ჩემი ოცნების ფრენა გადაჯდომით: მსოფლიოს 7 ყველაზე საინტერესო აეროპორტი

როგორ შეიძლება გაერთოთ, თუკი თქვენი მომდევნო რეისი რამდენიმე საათშია? ყველაზე რეიტინგული „არა მოსაწყენი“ აეროპორტების სია ადასტურებს, რომ ხანგრძლივი მოგზაურობა გადაჯდომით ყოველთვის არ არის დროის ფუჭი ხარჯვა.

მრავალსაათიანი გადაჯდომა მოგზაურთა ერთ-ერთი მთავარი მტერია. თქვენ საათობით გიწევთ მოუხერხებელ სავარძლებში ჯდომა, ერთი ტიპის მაღაზიებში ხეტიალი და თქვენს რეისზე ლოდინი. მაგრამ  ისეთი აეროპორტებიც არსებობს, სადაც თქვენ არ მოიწყენთ, პირიქით –  ინანებთ კიდეც, რომ მეტი დრო არ გქონდათ.

უფასო Wi-Fi უკვე არავის აკვირვებს, ამიტომ ზოგიერთმა აეროპორტმა რადიკალურ ზომებს მიმართა – გადაწყვიტეს მოსაცდელი დარბაზები  რეალურ გასართობ პარკებად აქციონ: ლუდის პაბებით დაწყებული, კლასიკური მუსიკის კონცერტებით დამთავრებული. მთავარია – თქვენი რეისი არ გამოგრჩეთ.

მაშ ასე – დავგეგმოთ მომდევნო მოგზაურობა ამ აეროპორტებში?

  1. ჩანგის საერთაშორისო აეროპორტი, სინგაპური

მსოფლიოს ყველაზე ავტორიტეტული რეიტინგები უკვე რამდენიმე წელია ამ აეროპორტს მსოფლიოს საუკეთესო აეროპორტად ასახელებენ! აქ, პირდაპირი მნიშვნელობით ყველა გასართობი არის „საუკეთესო საუკეთესოთა შორის“. თუ თქვენ ბედმა გაგიღიმათ და ამ აეროპორტში მოხვდით, თქვენი აქ ყოფნის დრო უეცრად გაივლის.

სინგაპურის აეროპორტი მგზავრებს მსოფლიოს 200-ზე მეტ დანიშნულების ადგილთან აკავშირებს, კვირაში 80 საერთაშორისო ავიაკომპანიის 5000 რეისის მიღებითა / გამგზავრებით.

ჩანგში მდებარეობს მსოფლიოს ყველაზე დიდი კინეტიკური ხელოვნების ობიექტი – მოძრავი ალუმინის წვეთები. არანაკლებ მომხიბლავია ბოტანიკური ბაღი, მზესუმზირის, კაქტუსის და ორქიდეების ბაღებიც კი, საოცარი თევზების აუზები და დარბაზები იშვიათი სახეობების პეპლებით.

აეროპორტის სახურავზე მდებარეობს საცურაო აუზი და ჯაკუზი შესანიშნავი ხედით. ორ ტერმინალში კი უფასო კინოთეატრებია განთავსებული.

გარდა ამისა, თუ აქ ღამის გათევას მოისურვებთ, სწორედ აქ მდებარეობს მსოფლიოს საუკეთესო სასტუმრო (აეროპორტებში მდებარე სასტუმროებს შორის)  – Crowne Plaza Changi Airport!

 

  1. ინჩხონის საერთაშორისო აეროპორტი, სეული

ჩანგის აეროპორტის მარადიული მეტოქე მსოფლიოში საუკეთესო აეროპორტის წოდებისთვის,  მათ შორის კვადრატულ მეტრზე საინტერესო ადგილების რაოდენობის მიხედვით!

რატომ უნდა წახვიდეთ კინოთეატრში ახალი ბლოკბასტერის პრემიერისთვის, თუ ის შეიძლება ინჩხონის აეროპორტში ნახოთ? ამიტომ აქ შეგიძლიათ გაატაროთ გადაჯდომით მოგზაურობის მინიმუმ ორი-სამი საათი.

გარდა ამისა, ინჩხონი შეძლებს თქვენს გაოცებას გოლფის მინდვრით და  სხვადასხვა მცენარეებისა და ხეების 7 ბაღით. აქ ასევე მდებარეობს კორეის კულტურის მუზეუმი, სადაც შეძლებთ უფრო მეტი გაიგოთ სამხრეთ კორეის შესახებ, თუ  სეულში ვერ მოხვდით.

მგზავრთა ნამდვილი სიურპრიზი კი საციგურაო მოედანია,  სადაც მთელი ოჯახით შეძლებთ ციგურაობას.

და რას ფიქრობთ იმ შესაძლებლობის შესახებ, რომ სრულიად უფასოდ  დაესწროთ კლასიკური მუსიკის ნამდვილ კონცერტს! მუსიკოსები დღეში 4-5 ჯერ ასრულებენ კორეის ეროვნული მუსიკის ნაწარმოებებსა და მსოფლიოს ცნობილ ჰიტებს.

 

  1. კლოტენის საერთაშორისო აეროპორტი, ციურიხი

ეს აეროპორტი იდეალურია ყველა იმ მგზავრისთვის, ვინც გადაჯდომით მოგზაურობს, ვისაც  აქტიური ცხოვრების წესი უყვარს და არ სურს  ტერმინალში გაატაროს დრო მომდევნო ფრენის მოლოდინში.

აეროპორტი რამდენიმე საინტერესო ექსკურსიას გთავაზობთ,  რომელთა ხანგრძლივობა 1.5-2 საათია. პირველ რიგში,  მიმოხილვითი ექსკურსია ავტობუსით აეროპორტის ტერიტორიის გარშემო გთავაზობთ აეროპორტის ყველა სამუშაო პროცესის მონახულებას გაშლილი ხელის მანძილზე. მეორეც, ეს არის 2-საათიანი  ექსკურსია ფეხით კლოტენის ყველა „საიდუმლო“ ოთახში, რომლის დროსაც გამოცდილი გიდები გიამბობენ და გიჩვენებენ, თუ როგორ უწევენ ორგანიზებას პედანტური შვეიცარელები ისეთი დიდ მექანიზმს, როგორიც ეს აეროპორტია. გარდა ამისა, აქ მდებარეობს დიდი სამიმოხილვო მოედანი, სადაც შეგიძლიათ თვალყური ადევნოთ თვითმფრინავების ფრენას.

შეძლებული მგზავრებისთვის არსებობს ისეთი გასართობი, როგორიცაა ვერტმფრენით ან პატარა თვითმფრინავით ფრენა აეროპორტისა და ქალაქის გარშემო.

აქ ბავშვებიც არ დავიწყებიათ: თუ ბავშვს დაბადების დღე აქვს, აქ ნამდვილ დღესასწაულს მოგიწყობენ სახალისო თამაშებითა და სანთლებიანი ტორტით.

თუმცა კლოტენის მთავარი „კოზირია“ – გორგოლაჭიანი ციგურების, ველოსიპედების ან ტელესკოპური ჯოხების გაქირავების სერვისით სარგებლობის შესაძლებლობა, თუკი გადაჯდომისთვის საჭირო დრო საშუალებას გაძლევთ რამდენიმე საათი მიდამოებში სეირნობას  დაუთმოთ.

  1. კიურასაოს საერთაშორისო აეროპორტი, ვილემსტადი

ბევრს შეიძლება უცნაურად მოეჩვენოს თუ რატომ არის ეს აეროპორტი (უფრო სწორად, კი მისი ადგილმდებარეობა) გადაჯდომით მოგზაურობისთვის მიმზიდველი, მაგრამ ეს ნამდვილად საუკეთესო ვარიანტია, თუ თქვენ ევროპიდან ცენტრალურ/სამხრეთ ამერიკაში მიფრინავთ, ან პირიქით. საქმე იმაშია, რომ აეროპორტი მდებარეობს კუნძულ კიურასაოს დედაქალაქის – ვილემსტადის გარეუბანში და ქალაქის ცენტრი ან ცნობილი კარიბის ზღვის სანაპიროები ორ ნაბიჯზე მდებარეობს!

ამიტომ თუ თქვენ 3 საათიან გადაჯდომას ელით, შეგიძლიათ თამამად გაემგზავროთ ტაქსით/ავტობუსით და კარიბის ზღვაში იბანაოთ, ან „პატარა ჰოლანდია“ დაათვალიეროთ და ლათინოამერიკული კოლორიტის მქონე ტიპიური ამსტერდამული სახლებით დატკბეთ.

  1. ფრანც-იოზეფ შტრაუსის სახელობის საერთაშორისო აეროპორტი, მიუნხენი

ალბათ ბევრმა თქვენგანმა იცის, რომ ეს უზარმაზარი აეროპორტი თავისი ლუდსახარშითაა ცნობილი, სადაც ნამდვილი გერმანული ლუდის დაგემოვნებას შეძლებთ. მართლაც, რატომ არ უნდა მიირთვათ ამ სასმელის რამდენიმე კათხა და მიუნხენური სოსისები?

მაგრამ ამ აეროპორტს დროის გატარების „ჯანსაღი“ ალტერნატივის შემოთავაზებაც შეუძლია ხანგრძლივი გადაჯდომით მოგზაურობის დროს – საინტერესო ექსკურსია აეროპორტის ტერიტორიაზე. 12-კილომეტრიანი დატვირთული მარშრუტი მოიცავს აეროპორტის ტერმინალების, ანგარების, ასაფრენ-დასაფრენი ბილიკების, საწვავის საწყობებისა და უამრავი სხვა სათავსოს მონახულებას, რომელსაც ჩვეულებრივ „მხოლოდ პერსონალისთვის“ აწერია. გარდა ამისა, თქვენ შეძლებთ ნახოთ მსოფლიოში ყველაზე დიდი თვითმფრინავი – Airbus A380. ექსკურსიის ხანგრძლივობა ჩვეულებრივ 1-1.5 საათს შეადგენს (8:30 საათიდან 17:30 საათამდე) და მთელი წლის განმავლობაში იმართება.

კიდევ უფრო გაგაოცებთ სერფინგის შესაძლებლობა მიუნხენის აეროპორტში! დიახ, სრულიად უფასოდ  გამოცდილი ინსტრუქტორები დაგეხმარებათ აითვისოთ სერფინგი ხელოვნურ ტალღებზე..

  1. სხიპჰოლის აეროპორტი, ამსტერდამი

სხიპჰოლის აეროპორტს შეიძლება ყველაზე „განათლებული“ ეწოდოს, რადგან ის იდეალურია ვისაც წიგნის წაკითხვა ან მუსიკის მოსმენა სურს გადაჯდომით მოგზაურობის დროს, ხოლო საყვარელი წიგნი/ფლეიერი სახლში დარჩა.

აქ ნამდვილი ბიბლიოთეკა მდებარეობს უამრავი წიგნითა და ფილმით, ბუხრით, პლედებით. ბიბლიოთეკაში 30-ზე მეტ ენაზე წარმოდგენილი  წიგნებია განთავსებული, ამიტომ თითოეული მგზავრი შეძლებს მისთვის სასურველი საკითხავის პოვნას.

ხანგრძლივი  გადაჯდომით მოგზაურობის დროს, რომ კიდევ უფრო მეტი ცოდნა შეიძინოთ კულტურის სფეროს შესახებ, ეწვიეთ მუზეუმს, სადაც ცნობილი რეიკსმუზეუმის (Rijksmuseum) – ნიდერლანდების მთავარი მუზეუმის ექსპონატებია წარმოდგენილი.

აეროპორტში მდებარე კაზინოში კი შეგიძლიათ რამდენიმე ასეული ევრო მოიგოთ ან წააგოთ.

ასევე შეგახსენებთ შესანიშნავი ბავშვთა სათამაშო ზონის შესახებ, სადაც ბავშვებს  უამრავი გასართობი ელით, მშობლები კი, შესაბამისად, დასვენებას შეძლებენ.

  1. დუბაის საერთაშორისო აეროპორტი

მგზავრთა რაოდენობის მიხედვით მსოფლიოში მესამე აეროპორტი ასევე საინტერესო ადგილია გადაჯდომით მოგზაურობისთვის, სადაც ნამდვილად არ მოიწყენთ.

სწორედ დუბაიში მდებარეობს მსოფლიოს უდიდესი მოლი, სავარაუდოდ ამიტომ გადაწყვიტა არაბთა გაერთიანებული საამიროების ხელისუფლებამ, რომ თვით აეროპორტიც კი უზარმაზარ  მოლად ექცია! მაღაზიებისა და საქონლის რაოდენობა უბრალოდ გაგაოცებთ. უბაჟო ვაჭრობის მაღაზიების მთლიანი ფართობი 15000 კვადრატულ მეტრს მოიცავს. ეს არის ნამდვილი სამოთხე შოპოჰოლიკებისთვის, სადაც შეგიძლიათ რამდენიმე საათით დაიკარგოთ და ამგვარად შეამციროთ ხანგრძლივი გადაჯდომით მოგზაურობის ლოდინი.

გარდა ამისა, დუბაის აეროპორტში დროდადრო უჩვეულო ლატარიები იმართება: Finest Surprise Luxury Car&Bike და Millennium millionaire. პირველ შემთხვევაში, მგზავრებს უნიკალური შესაძლებლობა აქვთ საუცხო ავტომობილი ან მოტოციკლი მოიგონ. მეორე ლატარია კი მილიონი დოლარის მოგების ბედნიერების შანსს გაძლევთ!

შეგიძლიათ წაიხემსოთ აეროპორტში მდებარე 25 რესტორნიდან ერთ-ერთში, რომლებიც მსოფლიოს სხვადასხვა სამზარეულოს დაგემოვნებას გთავაზობთ.

sastumroebi
Posted in ბლოგი and tagged , .

მალხაზ კევლიშვილი