დოლომიტის ალპები: 5 საუკეთესო სამთო-სათხილამურო კურორტი

დოლომიტის ალპებს სამართლიანად უწოდებენ „ყოველი მოთხილამურის ოცნებას“, ეს არის ერთ-ერთი ყველაზე თვალწარმტაცი და მაღალმთიანი დასასვენებელი ადგილი იტალიაში და შეთავსებით – მსოფლიოში უმსხვილესი სამთო-სათხილამურო ზონა . Aviabiletebi.org გიამბობთ სად განთავსდეთ, რა ნახოთ და როგორ გაატაროთ საინტერესოდ ზამთრის არდადეგები რეგიონში.

სამთო-სათხილამურო კომპლექსი Dolomiti Superski

Dolomiti Superski – სამთო-სათხილამურო ალიანსია, რომელიც აერთიანებს 12 მაღალთიან რეგიონს ერთ სასრიალო ზონად 40-ზე მეტი კურორტისთვის . ეს არის ერთი სათხილამურო აბონემენტი 1200 კმ ტრასებისა და 460 საბაგიროს სარგებლობისთვის, ეს არის შესაძლებლობა არა მხოლოდ იხილოთ იტალიის წარმოუდგენელი სიმაღლეები, არამედ მოინახულოთ მრავალი მაღამთიანი ოლქი თხილამურების გახდის გარეშე . ინფრასტრუქტურა კარგად არის განვითარებული: 30-ზე მეტი სნოუ პარკი, ნებისმიერი სირთულის ათეულობით ტრასა, ასზე მეტი კაფე და რესტორანი, უამრავი სკოლა ახალბედა მოთხილამურეებისთვის, გასართობი და სპორტული ცენტრები.

რეგიონი განთქმულია მსოფლიოში პოპულარული Sella Ronda-თი – სათხილამურო მარშრუტით, რომელიც 4 ხეობას (ვალ-გარდენა, ვალ-დი-ფასა, ალტა-ბადია და არაბე) და წრედ შეკრულ 6 მწვერვალს მოიცავს . მარშრუტის საერთო სიგრძე დაახლოებით 40 კილომეტრია, ხოლო ამ მარშრუტზე თხილამურებით გასეირნება – დამსვენებლებისთვის დროის გატარების ერთ-ერთი ყველაზე საყვარელი საშუალებაა, რადგან არსებობს შესაძლებლობა, რომ მთიანი ქედი ყველა მხრიდან იხილოთ . ამ მარშრუტით სრიალი ახალბედა მოთხილამურეებსაც კი შეუძლიათ, საშუალო დრო – 3.5-4.5 საათია.

როგორ ჩავიდეთ?

დოლომიტის ალპების რეგიონში ჩასვლა სხვადასხვა ქალაქიდან შეგიძლიათ, იმის მიხედვით თუ რომელ ოლქში მიემგზავრებით . უახლოესი ქალაქები, სადაც ჩაფრენა შეგიძლიათ არის ინსბრუკი, ბოლცანო, ვენეცია . ავიაბილეთის ღირებულება თბილისი-ინსბრუკი – 690 ლარიდან (ორი გზა), ქუთაისი-ვენეცია ​​– 490 ლარიდან.

სათხილამურო აბონემენტის ღირებულება

Dolomiti Superski-ს მთელ ზონაში მოქმედი სათხილამურო აბონემენტის ღირებულებაა:

დაბალი სეზონი (7.01 . – 1.02.2020; 22.03 – 14.04.2020): 1 დღე – 56 ევრო, 1 კვირა – 299 ევრო;

მაღალი სეზონი (22.12.2019 – 6.01.2020; 2.02 . – 21.03.2020): 1 დღე – 62 ევრო, 1 კვირა – 332 ევრო.

სხვადასხვა ტარიფების სანახავად ეწვიეთ ოფიციალურ საიტს

დოლომიტის ალპების პოპულარული კურორტები

ვალ-გარდენა

ეს არის დოლომიტის ალპების ერთ-ერთი ყველაზე პოპულარული კურორტი, რომელიც თვალწარმტაც ხეობაში მდებარეობს, სადაც დასვენებას ამჯობინებენ ოჯახები და მეგობარების პატარა კომპანიები .

ხეობაში 3 პატარა ქალაქია: ორტიზეი, სანტა-კრისტინა და სელვა . ვალ-გარდენა განთქმულია თავისი მასშტაბებით (175 კმ ტრასა, 83 საბაგირო) და შესანიშნავ ადგილად ითვლება ახალბედა მოთხილამურეებისთვის გრძელი, დამრეცი ფერდობებით . ამავდროულად აქ საკმაოდ ბევრი შავი ტრასაა . სნოუბორდისტებისთვის 2 თემატური პარკია: Funpark Val Gardena და Snowpark Val Gardena.

ვალ-გარდენა შესაფერისია ბავშვებთან ერთად დასვენებისთვის . პირველ რიგში, ეს არის ერთ-ერთი ყველაზე მშვიდი რეგიონი და ხმაურიან ღამის წვეულებებს აქ იშვიათად თუ მართავენ . მეორეც, ბავშვებისთვის აქ ხელმისაწვდომია უამრავი სკოლა ინსტრუქტორებით, „საბავშვო მოედნები“ სპეციალური მოკლე ტრასებითა და გასართობი ცენტრები.

თხილამურებით სრიალის გარდა, ვალ-გარდენა დამსვენებლებს უამრავ გასართობს სთავაზობს: სპა-ცენტრები, სპორტული დარბაზები, საცურაო აუზები, პანორამული რესტორნები ფერდობებზე, მაღაზიები, საციგურაო მოედნები და საინტერესო ექსკურსიები . ვალ-გარდენაში ასევე მასშტაბურად აღნიშნავენ შობასა და ახალ წელს.

განთავსების ღირებულება: 3* – 125 ევროდან, 5* – 360 ევროდან.

ვალ-დი-ფასა

კურორტმა, რომელიც ათეულობით პატარა დაბას აერთიანებს, იტალიაში ერთ-ერთი საუკეთესოს დიდება მოიპოვა მომსახურების ხარისხისა და თანამედროვე აღჭურვილობის წყალობით, მაგრამ ამავდროულად იგი უფრო ხელმისაწვდომი ფასებით ახარებს დამსვენებლებს, ვიდრე დოლომიტის ალპების სხვა კურორტები.

ვალ-დი-ფასას ტრასების სიგრძე 200 კილომეტრია, რომელთა უმეტესობა წითელია (105 კმ) . ტერიტორიაზე 59 საბაგიროა, მაქსიმალური სიმაღლე – 2950 კმ-ია . ყველაზე პოპულარული სასრიალო ზონაა – Belvedere (2425 მ), ასევე მის ქვეშ მდებარე ტრასები . აქვეა 2 სნოუ პარკი: Buffaure Snowpark და Snowpark Dolomiti, ხოლო ბავშვებისთვის – Kinderpark და სათხილამურო სკოლა ყველაზე პატარებისთვის.

თხილამურებით სრიალისგან თავისუფალ დროს ვალ-დი-ფასას დამსვენებლები აქტიურად ატარებენ: სრიალებენ თოვლმავალით, მარხილში შებმული ძაღლებით, საციგურაო მოედნებზე, ისვენებენ სპა-ცენტრებში, ვარჯიშობენ სპორტულ დარბაზებში, ბანაობენ აუზებში, თამაშობენ ბოულინგს, სტუმრობენ ადგილობრივ ბარებსა და კლუბებს.

განთავსების ღირებულება: 3* – 79 ევროდან, 5* – 179 ევროდან.

ალტა-ბადია

კიდევ ერთი თვალწარმტაცი სამთო-სათხილამურო რეგიონი, რომელიც არ ჩამოუვარდება თავის მეზობლებს . აქ 4 მყუდრო ქალაქია: კორვარე, კოლფოსკო, ლა-ვილე და სან-კასიანო, რომლებიც ამავე სახელწოდების მწვერვალებზე მდებარეობს . ალტა-ბადიას ტრასების საერთო სიგრძე 130 კილომეტრია, ძირითადად ლურჯი და წითელი, ტრასებსა და ქალაქებს შორის გადაადგილება საბაგიროთი შეგიძლიათ (რომელთა რაოდენობა აქ 50-ზე მეტია), ისევე როგორც სათხილამურო ავტობუსებით.

ალტა-ბადია უფრო შესაფერისია დამწყები მოთხილამურეებისთვის: მისი მწვერვალები არცთუ ისე მაღალია და აქ საკმაოდ მცირე რაოდენობის რთული, ციცაბო ფერდობებია . აქ სნოუბორდზე სრიალსაც აქტიურად ასწავლიან, გარდა ამისა არის სნოუ პარკი, ხოლო საფეხმავლო ტურიზმის მოყვარულთათვის აწყობენ თემატურ ლაშქრობებს თხილამურებით, მაგალითად, იმ ადგილებში, სადაც პირველი მსოფლიო ომის მნიშვნელოვანი მოვლენები ვითარდებოდა . ასეთი ექსკურსიების ღირებულება 80 ევროდან იწყება.

რასაკვირველია, სხვა კურორტების მსგავსად, ალტა-ბადიას თავის არსენალში „apres-ski“-ს სტანდარტული ნაკრები აქვს: სპორტული კომპლექსები, საცურაო აუზები, სპა-ცენტრები, ბარები, რესტორნები, ბავშვთა გასართობი ოთახები და ა.შ . ამასთან, რეგიონში უამრავი სანახაობაა: XIV-XV საუკუნეების ძველი ეკლესიები (სანტა-კროჩე და სან-ლეონარდო), ლადინის მუზეუმი, ციხე Ciastel de Tor, ასევე არტ-გალერეა Renee.

განთავსების ღირებულება: 3* – 70 ევროდან, 5* – 199 ევროდან.

კორტინა–დ‘ამპეცო

იგი შედის უფრო პრესტიჟულ, ელიტარულ კურორტთა კატეგორიაში და ასევე შეყვანილია რეიტინგში „Best of the Alps“ . ნათელია, რომ აქ ფასები ოდნავ განსხვავებულია, თუმცა დამსვენებლები სანაცვლოდ იღებენ ღირსეულ სერვისსა და მაღალი დონის მომსახურებას . ასევე ითვლება, რომ სწორედ კორტინა დ’ამპეცოშია დოლომიტის ალპების საუკეთესო მთის პეიზაჟები.

ეს პატარა საკურორტო ქალაქი ყველა მხრიდან გარშემორტყმულია მთის მასივებითა და ციცაბო კლდეებით . აქ ხელმისაწვდომია 140 კილომეტრიანი ტრასები და 45 საბაგირო, სათხილამურო სკოლები და 2 დიდი სნოუ პარკი, უამრავი საექსკურსიო პროგრამა და საინტერესო მარშრუტი . ტრასების უმეტესობა ორიენტიებულია ახალბედა მოთხილამურეებზე.

გულახდილად რომ ვთქვათ, კორტინა დ’ამპეცო უფრო არის ზონა ლამაზი დასვენებისთვის და აქ სხვა გასართობი საშუალებები პოპულარობით არ ჩამოუვარდება თხილამურებით სრიალს . კერლინგი, თოვლის კარტინგი, ძაღლებითა და თოვლმავალით სრიალი, ველოსიპედით გასეირნება, ციგურაობა, ტრეკინგი და, რა თქმა უნდა, სხვადასხვა წყლისა და სპა-პროცედურა . ასევე შეგიძლიათ გაისეირნოთ Natural Park of the Ampezzo-ში, რომელიც გაგაოცებთ თავისი ბუნებით.

რა თქმა უნდა, პრესტიჟულ კურორტზე განთავსებულია მრავალი მაღაზია, ბუტიკი ტოპ ბრენდებით კარგი შოპინგისთვის, ასევე ღამის კლუბები, ბარები და რესტორნები, სადაც სასიამოვნო საღამოებს გაატარებთ.

განთავსების ღირებულება: 3* – 99 ევროდან, 5* – 225 ევროდან.

ჩივეტა

მხოლოდ და მხოლოდ კარგი გაგებით – „ტიპური კურორტია“, სადაც თავად იტალიელები ამჯობინებენ დასვენებას, თუმცა ზომით სხვა კურორტებს ოდნავ ჩამოუვარდება . სასრიალო ზონა დაახლოებით 80 კილომეტრია, ტრასების უმეტესობა – წითელია, ტერიოტრიაზე 25 საბაგიროა, არის სათხილამურო სკოლები, სნოუ პარკი, ისევე როგორც საბავშვო ზონა Piani di Pezz-ში . რამდენიმე ტრასაზე გათვალისწინებულია ღამით სრიალი.

ჩივეტაში აქტიურად ეწყობა საფეხმავლო ექსკურსიები, რომელთა დროსაც შეგიძლიათ გაიგოთ არა მხოლოდ პირველი მსოფლიო ომის მოვლენების შესახებ, არამედ ეწვიოთ ყინულის კანიონს და ცხენებით შებმული მარხილით ისეირნოთ . და, რა თქმა უნდა, ყველაზე აქტიურად დამსვენებლები განთქმულ Sella Ronda-ს სტუმრობენ . ჩივეტას შორიახლოს მდებარეობს ტბა მაჯორე, რომელიც თოვლით დაფარულ მწვერვალებთან ერთად წარმოუდგენელ პეიზაჟს ქმნის.

ჩივეტას ქალაქებში მრავალი კლასიკური სასტუმროა, ასევე არის სასტუმრო სახლები უფრო ოჯახური გარემოთი, სადაც მეპატრონეები არა მხოლოდ ქმნიან ოჯახურ ატმოსფეროსა და სიმყუდროვეს, არამედ გიმასპინძლდებიან სახლში მომზადებული ნამდვილი იტალიური კერძებით.

განთავსების ღირებულება: 3* – 70 ევროდან, 5* – 170 ევროდან.