საოცარი ესპანეთი: მზიანი ქვეყნის 20 გამორჩეული ღირსშესანიშნაობა

ესპანეთი გოთური ციხე-სიმაგრეებით და საოცარი ხეობებით შემოგეგებებათ, აქ აღმოაჩენთ უნიკალურ მუზეუმებს, მრავალ კოლორიტულ კურორტს, დააგემოვნებთ ადგილობრივ ღვინოებს და დაგათრობთ ესპანური სტუმართმოყვარეობით . წარმოგიდნეთ ესპანეთის 20 საინტერესო ლოკაციას.

ბარსელონის წმინდა ოჯახის ტაძარი – საგრადა ფამილია

ბარსელონაში უპირველეს ყოვლისა ამ ქალაქის სავიზიტო ბარათი – წმინდა ოჯახის ტაძარი უნდა მოინახულოთ . Sagrada Familia (ასე ეწოდება კიდევ სალოცავს) – ესაა ესპანელი არქიტექტორის ანტონიო გაუდის ყველაზე ამბიციური პროექტი.

უცნაური ფორმები, მრავალრიცხოვანი სვეტები ტაძრის შიგნით და სტილი, რომელიც მსოფლიოში არც ერთი სხვა ტაძრისას არ ჰგავს – სწორედ ამით არის ცნობილი ბრწყინვალე არქიტექტორის შემოქმედება . ეკლესია ჯერ კიდევ მშენებარეა, მაგრამ ეს ხელს არ უშლის მას იყოს ესპანური არქიტექტურის მარგალიტი.

Sagrada Familia-ს მშენებლობა 1882 წელს დაიწყო . ის ჯერ კიდევ გრძელდება, რაც იმას ნიშნავს, რომ სამუშაოები თითქმის 130 წელია მიმდინარეობს . არქიტექტორი, რომელმაც შექმნა მსოფლიოში ცნობილი ტაძარი, მასშივეა დაკრძალული . არქიტექტორის საფლავი მდებარეობს Sagrada Familia-ს მიწისქვეშა დონეზე.

კოლომარესის ციხე-სიმაგრე, ბენალმადენა

ესპანეთის ეს კიდევ ერთი არქიტექტურული ძეგლი ფუტურიზმის ელფერს ატარებს . საუბარია კოლომარესის ციხეზე, რომელიც მდებარეობს პატარა საკურორტო ქალაქში . მას უწოდებენ ქვაში გამოკვეთილ ლეგენდას, რომელიც ნათლად მოგვითხრობს ამერიკის აღმოჩენის ისტორიას . ამერიკის აღმოჩენის 500 წლიანი იუბილეს აღსანიშნავად, 1994 წელს აშენებული ეს ციხე-სიმაგრე აოცებს ტურისტებს სხვადასხვა სტილის ნაზავით, რაც მას ნაქსოვ მაქმანს მიამსგავსებს.

ციხე-სიმაგრის ტერიტორიაზე აღმოაჩენთ მსოფლიოში ყველაზე პატარა სამლოცველოს, რომლის ფართობი 2 კვადრატულ მეტრზე ნაკლებია .

ციხის კონსტრუქციების შექმნაში გამოყენებულია ბეტონი, აგური, ქვა, მინა და ხე . კოშკების, სასახლისა და შადრევნების არქიტექტურა იმ მოვლენების სიმბოლოა, რომლებმაც მნიშვნელოვანი როლი ითამაშეს ესპანეთის ისტორიაში.

ნერვიონის ჩანჩქერი და დელიკას კანიონი

ესპანეთის ყველაზე მაღალი ჩანჩქერი (270 მ სიმაღლის) მდებარეობს ქვეყნის ჩრდილოეთით, დელიკას ღრმა კირქვის ხეობაში . ჩანჩქერისკენ წიფლის ტყის გავლით ულამაზესი ბილიკი გადის და გზად მე-11-მე-12 საუკუნეების მონასტრის ნანგრევებს წააწყდებით . ჩანჩქერს აქვს ორი პანურამული მოედანი, საიდანაც შესანიშნავი ხედები იშლება . ერთ-ერთი მდებარეობს 300 მ სიმაღლეზე და ხედი აქედან ჩანჩქერზე იშლება, ხოლო მეორე კი მოპირდაპირე მხარესაა და მთის პლატოს გადაჰყურებს.

საკრომონტეს სააბატო

გრანადიდან აღმოსავლეთით სამ კილომეტრზე, ვალპარაისოს მთაზე არის კიდევ ერთი სალოცავი, მნიშვნელოვანი მთელი ქრისტიანული სამყაროსთვის – საკრომონტეს სააბატო.

ათასობით მომლოცველი სტუმრობს ამ ადგილს, რათა თაყვანი სცეს ტესიფონის, იაკობ ალფეევის, ისიოსა და სესილიოს წმინდა ნაწილების . ამ წმინდანების ნაწილები, ლეგენდის თანახმად, შემთხვევით იპოვეს ოქროს მაძიებლებმა . მათი ღირსეულად დაკრძალვის მიზნით, მთის მწვერვალზე გაჩნდა პირველი ნაგებობა . ეს მოხდა შორეულ 1598 წელს . ორი წლის შემდეგ, იეზუიტმა პედრო სანჩესმა, იკისრა რა არქიტექტორის მოვალეობა, დაიწყო სრულფასოვანი ეკლესიის მშენებლობა, რომლის გარშემოც შემდგომში სააბატო ჩამოყალიბდა . სოლომონის ვარსკვლავი მისი სიმბოლო გახდა.

დღეს ამ ძეგლს ყოველწლიურად სტუმრობს ათასობით მომლოცველი მთელი მსოფლიოდან . სააბატოს მშენებლობა რამდენიმე საუკუნე გაგრძელდა და დასრულდა მხოლოდ მე-19 საუკუნეში . შენობების საკმაოდ მოკრძალებული არქიტექტურული გაფორმების შემდეგ გაგაოცებთ დახვეწილი ინტერიერი . ეკლესიაში წარმოდგენილია შესანიშნავად მორთული საკურთხეველი წმინდანთა ქანდაკებებით . ინტერიერს ამშვენებს მრავალი ნახატი და ქანდაკება.

პალმა დე მაიორკას აკვარიუმი

პალმა დე მაიორკას აკვარიუმი აქტიური შემეცნებითი დასვენების შესანიშნავი ალტერნატივაა ესპანეთში ან კონკრეტულად კუნძულზე . პალმას აკვარიუმში ვიზიტი დიდი სიამოვნებაა ბავშვებისთვის, მოზარდებისთვის და უფროსებისთვისაც . ყოველწლიურად მას 400 ათასი ადამიანი სტუმრობს!

აკვარიუმის ფუნქციონირებს 2007 წლიდან . სტუმრებს სთავაზობენ ჩაყვინთონ წყალქვეშა სამყაროში და გაეცნონ ფლორისა და ფაუნის საოცარ წარმომადგენლებს . ზღვის 700 სხვადასხვა სახეობის 8000-ზე მეტი ნიმუში ცხოვრობს აქ წარმოდგენილ 55 აკვარიუმში . ხმელთაშუა ზღვის, ინდოეთის, ატლანტისა და წყნარი ოკეანის თემატური დარბაზები გაგაოცებთ თავისი ფერთა პალიტრითა და მრავალფეროვნებით.

ქრისტიანი მეფეების ალკაზარი

თუკი ერთდროულად სხვადასხვა ეპოქის არქიტექტურული სტილის გაცნობა გსურთ, აუცილებლად უნდა მოინახულოთ ქრისტიანი მონარქების ალკაზარი, რომელიც იუნესკოს მსოფლიო მემკვიდრეობის სიის ღირსეული ნაწილია . თავისი ულამაზესი ბაღებით, აუღებელი ციტადელით, უძველესი მუდეხარის არქიტექტურითა და მდიდარი ისტორიით, ის სევილიის შემდეგ მეორე მონარქიული რეზიდენციაა მსოფლიოში.

დრომ არ დაზოგა ესპანეთის მრავალი ღირსშესანიშნაობა . თუმცა, რამდენიმე რესტავრაციის მიუხედავად, ალკაზარი დღესაც თავისი სრულყოფილი სილამაზით წარმოჩინდება . მაღლა, მთავარ ფასადზე განლაგებული დიდი და ლომის კოშკები დღემდე შემორჩა თავდაპირველი სახით . მე-15 საუკუნეში კომპლექსს დაემატა ინკვიზიციის კოშკი (ყველაზე მაღალი), ხოლო მე-20 საუკუნეში, რეკონსტრუქციის დროს, აშენდა მტრედის კოშკი.

სასახლეში შეგიძლიათ ნახოთ ანტიკვარული ნივთების კოლექციები: ხალიჩები, გობელენები, ანტიკვარული ავეჯი, ნახატები . აქ იმართება გამოფენები, ცერემონიები და პრეზენტაციები . ალკაზარის ბაღები, რომლებიც დაახლოებით 55 ათასი კვადრატული მეტრის ფართობს მოიცავს, ნამდვილი ხელოვნების ნიმუშია.

კოსტა ბრავა, კატალონია

კოსტა ბრავას თვალწარმტაცი კურორტი ცნობილია თავისი ქვიშიანი პლაჟებით, რომელთაც ზღვის ქარებისგან შთამბეჭდავი კლდეები იცავს, რომელთა ფერდობებზეც ზეთისხილის და ფიჭვის კორომებია გადაჭიმული.

ბუნებამ აქ ნამდვილი სამოთხე შექმნა . სანაპირო ზოლზე მრავლადაა შეჭრილი პატარა ყურეები, ხოლო ტერიტორიის ეკონომიკური თვალსაზრისით არამიმზიდველობის გამო მისი პეიზაჟები ხელუხლებლად შემორჩა, რაც ხელს უშლის იქ პორტებისა და ნავსადგომების წარმოქმნას . ამ საკურორტო ზონაში იპოვით მრავალ პატარა, მყუდრო ქალაქს, რომლებიც ერთმანეთის მიყოლებით მდებარეობს.

თითოეული ქალაქი რაღაც განსაკუთრებულს გვთავაზობს: ლორეტ დე მარში შეგიძლიათ დაესწროთ თეატრალურ შოუს შუა საუკუნეების ციხესიმაგრეში, ტოსა დე მარში უნდა ეწვიოთ მუზეუმს და იხილოთ მარკ შაგალის ნამუშევრები, ხოლო კადაკესში აღმოაჩენთ პერო-მურას ხელოვნების ცენტრს, რომელშიც გამოფენილია სალვადორ დალის ნამუშევრები, ხოლო პუბოლში აუცილებლად უნდა ნახოთ თავად დალის ციხე.

კოსტა ბლანკას ნაკრძალი

გირჩევთ ეწვიოთ კოსტა ბლანკას ნაკრძალს, რომელიც ესპანეთის სამხრეთ-აღმოსავლეთ მხარეს მდებარეობს . აქ მდებარეობს ევროპის ერთ-ერთი ყველაზე დიდი და მარილიანი ტბა, რომელიც ცნობილია თავისი წყლის ნათელი ვარდისფერი ელფერით.

მარილის კონცენტრაცია აქ ძალიან მაღალია, უფრო მაღალი, ვიდრე მკვდარ ზღვაში . საინტერესო ფერს წყალს აქ მობინადრე მიკროორგანიზმები სძენენ . ზაფხულის ბოლოს მათი კონცენტრაცია მაქსიმუმს აღწევს და წყალი მუქი ფუქსიის შეფერილობას იღებს.

პრადოს ეროვნული მუზეუმი, მადრიდი

მსოფლიოში ერთ-ერთი უდიდესი მუზეუმი მდებარეობს მადრიდში . მასში დაცულია მე-11-მე-18 საუკუნეების ესპანური ფერწერის ყველაზე სრულყოფილი კოლექცია . აქ გამოფენილია მრავალი ევროპელი მხატვრის ნამუშევრები, როგორებიცაა ველასკესი, გოია, ტიციანი, რემბრანდტი, ვან დაიკი და სხვა.

შედევრების რაოდენობით, პრადოს მუზეუმი არ ჩამოუვარდება ლუვრს . გამოფენა მოიცავს ნახატების, გრავიურების, მონეტების, ტანისამოსის ელემენტებისა და დეკორატიული ხელოვნების ნიმუშების კოლექციებს . აქ მოხვედრისას რამდენიმე საათიანი ესთეტიკური სიამოვნება გარანტირებული გექნებათ . პრადოს მუზეუმს ხელთუქმნელი სილამაზის ყველა თაყვანისმცემელი უნდა ეწვიოს.

პრადოს მუზეუმის ბილეთები

ბელვერის ციხესიმაგრე

ბელვერის ციხესიმაგრე ერთადერთი მრგვალი გოთური ნაგებობაა ესპანეთში . მისი ისტორია იწყება მე-14 საუკუნიდან (1300 – 1311 წწ.), როდესაც არაგონის მეფემ ხაიმე II-მ გადაწყვიტა თავისი საზაფხულო რეზიდენცია აეშენებინა მაიორკას თვალწარმტაც მთიან მხარეში.

ციხის ტერიტორიაზე სამი დიდი, განიერი, ცილინდრული კოშკი აკრავს ცენტრალურ ეზოს, რომლებიც თაღით უკავშირდება ცალკემდგომ უფრო მაღალ კოშკს . თავად ეზო ორდონიანია . შეგიძლიათ მოიაროთ პირველი და მეორე სართული, შემდეგ ახვიდეთ სახურავზე და დატკბეთ ულამაზესი პანორამით, რომელიც მთელს პალმაზე ერთ-ერთი ყველაზე ლამაზი და საოცარია.

თავდაპირველად ციხე ემსახურებოდა საცხოვრებელ და თავდაცვით ფუნქციებს . შემდეგ, თითქმის ექვსი საუკუნის განმავლობაში, მას ციხედ იყენებდნენ . ბელვერში ახლა განთავსებულია პალმის ისტორიული მუზეუმი, რომელიც ასახავს ქალაქის განვითარებას მისი კულტურული ძეგლებით . მასში დაცულია ტალაიოტური, რომაული, არაბული და ესპანური პერიოდის კერამიკის მდიდარი კოლექცია, ასევე არქეოლოგიური აღმოჩენებისა და კლასიკური ფიგურების საინტერესო კოლექცია.

ლა რიოხა – ვენახების ქვეყანა

ავთენტური ადგილობრივი ღვინის მცოდნეებისთვის ესპანეთში უდავოდ არის მოსანახულებელი ადგილები . რიოხას რეგიონი ჩრდილოეთ ესპანეთში განთქმულია თავისი ვენახებით . აქ წარმოებული ღვინოები ნათელი გემოთი გამოირჩევა . ნიადაგის უნიკალური შემადგენლობისა და მიკროკლიმატის გამო, თითოეულ ზონაში მისთვის დამახასიათებელი ღვინოა წარმოდგენილი.

რა იზიდავს აქ ტურისტებს ? უამრევი ვენახი და ღვინის საწარმო, შესანიშნავი გასტრონომია, ადგილობრივი მოსახლეობის სტუმართმოყვარეობა და შესანიშნავი სასმელების დაგემოვნების შესაძლებლობა . ღვინის საწარმოების მონახულების გარდა, შეგიძლიათ ეწვიოთ არაერთ რესტორანსა და ღვინის სპას, გაათებოთ ღამე რომელიმე მყუდრო სასტუმროში . ლა რიოხის ღვინის დედაქალაქ ლაგუარდიას ციხე-სიმაგრის მონახულებისას, აუცილებლად უნდა ეწვიოთ ღვინის კულტურის მუზეუმს, რომელშიც გამოფენილია ღვინოსთან დაკავშირებული ექსპონენტები.

სანტიაგო დე კომპოსტელას ტაძარი

ტაძრის კიდევ ერთი სახელწოდებაა წმინდა იაკობის საკათედრო ტაძარი . ათასწლიანი ისტორიის მქონე ეს ტაძარი ერთ-ერთი ყველაზე სახელგანთქმული სალოცავია დასავლეთ ევროპაში, რომელსაც ყოველწლიურად უამრავი ადამიანი სტუმრობს . ლეგენდის თანახმად, ტაძარი აშენდა ქრისტეს ერთ-ერთი მოწაფისა და მოციქულის, წმინდა იაკობის დაკრძალვის ადგილას.

დღეს ეს ესპანეთის ერთ-ერთი ღირსშესანიშნაობა 80 მ სიმაღლის გოთიკური კოშკებით, რომელიც გაგაოცებთ თავისი სიდიადითა და სილამაზით . ტაძარი ასევე არის მსოფლიოში ცნობილი მომლოცველთა მარშრუტის, წმინდა იაკობის გზის საბოლოო დანიშულების ადგილი.

ლას მედულასის ოქროს მაღაროები

ჩრდილო-დასავლეთ ესპანეთის კიდევ ერთი ღირსშესანიშნაობაა ოქროს მაღაროები ქალაქ პონფერადასთან ახლოს . ჩვენი წელთაღრიცხვის 1-ლ საუკუნეში რომის ხელისუფლებამ დაიწყო ოქროს საბადოების ექსპლუატაცია ჰიდრავლიკური ტექნოლოგიის გამოყენებით და კლდეებიდან მთელი ოქროს შემცველი ფენების გამორეცხვა . იმ დროს ეს იყო ყველაზე დიდი ოქროს მაღაროები მსოფლიოში . ორიოდე საუკუნის შემდეგ რომაელებმა მიატოვეს სამთო მოპოვება და თანდათან მაღაროებიც გამოუსადეგარი გახდა.

კომპლექსი მოიცავს მაღაროებს, გამოქვაბულებს, კაშხლებს და არხების სისტემებს, რომელთა მეშვეობითაც ხდებოდა წყლის მიწოდება . ზემოთ პანორამული მოედანია მოწყობილი.

ორდესა და მონტე პერდიდოს ეროვნული პარკი

ორდესა და მონტე პერდიდო არის ეროვნული პარკი ესპანეთის პირენეებში, უესკას პროვინციაში . ეს ეროვნული პარკი უძველესია პირენეებში და დაარსდა 1918 წლის 16 აგვისტოს . კომპლექსის მთავარი ღირსშესანიშნაობაა მთის მწვერვალი მონტე პერდიდო (3355 მ ზღვის დონიდან), რომელიც 1997 წელს იუნესკოს მსოფლიო მემკვიდრეობის სიაში შევიდა.

ამ ულამაზეს პარკს ყოველწლიურად დაახლოებით 600 000 ადამიანი სტუმრობს . მდინარე ორდესას ხეობაში წარმოდგენილია ევროპის კონტინენტის ყველაზე ღრმა კანიონები, გრანდ კანიონის მსგავსი საოცარი კლდეებით, მაგრამ უფრო მეტი მცენარეებით . დაცულ ტერიტორიაზე შემონახულია მცენარეები და ცხოველები, რომლებიც დღესდღეობით გამქრალია ევროპის უმეტეს ქვეყნებში.

კურორტი იბიცა

ესპანეთში ძალიან ბევრი საზღვაო კურორტია, რომელთა შორის განსაკუთრებული პოპულარობით სარგებლობს თავისი მრავალრიცხოვანი წვეულებებით სახელგანთქმული იბიცა . უამრავი ტურისტი სტუმრობს ხმელთაშუა ზღვის ამ მზიან კუნძულს, რომელიც ბალეარის არქიპელაგის ნაწილია, აქ ადამიანები ზღვითა და მზით ტკბებიან და დღე და ღამე გართობას ეძლევიან.

იბიცაზე დამსვენებელთა უმრავლესობა ახალგაზრდები არიან . მათთვის კუნძულზე ღამის კლუბების ქსელია წარმოდგენილი, რომელიც სტუმრებს რეგულარულ შოუ-პროგრამებს . კუნძულის მთავარი ქალაქი, ამავე სახელწოდებით, ცნობილია თავისი შესანიშნავი ინფრასტრუქტურით და სასიამოვნო, მეგობრული ატმოსფეროთი.

ქალაქის ძველ ნაწილს აკრავს უძველესი ციხესიმაგრის გალავანი . მიხვეულ-მოხვეულ ქუჩებში სეირნობისას შეგიძლიათ ეწვიოთ სუვენირების მაღაზიებს, უბრალო საყვარელ კაფეებს ან მყუდრო რესტორნებს.

ავიაბილეთები იბიცას მიმართულებით

არენა ლას ვენტასი

კორიდა – საკმაოდ საკამათო ესპანური ტრადიციაა, რომელიც წინააღმდეგობრივ ემოციებს იწვევს, მაგრამ ის მაინც ქვეყნის კულტურის განუყოფელ ნაწილად ითვლება . კულტურულ ძეგლად გამოცხადებული ხარების ბრძოლის არენა მადრიდში ყველაზე დიდია ესპანეთში და ერთ-ერთი უდიდესი მსოფლიოში, მაყურებელთა რაოდენობის მიხედვით.

ლას ვენტასის არენამ სახელი ქალაქის იმ უბნისგან მიიღო, სადაც მდებარეობს . ამ ნაგებობას გამოარჩევს მკაფიო ნეო-მუდეხარის სტილი: ლითონის ჩარჩო შერწყმული დეკორატიული აგურის ფასადთან, რომელზედაც ესპანეთის პროვინციების კერამიკული გერბებია გამოფენილი.

ამ ნაგებობის შიგნით არის კორიდის მუზეუმი, რომელიც მოგვითხრობს მის ისტორიასა და მნიშვნელობაზე ესპანეთის კულტურისა და ისტორიისთვის.

ლა რამბლა, ბარსელონა

ლა რამბლა მთელი ესპანეთის სავიზიტო ბარათადაა მიჩნეული  და გადაჭიმულია ბარსელონას კატალონიის მოედანიდან ძველ პორტამდე . ბულვარის საფეხმავლო ცენტრი, მუდამ სადღესასწაულო ატმოსფერო და მიმდებარე ტერიტორიაზე არსებული უამრავი მაღაზია ყოველწლიურად მილიონობით მნახველს იზიდავს . აქ მოგზაური აღმოაჩენს ბევრ არქიტექტურულ ღირსშესანიშნაობას, კაფესა და რესტორანს, მაღაზიებს და სუვენირების დახლებს.

ლა რამბლას ტერიტორია მთლიანად საფეხმავლოა და თითქმის არასოდეს არის ცარიელი . მის ორივე მხარეს ვიწრო ცალმხრივი გზებია . ქუჩა დიდი ხანია უდიდესი პოპულარობით სარგებლობს ტურისტებს შორის – აქ გასეირნება ბარსელონაში მოხვედრისას ნომერ პირველი საქმეა მათთვის, ვინც პირველად სტუმრობს ქალაქს.

გოთური კვარტალი, ბარსელონა

ევროპაში ყველაზე დიდი არქიტექტურული ანსამბლი, რომელიც ცნობილია როგორც გოთური კვარტალი, ბარსელონას ნამდვილი მარგალიტია და სტუმრებს მრავალ ღირსშესანიშნაობას სთავაზობს . რომის იმპერიის, რენესანსის, გოთური და თანამედროვე არტ ნუვოს არქიტექტურის ერთობლიობა, რომელიც საგულდაგულოდ არის შემუშავებული უმცირეს დეტალებამდე, იწვევს დაუვიწყარ შეგრძნებებს და ხიბლავს თავისი სილამაზით.

გოთურ კვარტალში თითქმის ყველა შენობა საინტერესოა არქიტექტურული თუ ისტორიული თვალსაზრისით . პირველ ადგილს იკავებს საკათედრო ტაძარი, რომელსაც თავისი გოთური სტილის ბრწყინვალე ფასადებით ბარსელონისს სხვა ტაძრებს შორის ბადალი არ ჰყავს . ასევე გირჩევთ მოინახულოთ მთავრობის სასახლე, მთავარდიაკონის სახლი, ავგუსტუსის ტაძრის ნანგრევები, სამეფო მოედანი და ა.შ.

დალის სახლ-მუზეუმი

სალვადორ დალის სახლ-მუზეუმი სტუმრებისთვის 1997 წელს გაიხსნა . ეს მართლაც უნიკალური სტრუქტურაა, რადგან შედგება სათევზაო სახლების ერთობლიობისგან, რომლებიც დალიმ დააპროექტა ლაბირინთის სახით.

სტუმრებს შეუძლიათ დაათვალიერონ მხატვრის სახელოსნო, ბიბლიოთეკა, ბაღი და საცხოვრებელი ოთახები . 1998 წელს კატალონიის მთავრობის კულტურის დეპარტამენტმა სახლ-მუზეუმი გამოაცხადა ეროვნულ კულტურულ და ისტორიულ ძეგლად.

ასევე წაიკითხეთ დაკავშირებული სტატიები:

• საუკეთესო-20 ღირშესანიშნავი ადგილი, მადრიდში
• 20 საინტერესო ადგილი ბარსელონაში, რომელიც ღირს სანახავად
• მენორკა: 5 მიზეზი, თუ რატომ უნდა იმოგზაუროთ აქ
• მზის ქალაქი: 3-დღიანი გზამკვლევი ბარსელონაში
• 9 ადგილი ტენერიფეში, რომელიც თქვენს დასვენებას საინტერესოს გახდის
• ესპანეთის 10 საუკეთესო კურორტი: კოსტა ბრავადან კოსტა დელ სოლიმდე