უხერხული კითხვა: როგორ მოქმედებს დაზღვევა საზღვარგარეთ და რისთვის არის საჭირო

მოგზაურობის თანხმლები, ჩვეულებრივ, მხოლოდ სასიამოვნო საზრუნავი უნდა იყოს, მაგრამ, სამწუხაროდ, მოულოდნელობისგან არავინაა დაზღვეული. ასეთი შემთხვევების შედეგებისგან თავიდან აცილებისა და საკუთარი ბიუჯეტის დაცვის მიზნით, გამოცდილი მოგზაურები სამოგზაურო დაზღვევას აფორმებენ.  ჩვენ შევისწავლეთ ეს საკითხი  და თქვენთვის სრული ინსტრუქცია შევადგინეთ თუ როგორ მუშაობს ტურისტული დაზღვევა და როგორ შეარჩიოთ თქვენთვის სასურველი დაზღვევა.

როგორ „მუშაობს“ დაზღვევა?

ყველაფერი მაქსიმალურად მარტივია – სადაზღვევო შემთხვევის დადგომის  შემთხვევაში თქვენ უნდა დარეკოთ ასისტანსის სადღეღამისო სამსახურში, რომლის ტელეფონის ნომერიც პოლისშია მითითებული (ეს სავალდებულოა!). აქ დეტალურ მითითებებს მიიღებთ თუ როგორ უნდა მოიქცეთ: მოგაწოდებენ იმ უახლოესი სამედიცინო დაწესებულების მისამართს, რომელსაც შეგიძლიათ მიმართოთ ან ექიმს სასტუმროში გამოიძახებენ. თქვენი მკურნალობის ყველა შემდგომ ხარჯს სადაზღვევო კომპანია აანაზღაურებს.

რა არის ფრანშიზა?

ეს არის თანხა (ფიქსირებული ან მკურნალობის ღირებულების %), რომელიც დაზღვეულმა თავად უნდა გადაიხადოს  სადაზღვევო შემთხვევის დადგომისას. როგორც წესი, ის არ აღემატება €300-400, ხოლო სოლიდურ კომპანიებში – €100. რაც უფრო მაღალია ფრანშიზა, მით უფრო დაბალფასიანია სადაზღვევო პოლისი.

სამოგზაურო დაზღვევის შემთხვევაში, ფრანშიზა პრაქტიკულად ყოველთვის  უპირობოა.  ეს ნიშნავს, რომ სადაზღვევო კომპანია ანაზღაურებს მხოლოდ იმ ხარჯებს, რომლებიც ფრანშიზას აღემატება. ამ  ხარჯებს ტურისტი თავად იხდის ყოველი სადაზღვევო შემთხვევის დადგომისას. მაგალითად, თუ ექიმთან ვიზიტისა და ანალიზების ხარჯი 150 ევროა, ხოლო ხელშეკრულებაში მითითებული ფრანშიზის ოდენობა 100 ევროა, თქვენ მხოლოდ 50 ევროს აგინაზღაურებენ. ასეთი პოლისი ცოტა უფრო იაფი ღირს ვიდრე ფრანშიზის გარეშე და ავადმყოფობის შემთხვევაში დანაზოგი არ მართლდება.

რა ღირს სამოგზაურო დაზღვევა?

სტანდარტული პოლისი  დღეში 1 ლარი ან უფრო ნაკლები დაგიჯდებათ (წამყვანი სადაზღვევო კომპანიების ფასების მიხედვით).

თუ გსურთ, რომ დასვენების დროს  ექსტრემალური სპორტით დაკავდეთ (სპორტის ამ სახეობების ჩამონათვალს ყველა კომპანია თავად განსაზღვრავს), მაშინ სადაზღვევო პოლისი საშუალოდ სამჯერ მეტი ეღირება. ეშმაკობა არ გამოგივათ: თუ სადაზღვევო შემთხვევა მაშინ დადგება, როდესაც სპორტის ექსტრემალური სახეობით ხართ დაკავებული და საბაზისო დაზღვევა გაქვთ გაფორმებული – მკურნალობის ხარჯის გადახდა თავად მოგიწევთ.

გაითვალისწინეთ, რომ ხანშიშესული ადამიანების დაზღვევა (65 წელზე მეტი) უფრო ძვირი დაგიჯდებათ. ასევე არსებობს დაზღვევა უფრო ფართო პირობების დაფარვით, რომელიც მოიცავს ორსულთა (როგორც წესი, 7 თვემდე) გინეკოლოგიური დახმარების გაწევას, ფრენის ან ბარგის დაგვიანების შემთხვევაში კომპენსაციის გადახდას, ადვოკატის მომსახურებისა და სხვა შემთხვევების გადახდას.

რა არის სადაზღვევო ლიმიტი?

ეს არის მაქსიმალური თანხა, რომელიც შეიძლება ანაზღაურდეს ერთი სადაზღვევო შემთხვევის ფარგლებში, ყველაზე ხშირად ესაა 30 000 ან 50 000 ევრო ან დოლარი. ამ თანხის ფარგლებში, როგორც წესი, მკურნალობის ხარჯი ანაზღაურებას ექვემდებარება მწვავე მდგომარეობის მოხსნამდე, მისი სრულად გამოყენება შესაძლებელია მხოლოდ მძიმე შემთხვევების დროს (რთული ოპერაცია ან საქართველოში ტრანსპორტირება სამედიცინო ჩვენების საფუძველზე).

სადაზღვევო სფეროს ექსპერტები გვირჩევენ ევროპის ქვეყნებისთვის შევიძინოთ პოლისი მინიმუმ €50000 დაფარვით, ეგვიპტისთვის, თურქეთისა და ტუნისისთვის – $30000 დაფარვით, ტაილანდისთვის, ინდოეთისთვის, ჩინეთისა და იაპონიისთვის – $50000 დაფარვით. ტურისტებს, რომლებიც აშშ–ში მოგზაურობას გეგმავენ, ვურჩევთ ლიმიტის გაზრდაზე დაფიქრდნენ, რადგან $1500 გადახდა მხოლოდ ექიმთან კონსულტაციისთვის შეიძლება მოგიწიოთ.

რას ფარავს საბაზისო სადაზღვევო პოლისი?

• • გადაუდებელ სამედიცინო დახმარებას (ამბულატორულ ან სტაციონარულ).

• • ტრანსპორტირებას უახლოეს სამედიცინო დაწესებულებაში.

• • სამედიცინო ევაკუაციას/რეპატრიაციას – მიზანშეწონილობის შემთხვევაში, დაზღვეული პირის მშობლიური ქვეყნის სამედიცინო დაწესებულებაში გადაყვანას.

• • დაზღვეულის გარდაცვალების შემთხვევაში სხეულის რეპატრიაციას.

• • ექიმის მიერ დანიშნული მედიკამენტების შეძენას.

• • გადაუდებელ სტომატოლოგიურ მომსახურებას ლიმიტის ფარგლებში.

• საკომუნიკაციო ხარჯების გადახდას (რაც გულისხმობს სადაზღვევო შემთხვევასთან დაკავშირებული სასწრაფო შეტყობინებების გადაცემას).

რა შედის უფრო ფართო პირობების დაფარვის პოლისში?

• • ქვეყანაში ყოფნის გაგრძელება: იფარება სასტუმროში განთავსების ხარჯები (ვადა და მაქსიმალური ღირებულება  მზღვეველის მიერ განისაზღვრება), საჭიროების შემთხვევაში, ექიმმა უნდა დაადასტუროს.

• • ახლო ნათესავის გარდაცვალების შემთხვევაში (უკან დასაბრუნებელი ბილეთის ღირებულება გარკვეული თანხის ფარგლებში კომპენსირდება)  ვადამდე სახლში დაბრუნება.

• • ფრენის შეფერხების შემთხვევაში კომპენსაციის გადახდა.

• • ბარგის შეფერხების შემთხვევაში კომპენსაციის გადახდა.

• • გადაუდებელი გინეკოლოგიური დახმარება ორსულთათვის (გარკვეულ ვადამდე).

• • ნათესავის ჩამოსვლა, თუ დაზღვეული დიდი ხნის განმავლობაში გადის სტაციონარულ მკურნალობას  (იფარება ავიაბილეთები და სასტუმროში განთავსება ლიმიტის ფარგლებში).

• • ადვოკატის მომსახურების გადახდა თუ დაზღვეულის მიმართ სარჩელია შეტანილი.

• • კომპენსაცია პირადი დოკუმენტების დაკარგვის შემთხვევაში.

• დაზღვეულის ტრანსპორტირება დანიშნულების ადგილზე ავტომობილის დაზიანების ან ავტოსაგზაო შემთხვევის დროს.

რას არ ფარავს დაზღვევა?

• • ფორს–მაჟორული ვითარებების დროს მიღებული ტრავმების მკურნალობას: სამხედრო კონფლიქტების, სამოქალაქო არეულობის, რევოლუციების ან ტერორისტული აქტების, ასევე იმ ქვეყნებში გამგზავრების შემთხვევაში, რომლებიც არ არის რეკომენდირებული საქართველოს საგარეო საქმეთა სამინისტროს მიერ.

• • ხელშეკრულების დადებამდე არსებული დაავადებების მკურნალობა, თუ სხვაგვარად არ არის შეთანხმებული მზღვეველთან.

• • სიცოცხლისა და ჯანმრთელობისათვის უსაფუძვლო რისკის, დაქირავებული ფიზიკური მუშაობის (თუ სადაზღვევო პოლისი ამ მიზნით არ არის გაფორმებული), პროფესიულ სპორტულ ვარჯიშებში ან შეჯიბრებებში მონაწილეობის შედეგად მიღებული დაავადებებისა და ტრავმების მკურნალობა.

• • სამედიცინო პროდუქტები და მედიკამენტები გაჯანსაღებისა და პროფილაქტიკის მიზნით: ვაქცინები, ვიტამინები, პროფილაქტიკური კვლევები, სანატორიუმ–საკურორტო მკურნალობა და ა.შ.

• • ტრავმების მკურნალობა, რომლებიც დაზღვეულმა ალკოჰოლის ან ნარკოტიკული საშუალებების  ზეგავლენის ქვეშ მიიღო.

• • კოსმეტიკური და პლასტიკური ოპერაციები.

• • სტომატოლოგიური მომსახურება (გარდა გადაუდებელი მკურნალობისა).

• მშობიარობა.

გავრცელებული სადაზღვევო შემთხვევები

ზაფხულობით ტურისტები ყველაზე ხშირად შემდეგი პრობლემებით მიმართავენ:

• • მოწამვლა, კვებითი აშლილობა უჩვეულო საკვების გამო, გასტროენტერიტი;

• • ანგინა, მწვავე რესპირატორული ვირუსული ინფექციები, ბრონქიტი, ოტიტი, ფარინგიტი, ლარინგიტი;

• • მზის დამწვრობა, სითბური დარტყმა;

• • ალერგია;

• • ინფექციური დაავადებები;

• გულ–სისხლძარღვთა დაავადებები.

ზამთარში ძირითადად ჭარბობს:

• • გაციება;

• სპორტული ტრავმები: დაჟეჟილობა, დაჭიმვა, ღრძობა, მოტეხილობა, ტვინის შერყევა.

ეგზოტიკურ ქვეყნებში მოგზაურებს ხშირად სჭირდებათ დახმარება შხამიან მწერებთან და გველებთან, ასევე გარეულ ცხოველებთან შეხვედრის შემდეგ.

როგორი დაზღვევაა საჭირო, თუ სპორტით უნდა დაკავდეთ?

დამოკიდებულია სპორტის სახეობაზე. საბაზისო ტურისტული დაზღვევა, როგორც წესი, ე.წ. აქტიურ დასვენებას მოიცავს: მარტივი ლაშქრობა, დაბალ სიღრმეზე აკვალანგით ყვინთვა, თხილამურებზე ან სნოუბორდზე სრიალი აღჭურვილ  ტრასებზე და ა.შ. მათ, ვინც რაიმე უფრო ექსტრემალურს გეგმავს (მაგალითად, პარაპლანით ფრენას, პარაშუტით ხტომას),   „სპორტის“ კატეგორიის  დაზღვევა ესაჭიროება, რომელიც დაახლოებით 3-ჯერ უფრო ძვირია ვიდრე ჩვეულებრივი. გირჩევთ არ დაზოგოთ დაზღვევაზე, რადგან ზოგჯერ სპორტული ტრავმები მართლაც ძვირადღირებულ მკურნალობას მოითხოვს.

ხშირად ვმოგზაურობ. რომელი დაზღვევა უნდა გავაფორმო?

თუ თქვენ სპონტანური და ხშირი მოგზაურობის მოყვარული ხართ, უმჯობესია წლიური დაზღვევა შეიძინოთ. ამ შემთხვევაში დაზღვევა დღეში დაახლოებით 30 თეთრით ნაკლები დაგიჯდებათ, ან შეიძინოთ მრავალჯერადი გამოყენების პოლისი რომელიც გაზღვევთ 90 დღით წლის ნებისმიერ მონაკვეთში როდესაც თქვენ იმოგზაურებთ!

რომელი სადაზღვევო კომპანია შევარჩიოთ?

აქ ყველაფერი მხოლოდ იმაზეა დამოკიდებული, თუ რას ანიჭებთ უპირატესობას. სადაზღვევო კომპანიის შერჩევის დროს ძირითადი ორიენტირია შეფასება, რეიტინგი და კომპანიის რეპუტაცია ბაზარზე. საქართველოში ჯანმრთელობის დაზღვევის წამყვანი კომპანიებია „ჯი პი აი ჰოლდინგი“, „იმედი L“, „პსპ დაზღვევა“, „არდი“, „ირაო“, „უნისონი“ და სხვ.