დასვენება ზამთარში თბილ ქვეყნებში: უპირატესობები და თავისებურებები

როდესაც ფანჯრის მიღმა ქარბუქი სადღესასწაულო განწყობას აღარ გიქმნით, ხოლო მოყინული გზები ფიგურული სრიალის ილეთების სწავლას გაიძულებთ, უნებლიეთ იფიქრებთ ამ საზარელი ზამთრისგან თავის დაღწევაზე. საბედნიეროდ, 2019 წელს გამოსავალი მხოლოდ რამდენიმე დაწკაპუნებითაა დაშორებული – ეს არის დასვენება თბილ ქვეყნებში. ამ სტატიაში ამ პროცესის ყველა დადებით და უარყოფით მხარეზე გიამბობთ.

ზამთრის დღესასწაულებზე ვიღაც სახლში ნაძვის ხესთან „ოლივიეს“ ამჯობინებს, ვიღაც დათოვლილი მთების დასაპყრობად მიემართება, ვიღაც კი იქ მიემგზავრება, სადაც თბილა – არაბთა გაერთიანებულ საამიროებში, ინდონეზიაში, ტაილანდში, ეგვიპტესა და სხვა თბილ ქვეყნებში.

გარემოს შეცვლა

ალბათ ზამთრის დასვენების სასარგებლოდ ყველაზე მნიშვნელოვანი „პლუსი“ თბილ ქვეყნებში მდგომარეობს. ფანჯრის მიღმა მოღუშული პეიზაჟი, თოვლ-ჭყაპი და ქალაქის ფუსფუსი არანაირად არ უწყობს ხელს კარგ განწყობასა და სიმხნევეს, სამაგიეროდ ადვილად იწვევს ძილიანობასა და აპათიას. ისეთ ადგილში მოგზაურობა, რომელიც ჩვენი ფანჯრების მიღმა ჩვეული სურათისგან რადიკალურად განსხვავდება, დაგეხმარებათ დაისვენოთ და ენერგია და ძალ-ღონე მოიკრიბოთ, რომელიც კიდევ დიდხანს გაგყვებათ.

საკვები გონებისთვის

ეგზოტიკურ ქვეყანაში გამგზავრებით, ჩვენთვის უჩვეულო გარემოში აღმოვჩნდებით და იმ კულტურასა და ტრადიციებს ვეცნობით, რომლებიც ჩვენსას დიამეტრალურად ეწინააღმდეგება. ეს კი ქალაქის რუტინაში დახშობილი ჩვენი შემეცნებითი შესაძლებლობების გამოცოცხლების საუკეთესო გზაა. იხილოთ და გაიგოთ რაღაც ახალი, ახალი ადამიანები გაიცნოთ, უცნობი კულტურა შეისწავლოთ (თუნდაც ცოტათი), ახალი კერძები დააგემოვნოთ – ეს ყველაფერი შთაბეჭდილებებითა და შთაგონებით აგავსებთ.

სარგებელი ჯანმრთელობისთვის

განსაკუთრებით აქტუალურია მათთვის, ვინც ჩრდილოეთ რეგიონებში ცხოვრობს, სადაც ზამთარში ძალიან ცოტა მზეა. მართლაც, D ვიტამინის ნაკლებობის გამო, რომლითაც მზის სხივები გვმუხტავს, ჩვენ ხშირად „სეზონურ დეპრესიაში“ ვვარდებით, როდესაც არ გვსურს რაიმე ვაკეთოთ და საქმეს გულს ვერ ვუდებთ. მაგრამ ერთი კვირა პლაჟზე ენერგიით აგავსებთ. თბილ ადგილებში დასვენება შეუცვლელია მათთვის, ვისაც აქვს სუსტი ფილტვები ან ფარისებრი ჯირკვალი, რადგან ზღვის სუფთა ჰაერი, რომელიც მდიდარია იოდითა და მინერალური მარილებით, დიდი ხანია თავისი სამკურნალო თვისებებითაა ცნობილი.

კლიმატი

საზღვარგარეთის კურორტებზე ზამთარში დასვენების უპირატესობა ასევე იმაში მდგომარეობს, რომ წელიწადის ამ დროს აქ ჩვეულებრივ ძალიან მისაღები ტემპერატურაა, განსხვავებით ზაფხულის თვეებისგან, როდესაც მხუთავი სიცხე და ჰაერის მაღალი ტენიანობა ან წვიმების სეზონია. ამიტომ, ზამთარი შესანიშნავი ვარიანტია, თუ კომფორტულად დასვენება გსურთ.

ხარჯები

თუ ზამთარში თბილ ქვეყნებში დასვენება გადაწყვიტეთ, ფრენასა და სასტუმროებზე საკმაოდ დიდი დანაზოგის გაკეთებას შეძლებთ, ვიდრე ზაფხულში მოგზაურობისას. „მაღალ სეზონზე” ბინებისა და ავიაბილეთების ფასები ხშირად ზედმეტად მაღალია, ხოლო ნომრები/ბილეთები ელვის სისწრაფით იყიდება. ზამთარში კი აჟიოტაჟი ცხრება და შეგიძლიათ მეტ-ნაკლებად მშვიდად შეარჩიოთ თქვენი ბიუჯეტის შესაფერისი საცხოვრებლის ვარიანტი და მოსახერხებელი რეისიც იაფად დაჯავშნოთ. მაგალითად, იანვარში პატაიაში 4-ვარსკვლავიანი სასტუმროს ნომრის ფასი (ერთი ღამე) საშუალოდ 50 – 120 ევროა, ივლისში – 96-დან 160 ევრომდე.

ეგზოტიკურ ქვეყნებში გამგზავრებისას შემდეგი თავისებურებები გაითვალისწინეთ:

დარწმუნებული ვართ, რომ ნებისმიერი, ვინც ერთხელ მაინც ზამთარში თბილ ქვეყნებში ისვენებდა, რამდენიმე ნიუანსის დასახელებას შეძლებს, რამაც გარკვეული დისკომფორტი შეუქმნა. არსებობს რამდენიმე საერთო ნაკლი, რომლითაც საზღვარგარეთის ქვეყნები „სცოდავენ“.

აბეზარი მაცხოვრებლები

არა ყველგან და ყოველთვის, მაგრამ ადგილობრივი მოსახლეობა ხშირად ზედმეტად აქტიურ ყურადღებას იჩენს „თეთრი ხალხის“ მიმართ. ამით განსაკუთრებით ცნობილია ვაჭრები, აგრეთვე ღარიბები და მათხოვრები. ერთი მხრივ, ყველაფერი გასაგებია: ჩვენ მათთვის ისეთივე უცნაურობა ვართ, როგორც ისინი ჩვენთვის. მაგრამ ყოველივე ამან შესაძლოა ხელი შეუშალოს თქვენს მშვიდ დასვენებას.

აკლიმატიზაცია

ეგზოტიკურ მოგზაურობაში გამგზავრებისას, გაითვალისწინეთ, რომ თქვენ სრულიად განსხვავებულ კლიმატურ პირობებში აღმოჩნდებით და, შესაბამისად, მზად უნდა იყოთ ორგანიზმის გაუთვალისწინებელი რეაქციისთვის. კარგია თუ ადაპტაცია შეუფერხებლად ჩაივლის, წინააღმდეგ შემთხვევაში საშინაო აფთიაქი და მზისგან დამცავი საშუალებები უნდა მოიმარაგოთ, რათა მთელი შვებულება სასტუმროს ნომერში არ გაატაროთ და ჯანმრთელობის პრობლემები აიცილოთ თავიდან. დროის სარტყლის შეცვლაც შესაძლოა დისკომფორტის მიზეზად იქცეს.

საკვები

გასაგებია, რომ ეგზოტიკურ გარემოში ადგილობრივი სამზარეულოს კერძების დაუყოვნებლივ დაგემოვნებასაც მოისურვებთ. მაგრამ ფრთხილად იყავით: უჩვეულო საკვებზე მკვეთრმა გადასვლამ შესაძლოა კუჭ-ნაწლავის პრობლემები გამოიწვიოს. ამიტომ, თქვენთვის ახალ დელიკატესებს თანდათანობით გაეცანით და ცოტ-ცოტა მიირთვით. თავიდან კი ზოგადად გირჩევთ ჯადოსნური სიტყვები გამოიყენოთ „no spices“, რაც თქვენთვის ახალი სამზარეულოს გაცნობის მსუბუქ რეჟიმს უზრუნველყოფს.

Posted in ბლოგი, ლაიფჰაკი and tagged , .