მზის ქალაქი: 3-დღიანი გზამკვლევი ბარსელონაში

თუ თქვენ ბარსელონაში მიფრინავთ – იღბლიანი ბრძანდებით! ეს ქალაქი სამართლიანად ითვლება პლანეტის ერთ-ერთ საუკეთესო დასასვენებელ და საცხოვრებელ ადგილად. ბარსელონაში თავისუფალი, მზიანი ატმოსფერო სუფევს, რა მიზეზითაც ადამიანები აქ მსოფლიოს ყველა კუთხიდან  ჩამოდიან და სეზონზე ქალაქი მოგზაურთა უზარმაზარ ნაკადს სტუმრობს.

ბარსელონის მონახულების საუკეთესო დროა – სექტემბერი, ოქტომბრის დასაწყისი. ამ თვეებში ტურისტების ნაკადი უკვე შემცირებულია, თვენ მარტივად შეძლებთ კარგი საცხოვრებლის პოვნას, არ იქნება უზარმაზარი რიგები დაწესებულებებში (დიახ, ბარსაში რესტორნებში რიგებში დგანან ხოლმე, მაგრამ ამაზე უფრო მოგვიანებით ვისაუბრებთ), ფასები მცირდება და ზოგადად უფრო სასიამოვნოა, როდესაც ადამიანთა რაოდენობა უფრო მცირეა და არ არის დამღლელი პაპანაქება სიცხე.

El Prat (BCN) აეროპორტში ჩამოსვლა

ჩამოსვლისას თქვენ სტანდარტულ პროცედურებს გაივლით: საპასპორტო კონტროლი, ბარგის აღება და საერთო დარბაზში გასვლა. შემდეგ თქვენ ქვედა დონეზე ჩასასვლელი და A1 ავტობუსი უნდა იპოვოთ. ეს ძალიან მარტივია, რადგან ყველგან განთავსებულია მინიშნება „Bus“ და უბრალოდ მიჰყევით მას. ავტობუსით მგზავრობის ღირებულება დაახლოებით 6 ევროა, გირჩევთ თან ცოტაოდენი წვრილი ფული იქონიოთ.

ამ ავტობუსით თქვენ ბარსელონას შუაგულ ცენტრამდე – კატალონიის მოედნამდე იმგზავრებთ. სხვათა შორის, ამ ავტობუსითვე ყველაზე კომფორტულად შეძლებთ აეროპორტში ჩასვლას, მაგრამ ყურადღება მიაქციეთ თუ რომელი ტერმინალიდან მიფრინავთ, ელ პრატის აეროპორტში ორი ტერმინალია – და შესაბამისად  A1 და A2 ავტობუსები.

მოედანზე ყველა სატრანსპორტო საშუალებაა თავმოყრილი – ავტობუსი, მეტრო და საქალაქთაშორისო ელექტრომატარებელი. აქედან ესპანეთის პრაქტიკულად ნებისმიერ წერტილში შეძლებთ მგზავრობას. გადაადგილების ყველაზე ოპტიმალური ვარიანტია – T10 სამგზავრო ბილეთი. მის შეძენას მეტროს ნებისმიერი სადგურის შესასვლელთან შეძლებთ. სამგზავრო ბილეთი მეტროთი, ავტობუსითა და ტრამვაით ათი მგზავრობის საშუალებას იძლევა, ამასთან თუ  ბილეთი აამოქმედეთ,  უახლოესი ერთი საათის განმავლობაში ყველა ტრანსპორტით სარგებლობას შეძლებთ. სატრანსპორტო საშუალების შეცვლის დროს თქვენ უბრალოდ გაატარებთ ბილეთს როგორც ჩვეულებრივი გადახდის შემთხვევაში, მაგრამ არ გაკლდებათ მოგზაურობის რაოდენობა. ბილეთის უკანა მხარეს ყოველ ჯერზე მოგზაურობის დარჩენილი რაოდენობა იბეჭდება.

გირჩევთ მობილურ ტელეფონზე Moovit აპლიკაცია ჩაიწეროთ – ის დაგეხმარებათ გაიგოთ საზოგადოებრივი ტრანსპორტის ადგილმდებარეობა, რომლის მეშვეობითაც ძალიან მოსახერხებელია მოგზაურობის საშუალების და მარშრუტის შერჩევა და დანიშნულების ადგილზე მოხვედრის დროის გათვლა.

რა შეიძლება მოინახულოთ

დღე 1

შეიძინეთ ადგილობრივი სიმ ბარათი. გამოგადგებათ, მაგალითად Lebara ან Orange ბარათები. ამისათვის აუცილებელია პასპორტი და ენის ცოტაოდენი ცოდნა იმისათვის, რომ შეძლოთ ახსნათ, რომ მობილური ინტერნეტი რამდენიმე დღით გჭირდებათ. მობილური ინტერნეტი ძალიან დაგეხმარებათ ქალაქში გადაადგილების დროს.

კატალონიის მოედანი

ეს არის ბარსას გული და ქალაქის უდიდესი სატრანსპორტო კვანძი. კატალონიის მოედანზე მოხვედრისას მსოფლიოს ნებისმიერი კუთხიდან ჩამოსული ადამიანების ნახვას შეძლებთ. მოედნის ცენტრს უზარმაზარი „ქარის ვარდი“ ამშვენებს, გვერდით კი ლამაზი შადრევანია, რომელიც საღამოობით განათებულია. მოედნის ერთ-ერთი მთავარი ღირსშესანიშნაობა მტრედებია – აქ მილიონობით მტრედია, რომლებსაც ადამიანების საერთოდ არ ეშინიათ.

ადგილობრივი მოვაჭრეები მარცვლეულს ყიდიან იმისათვის, რომ ტურისტებმა ფრინველების გამოკვება შეძლონ და სამახსოვროდ რამდენიმე ფოტო გადაიღონ. თუმცა ისინი მარცვლეულს არარეალურ ფასად ყიდიან. შეგიძლიათ საკვები სადმე სხვაგან შეიძინოთ და ამით თანხა დაზოგოთ, მაგრამ შეგიძლიათ ამაზე უბრალოდ არ იდარდოთ, ეს უკვე თქვენზეა დამოკიდებული.

კაფე Corte Ingles (Viewpoint) ზედა სართულზე

მოედანზე განთავსებულია უზარმაზარი სავაჭრო ცენტრი Corte Ingles. აქ  საინტერესო ლოკაცია მდებარეობს, რომელიც არ ჩანს, მაგრამ ყურადღებას ნამდვილად იმსახურებს. თუ სავაჭრო ცენტრში  პუნქტზე მითითებული შესასვლელიდან შეხვალთ, ლიფტებთან მოხვედრას  და ზედა სართულზე ასვლას შეძლებთ. ზემოთ მდებარეობს რესტორანი და კაფე თვითმომსახურებით, საიდანაც საოცარი ხედი იშლება მოედანზე.

La Rambla

გთავაზობთ ადგილს კაფესთან La Rambla-ს დასაწყისში, საიდანაც აუჩქარებლად ზღვისკენ გასეირნებას შეძლებთ. ეს ქუჩა ძალიან კოლორიტულია, აქ ადამიანთა უწყვეტი ნაკადია დღის ნებისმიერ მონაკვეთში.

მარცხნივ – გოთიკური კვარტალი, ვიწრო ქუჩები, არქიტექტურული ძეგლები, ბარები, კაფეები და სუვენირების მაღაზიებია. მარჯვენა მხარეს უფრო სავაჭრო ნაწილია წარმოდგენილი უამრავი მაღაზიით. გირჩევთ არ აჩქარდეთ, რამბლასთან სეირნობას რამდენიმე საათი ან თუნდაც ნახევარი დღე დაუთმოთ.

აქ უამრავი რამაა სანახავი და მთავარი ქუჩის როგორც მარჯვენა, ისე მარცხენა მხარეს ბევრ საინტერესოს იხილავთ. ქვემოთ გთავაზობთ იმ ადგილების სიას, რომელთა მონახულებას გირჩევთ სეირნობის დროს ან საღამოს.

წმიდა ჯვრის ტაძარი

შემდეგ  Rambla-ს გადაკვეთას  და წმინდა ჯვრის ტაძრისკენ  მიმავალ გზაზე მდებარე ვიწრო ქუჩების შესწავლას გირჩევთ.

ამ ტაძარში შესვლა და შიგნიდან დათვალიერება ნამდვილად ღირს. არ დაიშუროთ შესვლის საფასური და თქვენ გაოცებული დარჩებით შუა საუკუნეების არქიტექტურისა და ამ ადგილის სილამაზით.

სანტა მარია დელ პის ტაძარი

შემდეგ კი გოთიკური კვარტლის ქუჩებში კვლავ სეირნობით, განაგრძეთ გზა სხვა მხარეს, კიდევ ერთი ტაძრისკენ. ამჯერად ეს სანტა მარია დელ პის ტაძარია. ტაძარი თავისი სიძველით და წინა მხარეს დიდი ვიტრაჟით გამოირჩევა. მაგრამ ამ ადგილის განსაკუთრებულობა ამაში არ მდგომარეობს.

ფლამენკოს ვირტუოზი გიტარისტი დღე გამოტოვებით კონცერტს მართავს მცირე სალოცავ დარბაზში. უძველესი კედლების, ესპანური გიტარის და კოლორიტის შეხამება საოცარ შთაბეჭდილებას ახდენს.  ბილეთის შეძენა პირდაპირ ტაძრის შესასვლელში შეგიძლიათ, უბრალოდ აქვე მომუშავეებს სთხოვეთ და აუხსენით, რომ გიტარის კონცერტზე გსურთ მოხვედრა. გირჩევთ, საღამოს ცოტა ხნით ადრე მოხვიდეთ, რომ დარბაზში კარგი ადგილი დაიკავოთ.

ბოკერიას ბაზარი

სავარაუდოდ მოგშივდათ? მაშინ თქვენ აქ უნდა მოხვიდეთ. გადაჭარბების გარეშე, ეს ბაზარი მსოფლიოში ერთ-ერთი ყველაზე კოლორიტულია. შესასვლელთანვე შემოთავაზებული დელიკატესების მრავალფეროვნება ყველაზე დახვეწილ  ფანტაზიასაც კი გააოცებს. სამარკო ჰამონი გსურთ? ან იქნებ ტროპიკული ხილი? ან იქნებ ახალი ხამანწკები გსურთ ბოკალ ღვინოსთან ერთად? ყველაფერი ეს და სხვა მრავალი რამ პირდაპირ ბაზარზე შეგიძლიათ შეიძინოთ და დააგემოვნოთ.

საქმე იმაშია, რომ ესპანელებს  განსაკუთრებული კვების კულტურა აქვთ, თითქმის ყველაფერი რასაც ხედავთ, ადგილზე შეგიძლიათ დააგემოვნოთ. ბაზრის სიღრმეში რამდენიმე რესტორანი მდებარეობს, სადაც რიგში დგომაც კი მოგიწევთ, სანამ ადგილი არ განთავისუფლდება.

თევზის რიგებში თქვენ ახალ ხამანწკებს შემოგთავაზებენ (აქ ერთი ჩინელია, რომელსაც ყველაზე გემრიელი და დიდი ხამანწკები აქვს). ბაზრის პერიმეტრის გასწვრივ ღვინის მაღაზიები მდებარეობს. ნუ ეტყვით თავს უარს სიამოვნებაზე. მაშ ასე, დანაყრდით? დროა გზა განვაგრძოთ!

Plaça Reial

რიგში შემდეგია Plaça Reial. ეს საინტერესო ადგილი მთავარი ქუჩიდან სიღრმეში მდებარეობს. თავად მოედანიც ლამაზია, პერიმეტრზე უამრავი რესტორანი და ბარი მდებარეობს. ეს პუნქტი აღნიშნულია ბარის გვერდით სახელწოდებით Los Tarantos.

ეს ძალიან განსაკუთრებული ადგილია, სადაც უკვე მრავალი წელია ფლამენკოს წარმოდგენებს მართავენ. ითვლება, რომ ეს არის ფლამენკოს ერთ-ერთი უძველესი შოუ ბარსელონაში. მე პირადად ორჯერ ვიყავი და, ვაღიარებ, რომ მოგონებისგან ჯერ კიდევ ჟრუანტელი მივლის. საოცარი ენერგეტიკა და შესრულებაა, ესპანეთის ნამდვილი კოლორიტი და ტემპერამენტი. ერთ-ერთ საღამოს აუცილებლად ეწვიეთ, აღფრთოვანებული დარჩებით.

გუელის სასახლე

რა თქმა უნდა, ბარსელონაში გაუდის გარეშე როგორ დავრჩებით? მის შემოქმედებასთან გაცნობა გუელის სასახლით  დავიწყოთ –  გენიალური არქიტექტორის მფარველისა.

შენობა თავად საუბრობს საკუთარ თავზე, ნათლად ჩანს გაუდის სტილი და მანერა. მე არა ვარ სპეციალისტი არქიტექტურაში, მაგრამ გირჩევთ დაათვალიეროთ ეს ადგილი.

Mirador de Colom

შემდეგ ზღვისკენ ჩასვლისას თქვენ  Mirador de Colom მოედანზე მოხვდებით.

ცენტრში სვეტის სახით მონუმენტია აღმართული, ძალიან ლამაზი ადგილია, საიდანაც სანაპირო და იახტ კლუბი იწყება.

იახტ კლუბი

თქვენ საინტერესეო ხიდზე და იახტ-კლუბებში მოხვდით. მე მსიამოვნებს საღამოობით ხიდზე ჯდომა და თამბაქოს მოწევა ათასობით ანძაზე ცქერით.   ვიმედოვნებ, თქვენც მოგეწონებათ! შეგიძლიათ ხიდის გარშემო გაისერნოთ და ახლომდებარე სავაჭრო ცენტრები და აკვარიუმი შეისწავლოთ.

L’Aquarium

აკვარიუმზე ვერაფერს ვიტყვი, უბრალოდ ვიცი, რომ იქ მდებარეობს და მოძრაობისთვის კარგი ორიენტირია.

შეხვიდეთ თუ არა – თქვენი გადასაწყვეტია. აქედან პარკის გავლით თქვენ სანაპიროზე მოხვდებით და შემდეგ კი მომდევნო ლოკაციაზე.

Museu d’Història de Catalunya

ასევე ყურადღებას იმსახურებს კატალონიის ისტორიის მუზეუმი, სადაც სართულების მიხედვით ჩვენი ისტორიაა წარმოდგენილი  უძველესი დროიდან დღემდე. სახურავზე შესანიშნავი რესტორანი მდებარეობს ლამაზი ხედით ყურეზე. შესასვლელთან შეგიძლიათ დაცვას აუხსნათ, რომ რესტორანში გსურთ შესვლა და სავარაუდოდ, მუზეუმში შესვლის საფასურს არ გადაიხდით.

Restaurant 7 Portes

განსაკუთრებული გურმანებისთვის განსაკუთრებული ადგილის რეკომენდაცია შემიძლია. ეს არის  ისტორიისა და ტრადიციების მქონე რესტორანი. «7 ნავსადგური»  ბარსელონას ერთ-ერთი უდავო ღირსშესანიშნაობაა. ამ რესტორნის მაგიდებთან ერთ დროს  უამრავი ცნობილი ადამიანი იჯდა, რასაც მიმტანები მოგახსენებთ და გაჩვენებთ. საშუალო ქვითარი საკმაოდ ძვირადღირებულია, რადგან ეს დაწესებულება საკმაოდ მაღალი დონისაა.

დღე 2

Arc de Triomf

ეს დღე ტრიუმფალური თაღით დავიწყოთ, მეტროს სადგური Arc de Triomf (L1 ხაზი).

ციტადელის პარკი

თაღიდან ზღვისკენ გრძელი, ლამაზი გამზირი იწყება. ამ გამზირზე აუჩქარებელი გასეირნებით თქვენ ციტადელის პარკში მოხვდებით. აუცილებლად გაისერნეთ შადრევნისკენ, ის ძალიან ლამაზია! პარკში სეირნობისას ასევე გირჩევთ კიდევ ერთ ტაძარს ეწვიოთ – სანტა მარია დელ მარის ტაძარს.

ამ ტაძრისკენ გზა ისეთ უბანში გადის, სადაც უამრავი მაღაზიაა გათვასებული ყველა სახის ხელნაკეთი ნივთებით. შეგიძლიათ შეათავსოთ სასიამოვნო სასარგებლოსთან და სუვენირები შეიძინოთ.

ღვინის მაღაზია მეტრო ბარსელონეტასთან

შემდეგ ვიწრო ქუჩების ლაბირინთს თავი დავაღწიოთ და მეტრო ბარსელონეტასკენ გავემართოთ. მეტროდან გამზირის გასწვრივ გადაადგილდით. ნავიგატორით შეამოწმეთ თუ სად მდებარეობს ჩასახვევი და ღვინის მაღაზიაში  შეიხედეთ ბოთლი ღვინის შესაძენად,  რომელიც  ცოტა მოგვიანებით გამოგადგებათ 🙂 თუ მაღაზია დახურული დაგხვდებათ. არ იდარდოთ, ღვინოს ნებისმიერ მაღაზიაში შეიძენთ.

ლაიფჰაკი იმ შემთხვევაში, თუ აბსოლუტურად არაფერი იცით თაროებზე განთავსებულის შესახებ. ჩვეულებრივ, რაც უფრო მაღალია თარო, მით უფრო მაღალი ფასის კატეგორიის ღვინოა ზედ განთავსებული, ამიტომ ჯერ გადაწყვიტეთ თუ რომელი სიმაღლის შეძენა გსურთ. შემდეგ შეხედეთ თუ რომელი ბოთლები დარჩა ყველაზე ცოტა. ჩვეულებრივ, ადგილობრივმა მოსახლეობამ კარგად იცის თუ რომელი ღვინოა უკეთესი ან რომელია ფასდაკლებით და მას იძენენ. ისარგებლეთ, არ მოგერიდოთ – ჩემთვის ეს ლაიფჰაკი ესპანეთში კარგად მოქმედებდა, 10-დან 9 შემთხვევაში ღვინო  შესანიშნავი იყო.

ბარსელონეტას ბაზარი

ღვინის მაღაზიის შემდეგ ადგილობრივ ბაზარს ეწვიეთ (ან იმავე შენობაში მდებარე სუპერმარკეტს, თქვენი დროიდან გამომდინარე), ღვინოსთან მისართმევად  ყველი და ჰამონი შეიძინეთ. ბოლოს გირჩევთ პატარა საცხობს ესტუმროთ და ახალი პური იყიდოთ. თქვენ უკვე სრულად შეიარაღებული ბრძანდებით.

მსოფლიოს საუკეთესო ბურგერები Bro-ში

თუ ძალიან მოგშივდათ, მაშინ ნამდვილი ბურგერის დასაგემოვნებლად Bro Burgers ეწვიეთ. აქ მსოფლიოში საუკეთესო ბურგერებია, ხუმრობის გარეშე. შერჩეული არგენტინული ხბოს ხორცის კატლეტი, ხრაშუნა ფუნთუშა, სალათის ფურცლები და ნაზი სოუსი… როგორ შეიძლება ამაზე უარის თქმა? დანაყრების შემდეგ ბარსელონეტას კვარტლების გავლით სანაპიროსკენ გაემართეთ. გირჩევთ ნავიგატორზე შეამოწმოთ ხოლმე, რომ გზა არ აგებნათ.

Placa de Mar და საბაგირო გზა

თქვენ ქალაქის მთავარ პლაჟსა და სანაპიროზე მოხვდით. გირჩევთ Placa de Mar-ის მიმართულებით გაისეირნოთ. აქედან ორი ნაბიჯის გზაზეა საბაგირო გზა.  გაბედულად გადაკვეთეთ მოედანი და მისკენ გაემართეთ.  აქ რიგში დგომა მოგიწევთ, რა გაეწყობა. მაგრამ საბაგიროზე მოხვედრის შემდეგ თქვენ ნამდვილად შეაფასებთ აქედან გადაშლილ ბარსელონას დიდებულ ხედს.

Plaça de l’Armada

საბაგარო გზით თქვენ Plaça de l’Armada მოხვდებით. ბარსელონის ამ ნაწილში – უზარმაზარი პარკია მონტჟუიკის მთაზე საცალფეხო მარშრუტებითა და მთის წვერზე მდებარე უძველესი ციხესიმაგრით. პარკი ძალიან ლამაზია და ბარსას ხედებიც შესანიშნავია. ციხე-სიმაგრეზე ასასვლელად ცოტა აღმართზე ფეხით სიარული მოგიწევთ.

აირჩიეთ თქვენთვის მოსაწონი გაზონი და პიკნიკი მოიწყვეთ, სწორედ აქ გამოიყენებთ შეძენილ ღვინოსა და დასაყოლებელს. მოეწყვეთ ხეების ჩრდილის ქვეშ და ბარსელონას საოცარ ხედებთან ერთად  ღვინის და გაუდას ყველის ახალ ბაგეტთან მირთმევით ისიამოვნეთ. ამ სიტყვებს ვწერ და კეთილი შურით მშურს იმის, ვინც ამას გააკეთებს 🙂 საკვების ნაწილი შეგიძლიათ მზის ჩასვლისთვის დაიტოვოთ, მერწმუნეთ, გამოგადგებათ.

მონტჟუიკის ციხესიმაგე

მთაზე ასვლის საბოლოო წერტილია – უძველესი ციხესიმაგრე. ციხესიმაგრე ძალიან ლამაზი და ძალიან ძველია. ეს შესანიშნავი ადგილია ფოტოებისთვის, შენიშვნა მათთვის, ვისაც ფოტოების გადაღება უყვარს.

ციხესიმაგრის კუთხეში თქვენ  ბონუსი გელით დასაშვები საბაგირო გზის სახით. გაითვალისწინეთ, რომ საბაგირო გზას  შუალედური სადგურიც აქვს, თქვენ ბოლოს უნდა ჩამოხვიდეთ – აქედან  აქამდე.

Palau Nacional

აქედან ცოტა მეტი ფეხით სიარული მოგიწევთ, მარგამ უკვე დაღმართზე, რაც უთუოდ გესიამოვნებათ ასეთი დატვირთული დღის ბოლოს. საბოლოო ჯამში Palau Nacional-თან უნდა  მოხვდეთ. თქვენ უზარმაზარი კიბის  ზედა ნაწილში აღმოჩნდებით, სადაც საღამოობით საფეხურებზე ხალხი იკრიბება. კიბეების ზედა ნაწილიდან ბარსელონას დიდებული ხედი იშლება.

გირჩევთ დროს მიაქციოთ ყურადღება და აქ მზის ჩასვლამდე მოხვდეთ,  სასურველია 30-40 წუთით ადრე. ეს სანახაობა შესანიშნავი დღის ღირსეული დასასრული იქნება. დაელოდოთ მზის ჩასვლას  (სწორედ აქ დაგჭიდებათ საკვების დარჩენილი მარაგი).

Anella Olimpica

თუ კიბეებზე მზის ჩასვლამდე დიდი ხნით ადრე მოხვედით, შეგიძლიათ ოლიმპიურ პარკს ეწვიოთ.

Font Magica de Montjuic

მზის ჩასვლის შემდეგ  შადრევნისკენ გაემართეთ. ყოველთვის არ მუშაობს, მაგრამ იმედი მაქვს, რომ იღბლიანი აღმოჩნდებით და შოუზე მოხვდებით.

ამ მარშრუტით მეორე დღე ამოიწურა.

დღე 3

ეს დღე განსაკუთრებულია. თქვენ ბარსელონაში სეირნობით უკვე ისიამოვნეთ, დროა მის ყველაზე შთამბეჭდავ ღირშესანიშნაობებს გაეცნოთ. რა თქმა უნდა, ერთ-ერთი ასეთი ადგილია დიდი გენიოსის გაუდის ქმნილება – Sagrada Familia.

Sagrada Familia

არ მოგაწყენთ ამ ადგილის აღწერით, რადგან მისი მხოლოდ სიტყვებით აღწერა შეუძლებელია. ეს საკუთარი თვალით უნდა ნახოთ. ერთადერთი რასაც გირჩევთ არის ის, თუ როგორ მოხვდეთ Sagrada Familia-ში ყველაზე მოხერხებული გზით. ამისათვის თქვენ წინასწარ უნდა შეიძინოთ ბილეთი ონლაინ რეჟიმში, რადგან ტურისტების ნაკადი უზარმაზარია და უმჯობესია ვიზიტის დრო წინასწარ შეარჩიოთ. ოფიციალურ ვებგვერდზე ბილეთების რამდენიმე ვარიანტის შეძენა შეგიძლიათ.

გირჩევთ შეიძინოთ Top Views – experience panoramic views 29 ევროდ. ეს ბილეთი მოიცავს ბილეთებს საგრადაში, აუდიო გიდს და კოშკებზე ასვლას. ბილეთების შეძენისას საშუალება გექნებათ შეარჩიოთ ვიზიტის დრო. გირჩევთ არ იზარმაცოთ და ადრე ადგეთ. საგრადაში ვიზიტისთვის უმჯობესია სამი საათი მაინც გამოყოთ. ამგვარად საკმარისი დრო გექნებათ, რომ აუჩქარებლად დაათვალიერთოთ და გაუდის დიდებულ შემოქმედებას დეტალურად გაეცნოთ.

Sagrada Familia-ს გვერდით იმავე სახელის მეტროს სადგური მდებარეობს. ამ სადგურში მეტროს ორი ხაზი L2 და L5 გადის. ნავიგატორის ან Moovit აპლიკაციის მეშვეობით შეგიძლიათ მგზავრობისთვის საჭირო დრო გამოთვალოთ. ცოტა ადრე გამოდით, რომ უბრალოდ სეირნობის და გარემოს დათვალიერების დრო  დაგრჩეთ.

Tibidabo

დღეისათვის მხოლოდ ორი ღირსშესანიშნაობის მონახულებას  გირჩევდით.  საგრადას შემდეგ თქვენ საკმაოდ გრძელი გზა გელით ბარსელონას ერთ-ერთ ყველაზე მაღალ წერტილზე. აქ ორი გზით შეგიძლიათ ამოსვლა.

პირველი – მარტივია და ზარმაცებისთვის გამოდგება. კატალონიის მოედნიდან ტურისტული ავტობუსი გადის, რომლის ღირებულება დაახლოებით 20 ევროა. ის ყოველგვარი ზედმეტი საზრუნავის გარეშე აგიყვანთ ზემოთ. ავტობუსის გაჩერება აქ იხილეთ.

მეორე ვარიანტის შესახებ ადგილობრივმა მოსახლეობამ მიამბო და ის თავისთავად ბევრად უფრო საინტერესოა, რომ აღარაფერი ვთქვათ მის ბევრად უფრო იაფ ფასზე. გამოიყენეთ თქვენთვის უკვე კარგად ცნობილი T10 სამგზავრო ბილეთი. პირველ რიგში, თქვენ კატალონიის მოედანზე უნდა მოხვდეთ და მეტროს შესასვლელი მოძებნოთ, სადაც S1 და S2 საგარეუბნო ელექტრომატარებლების აღნიშვნაა (ნარინჯისფერი) განთავსებული. ეს შესასვლელი თქვენთვის უკვე ნაცნობ კაფე Zurich-თან მდებარეობს. მიჰყევით ქვემოთ მინიშნებებს, S1 ელექტრომატარებელში ჩაჯექით და  სადგურ Peu del Funicular-მდე იმგზავრეთ.

ამ სადგურზე ჩამოდით და ყოველგვარი ტურნიკეტის გარეშე ფუნიკულიორზე გადაინაცვლეთ. ზემოთ ასვლის შემდეგ (არ ჩამოხვიდეთ შუალედურ გაჩერებაზე) მარჯვნივ  ნომერ 111 ავტობუსი მოძებნეთ – ის პირდაპირ Tibidabo-ს ტაძარში მიგიყვანთ. აქვე ატრაქციონების პარკი და კაფე მდებარეობს, სადაც თუ მოგშივდათ საკმაოდ გემრიელად მიირთმევთ. შემდეგ ტაძარში შედით და ლიფტი იპოვეთ, რომელიც სიმბოლურ ფასად სახურავზე აგიყვანთ.

აქედან საოცარი ხედი იშლება, მთელი ბარსელონა ხელისგულზე მოჩანს. მაგრამ არ შეჩერდეთ მიღწეულზე  – იარეთ წინ და ზემოთ! იპოვეთ კიბე, რომელიც კოშკთან და პირდაპირ ჯვარცმის ქანდაკებამდე აგიყვანთ.  ამ ადგილის სიტყვებით აღწერა შეუძლებელია.

უკან დასაბრუნებლად ორი ვარიანტი გაქვთ, ან  მარშრუტი გაიმეორეთ, ან ავტობუსის გარეშე ფეხით გაისეირნეთ ფუნიკულიორის ზედა წერტილამდე. აქ ჩვენი მარშრუტი სრულდება. თუ მარშრუტი მოგეწონათ, მადლობელი ვიქნები კომენტარებისთვის. გულწრფელად გისურვებთ სასიამოვნო დასვენებას და ბარსელონას ჩვენგან მოკითხვა გადაეცით!

აქვე გთავაზობთ ტოპ შემოთავაზებებს ბარსელონას მიმართულებით

პირდაპირი ფრენა ქუთაისიდან ბარსელონა-ში

გამგზავრებადაბრუნებაავიაკომპანიაფასი
18 მარ 202422 მარ 2024Wizz Airფასი 637
10 აპრ 202422 აპრ 2024Wizz Airფასი 428
10 მაი 202415 მაი 2024Wizz Airფასი 731

ყველაზე იაფი ავიაბილეთები თბილისიდან ბარსელონა, შემდეგი 1წლის განმავლობაში

გამგზავრებადაბრუნებაგაჩერებაავიაკომპანიაფასი
29 მარ 202410 აპრ 20241 ᲒაჩერებაLufthansa647 -დან
28 აპრ 202410 მაი 20241 ᲒაჩერებაLufthansa535 -დან
3 მაი 202410 მაი 20241 ᲒაჩერებაLufthansa606 -დან
5 ივნ 202411 ივნ 20241 ᲒაჩერებაLufthansa629 -დან
16 ივლ 202430 ივლ 20241 ᲒაჩერებაLufthansa738 -დან
5 აგვ 202420 აგვ 20241 ᲒაჩერებაAustrian Airlines864 -დან
19 სექ 202425 სექ 20241 ᲒაჩერებაAustrian Airlines736 -დან
18 ოქტ 202422 ოქტ 20241 ᲒაჩერებაLufthansa605 -დან
14 ნოე 202426 ნოე 20241 ᲒაჩერებაLufthansa844 -დან
1 დეკ 202419 დეკ 20241 ᲒაჩერებაLOT Polish Airlines996 -დან
2 იან 20255 იან 20251 ᲒაჩერებაLOT Polish Airlines790 -დან
8 თებ 202513 თებ 20251 ᲒაჩერებაLOT Polish Airlines1 007 -დან

ასევე შესაძლოა მოგეწონოთ შემდეგი სტატიები და გზამკვლევები:

პრაღის ჯადოსნური ოცეული
20 ადგილი, რომელთა მონახულება ღირს ნიუ-იორკში
ფრენა გადაჯდომით კატარში: რით შეიძლება გაერთოთ, რა შეიძლება დააგემოვნოთ, როგორ უნდა მოიქცეთ
იაპონიის 10 საინტერესო ადგილი, რომელთა დათვალიერებაც ღირს
ჩემი ოცნების ფრენა გადაჯდომით: მსოფლიოს 7 ყველაზე საინტერესო აეროპორტი
თეგები: , ,

მოძებნე ავიაბილეთი

შენთვის სასურველი მიმართულებით საუკეთესო ფასად

Leave a Comment

მობილური აპლიკაცია

მოიძიეთ და დაჯავშნეთ იაფი ავიაბილეთები პირდაპირ თქვენი სმარტფონებიდან, მიიღეთ უფრო მეტი სიამოვნება თქვენი მომავალი დასვენებისთვის.

გადმოწერა