უნგრული დაბალბიუჯეტიანი ავიაკომპანიის Wizz Air-ის გენერალურმა დირექტორმა იოჟეფ ვარადიმ გარემოს დაცვას დაუჭირა მხარი და ბიზნეს კლასის გაუქმებისკენ მოუწოდა.

მისი აზრით, ბიზნეს-კლასი არ არის აუცილებლობა 5 საათზე ნაკლები ხანგრძლივობის რეისებზე.

Forbes-ის თანახმად, ბიზნეს-კლასში ნახშირორჟანგის ემისიის თანაფარდობა ერთ მგზავრზე გათვლით გაცილებით მეტია, ვიდრე ეკონომ-კლასში. და ამას ორგანიზაცია „MyClimate” ადასტურებს: ლონდონი-ბერლინის მიმართულებით ეკონომ-კლასის ფრენის დროს გამოიყოფა 0,209 ტონა ნახშირბადი, ხოლო ბიზნეს კლასის – 0,270 ტონა.

კონკურენტებს შორის Wizz Air-სა და Ryanair-ს ერთ მგზავრზე ნახშირორჟანგის ემისიის ყველაზე დაბალი მაჩვენებლები აქვთ. მაგრამ ავიარეისების უზარმაზარი რაოდენობის გათვალისწინებით, ეს უკანასკნელი ევროპის ტოპ-10 დამაბინძურებელი კომპანიის სიაში მოხვდა.

ავიაკომპანიები, რომლებიც არ აპირებენ ბიზნეს-კლასის გაუქმებას, ატმოსფეროს დაბინძურებაში სწორედ დაბალბიუჯეტიან ავიაკომპანიებს ადანაშაულებენ ბილეთებზე მიმზიდველი ფასების გამო.