დღესასწაულის მოლოდინში: ევროპის 10 ყველაზე ლამაზი საშობაო ბაზრობა

შობა ევროპაში – ჯადოსნური დროა. ცენტრალურ მოედნებზე მორთულ ნაძვის ხეებს დგამენ, ქუჩები მანათობელი გირლანდებითაა მორთული, ისმის მუსიკა, ჰაერში გლინტვეინის, ახალგამომცხვარი ფუნთუშეულის და მაყალზე შემწვარი ხორცის თავბრუდამხვევი არომატი ტრიალებს. და კიდევ იმართება ბაზრობები, საიდანაც პრაქტიკულად შეუძლებელია ხელცარიელი და სავსე საფულით დაბრუნება. თქვენთვის 10 საშობაო ბაზრობა შევარჩიეთ, რომლებსაც გირჩევთ ერთხელ მაინც ეწვიოთ!

  1. პრაღა, ჩეხეთი

დედაქალაქის ყველაზე ცნობილი ბაზრობა „სტარე მესტოს“ (Staré Město) მოედანზე, რატუშის შენობის გვერდით მდებარეობს, სადაც ახლახან დააბრუნეს რესტავრირებული ასტრონომიული საათი „ორლოი“ (Orloj). აქ ხმაური და ხალხმრავლობაა, განათებულია ქვეყნის მთავარი  ნაძვის ხე, საღამოობით კი კონცერტები და თეატრალური წარმოდგენები იმართება. მოედანზე მდგარი უამრავი ჯიხურიდან შებოლილი ხორცის, ძეხვეულის, ტრადიციული ტკბილი ფუნთუშეულის სახელად ტრდელნიკი, გლინტვეინის, გროგისა და თაფლის არყის არომატი მიგიზიდავთ, ხოლო სუვენირების ჯიხურებში მარიონეტების, ბოჰემის მინის ნაკეთობების, ნახატების და ნაძვის ხის სათამაშოების შეძენას შეძლებთ. ამ უკანასკნელს გირჩევთ სათანადო ყურადღება მიაქციოთ: უსახური ფართო მოხმარების საქონელს შორის აქ ღირსეულ ხელნაკეთ ნივთებს იპოვით, რომლებსაც სიამოვნებით აჩუქებთ თქვენს ახლობლებს. ან საკუთარ თავს 😉

გაითვალისწინეთ, რომ 24 დეკემბრის საღამოს ჯიხურების უმრავლესობა დაკეტილია, ხოლო ღია ჯიხურების წინ გრძელი რიგებია. ფულის შოვნასა და შობის დღესასწაულის  საოჯახო გარემოში აღნიშვნას შორის ჩეხები ამ უკანასკნელს ანიჭებენ უპირატესობას. თუმცა ბაზრობა დიდხანს გაახარებს ტურისტებს, ის იანვრის დასაწყისამდეა ღია.

სამუშაო განრიგი:

01.12.18-დან 06.01.19 ჩათვლით, 10:00-დან 22:00 საათამდე (საკვებით მოვაჭრე ჯიხურები შუაღამემდე ღიაა).

ალტერნატივა: თუ არ გიყვართ ხალხმრავლობა, მოძებნეთ ბაზრობები „შინაურებისთვის“. ცენტრიდან შორს წასვლა არ არის აუცილებელი: ეწვიეთ მშვიდობის მოედანს (20.11-24.12.18) ან მოედანს Anděl მეტროს სადგურთან (11.24-23.12.18). ასეთ ადგილებში ნაკლები ხალხმრავლობაა, უფრო თბილი ატმოსფერო, საკვებიც უფრო გემრიელი და ფასებიც კი უფრო დაბალია, ვიდრე „სტარე მესტოს“ და ვაცლავის მოედნებზე.

  1. ვენა, ავსტრია

ყველაზე დიდი ბაზრობა Friedrich-Schmidt-Platz-ზე ეწყობა, რატუშის შენობის წინ. აქ წელს 152 ჯიხურს დადგამენ ტკბილეულობით, საკვებით, სასმელებითა და სუვენირებით, ასევე 3000 მ2 საციგურაო მოედანს მოაწყობენ (თუ ბილეთებს ონლაინ შეიძენთ, თქვენ 10% ფასდაკლებით ისარგებლებთ და შესასვლელთან რიგებში დგომაც არ მოგიწევთ).

მშობლებს ბავშვებთან ერთად შეუძლიათ მასტერ-კლასი გაიარონ საშობაო ფუნთუშეულის დამზადებაში, სათამაშოების დეკორაციაში, „სიზმრების მჭერის“ მოქსოვასა და საახალწლო ნაძვის ხის მოსართავი საშუალებების დამზადებაში. ეს ყველაფერი ვენის მერიის შენობაში გაიმართება, მონაწილეობის საფასურია €2-4, წინასწარი რეგისტრაცია არ არის საჭირო.

ყოველ პარასკევს, შაბათსა და კვირას ბაზრობის სტუმრებს სხვადასხვა ქვეყნიდან ჩამოსული საშობაო სიმღერების შემსრულებლები გაართობენ, რომლებსაც უფასოდ შეგიძლიათ მოუსმინოთ. აუცილებლად დააგემოვნეთ  ცნობილი ვენური ძეხვი, გლინტვეინი (აქ მისი სახელი სხვაგვარად ჟღერს  – გლუვაინი) ან პუნში. ამ სასმელებს არა მხოლოდ ერთჯერად ჭურჭელში, არამედ სუვენირების ჭიქებშიც მოგართმევენ, რომლებიც 4-5 ევროდ შეგიძლიათ სამასხოვროდ შეიძინოთ.

სამუშაო განრიგი:

16.11-დან 26.12.18 ჩათვლით, კვირიდან ხუთშაბათის ჩათვლით 10:00-დან 21:30 საათამდე, პარასკევსა და შაბათს 10:00-დან 22:00 საათამდე. 7 დეკემბერს ბაზრობა ღიაა 10:00 საათიდან 22:00 საათამდე, 24 დეკემბერს – 10:00 საათიდან 18:00 საათამდე, 25 და 26 დეკემბერს – 11:00 საათიდან 21:30 საათამდე.

ალტერნატივა: 2018 წლის 23 ნოემბრიდან  26 დეკემბრის ჩათვლით  ბელვედერის სასახლე კომპლექში (Prinz Eugen-Straße 27) „ოსტატების სოფელი“ მოეწყობა, სადაც შეგიძლიათ ხელნაკეთი ნივთები და ტრადიციული ტბილეული შეიძინოთ.

  1. ნიურნბერგი, გერმანია

Christkindlesmarkt, რომელიც Hauptmarkt-ის მოედანზე იმართება წმინდა სებალდის ეკლესიისა და ქალაქის რატუშის შენობასთან ახლოს, – ევროპის ერთ-ერთი უძველესი საშობაო ბაზრობაა (პირველად 1628 წელს მოიხსენიება). მისი სიმბოლო – პატარა იესოა (Christkind), მომხიბლავი ქმნილება ქერა კულულებითა და ოქროსფერი სამოსით. ამ როლის შემსრულებელს ქალაქის მოზარდ მაცხოვრებლებს შორის ირჩევენ 2 წელიწადში ერთხელ, ის ბაზრობა ადვენტის პირველი კვირა დღის წინა პარასკევს ხსნის.

თუ მოგშივდათ, აუცილებლად მოძებნეთ და დააგემოვნეთ ნიურნბერგის ძეხვი. ის ღორის ხორცის ფარშისგან მზადდება მაიორანთან ერთად. 6, 8, 10 ან 12 ძეხვს მდოგვთან ან პირშუშხასთან ერთად მოგართმევენ, ან გაჭრილ ფუნთუშაში მოთავსებულ 3 ძეხვს შემოგთავაზებენ  (ამ კერძის სახელწოდებაა  Drei im Weggla ან „სამი ფუნთუშაში“). ამ მინიატურული (7-9 სანტიმეტრი, 20-25 გრამი) სოსისების რეცეპტი და ფორმატი უცვლელია 1497 წლიდან!

კიდევ ერთი ადგილობრივი სპეციალიტეტია – ჯანჯაფილის თაფლაკვერი Lebkuchen, რომლის რეცეპტი უკვე 600  წლისაა. ყოველწლიურად ნიურნბერგში დაახლოებით 70 მილიონი ჯანჯაფილის თაფლაკვერი იყიდება. თუ შეგცივდათ, გლინტვეინი გაგათბობთ, რომლის მირთმევა სასუვენირო ჭიქითაც შეგიძლიათ (მისი დიზაინი ყოველ წელს იცვლება). სტატისტიკის მიხედვით, სტუმრების 80%-ს სამასხოვრო სუვენირად ჭიქები  თან მიაქვთ.

Hans-Sachs-Platz-ზე ასევე მოეწყობა საბავშვო ბაზრობა, სადაც ბავშვებს ელოდება კარუსელები, მატარებელი და საშობაო ანგელოზთან თამაში, მასტერ-კლასები თაფლაკვერის გამოცხობაში (€3), სანთლების ან მინის ნაწარმის დეკორაციაში (€2), მისალოცი ბარათებისა და საშობაო საჩუქრების დამზადებაში (1 ევროდან), ქვიშისგან ნახატების დამზადებაში (€5). ასევე შეგიძლიათ წერილი გაუგზავნოთ ნათესავებს,  წმინდა ნიკოლოზს ეწვიოთ სტუმრად და Bruder-ის უფასო სათაშო ოთახში გათბეთ.

სამუშაო განრიგი:

30.11-დან 24.12.18 ჩათვლით, 10:00-დან 21:00 საათამდე. 24 დეკემბერს, ბაზრობა 14:00 საათამდე  იქნება ღია.

ალტერნატივა: Christkindlesmarkt-ს პოპულარობის უარყოფითი მხარე გალხავთ ის, რომ მას ყოველწლიურად დაახლოებით 2 მილიონი ადამიანი სტუმრობს. ტურისტების ნაკადს ერთ-ერთ მეზობელ პატარა ქალაქში შეგიძლიათ დააღწიოთ თავი: ბამბერგი, ერლანგენი ან ფორჰაიმი.

  1. ბუდაპეშტი, უნგრეთი

ბუდაპეშტის უძველესი ბაზრობა  Vörösmarty-ს მოედანზე მდებარეობს. ეს არის სამოთხე გურმანებისთვის, აქედან მშიერი ნამდვილად ვერ წახვალთ. ტკბილეულის მოყვარულებს დარიჩინის ფუნთუშეული Kurtoskalacs მოეწონებათ, რომელიც ჩეხური ტრდელნიკის მსგავსია, ხორცის მოყვარულებს კი – ძეხვი ან პურში მორთმეული გულიაში, მსუბუქად წასახემსებლად კარგია კარტოფილის გუფთა dodolle, ლანგოში ან მოხალული წაბლი. ტრადიციული გლინტვეინის დაგემოვნებაც მოგიწევთ.

საღამოობით კაფე Gerbeaud-ის ფასადზე სინათლის შოუ და ხალხური, ჯაზის, ინდის, ბლუზისა და პოპმუსიკის უფასო კონცერტები გელით.

სამუშაო განრიგი:

9.11-დან 29.12.18 ჩათვლით, კვირიდან ხუთშაბათის ჩათვლით 10:00-დან 21:00 საათამდე, პარასკევსა და შაბათს 10:00-დან 22:00 საათამდე. საკვებით მოვაჭრე ჯიხურები  1 იანვრამდეა ღია.

ალტერნატივა: წმინდა სტეფანეს ბაზილიკის წინ მდებარე მოედანზე მოეწყობა ბაზრობა 23.11-დან 01.01.19 ჩათვლით, ორშაბათიდან ხუთშაბათის ჩათვლით 10:00 საათიდან 21:00 საათამდე, ხოლო პარასკევიდან კვირის ჩათვლით 10:00 საათიდან 22:00 საათამდე. აქ შეგიძლიათ შეიძინოთ უნგრეთის ოსტატების მიერ დამზადებული სუვენირები ან საციგურაო მოედანზე ისრიალოთ, ხოლო ყოველდღე 16:30 საათიდან 22 საათამდე შეგიძლიათ ვიდეოჩვენებას უყუროთ, რომელიც ბაზილიკის ფასადზეა დაპროექტებული, წელს კი პირველად – 3D ფორმატშია წარმოდგენილი.

  1. ჰელსინკი, ფინეთი

დედაქალაქის ცენტრში, სენატის მოედანზე მოწყობილი წმინდა ტუომასის საშობაო ბაზრობა პიკუიოლუს („პატარა შობის“) განუყოფელი ნაწილია. Huffington Post-ის თანახმად, 2015 წელს იგი 15 მსოფლიოში ყველაზე პოპულარულ ბაზრობათა  სიაში შევიდა.

ეს არის სამოთხე გემოვნებიანი ნივთების მოყვარულთათვის: 120 ჯიხურში სამკაულს, ჭურჭელს, სათამაშოებს, გირლანდებს და უამრავ სხვა საინტერესო ნივთს ყიდიან. ბაზრობის ცენტრალურ ნაწილში ძველებური კარუსელია განთავსებული, რომელიც ნებისმიერი ასაკის სტუმარს იზიდავს.

ბაზრობაზე შეგიძლიათ იხილოთ იოლუპუკი, ფინელი „თოვლის ბაბუა“, შეიძინოთ ირმებიანი სვიტერი თქვენთვის ან თქვენი ოჯახის წევრებისთვის და სანელებლებიანი ჩაით ან გლეგით გათბეთ (ეს არის გლინტვეინის ანალოგი, რომელშიც სიმაგრისთვის არაყს ან მადერას ამატებენ). როდესაც მოგშივდებათ, ერთ-ერთ ჯიხურს ეწვიეთ და ძეხვი ან იოლუტორტა შეიძინეთ – ფენოვანი ფუნთუშა ჯემით.

სამუშაო განრიგი:

2018 წლის 1 დეკემბრიდან 22 დეკემბრის ჩათვლით, ორშაბათიდან პარასკევის ჩათვლით 11:00-დან 20:00 საათამდე, შაბათსა და კვირას 10:00-დან 19:00 საათამდე.

ალტერნატივა: 26 ნოემბრიდან დეკემბრის ბოლომდე შეგიძლიათ ეწვიოთ შუა საუკუნეების ქალაქ პორვოოში გამართულ ბაზრობას, რომელიც ჰელსინკიდან ნახევარი საათის გზაზე მდებარეობს. ძველ კოსტიუმებში ჩაცმული მოვაჭრეები  ადგილობრივი ოსტატების ნამუშევრებს შემოგვთავაზებენ, მოსახლეობა თხილამურებით და ტრადიციული ციგებით სრიალებს, პატარა სახლები შობისთვის საგანგებოდაა მორთული… ვიწრო ქუჩებში სეირნობის დროს დროებით წარსულში იმოგზაურებთ ხმაურისა და ხალხმრავლობისგან შორს.

  1. კოპენჰაგენი, დანია

კოპენჰაგენის #1 საშობაო ბაზრობა Tivoli Gardens-ში მდებარეობს (Vesterbrogade 3) – ევროპის მესამე ყველაზე პოპულარული ატრაქციონების პარკში. ადვენტის დღეებში ისტორიული პარკი ივსება ხის მორთული სახლებით, სანტას ირმებით (თვითონაც ეწვევა ხოლმე ზეიმს), დათოვლილი ხეებითა და განათებული გირლანდებით. აქ უამრავი ღია და დახურული კაფე მუშაობს (როგორც წესი, გამათბობლები დგას და სტუმრებს პლედებს სთავაზობენ).

გასათბობად ღვინისგან დამზადებული სასმელი შეგიძლიათ მიირთვათ, რომელსაც აქ გლეგს, გლოგს თუ გლუკს უწოდებენ. წითელ ღვინოს  ქიშმიშს, დარიჩინს, ნუშს, მიხაკს და ცოტა შნაფსს ან აკვავიტს უმატებენ.  თუ ლუდს ანიჭებთ უპირატესობას, ის საშობაო ლუდის სახეობა მოძებნეთ, რომლის წარმოებას „ტუბორგი“ და სხვა მწარმოებელი საგანგებოდ ნოემბერში იწყებს.

ტკბილეულის მოყვარულებს ტრადიციული ფუნთუშა Æbleskiver მოეწონებათ – შაქრის პუდრით მორთული ფუნთუშის მსგავსი  ტკბილეული, რომელსაც ხშირად მურაბასთან ერთად შემოგთავაზებენ. ბაზრობაზე ასევე შეგიძლიათ დააგემოვნოთ  ჭვავის პურის ბუტერბროდი მარინადში ჩაწყობილი ქაშაყით Smørrebrød, ასევე შემწვარი იხვის ხორცის სენდვიჩები, მოხალული წაბლი და ნუში.

პარკში შესვლა ფასიანია (120 DKK=€16). რიგების თავიდან აცილების მიზნით გირჩევთ  ბილეთები შობამდე წინასწარ ონლაინ შეიძინოთ.

სამუშაო განრიგი:

17.11-დან 31.12.18-ის ჩათვლით, კვირიდან ხუთშაბათის ჩათვლით 11:00-დან 23:00 საათამდე, პარასკევსა და შაბათს 11: 00-დან 24:00 საათამდე.

ალტერნატივა: 8-დან 20 დეკემბრამდე შეგიძლიათ ეწვიოთ ბაზრობას ქრისტიანიაში, რომელიც ნაწილობრივ თვითმმართველ „სახელმწიფოს სახელმწიფოში“ წარმოადგენს. თვით რეგიონის ატმოსფეროს გარდა, ღონისძიება საინტერესოა ხელნაკეთი სუვენირების, მათ შორის სამკაულების, სარკეების, სასანთლეების, ნაძვის ხის დეკორაციების, ტანსაცმლის, ტყავის ნაწარმისა და სხვა საინტერესო ნივთების შეძენის შესაძლებლობით. ბაზრობა Grey Hall საკონცერტო დარბაზში  გაიმართება (Refshalevej 2).

  1. ტალინი, ესტონეთი

ბაზრობა რატუშის მოედანზე (Raekoja plate) გაიმართება, სადაც 1441 წლიდან ქვეყნის მთავარ ნაძვის ხეს დგამენ. ხის პატარა სახლებში იყიდება ხელნაკეთი სუვენირები, ცხვრის ტყავის ნაწარმი, ადგილობრივი თაფლი, გლინტვეინი და ცხელი ლუდი სანელებლებით. როდესაც მოგშივდებათ, დააგემოვნეთ სისხლიანი ძეხვი „ვერივორსტი“, რომელსაც ასევე „შავ პუდინგს“ უწოდებენ, ასევე კომბოსტოს მწნილი, ხოლო დესერტად – ჯანჯაფილის თაფლაკვერი.

გასართობი პროგრამა მოზარდებისა და ბავშვებისთვის მოიცავს: კარუსელებს, შაბათ-კვირაობით კონცერტებს ესტონეთისა და უცხოელი შემსრულებლების მონაწილეობით და ესტონეთის თოვლის ბაბუის სახლის ნახვის შესაძლებლობას, სადაც ყველა პატარა სტუმარი  შობის ცოცხალი სიმბოლოს ხელიდან საჩუქარს მიიღებს.

სამუშაო განრიგი:

16.11.18-დან 7.01.19-ის ჩათვლით, 10:00 საათიდან 20:00 საათამდე. სასმელები იყიდება კვირიდან ხუთშაბათის ჩათვლით 22:00 საათამდე, პარასკევსა და შაბათს – 23:00 საათამდე. თანმხლები პროგრამა: პარასკევს 17:00 საათიდან 19:00 საათამდე, შაბათსა და კვირას 12:00 საათიდან 14:00 საათამდე.

ალტერნატივა: 15 დეკემბერს ტალინის მახლობლად მდებარე სოფელში Vanamõisa შეგიძლია 3-5 წლის ასაკის ბავშვებისთვის მოწყობილ ბაზრობას ეწვიოთ.  დაგეგმილია სადღესასწაულო შოუ-პროგრამა, ხელნაკეთი ნივთების დამზადების  მასტერ-კლასები, გასეირნება ორთქლმავლით და ცხოველებთან კონტაქტი, ხოლო ხელსაყრელი ამინდის შემთხვევაში – თოვლის ქალაქის აშენება, ციგებზე, თხილამურებზე და ციგურებზე სრიალი. მოზრდილთათვის ბილეთის საფასურია €8, საოჯახო ბილეთის – €24.

  1. სტოკჰოლმი, შვედეთი

სტოკჰოლმის მთავარი საშობაო ბაზრობა Stortorget-ის მოედანზე, Gamla Stan უბანში იმართება, სამეფო სასახლიდან რამდენიმე ნაბიჯის მოშორებით. მორთული ნაძვის ხის გარშემო წითელი სახურავების ქვეშ განთავსებულ პატარა სახლებში შვედეთის ოსტატების ნამუშევრებია წარმოდგენილი,  მაგალითად, ხელით მოხატული ნაძვის ხის სათამაშოები, ანგელოზები და ჩალის ჯუჯები. აქვე შეგიძლიათ შეიძინოთ კერამიკა, სამკაული, სანელებლები, საპონი, ტანსაცმელი, ყველი და სხვა დელიკატესები. საკვებითა და სასმელებით მოვაჭრე ჯიხურებში შემოგთავაზებენ ვაფლს, თაფლაკვერს და ცხელ შოკოლადს, ხოლო მათ, ვისაც ტკბილეული არ უყვარს, ძეხვეულის ან ირმის ხორცის შეკვეთა შეუძლია. რა თქმა უნდა, შეგიძლიათ გლეგი მიირთვათ – ბევრისთვის საყვარელი გლინტვეინის სკანდინავიელი ძმობილი და აგრეთვე ცხელი ლუდი სანელებლებით.

სამუშაო განრიგი: 24.11-დან 23.12.18 ჩათვლით, 11:00 საათიდან 18:00 საათამდე.

ალტერნატივა:  24.11-დან 16.12.18 ჩათვლით, შაბათსა და კვირას, Skansen-ის მუზეუმში ღია ცის ქვეშ (Djurgårdsslätten 49-51) ასევე გაიმართება საშობაო ბაზრობა. 1903 წლიდან აქ სახლების მორთვა, კოცონის დანთება, კონცერტების გამართვა და სახალხო ოსტატების მონაწილეობით მასტერ-კლასების მოწყობა 1903 წლიდან მიმდინარეობს. მრავალრიცხოვან ჯიხურებში შეგიძლიათ შეიძინოთ ძეხვეული, ყველი, ჯემი, მარმელადი, კანფეტები, ფუნთუშეული, სანელებლები, ნაძვის ხის სათამაშოები, საბავშვო წიგნები და ხელნაკეთი სუვენირები. შესვლის საფასურია: 125 SEK (€12) მოზრდილთათვის, 60 SEK (€6) – 4-15 წლის ასაკის ბავშვებისთვის.

  1. ბოლცანო, იტალია

1990 წლიდან სამხრეთ ტიროლის დედაქალაქში იმართება ბაზრობა, რომელიც იტალიაში ერთ-ერთი ყველაზე ლამაზი და მონახულებადია. აქ მონაწილეობის  მკაცრი წესებია: Piazza Walther-ზე განთავსებულ 80 ჯიხურში მხოლოდ ადგილობრივი პროდუქციის გაყიდვაა ნებადართული: ხის სათამაშოები, ნაქსოვი ტანსაცმელი, ნაძვის ხის სათამაშოები, მუსიკალური ინსტრუმენტები, დეკორატიული სანთლები. ასევე შეგიძლიათ იხილოთ ოსტატები სამუშაო პროცესში, გაისეირნოთ კარუსელზე, ოთხთვალით ან მინი-მატარებლით, ეწვიოთ თოჯინების თეატრს.

შეგიძლიათ წაიხემსოთ სამიდან ერთ-ერთ გასტრონომიულ სტენდთან, სადაც შემოგთავაზებენ ბლინებს, შტრუდელს სხვადასხვა შიგთავსით, კექსს ჩირითა და „ზელტენის“ ცუკატებით, ვაშლის წვენს ან გლინტვეინს, რომელსაც აქ Vin Brulè უწოდებენ.

სამუშაო განრიგი:

22.11.18-დან 01.01.19 ჩათვლით – 10:00 (12:00)-დან 19:00 (21:00) საათამდე.

ალტერნატივა: არანაკლებ კოლორიტული საშობაო ბაზრობები იმართება მეზობლად მდებარე ქალაქებში მერანო (22.11.18-6.01.19) და ლაგუნდოში (23.11.18-1.01.19), სადაც ბოლცანოდან ადვილად შეძლებთ ავტომობილით ჩასვლას.

  1. სტრასბურგი, საფრანგეთი

1570 წლიდან ელზასის დედაქალაქში საფრანგეთის უძველესი და ევროპის ერთ-ერთი უდიდესი საშობაო ბაზრობა იმართება. ერთი თვის მანძილზე ქალაქი  ფილმის საშობაო დეკორაციას ემსგავსება: ირგვლივ ყველაფერი ბრწყინავს, ანათებს, ქუჩებში ტრადიციული სიმღერები ისმის, ჰაერში გლინტვეინის, შოკოლადის, ფუნთუშეულის და კარამელში ამოვლებული ვაშლის არომატი ტრიალებს. Place Kléber ცენტრალურ მოედანზე დღესასწაულის სიმბოლოს – ნაძვის ხეს დგამენ.

ქალაქის ათ მოედანზე (ყველაზე მეტი Place Broglie მოედანზე) დაახლოებით 300 ხის პატარა სახლები ჩნდება, რომლებშიც საკვების, სასმელებისა და სუვენირების შეძენას შეძლებთ. აქ შემოგთავაზებენ ნაძვის ხის მოსართავ საშუალებებს, ჭურჭელს, სათამაშოებს, პირსახოცებს და მაგიდის გადასაფარებლებს ტრადიციული მოხატულობით, გარლანდებს და ბევრ სხვა საინტერესო ნივთს.

სამუშაო განრიგი:

23.11-დან 30.12.18 ჩათვლით, 11:00 საათიდან 20:00 საათამდე. პარასკევს, ჯიხურები ღიაა 21:00 საათამდე, შაბათს კი – 22:00 საათამდე.

ალტერნატივა: ტრადიციული საშობაო ბაზრობის გარდა, რამდენიმე თემატური ბაზრობა იმართება: Marché des Saveurs Alsaciennes („ელზასის არომატები“) Place des Meuniers მოედანზე, Comptoir des Rois Mages („მოგვების ბაზრობა“) Place Benjamin-Zix მოედანზე, Marché des Bredle (აქ ტრადიციულ ელზასურ ღვეზელს – ბრედელს ყიდიან) Place d’Austerlitz მოედანზე. ასევე შეგიძლიათ ეწვიოთ კოლმარის, მიულუზის ბაზრობებსა და სოფლებში Kaysersberg, Ribeauville, Wesserling, Riquewihr გამართულ ბაზრობებს.

 

 

sastumroebi
Posted in ბლოგი and tagged , , .

მალხაზ კევლიშვილი