რა საიდუმლო ადგილებს არ იგონებენ ტურისტები დოკუმენტების შესანახად, მაგრამ საზღვარგარეთ პასპორტები მაინც რეგულარულად იკარგება.
ამრიგად, ასეთი ვითარებაა: თქვენ ყველა ჯიბე და ჩანთა გადაამოწმეთ, ათჯერ მაინც მოძებნეთ თქვენს ნომერში, შემდეგ კი ისევ და ისევ. და ისევ. მაგრამ დასკვნა მაინც არასანუგეშოა - პასპორტი არსად არის. პანიკის გარეშე! შეეცადეთ მშვიდად, მაგრამ ოპერატიულად იმოქმედოთ. გთავაზობთ რჩევებს, რომლებიც ორიენტირებაში დაგეხმარებათ.
რა უნდა გააკეთოთ თუ საზღვარგარეთ პასპორტი დაკარგეთ?
- პირველ რიგში, პოლიციის უახლოეს განყოფილებას ეწვიეთ და დაწერეთ განცხადება პასპორტის დაკარგვის ან ქურდობის შესახებ. ეს აუცილებელია იმისთვის, რომ დოკუმენტის დაკარგვის ფაქტის დამადასტურებელი ცნობა აიღოთ. თუ თქვენ არ ფლობთ იმ ქვეყანის ენას, სადაც იმყოფებით, შეეცადეთ ვითარება Google Translate-ის მეშვეობით აუხსნათ.
- შემდეგ თქვენი ქვეყნის საელჩოს ან საკონსულოს მიმართეთ. მიიღეთ დასაბრუნებელი მოწმობა ან ჩააბარეთ დოკუმენტები ახალი პასპორტის მისაღებად (თუ საზღვარგარეთ დიდი ხნით იმყოფებით ან მაგალითად, მუდმივ საცხოვრებელ ადგილზე გადახვედით. ჩვეულებრივ, პასპორტს დაახლოებით სამი თვის განმავლობაში უნდა ელოდოთ. საკონსულოში ყველა დეტალს გაცნობებენ).
რა არის დასაბრუნებელი (გამოსამგზავრებელი) მოწმობა
ეს არის დროებითი დოკუმენტი, რომელიც დაკარგული ან ვადაგასული საზღვარგარეთის პასპორტის სანაცვლოდ გაიცემა. მოწმობა უფლებას გაძლევთ დარჩეთ იმ ქვეყანის ტერიტორიაზე, სადაც იმყოფებით, ასევე საშუალებას გაძლევთ დაბრუნდეთ სამშობლოში. ინფორმაცია სხვა ქვეყნების გავლით იძულებითი ტრანზიტის შესახებ უმჯობესია საკონსულოს თანამშრომლებთან დააზუსტოთ. მოწმობა მოქმედებს გაფორმებიდან არა უმეტეს 30 დღის განმავლობაში და ამ პერიოდის განმავლობაში თქვენ სახლში გამგზავრება უნდა მოასწროთ.
საქართველოში დაბრუნების შემდეგ, უნდა მიმართოთ საქართველოს საგარეო საქმეთა სამინისტროს საკონსულო დეპარტამენტს, ჩააბაროთ მოწმობა და ახალი პასპორტი მიიღოთ.
რა არის საჭირო დასაბრუნებელი მოწმობის მისაღებად:
- პოლიციის მიერ გაცემული ცნობა, რომელიც ადასტურებს პასპორტის ქურდობის ან დაკარგვის ფაქტს.
- სასურველია - შიდა პასპორტი ან თქვენი პირადობის დამადასტურებელი სხვა დოკუმენტი. თუ თქვენს პასპორტთან ერთად ყველა სხვა დოკუმენტიც გაუჩინარდა, რამდენიმე ადამიანის პოვნა მოგიწევთ, რომლებიც მზად არიან დარწმუნებით განაცხადონ, რომ თქვენ - თქვენ ხართ. ასეთი „მოწმეების“ პოვნა შეგიძლიათ სასტუმროში ტურისტებს შორის ან უშუალოდ საელჩოში. არსებობს კიდევ ერთი საშუალება: საკონსულოს შეუძლია ოფიციალური მოთხოვნა გაუგზავნოს საქართველოს საგარეო საქმეთა სამინისტროს მიგრაციის დეპარტამენტს თქვენი ვინაობის დადგენის მიზნით, მაგრამ პასუხის მისაღებად 30 დღემდე ლოდინი მოგიწევთ.
- განაცხადი დასაბრუნებელი მოწმობის შესახებ. ფორმის მიღება შესაძლებელია საკონსულოში.
- ორი ფერადი ან შავ-თეთრი 3,5×4,5 სმ ზომის ღია ფონზე გადაღებული ფოტოსურათი.
- დაკარგული პასპორტის ასლი, შიდა პასპორტის ასლი (თუ ორიგინალი არ გაქვთ), მართვის მოწმობა - ეს ყველაფერი არ შედის დასაბრუნებელი მოწმობის მისაღებად საჭირო დოკუმენტების სიაში, მაგრამ გაფორმებას გაამარტივებს.
- საკონსულო მოსაკრებლის გადახდის დამადასტურებელი დოკუმენტი (საზღვარგარეთ დიპლომატიური დაწესებულების მოქმედი ტარიფების შესაბამისად) ან გადახდისგან გათავისუფლების შესახებ დოკუმენტის ორიგინალი.
რა დოკუმენტებია საჭირო ბავშვისთვის დასაბრუნებელი მოწმობის მისაღებად?
- დაბადების მოწმობა (ორიგინალი) ან შიდა პასპორტი 14 წლის და უფროსი ასაკის ბავშვისთვის. თუ 14 წელზე მეტი ასაკის ბავშვს შიდა პასპორტი თან არ აქვს, პირადობისა და მოქალაქეობის დადასტურების პროცედურის გავლაც მოგიწევთ.
- მშობლის საზღვარგარეთის პასპორტი.
- განაცხადი დასაბრუნებელი მოწმობის მისაღებად.
- ბავშვისა და მშობლის 3,5 × 4,5 სმ ზომის ორი ფოტოსურათი.
რამდენ ხანს უნდა ელოდოთ დასაბრუნებელ მოწმობას?
ზემოხსენებული დოკუმენტების არსებობის შემთხვევაში, მოწმობა ჩვეულებრივ იმავე დღეს გაიცემა, ყველა დოკუმენტის წარდგენის დღიდან - მაქსიმუმ 5 სამუშაო დღის განმავლობაში.
როგორ უნდა გაფრინდეთ სახლში დასაბრუნებელი მოწმობით?
აეროპორტში რეგისტრაციის დახლთან თქვენ საზღვარგარეთის პასპორტით გელოდებიან, ამიტომ წინასწარ დაუკავშირდით ავიაკომპანიას და შექმნილი ვითარების შესახებ უამბეთ. გირჩევთ აეროპორტში წინასწარ მოხვიდეთ, რადგან ავიაკომპანიის თანამშრომლებს შესაძლოა დამატებითი კითხვები გაუჩნდეთ თქვენს მიმართ.
მომზადება შესაძლო ფორს-მაჟორისთვის: რა უნდა გააკეთოთ მგზავრობამდე?
რა თქმა უნდა, ჩვენ იმედი გვაქვს, რომ თქვენი პასპორტი არსად წავა, მაგრამ მაინც გირჩევთ, რომ მგზავრობამდე თავი დაიზღვიოთ. იმისათვის, რომ ფორს-მაჟორის შემთხვევაში, საკითხი უფრო სწრაფად მოგვარდეს, მოგზაურობამდე:
- გაიგეთ და ჩაიწერეთ მისამართები, ტელეფონის ნომრები, აგრეთვე დანიშნულების ქვეყანაში (ან უახლოეს ქვეყანაში ეგზოტიკის შემთხვევაში) თქვენი სამშობლოს საელჩოს ან საკონსულოს სამუშაო გრაფიკი.
- დაასკანერეთ თქვენი შიდა და საზღვარგარეთის პასპორტი - მათ შორის, მოქმედი ვიზების გვერდები. არ დაგავიწყდეთ მართვის მოწმობისა და ბავშვის დაბადების მოწმობის შესახებ. ეს ყველაფერი გააგზავნეთ საკუთარ და თქვენი ახლობლის ელ. ფოსტაზე. დარწმუნდით, რომ პაროლი გახსოვთ და თქვენს ფოსტაში შესვლას სხვისი მოწყობილობიდანაც შეძლებთ. დაბეჭდეთ და მოათავსეთ პასპორტების ასლები თქვენი ხელბარგისა და ბარგის სხვადასხვა ადგილზე. ფრენის შემდეგ, გადაიღეთ საზღვრის კვეთის შტამპი ან შესასვლელი ვიზა და თქვენ ფოსტაზე გადააგზავნეთ.
- 3,5 × 4,5 სმ ზომის რამდენიმე ფოტო გადაიღეთ, რომ შემდეგ ფოტოსტუდიის ძებნა არ მოგიწიოთ.
- თქვენი საზღვარგარეთის პასპორტი, შიდა პასპორტი და მართვის მოწმობა სხვადასხვა ჩანთაში მოათავსეთ (იმისათვის, რომ ერთი დოკუმენტის დაკარგვის შემთხვევაში, სხვა დანარჩენი არ დაკარგოთ).