გასართობი საშუალებებიდან არის ლუნა-პარკი და ზოოპარკი . დაივერებიც არ მოიწყენენ – კურორტის ნაპირებთან ზღვის ფსკერზე მდებარეობს 1980 წელს ჩაძირული შვედური ბორანი და 1943 წელს ჩაძირული კრეისერი.

პაფოსი – კვიპროსის ერთ-ერთი ყველაზე ძვირადღირებული კურორტია, რომელიც ძირითადად განკუთვნილია მოზრდილებისთვის . აქ უმეტესად ხრეშიანი და კენჭიანი პლაჟებია, წყალში შესასვლელი ყოველთვის არ არის მოხერხებული კლდოვანი რელიეფის გამო . საუკეთესო პლაჟების სია ასე გამოიყურება: კორალ-ბეი, კორალია, ფაროსი, ვირსუდია და გარეუბნებში მდებარე გეროსკიპუ . საინტერესო ღირსშესანიშნაობებია: აფროდიტეს საბანაოები, სამეფო სამარხები, არქეოლოგიური პარკი და პაფოსის ციხე . ბავშვები დაინტერესდებიან აკვაპარკის, აკვარიუმის ან ფრინველების პარკის მონახულებით.

რა უნდა დააგემოვნოთ: „ხორიატიკი სალათა“ (ჩვენ ამ სალათს ბერძნულს ვუწოდებთ), თხის ან ცხვრის რძის წვნიანი „ტრაჰანასი“, „სუვლას“ მწვადი, საუზმეულის ასორტი „მეზე“ (თევზის, ხორცის ან შერეული), ფუნჩულა „ლუკუმადესი“ თაფლის სიროფით . ალკოჰოლურ სასმელებს შორის აღსანიშნავია ანისის ბრენდი „უზო“, ყურძნის შინნახადი არაყი „ზივანია” და ღვინო „კომანდარია” თაფლის, ჩირისა და სანელებლების გემოთი.

შესვლის რეჟიმი ქართველებისთვის: უვიზო (ბიომეტრიული პასპორტების მფლობელებისთვის) . კვიპროსზე ტურისტული მიზნით ყოფნა შესაძლებელია მაქსიმუმ 90 დღე ნახევარ წელიწადში.

როგორ ჩავიდეთ: საზღვარგარეთიდან სტუმრებს იღებენ ლარნაკასა (Wizzair პირდაპირ რეისებს ახორციელებს ქუთაისიდან) და პაფოსის აეროპორტები (აქ ფრენა შეგიძლიათ მხოლოდ გადაჯდომით ან ჩარტერით).

5 . როდოსი (საბერძნეთი)

ჰაერის ტემპერატურა ოქტომბერში: +24°C-მდე.

ხმელთაშუა ზღვის წყლის ტემპერატურა: +23°C-მდე.

ეგეოსის ზღვის წყლის ტემპერატურა: +24°C-მდე.

საბანაო სეზონი გრძელდება მაისის შუა რიცხვებიდან – ივნისის დასაწყისიდან ოქტომბრის შუა რიცხვებამდე.

როდოსის პლაჟები ძირითადად კენჭიანია, მათი უმეტესობა შესაფერისია ბავშვებთან ერთად მოგზაური ოჯახებისთვის.

ფალირაკი როდოსის ყველაზე „საწვეულებო“ კურორტია, რომლის ოკუპაციას სეზონზე ხმაურიანი ახალგაზრდობა ახდენს . აქ კუნძულის ერთ-ერთი ყველაზე ლამაზი პლაჟი მდებარეობს (და სამწუხაროდ ერთ-ერთი ყველაზე ხალხმრავალი), ხოლო კალიტეას ყურეში შეგიძლიათ თავი გამოსცადოთ სპორტის ერთ-ერთ წყლის სახეობაში . კოლიმიბია შესაფერისია სნორკელინგისთვის.

თუ გსურთ პლაჟის დასვენება მდიდარ საექსკურსიო პროგრამასთან შეათავსოთ, შეარჩიეთ ლინდოსი . ქალაქი შედის იუნესკოს მსოფლიო მემკვიდრეობის ძეგლთა დაცვის სიაში, მისი მთავარი ღირსშესანიშნაობა – სიდიდითა და მნიშვნელობით მეორე ბერძნული აკროპოლისია.

ლარდოს-ბეიდან პლიმირიმდე 30 კილომეტრზე ველური პლაჟებია გადაჭიმული – სამოთხის კუთხე მათთვის, ვინც ხალხმრავლობით დაიღალა და მარტო ყოფნა სურს . ცოტა მოშორებით მდებარეობს როდოსის ყველაზე სამხრეთით მდებარე კურორტი – პრასონისი, რომლის ნაპირებზე ორი ზღვა ერწყმის ერთმანეთს.

კუნძულის დედაქალაქთან, ქალაქ როდოსთან, ყველაზე ახლოს მდებარეობს იალისოსისა და იქსიას კურორტები . სანაპიროს ამ ნაწილში თავმოყრილია ფეშენებელური კომპლექსები და საუკეთესო პლაჟები, აქ ყოველწლიურად იმართება სერფერთა შეჯიბრებები . ერთი დღით დედაქალაქს ეწვიეთ, რათა იხილოთ იუნესკოს ძეგლთა დაცვის სიაში შეტანილი ძველი ქალაქი, მონტე-სმიტის მთაზე მდებარე არქეოლოგიური რაიონი (რამდენიმე ანტიკური ტაძრის ნანგრევი და სტადიონი, რომელიც ჩვ.წ.აღ.-მდე II საუკუნეში ააგეს), ხორას ღვთისმშობლის სახელობის ეკლესია, რაინდთა დიდი მაგისტრის სასახლე . ასევე გირჩევთ ეწვიოთ როდოსის შემოგარენში მდებარე პეპლების ხეობას, სადაც ფრთებიანი ლამაზმანები ბუნებრივ პირობებში ბინადრობენ.

რა უნდა დააგემოვნოთ: „ბერძნული“ სალათი (კონტინენტური საბერძნეთისგან განსხვავებით აქ მას სწორედ ასე უწოდებენ), „ძაძიკის“ სოუსი (იოგურტი კიტრით, ნივრით, მწვანილებითა და სანელებლებით), საუზმეული „მეზე“, კატლეტი „კეფტედესი“, მწვადი „სუვლაკი“, ბადრიჯანი კარტოფილითა და ფარშით „მუსაკა“, იოგურტი თაფლით, ბაქლავა . პოპულარული ალკოჰოლური სასმელებია: ღვინო (მაგალითად „რეცინა“ წიწვის გემოთი), ბრენდი „მეტაქსა“, ანისის არაყი .

შესვლის რეჟიმი ქართველებისთვის: უვიზო (ბიომეტრიული პასპორტების მფლობელებისთვის) . საბერძნეთში ტურისტული მიზნით ყოფნა შესაძლებელია მაქსიმუმ 90 დღე ნახევარ წელიწადში.

როგორ ჩავიდეთ: საერთაშორისო რეისებს იღებს დიაგორასის საერთაშორისო აეროპორტი . საქართველოდან აქ ჩამოსვლა მინიმუმ ერთი გადაჯდომით შეგიძლიათ (მაგალითად, ათენში) Aegean, უკრაინის საერთაშორისო ავიახაზები, თურქეთის ავიახაზებით და სხვა კომპანიების რეისებით, ასევე ჩარტერული რეისებით.

ასევე წაიკითხეთ:

• 10 საინტერესო ადგილი, რომელიც ტალინში უნდა მოინახულოთ
• 20 ადგილი, რომელთა მონახულება ღირს კოპენჰაგენში
• საბერძნეთის TOP-8 თვალწარმტაცი კუნძული: ვირჩევთ დასვენების ადგილს
• 3 დღე პარიზში: გზამკვლევი გიდისგან ყველაზე საინტერესო ადგილებში