ევროპის TOP-9 კურორტი მათთვის, ვისაც გართობა უყვარს

ევროპის ყველაზე გასართობი კურორტები – უბრალოდ ოცნებაა მათთვის, ვისაც უყვარს ცეკვა, გართობა და მხიარულება მთელი ღამის განმავლობაში. უგემრიელესი კოქტეილები, ყველაზე ცხელი წვეულებები, ყველაზე საინტერესო ადამიანების გაცნობა – და უბრალოდ საუკეთესო დასვენება!

აღმოჩნდა, რომ იბიცა ყველაზე პოპულარული, მაგრამ არა ერთადერთი კურორტია ხმაურიანი დასვენების მოყვარულთათვის. საბოლოო სიაში ცხრა მათგანი მოხვდა – თქვენ რომელ კურორტს ირჩევთ?

1. იბიცა, ესპანეთი

პატარა კუნძული ხმელთაშუა ზღვაზე, რომლის ხსენებისას  ნებისმიერი „კლაბერის“ გული სწრაფად იწყებს ცემას. იგი განთქმულია  ხმაურიანი წვეულებებით, თავისუფალი მორალითა და მრავალფეროვანი კონტინგენტით – მდიდრულ სასტუმროებში მცხოვრები ცნობილი ადამიანებისგან დაწყებული იმ ადამიანებით დამთავრებული, რომლებმაც უკანასკნელი ფული გართობაში დახარჯეს და ღამეს სანაპიროზე ათენებენ, ახალგაზრდებიდან დაწყებული იმ ევროპელი პენსიონრებით დამთავრებული, რომლებმაც ახალგაზრდობის გახსენება გადაწყვიტეს… აქ სექსუალური უმცირესობის წარმომადგენლებსაც სწყალობენ, რომლებიც თავინთი კოსტიუმებითა და ვარცხნილობით მოუმზადებელ საზოგადოებას შოკს გვრიან.

კუნძულის ცენტრი, სადაც წვეულებები იმართება – სან ანტონიო და ივისაა. იბიცას კლუბების მაცხოვრებლებსა და მოწვეულ სტუმრებს შორის არიან Paul van Dyk, Fatboy Slim, Paris Hilton, Will Atkinson, David Guetta და სხვა პოპულარული შემსრულებლები.

ჯერ კიდევ 1976 წელს გახსნილი არა მხოლოდ იბიცას, არამედ მსოფლიოს ერთ-ერთი ყველაზე ცნობილი კლუბია – Amnesia (განთავსებულია სან-რაფაელის მახლობლად). ალტერნატიული ვარიანტებია: DC-10, რომელიც  აეროპორტთან ახლოს მდებარეობს, ტალამანკას სანაპიროზე მდებარე Destino, Eden სან-ანტონიოს სანაპიროზე, ​​ Heart ქალაქში ივისა. შესასვლელი ბილეთის ფასი 15 ევროდან იწყება, კოქტეილების – 20 ევრომდე. იბიცას კლუბური კულტურის განუყოფელი ნაწილია – დისკოთეკები ნავებზე, რომლებიც ყოველ ღამე სან-ანტონიოს, ივისასა და პლაია-დენ-ბოსას ქალაქებიდან გადიან ზღვაში.

დღისით კი (თუ, რა თქმა უნდა, საკმარისი ძალა გექნებათ მშფოთვარე ღამის შემდეგ), შეგიძლიათ  ერთ-ერთ პლაჟზე დაისვენოთ (რომლებიც დაახლოებით 18 კილომეტრზეა გადაჭიმული, მათ შორის ნუდისტურიც), Platja es Canar-ის მახლობლად მდებარე ჰიპი-ბაზრობაზე შეიაროთ, დაივინგით ან ვინდსერფინგით დაკავდეთ, ივისას ძველი ქალაქი მოინახულოთ. საღამოს კი  მზის ჩასვლით ისიამოვნეთ (ამბობენ, რომ აქ ისინი ერთ-ერთი ყველაზე ლამაზია მსოფლიოში), შემდეგ კი ისევ გიჟური წვეულებების მორევში ჩაეშვით!

როგორ ჩავიდეთ? აეროპორტიდან ყოველ 15-30 წუთში  №10 ავტობუსი გადის, რომელიც ქალაქი ივისას ავტოსადგურამდე ჩაგიყვანთ (ბილეთის ღირებულებაა €3.5). სეზონზე კუნძულის ძირითად კურორტებამდე დამატებითი ავტობუსები ინიშნება. შუაღამის შემდეგ აეროპორტიდან დედაქალაქში გამგზავრებას მხოლოდ ტაქსით შეძლებთ.

თბილისი-იბიცა მიმართულებით ორი გზის ფრენის ღირებულება 1275 ლარიდან იწყება.

შედარებით ბიუჯეტური ვარიანტი იბიცაზე მოსახვედრად არის ქუთაისიდან გაფრენა ბარსელონაში და შემდეგ ბარსელონიდან იბიცაზე გადაფრენა ასეთ შემთხვევაში შესაძლებლობა გაქვთ 2 ქალაქი დაათვალიეროთ ერთი მოგზაურობით

2. აია-ნაპა, კვიპროსი

ღამის კლუბების, დისკოთეკებისა და ბარების სიუხვე, სადაც ტურისტები და კვიპროსელები მთელი ღამის განმავლობაში ერთობიან, გახდა მიზეზი იმისა, რის გამოც კურორტს „მეორე იბიცას“ უწოდებენ. ქალაქში არის კლუბური კვარტალი, სადაც ყველაზე მეტი გასართობი ადგილია თავმოყრილი. აია-ნაპას ყველაზე ცნობილი კლუბებია: Starskys (აქ საუკეთესო თემატური წვეულებები იმართება), The Castle, Car Wash, Black and White და Red Square,, სადაც უყვართ დასვენება ტურისტებს დსთ-ის ქვეყნებიდან. გირჩევთ შეიაროთ ბარში Crazy Frog, რომელიც კოქტეილების უზარმაზარი ულუფებითა და მგზნებარე ანიმატორებითაა განთქმული.

თუ ერთი-ორი დღის გატარება უფრო მშვიდ გარემოში გსურთ, კურორტის მთავარ ისტორიულ ღირსშესანიშნაობებს ეწვიეთ – მონასტერსა და კლდეში ნაკვეთ სამარხებს Makronissos. ხოლო Greco-ს კონცხის მახლობლად  ეროვნული პარკი მდებარეობს, რომლის ტერიტორიაზეც საცალფეხო და ველოსიპედის მარშრუტებია მოწყობილი.

მზეზე გარუჯვა და ბანაობა გადაწყვიტეთ? აია-ნაპა ამ მიზნითაც კი იდეუალურია, რადგან ადგილობრივი პლაჟები რეგულარულად „ლურჯი დროშით“ ჯილდოვდება სისუფთავისთვის. ყველაზე პოპულარულია Nissi, სადაც სეზონზე ნემსის ჩასაგდები ადგილიც კი არ რჩება, ნაკლებად ხალხმრავალია პლაჟები Landa, Grecian Bay და Makronissos. აქტიური დასვენების მოყვარულებს შეუძლიათ დაკავდნენ დაივინგით, სერფინგით, კატამარანით, ჰიდროციკლით ან იახტით გაისეირნონ, სათევზაოდ წავიდნენ.

როგორ ჩავიდეთ? უახლოესი საერთაშორისო აეროპორტი ლარნაკას შემოგარენში მდებარეობს, კურორტიდან 35 კილომეტრში, საიადანაც აია-ნაპამდე შეგიძლიათ იმგზავროთ ავტობუსით 7-10 ევროდ ან ტაქსით 50-60 ევროდ. მგზავრობის ხანგრძლივობა 40 წუთიდან საათნახევრამდე შეადგენს.

თბილისი-ლარნაკას მიმართულებით ორი გზის ფრენის ღირებულება 675 ლარიდან იწყება.

ბიუჯეტურად მგზავრობა ქუთაისის აეროპორტიდან შეგიძლიათ პირდაპირი რეისით ლარნაკაში

3. ჰერაკლიონი, საბერძნეთი

კუნძული კრეტას უმსხვილეს ქალაქში ღამის ცხოვრება ჩქეფს. ცენტრში, Korai-ს ქუჩაზე თავმოყრილია ყავახანები. Chandakos-ს ქუჩაზე, რომელიც სანაპიროს უერთდება, სხვადასხვა მიმართულების ბარები მუშაობს: აქ შეგიძლიათ მოუსმინოთ როკს, ლათინოს, ბერძნულ მელოდიებს… Sophocles Venizelos ქუჩაზე ღამის კლუბები მდებარეობს საზაფხულო მოედნებით, სადაც განთიადით შეგიძლიათ დატკბეთ მოდური ჰიტების თანხლებით. Island of Desire და Loft  საუკეთესო კლუბებად ითვლება, კრეატიული კოქტეილებისთვის, გირჩევთ ეწვიოთ ბარებს Trito, The Bitters, Wets & Drys და Stone Cocktail.

აქტიური ღამის ცხოვრებით ასევე განთქმულია Peninsula (ჰერაკლიონიდან 28 კილომეტრი) და Malia (ჰერაკლიონიდან 34 კილომეტრი). სეზონზე ამ ქალაქების კლუბებში ცნობილი დიჯეები უკრავენ. კიდევ ერთი ახლომდებარე გასართობი კურორტია Agia Pelagia (ჰერაკლონიდან 18 კმ), სადაც უფრო სიმშვიდე, თუმცა არანაკლები მხიარულებაა.

არ დაგავიწყდეთ, რომ კრეტა არ მხოლოდ საკურორტო კუნძული, არამედ  ჩვ. წ. აღ–მდე II საუკუნეში არსებული მინოსური ცივილიზაციის აკვანია, ამიტომ დასანანი იქნება, თუ რამდენიმე დღეს ღირსშესანიშნაობების მონახულებას არ დაუთმობთ. გირჩევთ ჰერაკლიონის არქეოლოგიურ მუზეუმს ეწვიოთ, რომელიც მსოფლიოში საუკეთესოთა სიაში შედის და კნოსოსის სასახლის ნანგრევები იხილოთ (ლაბირინთი, რომელმაც წარმოშვა მითები მინოტავრის, თესევსისა და არიადნეს ძაფის შესახებ).

მაგრამ ჰერაკლიონში არ არის პლაჟები. რუჯის მისაღებად გაემგზავრეთ, მაგალითად, პლაჟზე Ammoudara Beach (დედაქალაქიდან 5 კილომეტრი).

როგორ ჩავიდეთ? ჰერაკლიონიდან ექვს კილომეტრში ნიკოს კაზანძაკისის სახელობის საერთაშორისო აეროპორტი მდებარეობს, საიდანაც დედაქალაქში ავტობუსით ან ტაქსით (20 ევროდან) შეგიძლიათ იმგზავროთ. ათენისა და ჰერაკლიონის ნავსადგურებს შორის გემები კურსირებს, ბილეთის ფასია 50 ევროდან 160 ევრომდე, მგზავრობის ხანგრძლივობა კი დაახლოებით 9 საათია.

თბილისი-ჰერაკლიონის მიმართულებით ორი გზის ფრენის ღირებულება 650 ლარიდან იწყება.

4. სენტ-ჯულიანსი, მალტა

ქალაქი პაჩევილი, რომელიც ფაქტობრივად სენტ-ჯულიანსთანაა შერწყმული, ქვეყნის გასართობ დედაქალად მიიჩნევა. აქ უამრავი ბარი, რესტორანი, კლუბი და დისკოთეკაა, აქვე მდებარეობს კაზინო და მალტის უდიდესი კინოთეატრი. მხიარულება პეჩევილში დილამდე გრძელდება, ყოველთვის იპოვოთ ადგილს, სადაც დალევას და ცეკვას შეძლებთ. ღამის კლუბები ცენტრალური მოედნის ირგვლივ მდებარე ოთხ ქუჩაზეა თავმოყრილი: Dragonara Road, Wilga Street, St Georges Road და St. Rita Steps.

წვეულებების მოყვარულები გვირჩევენ ვეწვიოთ კლუბებს  Havana, Hugo’s Passion, Axis, Fuego, Barfunk, The Alley და Sabor. აქ სხვადასხვა სტილის მუსიკას უკრავენ, ასე რომ,  თქვენთვის სასურველი დაწესებულების პოვნას მარტივად შეძლებთ. მგზნებარე ღამის შემდეგ დასვენებას გთავაზობთ ბარი  Hugo’s Terrace პლაჟზე St. George’s Bay – სენტ-ჯულიანსის შემოგარენში არსებული ერთადერთი ქვიშიანი პლაჟი.

ქალაქის ფარგლებში სეირნობის მარშრუტში შეიტანეთ საგუშაგო კოშკი და წმინდა გიორგის ყაზარმები, სასახლე Dragonara, სადაც ამჟამად კაზინო მდებარეობს და რამდენიმე საინტერესო ტაძარი, მაგალითად, St. Julian’s Parish church ან Immaculate Conception church.

როგორ ჩავიდეთ? მალტის საერთაშორისო აეროპორტიდან სენტ-ჯულიანსში  X2 ავტობუსი მოძრაობს, ბილეთის ღირებულება 2 ევროა. ტაქსი  20 ევროდან დაგიჯდებათ.

თბილისი-მალტას მიმართულებით ორი გზის ფრენის ღირებულება 900 ლარიდან იწყება.

5. რიჩონე, იტალია

ადრიატიკის ზღვის სანაპიროზე მდებარე ამ საკურორტო ქალაქში იტალიური რიმინის პროვინციის საუკეთესო კლუბები და დისკოთეკებია განთავსებული. გორაკზე თავმოყრილია ყველაზე მოდური მათგანი, ხოლო რიმინის საზღვართან მდებარე პლაჟის ზონა საღამოობით იმ ახალგაზრდებით ივსება, რომლებსაც ვარსკვლავების ქვეშ  ზღვის სანაპიროზე გართობა უყვართ.

80-იანი წლების სტილში საუკეთესო დისკოთეკებია: Byblos, Villa Delle Rose და Peter Pan. საერთაშორისო ჰიტები ისმის დისკოთეკაზე Cocoricò, ლათინოამერიკულ მელოდიებზე ცეკვას შეძლებთ  Palacio de la Salsa-ში. პლაჟის მახლობლად,  „Marano“-დ წოდებულ ზონაში ფუნქციონირებს კლუბები Moijto Beach, Operà, Sbronzo, Palma, El Mexicali.

რიჩონეში წვეულებების შემდეგ ყველაზე პოპულარული გასართობი საშუალება შოპინგია. მოდის სიახლეები Armani, Trussardi, D & G, Guess და სხვა ლუქს ბრენდებისგან ეძებეთ ქუჩაზე Ceccarini, ხოლო  იტალიელი დიზაინერების მიერ შექმნილი ფეხსაცმელი – ქუჩაზე Dante.

თუ  გაუთავებელი წვეულებებისგან დაიღალეთ, შეგიძლიათ ერთ-ერთ ქვიშიან პლაჟს, აკვაპარკს Aquafan ან მეზობელ რიმინიში მდებარე  დელფინარიუმს ეწვიოთ. აქვეა ისტორიული ღირსშესანიშნაობები: ფრანჩესკას  ვილა, მუსოლინის ვილა, კონგრესის სასახლე, ქალაქის შემოგარენში მდებარე ციხე Castello degli Agolanti… თანამედროვე ხელოვნების თაყვანისმცემლები ადგილობრივი სამხატვრო გალერეის კოლექციას შეაფასებენ, ხოლო მათ, ვისაც წარსული აინტერესებს,  რიჩონეს არქეოლოგიური მუზეუმი ეპატიჟებათ.

როგორ ჩავიდეთ? მეზობელ რიმინიში საერთაშორისო აეროპორტი, რკინიგზის სადგური და ავტოსადგური მდებარეობს. ასევე შეგიძლიათ ჩამოფრინდეთ ბოლონიას აეროპორტში, საიდანაც დანიშნულების ადგილამდე მატარებლით იმგზავრებთ.

თბილისი-ბოლონიას მიმართულებით ორი გზის ფრენის ღირებულება 910 ლარიდან იწყება.

6. ლორეტ დე მარი, ესპანეთი

ბარსელონიდან 70 კილომეტრში მდებარე პოპულარული საზღვაო კურორტი კოსტა-ბრავას „საწვეულებო დედაქალაქია“. აქ დემოკრატიული ატმოსფეროა, „ფრიკებს“ და სექსუალური უმცირესობების წარმომადგენლებსაც შეხვდებით. ყველაზე პოპულარული დისკოთეკებია: St Trop’, Revolution, Salero, Londoner, Nidara S.I., Constur S.I., Tropics, Bumper’s, Hollywood Dance Club, Moby’s, Privet de Magic, Gerry’s Bar, La Siesta. მათი უმრავლესობა ღიაა 24 საათის განმავლობაში, რის წყალობითაც ლორეტმა მოიპოვა რეპუტაცია, როგორც კურორტისა, რომელსაც არასდროს სძინავს. აქ რეგულარულად ეწყობა Beach Party ნავებზე, რომლებიც სანაპიროს გასწვრივ კურსირებს.

მზეზე გარუჯვასა და ბანაობას გირჩევთ პლაჟებზე Lloret, Canyelles, Santa Cristina და Fenals, ასევე გირჩევთ ეწვიოთ აკვაპარკს Water World. თუ გსურთ კურორტზე ყოფნის პროგრამა უფრო მრავალფეროვანი გახადოთ, ეწვიეთ Sant Joan ციხე-სიმაგრეს, წმინდა კლოტილდას ბაღებს, ადგილობრივ ისტორიულ სასაფლაოს ან კატების მუზეუმს.

როგორ ჩავიდეთ? კურორტიდან 90 კილომეტრში ბარსელონის საერთაშორისო აეროპორტი მდებარეობს. ლორეტში მოსახვედრად ყველაზე სწრაფი გზა ტაქსით მგზავრობაა (დაახლოებით €150). ეკონომ- ვარიანტია – ავტობუსი (15 ევროდან), რომელიც ღამით არ მოძრაობს.

თბილისი-ბარსელონას მიმართულებით ორი გზის ფრენის ღირებულება 750 ლარიდან იწყება.

უფრო დაბალ ფასად მგზავრობა ბარსელონამდე ქუთაისის აეროპორტიდან არის შესაძლებელი

7. ხერსონისოსი, საბერძნეთი

ეს კურორტი კუნძული კრეტას გასართობ დედაქალაქად ითვლება. აქ კუნძულზე მდებარე გასართობი დაწესებულებების ყველაზე მაღალი კონცენტრაციაა, მუსიკა და სიცილი დილამდე არ ცხრება. ხერსონისოსის ყველზე პრესტიჟული ღამის კლუბია Status, ასევე პოპულარულია New York, Matrix და Amnezia. კლუბებში Bio Bio Club და Camelot Club 80-იანი წლების ჰიტები ისმის, სადაც უფრო ასაკოვანი საზოგადოება ისვენებს. სასმელების დასაგემოვნებლად გეპატიჟებათ ბარები Temple და Saloon Cafe.

დღის განმავლობაშიც არ მოიწყენთ: ხერსონისოსში შესანიშნავი პლაჟებია (საუკეთესო მათგანია: Drepanos და Star Beach) და ორი აკვაპარკი. თუ ქალაქის სახელოვანი ისტორიის შესახებ უფრო მეტი გსურთ გაიგოთ, სასეირნოდ გაემგზავრეთ, რომლის მარშრუტში ჩართეთ რომაული ნავსადგური, ანტიკური თეატრების ნანგრევები და ბაზილიკა. პოპულარობით სარგებლობს ექსკურსიები კუნძული კრეტას სხვა კუთხეებში, მაგალითად უძველეს ქალაქ გორტინაში მინოსური გამოქვაბულებით ან სპინალონგას კუნძულზე, სადაც ვენეციური ციხეების ნანგრევებია შემორჩენილი.

როგორ ჩავიდეთ? ჰერაკლიონიდან ექვსი კილომეტრის მანძილზე ნიკოს კაზანძაკისის სახელობის საერთაშორისო აეროპორტი მდებარეობს.  ხერსონისოსში ჩასვლა ტაქსითაც შეგიძლიათ (დაახლოებით 35 ევრო) ან დედაქალაქის რკინიგზის სადგურში ჩახვიდეთ, საიდანაც  კურორტზე ავტობუსი მოძრაობს (მგზავრობის ხანგრძლივობა დაახლოებით 45 წუთია, ბილეთის ღირებულება €4).

თბილისი-ჰერაკლიონის მიმართულებით ორი გზის ფრენის ღირებულება 700 ლარიდან იწყება.

8. მიკონოსი, საბერძნეთი

საბერძნეთის კუნძულ მიკონოსს არასდროს სძინავს. ექსპერტები მას იბიცას ღირსეულ ალტერნატივად მიიჩნევენ, და მათ მსოფლიოს მრავალი ვარსკვლავი ეთანხმება, როგორიცაა მადონა, ნიკოლას კეიჯი, რასელ კროუ და მაიკლ ჯორდანი. აქ უამრავი გასართობი დაწესებულებაა, მაგრამ Cavo Paradiso პლაჟზე Paradise (მსოფლიოს TOP-10 საუკეთესო დისკოთეკეკების სიაში შედის), Remezzo და Space Mykonos Xperience საუკეთესოდ ითვლება. აქ ცნობილი დიჯეები უკრავენ და ხმამაღალი წვეულები იმართება, სადაც შეგიძლიათ შეხვდეთ მსახიობებს, მუსიკოსებს, სპორტსმენებს და სხვა „ცნობილ ადამიანებს ყდიდან“.

მიკონოსი საინტერესო ღირშესანიშნაობებითაც ცნობილია.  იმ შემთხვევაშიც კი, თუ თქვენ სხვა ტურისტების მსგავსად ექსკურსიების გამო არ ჩამოსულხართ, გირჩევთ ეწვიოთ კასტროს ციხე-სიმაგრეს, რომლის მახლობლად  ეროვნული ძეგლი პარაპორტიანი მდებარეობს (უძველესი ეკლესიების ჯგუფი), იხილოთ „მიკონოსის კარიბჭე“ – ორი შთამბეჭდავი ზომის კოშკი და 1891 წელს აგებული შუქურის მონახულებით დატკბეთ. გვერდი არ აუაროთ ცნობილ ქარის წისქვილებს – კუნძულის სავიზიტო ბარათს (28-დან შემორჩენილია მხოლოდ 7).  

გადაწყვიტეთ რუჯი განაახლოთ? თქვენ მიკონოსის პლაჟები გელოდებათ, რომელთა რეიტინგში ნუდისტური  Paradise და Paraga ლიდერობს, ასევე დაივინგში სავარჯიშოდ შესაფერისი Diving Psiver და Platis Gialos.

როგორ ჩავიდეთ? ათენის ერთ-ერთი ნავსადგურიდან საბორნე მიმოსვლით ან თვითმფრინავით ათენიდან, კუნძულებიდან კრეტა, სანტორინი და როდოსი.

თბილისი-ათენის მიმართულებით ორი გზის ფრენის ღირებულება 450 ლარიდან იწყება.

9. სენ-ტროპე, საფრანგეთი

საფრანგეთის ლაჟვარდოვანი სანაპიროს ერთ-ერთი ყველაზე მოდური კურორტი, სადაც ხელგაშლილი შეგიძლიათ დაისვენოთ და მოიმოქმედოთ ყველაფერი, რაც მოგესურვებათ. რა თქმა უნდა, ფული თუ გეყოფათ, რადგან ლამაზი ცხოვრება იაფი არ ღირს.

საფრანგეთის ყველაზე პრესტიჟული კლუბი, Les Caves du Roy, Byblos სასტუმროში მდებარეობს. მზად იყავით იმისათვის, რომ  30 ევროს კოქტეილში, ხოლო 300 ევროს შამპანურის ბოთლში გადაიხდით, რომელიც საუკეთესო ნამდვილად არ იქნება. რა გაეწყობა, იმისათვის, რომ მდიდართა და ცნობილთა სამყაროსთან შეხების უფლება მოიპოვოთ, გადახდა მოგიწევთ.

კიდევ ერთი ლეგენდარული კლუბია VIP Room, რომელსაც კარლ ლაგერფელდმა ერთხელ მსოფლიოში საუკეთესო უწოდა. დღისით იგი ხმელთაშუა ზღვის  სამზარეულოს რესტორანია, ღამით კი უზარმაზარ საცეკვაო მოედნად იქცევა. ლიდერთა სამეულშია კლუბი Papagayo, რომლის ხშირი სტუმარია ანტონიო ბანდერასი.

სენ-ტროპეს მეორე ყველაზე პოპულარული დასვენების საშუალებაა – შოპინგი. აქ  მსოფლიოს ყველა წამყვანი დიზაინერის ბუტიკი მდებარეობს, სადაც  მარტივად შეგიძლიათ დატოვოთ მთელი თქვენი  ქონება – თავს ნუ დაკარგავთ!

ღამის ცხოვრებით ისიამოვნეთ, მაგრამ ღირსშესანიშნაობებსაც ნუ დაივიწყებთ. ყურადღებას იმსახურებს ძველი ქალაქი, სადაც Notre-Dame de l’Annonciade კაპელაში სინიაკის, მატისისა და სხვა ცნობილი მხატვრების ტილოების მდიდარი კოლექცია ინახება. ხმაურიანი კურორტის მახლობლად უამრავი ტიპური პროვანსული სოფელია, სადაც სიმშვიდეში შეგიძლიათ დაისვენოთ და ადგილობრივი კოლორიტი შეიგრძნოთ (რამატუელი, გასანი, გრიმო და სხვ.).

როგორ ჩავიდეთ? სენ-ტროპედან 100 კილომეტრში ნიცის საერთაშორისო აეროპორტი მდებარეობს. ასევე შეგიძლიათ ნიცის რკინიგზის ცენტრალურ სადგურში ჩამოხვიდეთ, Saint-Raphaël სადგურამდე მიმავალი მატარებელით იმგზავროთ (გზაში დაახლოებით ერთ საათს გაატარებთ,  ბილეთის ღირებულება €10), შემდეგ კი მოგზაურობას ავტობუსით   (დაახლოებით 1 საათი,  €12) ან ნავით (დაახლოებით ერთი საათი, €15) გააგრძელებთ.

თბილისი-ნიცის მიმართულებით ორი გზის ფრენის ღირებულება 900 ლარიდან იწყება.

ასევე წაიკითხეთ:

• ესპანეთის 10 საუკეთესო კურორტი: კოსტა ბრავადან კოსტა დელ სოლიმდე
• ბუდაპეშტი: გამოცდილი მოგზაურების რჩევები
• TOP-20 საინტერესო ადგილი, რომელიც ფლორენციაში შეიძლება მოინახულოთ