გასართობი პარკები

საით მივყავართ ოცნებებს: მსოფლიოს საუკეთესო გასართობი პარკები

თანამედროვე გასართობი პარკები უკვე დიდი ხანია აღარ ჰგვანან იმ ადგილებს, სადაც ბავშვები აუჩქარებელი ნავებით სეირნობენ, ხოლო მათი მოწყენილი მშობლები ფოტოს გადაღებისას დიდ აღტაცებას განასახიერებენ. თავბრუდამხვევი, ადრენალინით სავსე ატრაქციონები მწვავე შეგრძნებების მოყვარულებს იზიდავს. გთავაზობთ მსოფლიოს სხვადასხვა კუთხეში მდებარე საუკეთესო გასართობი პარკების სიას.

Europа Park, რუსტი, გერმანია

Europа Park – ევროპის ფაქტობრივად უდიდესი და მრავალფეროვანი გასართობი პარკია, რომელიც დისნეილენდის შემდეგ მეორე ყველაზე მონახულებადი პარკია.

გერმანიის პატარა ქალაქ რუსტში მდებარე Europа Park წელიწადში სულ მცირე 4 მილიონ ვიზიტორს იზიდავს.

პარკის უნიკალური კონცეფციის წყალობით, აქ სტუმრებს მრავალ ქვეყანაში ერთდროულად გართობის საშუალება აქვთ გერმანიის დატოვების გარეშე. მისი ტერიტორია დაყოფილია თემატურ უბნებად, რომელთაგან თითოეული გარკვეულ სახელმწიფოს შეესაბამება. ამგვარად, აქ არის საფრანგეთი, შვეიცარია, საბერძნეთი, იტალია, ინგლისი, სკანდინავიის ქვეყნები, ისევე როგორც „შოკოლადის მიწა“ და „ვიკინგების მხარე“, რომლებიც ფორმალურ რუკებზე არ არის მითითებული.

ასეთივე მრავალფეროვნებითა და ეროვნული კოლორიტით გამოირჩევა თითოეულ უბანზე წარმოდგენილი გასართობი საშუალებები. მაგალითად, აქ შეგიძლიათ გახდეთ ნამდვილი რაინდული ტურნირის ან ისტორიული რეკონსტრუქციის მოწმე, რომელშიც გამრთობი მსახიობების მრავალეროვნული გუნდი მონაწილეობს.

მრავალრიცხოვანი ამერიკული მთები და თავბრუდამხვევი ატრაქციონები აქ ციხესიმაგრეებისა და პოპულარული ღირსშესანიშნაობების ასლების გვერდით მდებარეობს, ისევე როგორც რესტორნები და კაფეები, რომლებიც გურმანებს ყველა ამ ქვეყნიდან კერძებს სთავაზობს.

ყველაზე პოპულარულ გასართობებს შორისაა: თეატრალიზებული შოუ „გლადიატორები მოდიან“, თემატური ატრაქციონი „არტური მინიპუტების სამეფოში“, წყლის Atlantica SuperSplash, ამერიკული მთები „ვერცხლის ვარსკვლავი“.

ბილეთების ღირებულება – 36 ევროდან. 4 წლამდე ასაკის ბავშვებისთვის – უფასო.

Europa Park-ში ყველაზე მოხერხებულად შტუტგარტიდან ჩახვალთ.

Disneyland, მარნ-ლა-ვალე, საფრანგეთი

აი ამ გასართობ პარკს წარმოდგენა ნამდვილად არ სჭირდება! აქ თქვენ შეგიძლიათ არა მხოლოდ ჩაეფლოთ გასული საუკუნის ერთ-ერთი ყველაზე ცნობილი მეზღაპრის მიერ შექმნილ საინტერესო სამყაროში, არამედ პირადად მიესალმოთ და ფოტო გადაიღოთ მულტფილმების მრავალ გმირთან.

კალიფორნიის ნიმუშის მიხედვით მოწყობილი ციხეების, სასრიალოებისა და ატრაქციონების გარდა, აქ ასევე იპოვით უამრავ მყუდრო რესტორანს, ისევე როგორც გოლფის მოედანს და მთელ საცხოვრებელ კვარტალსაც კი! 1943 ჰექტარზე მეტი ფართობის უზარმაზარ ტერიტორიაზე სპეციალური მატარებელი კურსირებს.

სხვათა შორის, 1992 წელს მისი გახსნიდან დღემდე, ეს ადგილი წარმოუდგენელი პოპულარობით სარგებლობს (რაც მოსალოდნელი იყო). ამიტომ აქ თითქმის ყველა ატრაქციონთან სამუშაო დღეებშიც კი გრძელი რიგებია.

საბედნიეროდ, წინდახედული მოგზაურებისთვის მათი თავიდან აცილების რამდენიმე გზა არსებობს. მაგალითად, ბილეთები შეგიძლიათ წინასწარ ონლაინ შეუკვეთოთ ან პარიზში შეიძინოთ, Fnac წიგნების ქსელის ერთ-ერთ მაღაზიაში ან დისნეის საფირმო მაღაზიებში.

სტუმრებს ყველაზე მეტად უყვართ თემატური ატრაქციონები „ინდიანა ჯონსი და ბედისწერის ტაძარი“, „პიტერ პენის ფრენა”, Hollywood Tower Hotel და „კარიბის ზღვის მეკობრეები”, ამერიკული მთები Big Thunder Mountain.

ბილეთები: მოზრდილთათვის – 56 ევროდან, ბავშვებისთვის – 51 ევროდან.

Lotte World, სეული, სამხრეთ კორეა

ეს გასართობი პარკი გინესის რეკორდების წიგნშიც კი მოხვდა. ცნობილ ალმანახში მითითებულია, რომ Lotte World მსოფლიოს უდიდესი დახურული გასართობი პარკია.

აღსანიშნავია, რომ დახურული ატრაქციონების პარკის გარდა, აქ მეორე ნაწილიც არის, რომელიც ღია ცის ქვეშ მდებარეობს, ამიტომ ადგილის მასშტაბები გაცილებით გრანდიოზულია. ყინულის არენა, ატრაქციონები, მუზეუმები და სხვადასხვა მაღაზია ტკბილეულის მოყვარულთათვის – ეს ყველაფერი და კიდევ ბევრი რამ ლოტეშია ხელმისაწვდომი.

მაგალითად, აქ შეგიძლიათ გამოსცადოთ საკუთარი შეგრძნებები 70 მეტრის სიმაღლიდან ვარდნის ან უზარმაზარი ტორნადოს კრატერში მოხვედრის დროს. პარკი ვიზიტორებს მთელი წლის განმავლობაში იღებს, მიუხედავად ამინდის პირობებისა, ხოლო დახურული ნაწილის კარგი სინათლის გამტარიანობა ბუნებრივი განათების შენობაში გამოყენების საშუალებას იძლევა.

სტუმრებს განსაკუთრებით უყვართ ატრაქციონები „ჩაირო-დროპი“, „ჩაირო-სვინგი“ და მინიატურების მუზეუმი.

ბილეთები: გირჩევთ, ვიზიტამდე magic pass შეიძინოთ, რომელიც დაგეხმარებათ მნიშვნელოვნად დაზოგოთ რიგში დგომის დრო, გარდა ამისა, პარკის უცხოელ სტუმრებს ფასდაკლება ეკუთვნით. შესვლის საფასურია – 32 ევრო, 3 წლამდე ასაკის ბავშვებისთვის – უფასო.

Legoland, ბილუნდი, დანია

ბავშვების გართობის სურვილის მიზნით დანიაში კიდევ უფრო შორს წავიდნენ – და „ლეგოს“ დეტალებისგან მთელი სამყარო აღმართეს. სწორედ ლეგოსგან მზადდება სათამაშო ზონები, შენობები და ევროპის მრავალი ქალაქის შემცირებული ასლებიც კი!

კონსტრუქტორის დეტალებისგან თავად ვიზიტორებს შეუძლიათ შექმნან მთელი დასახლებული პუნქტები, ჯადოსნური არსებები და რობოტები. ეს პრაქტიკა არა მხოლოდ გასართობი ხასიათისაა, არამედ შესანიშნავად ავითარებს ხატოვან აზროვნებასა და სივრცით წარმოსახვას.

გარდა ამისა, აქ შეგიძლიათ გაისეირნოთ თავბრუდამხვევ ატრაქციონებზე და წყლის სასრიალოებზე, ექსპედიციაში გაემართოთ ადგილობრივ ჯუნგლებში და მონაწილეობა მიიღოთ რაინდულ ტურნირში.

ასევე შთამბეჭდავია სრულიად რბილი მასალისგან შექმნილი „დუპლოლენდი“ ყველაზე პატარებისთვის, ავტოსკოლა ბავშვებისთვის Toyota Traffic School, „ველური დასავლეთის“ კუთხის თემატური ზონები, მეკობრეების მიწა და რაინდთა სამეფო.

ბილეთები: ერთდღიანი ბილეთის ღირებულება 51 ევროა. თუ წინასწარ შეიძინეთ, 10 პროცენტიანი ფასდაკლება შეგიძლიათ მიიღოთ.

ბილუნდი კოპენჰაგენიდან 260 კილომეტრში მდებარეობს, აქ ავტომობილით ან ავტობუსით შეგიძლიათ მოხვდეთ (მგზავრობას დაახლოებით 4 საათი სჭირდება).

Tivoli Gardens, კოპენჰაგენი, დანია

უბრალოდ წარმოიდგინეთ, ეს გასართობი პარკი 170 წელზე მეტი ხნისაა და ევროპის სამი ყველაზე პოპულარული პარკის სიაში შედის.

Tivoli Gardens – არა მხოლოდ პარკი, არამედ მთლიანი პლანეტაა ფერადი ველებით, ცხოველებით, არქიტექტურული ნაგებობებით, უჩვეულო თეატრებით, საკონცერტო დარბაზებით, მყუდრო რესტორნებით. აპრილიდან ოქტომბრის ჩათვლით ეს პლანეტა ჩაფლულია ათასობით ყვავილისა და ასობით ნათურის ფერებში, რთულია უფრო ლამაზი და აყვავებული პარკის პოვნა. და რა შეგვიძლია ვთქვათ გართობის შესახებ?

აქ მდებარეობს ათობით საინტერესო ატრაქციონი როგორც ბავშვებისთვის, ისე ექსტრემალი-მოზრდილებისთვის. ყველას უცვლელად იზიდავს ძველი ამერიკული მთები – ჯერ კიდევ 1914 წელს აშენებული The Roller Coaster.

აუცილებლად იტრიალეთ Star Flye-ზე – ეს არის მსოფლიოში ერთ-ერთი ყველაზე მაღალი კარუსელი (80 მ), Demon-ზე – 80 კმ/სთ მეტი სიჩქარის დიდ გორაკზე, აგრეთვე Monsunen და Vertigo საქანელებზე. და არ გამოტოვოთ ყოველდღიური სპექტაკლები და წარმოდგენები პარკის თეატრებსა და ქუჩებში, ხოლო ოთხშაბათსა და შაბათს ღამით ფეიერვერკების ნამდვილ შოუს მართავენ.

ბილეთები: ერთდღიანი აბონემენეტი – 34 ევრო.

Universal Studios Park, ლოს-ანჯელესი, აშშ

ეს პარკი არის მექა არა მხოლოდ შთაბეჭდილებიანი ბავშვებისთვის, არამედ მთელი მსოფლიოს კინომანებისთვის. აქ ფანტასტიკური ფილმების მოტივებზე უნიკალური ატრაქციონები შეიქმნა.

მთავარი პარკი უშუალოდ ტერიტორიაზე მდებარეობს Universal სტუდიოს პავილიონებით, სადაც დღესაც ახალი ბლოკბასტერების გადაღებები მიმდინარეობს. ატრაქციონების გარდა აქ არის სათამაშო და შოუ-მოედნები, ასევე საინტერესო რეტროსპექტული მუზეუმები, რომლებშიც შეგიძლიათ იხილოთ თანამედროვე ჰოლივუდის შექმნის ისტორია დასაბამიდან დღემდე.

გარდა ამისა, აქ აუცილებლად შეხვდებით ერთ-ერთ ცნობილ პერსონაჟს, როგორიცაა მაგალითად ადგილობრივი სიმბოლო – კოდალა ვუდი ან თუნდაც ფილმის რეალურ სახელგანთქმულ პირს.

სტუმრებს ყოველთვის იზიდავთ შემდეგი ფილმების მოტივებზე დაფუძნებული თემატური ატრაქციონები: „ადამიანები შავებში“, „კინგ კონგი“, „იურული პერიოდის პარკი“, „ტრანსფორმერები“, „ჰარი პოტერის ჯადოსნური სამყარო“, 3D ატრაქციონი „საზიზღარი მე“ ანიმაციის მოტივების მიხედვით.

ბილეთები: მოზრდილებისთვის 1 დღიანი ვიზიტის ღირებულებაა – 114 ევროდან, 3-9 წლის ასაკის ბავშვებისთვის – 109 ევროდან, 3 წლამდე ასაკის ბავშვებისთვის გადახდა არ არის საჭირო. არსებობს ატრაქციონებზე პრიორიტეტული შესვლის შეძენის შესაძლებლობა, თუმცა ამ შემთხვევაში ბილეთების ღირებულება ორჯერ მეტი იქნება.

FerrariWorld, აბუ-დაბი, არაბთა გაერთიანებული საამიროები

FerrariWorld – ამჟამად მსოფლიოს ყველაზე დიდი დახურული ატრაქციონების პარკია. იგი არაბთა გაერთიანებულ საამიროებში მდებარეობს, ცალკე შექმნილ ხელოვნურ კუნძულზე. პარკი შთამბეჭდავია თავისი მასშტაბებით, ამბობენ, რომ მისი დანახვა კოსმოსიდანაც კი შეიძლება. და ატრაქციონების სიჩქარეც აქ კოსმოსურია.

სახელწოდებიდან ჩანს, რომ ეს არის პარკი სიჩქარისა და Ferrari-ს მოყვარულთათვის. თუ აქ მოხვდებით, არ აუაროთ გვერდი ლეგენდარულ ატრაქციონს Formula Rossa-ს – ეს არის სასრიალო, რომელიც ფორმულა 1-ის პროტოტიპის მიხედვით, მხოლოდ ერთ წამში 100 კმ/სთ სიჩქარეს აღწევს, ძირითადი სიჩქარე კი აქ 240 კმ/სთ-ია!

პარკის მეორე ყველაზე პოპულარული ატრაქციონია G-Force. ეს არის მთელი კომპლექსის გუმბათში ჩაშენებული კაფსულა, საიდანაც აფეთქების მსგავსად ადამიანს 62 მეტრის სიმაღლეზე აგდებენ. თქვენს თვალწინ იანგის მთელი კუნძული გადაიშლება, შემდეგ კი უზარმაზარი სიჩქარით კაფსულა ისევ ქვემოთ ეშვება. შთაბეჭდილებების გადმოცემა შეუძლებელია, თავად უნდა სცადოთ. სხვათა შორის, თქვენს რეაქციას ნახავთ ფოტოზე, რომელიც „დაფრენის“ შემდეგ გადმოგეცემათ, და გვერწმუნეთ, რომ ფოტოს ყველაზე ემოციურ მომენტში გადაგიღებენ.

და რასაკვირველია Ferrari-ს პარკი მანქანების გარეშე წარმოუდგენელია. სწორედ FerrariWorld-ში გექნებათ საშუალება ერთი სახურავის ქვეშ ყველა ის ლეგენდარული „მერცხალი“ იხილოთ, რომლებიც პოპულარულმა ბრენდმა ოდესღაც შექმნა, ზოგიერთ მათგანზე გასეირნების საშუალებაც კი გექნებათ. მაგალითად, სპორტულ ავტომობილზე შთამბეჭდავი შუშის გვირაბის გავლით, 20-ზე მეტი სარბოლო მარშრუტით. მანქანის მართვის გამოცდილების ბილეთები შეიძინეთ აქ

ბილეთები: სტანდარტული შესასვლელი ბილეთის საფასურია მოზრდილთათვის – 77 ევრო, ბავშვებისთვის (1,3 მეტრამდე სიმაღლის) – 57 ევრო.

Cedar Point, ოჰაიო, აშშ

Cedar Point – აშშ-ს ერთ-ერთი უძველესი ატრაქციონების პარკია, სადაც მოხვედრას ყველა თავგამოდებული ექსტრემალი ოცნებობს. პირველი ამერიკული მთები Cedar Point-ში 1892 წელს გაიხსნა. და მიუხედავად იმისა, რომ პარკი 100 წელზე მეტი ხნისაა, იგი არ ჩამოუვარდება თანამდეროვე პარკებს და არსენალში 70-ზე მეტი ატრაქციონი აქვს.

Cedar Point – უბრალოდ ოცნებაა ექსტრიმისა და აუწერელი შეგრძნებების მოყვარულთათვის. პარკის ყველაზე ცნობილი ატრაქციონია – Skyhawk, წარმოუდგენლად მაღალი „საქანელა-ხელები“. ერთი შეხედვით – ჩვეულებრივი საქანელაა, თორმეტსართულიან სახლზე ოდნავ მაღალი, რომელიც მაღლა მარტივად აგიყვანთ, წუთით ჩერდება… და შემდეგ 100 კმ/სთ-ზე მეტი სიჩქარით ქვემოთ ეშვება. და არ დაგავიწყდეთ Power Tower კოშკზე გასეირნება, რაც საშუალებას მოგცემთ თავისუფალი ვარდნაზე მაღალი სიჩქარე შეიგრძნოთ.

ბილეთები: შესასვლელი ბილეთის საფასურია 60 ევრო ადგილზე ან 41 ევრო თუ ინტერნეტით შეიძენთ. ბავშვებისა და მოზრდილებისთვის ერთნაირი ფასია.

Port Aventura, სალოუ, ესპანეთი

შემდეგი ჩვენს მარშრუტში ესპანეთი და მისი ცნობილი გასართობი პარკი Port Aventura-ა. იგი ასევე დაყოფილია თემატურ ზონებად, რომლებიც მსოფლიოს სხვადასხვა ნაწილსა და ქვეყნას შეესაბამება.

ყველაზე პოპულარულ ზონებს შორისაა – ჩინური და მისი „ჰონ-დრაკონი“ – 45 მეტრი სიმაღლის ატრაქციონი, რომელიც 100 კილომეტრზე მეტი სიჩქარით ვაგონებს მგზავრებით ყირამალა აყენებს ყველა შესაძლო კუთხით, ნადმვილი სანახაობაა! მწვავე შეგრძნებების მოყვარულებს ასევე უყვართ მექსიკური ზონა და პარკის ყველაზე მაღალი ატრაქციონი „კონდორე ჰურიკანე“. ყველაზე გაბედულებიც კი ამბობენ, რომ აქ უბრალოდ „სუნთქვას წყვეტ“.

პარკის არსენალში ორმოცდაათამდე გასართობია, მაგრამ ყველამ არ იცის, რომ იქვე მდებარეობს შესანიშნავი აკვაპარკი Caribe Aquatic, და თუ ბილეთებს ორივე ცენტრში შეიძენთ, ფასი ბევრად უფრო მომგებიანი იქნება.

ბილეთები: ფასი დამოკიდებულია სეზონზე. ერთდღიანი ბილეთის საფასურია – მოზრდილთათვის 55 ევროდან, ბავშვებისთვის – 44 ევროდან.

Thorpe Park, ჩერტსი (ლონდონის მახლობლად), დიდი ბრიტანეთი

Thorpe Park – პარკი, რომელზეც ლეგენდები დადის. შესაძლოა ზომითა და მასშტაბით სხვას ჩამოუვარდებოდეს, მაგრამ აქ გატარებული დრო კიდევ დიდხანს გემახსოვრებათ. პარკში არის წყლის ატრაქციონები და ამერიკული მთები, ისევე როგორც შემაშფოთებელი შიშის ოთახები.

მთავარ ატრაქციონად Saw the Ride ითვლება და სწორედ მისგან უნდა დაიწყოთ, მითუმეტეს, რომ იგი პირდაპირ შესასვლელთან მდებარეობს. აქ მოსვლა არ არის რეკომენდებული არათუ ბავშვებთან, არამედ მოზარდებთან ერთადაც კი. მაგრამ „ხერხის“ მოყვარულებს მოეწონებათ, თუ როგორ არის ფილმიდან ყველაფერი აღდგენილი: ანტურაჟი, ხმები, სისხლის გუბეები, ყვირილი და, რა თქმა უნდა, იგივე თოჯინა დაგედევნებათ. მისგან თავის დაღწევას კი მხოლოდ ერთი გზით შეძლებთ – 30 მეტრი სიმაღლიდან გადმოსრიალებით.

იფრინოთ ფეხებქვეშ ნიადაგის გარეშე ან თავდაყირა, მკვდარ მარყუჟში იბრუნოთ… გნებავთ? დარწმუნებული ხართ? მაშინ დაუყოვნებლივ ეწვიეთ ატრაქციოს Nemesis Infernо. გსურთ 2 წამში 120 კმ/სთ სიჩქარე აკრიფოთ და შემდეგ მკვეთრად დაეცეთ 63 მეტრი სიმაღლიდან? რა პრობლემაა, ეწვიეთ Stealth-ს.

ერთი მინუსი – აქ უსასრულო რიგებია, ამიტომ გირჩევთ პარკში დილით ადრე მოხვიდეთ.

ბილეთები: ონლაინ დაჯავშნისას – 33 ევრო. ადგილზე 40%-ით მეტის გადახდა მოგიწევთ.

Mirabilandia, რავენა, იტალია

დაბოლოს, გთავაზობთ იტალიასა და მის განთქმულ Mirabilandia-ს – 7-დან 70 წლამდე ასაკის ყველა ადამიანის ოცნებას. ეს პარკი უნივერსალური ადგილია. თავისთავად, აქ არის ატრაქციონები მხიარული და გულადი ადამიანებისთვის, არის ექსტრემალური სასრიალოები, ასევე მდიდრული, ლამაზი ბაღები და სამი სუფთა ტბა, რომელთა მახლობლად შეგიძლიათ უბრალოდ სული მოითქვათ.

პარკი დაყოფილია 7 თემატურ ზონად და აქ 40-ზე მეტი ატრაქციონია. მათგან ყველაზე საშიშია Katun. ეს არის ძალიან სწრაფი გადაბრუნებული ამერიკული მთები. მას სახელი მაიას კალენდრის საპატივცემულოდ ეწოდა და ამ კულტურის ანტურაჟითაა გაფორმებული. მათ, ვისაც ექსტრიმი ნაკლებად იზიდავს, ვურჩევთ ეწვიონ Eurowheel-ს – სათვალთვალო ბორბალს, რომელიც არცთუ ისე დიდი ხნის წინ გინესის რეკორდების წიგნში პირველობას ინარჩუნებდა, როგორც მსოფლიოს ყველაზე მაღალი სათვალთვალო ბორბლისა. სიცხისგან დაიღალეთ? შეგიძლიათ გაგრილდეთ Niagara-სთან – წყლის ატრაქციონი, სადაც ნავებით 25 მეტრის სიმაღლეზე „შეცურავთ“, შემდეგ კი სწრაფად ქვემოთ ტბაში დაეშვებით და საკუთარ თავსა და ყველას ირგვლივ 15 მეტრი სიმაღლის ტალღას შეაშხეფებთ.

პარკში ყოველდღიურად იმართება ქუჩის სპექტაკლები, შოუ-პროგრამები, კონცერტები. Mirabilandia მუშაობს აპრილიდან სექტემბრის ჩათვლით, ხოლო დანარჩენ დროს – მხოლოდ შაბათ-კვირას. აქ უამრავი გასართობია, ასე რომ, ნუ დაიშურებთ ერთ დღეს, ყველა საქმე გადადეთ და დილიდანვე მობრძანდით. სხვათა შორის, საცურაო კოსტიუმიც არ დაგავიწყდეთ.

ბილეთები: შესვლის საფასურია – 37 ევრო ერთ ადამიანზე.

თეგები: , , ,

მოძებნე ავიაბილეთი

შენთვის სასურველი მიმართულებით საუკეთესო ფასად

მობილური აპლიკაცია

მოიძიეთ და დაჯავშნეთ იაფი ავიაბილეთები პირდაპირ თქვენი სმარტფონებიდან, მიიღეთ უფრო მეტი სიამოვნება თქვენი მომავალი დასვენებისთვის.

გადმოწერა