ზამთრის ბავარია: როგორ მოვხვდეთ ნოიშვანშტაინის სასახლეში

ბავარიაში მოგზაურობისას უნებლიედ გაგახსენდებათ სცენები საბავშვო ზღაპრებიდან: ჯანჯაფილის სახლები „ჰენზელი და გრეტელიდან“, დათოვლილი ტყეები, სადაც ნადირობდა პრინცი ფილმიდან „სამი კაკალი კონკიასთვის“, და ნოიშვანშტაინის სამეფო სასახლე, რომლის გამოსახულებით დისნეის ყველა მულტფილმი იწყება. თუ ცივ ზამთარში სილამაზე და ჯადოქრობა გსურთ, მაშინ ამ ადგილს უნდა ეწვიოთ.

ამ რეგიონში მოგზაურობა – მრავალი ადამიანის ბავშვობის ოცნებაა. ნოიშვანშტაინის სასახლის სურათები გერმანული ენის სახელმძღვანელოებიდანაც გემახსოვრებათ.

ტურისტული პაკეტი ამ რეგიონში საკმაოდ ძვირია, მაგრამ თუ მოგზაურობას თავად გეგმავთ, საკმაოდ ბიუჯეტური და ბევრად უფრო საინტერესო იქნება. ამ სტატიაში გაგიზიარებთ ჩვენს გამოცდილებას, „ლაიფჰაკებსა“ და პირად შთაბეჭდილებებს ბავარიაში ზამთრის დასვენების შესახებ.

მოგზაურობის დაგეგმვა

ამრიგად, მიზანი ნათელია – ნოიშვანშტაინის სასახლე, ბავარია. როგორ ჩავიდეთ? კლასიკური ვარიანტია – მიუნხენში ჩაფრინდეთ და შეიძინოთ საავტობუსო ექსკურსია სასახლემდე, რომელიც ქალაქიდან 120 კილომეტრში მდებარეობს. გახსოვდეთ, რომ მიუნხენი გერმანიის ერთ-ერთ ყველაზე ძვირადღირებულ ქალაქად ითვლება, ხოლო ნოიშვანშტაინი მსოფლიოს ათი ყველაზე ლამაზი ციხე-სიმაგრის სიაში შედის და, რა თქმა უნდა, საკუთარი თავის მიმართ პატივისცემის გრძნობის მქონე ნებისმიერი ტურისტისთვის აუცილებლად სანახავი ადგილია. ეს კი ნიშნავს, რომ ეს მოგზაურობა იქნება ძვირი და მსოფლიოს სხვა მოგზაურებთან ერთად. თუ ეს არ გაღელვებთ, თამამად მიჰყევით ამ მარშრუტს.

სხვაგვარად როგორ არის შესაძლებელი? მოგზაურობის დაწყებას ქალაქ მემინგენიდან გთავაზობთ, რომელიც სასახლიდან მხოლოდ 75 კილომეტრში მდებარეობს, ამ მყუდრო შუასაუკუნეების ქალაქში ერთი-ორი დღე გაატარეთ, შემდეგ კი ერთი დღე ნოიშვანშტაინში მოგზაურობას დაუთმეთ. ასევე გირჩევთ ეწვიოთ ბავარიის დედაქალაქ მიუნხენს. იგი გერმანიის ერთ-ერთი ულამაზესი ქალაქია და ნამდვილად იმსახურებს თქვენს ყურადღებას. კომფორტული გერმანული ავტობანით მგზავრობას ერთ საათზე ნაკლები დასჭირდება.

ქუთაისიდან მემინგენ/მიუნხენ-ვესტში Wizz Air დაფრინავს. ჩვენს ვებ-გვერდზე „იაფი ავიაბილეთების კალენდრის“ მეშვეობით ყველაზე ხელსაყრელ შეთავაზებებს იპოვით. მაგალითად, ნოემბერში ბილეთების ღირებულება 160 ლარიდან იწყება (ორი გზა). ძალიან კარგი შეთავაზებაა!

მემინგენის აეროპორტი ქალაქის მახლობლად მდებარეობს – ავტომობილით 10 წუთის სავალ მანძილზე. აეროპორტიდან 2,50 ევროდ ავტობუსითაც შეგიძლიათ იმგზავროთ. ჩვენს შემთხვევაში, ტრანსფერზე არ გვიფიქრია, რადგან ის ადგილობრივი მკვიდრი დაგვხვდა, რომლისგანაც საცხოვრებელი ვიქირავეთ, თანაც სრულიად უფასოდ! იგი ყველა თავის სტუმარს ასეთ ბონუსს სთავაზობს.

ახლა კი საცხოვრებელი დეტალურად განვიხილოთ. ყველაზე საინტერესოა საცხოვრებლის ადგილობრივი მკვიდრებისგან ქირაობა. აქ გერმანელები ხშირად ცხოვრობენ 2 ან 3-სართულიან სახლებში, რომლებსაც რამდენიმე მფლობელი ჰყავთ და რომელთა ნაწილს ტურისტებზე აქირავებენ. ჩვენი ბინა ერთ-ერთი ასეთი სახლის პირველ სართულზე მდებარეობდა, რომელიც booking.com-ზე ვიპოვეთ. ატმოსფერო აქ მყუდრო და ავთენტურია, ბავარიულ სტილში შესრულებული დეკორის ბევრი საინტერესო ელემენტით. ასეთი საცხოვრებლის ქირაობა 4 დღე-ღამეში 212 ევრო დაგვიჯდა.

დღე 1-2. მემინგენი

ეს ქალაქი ფეხით სეირნობისთვის შეიქმნა, ზამთარშიც კი – შუასაუკუნეების ქუჩები, არხები, ნაირფერი სახლები, მოჭედილი აბრები… აქ გექნებათ განცდა, თითქოს ისტორიული ფილმისთვის შექმნილ დეკორაციებში სეირნობთ და რეჟისორი ახლავე შესძახებს „შეჩერდით! გადაღებულია!”

მემინგენის ყველა ღირსშესანიშნაობის მოსანახულებლად, მარკტპლაცის (Marktplatz) მთავარ მოედანზე მდებარე საინფორმაციო ბიუროში ტურისტული მარშრუტის რუკა აიღეთ. და თუ გსურთ თავი პირველაღმომჩენად იგრძნოთ, ჩართეთ ნავიგატორი და წინ, ღირშესანიშნაობების ძიებისკენ! გთავაზობთ რამდენიმე ადგილს, რომელთა მონახულებას გირჩევთ:

  • Siebendächerhaus (სიტყვასიტყვით „სახლი 7 სახურავით“) აშენდა მე-17 საუკუნის დასაწყისში იმ ხელოსნების მიერ, რომლებიც ტყავს ამუშავებდნენ. ამდენი სახურავი საჭირო იყო ცხოველების ტყავის გასაშრობად. ახლა ამ შენობაში აფთიაქი და სასტუმრო მდებარეობს.
  • Marktplatz – ქალაქის ცენტრალური მოედანი, სადაც იხილავთ მე-16 საუკუნის რენესანსის სტილის დახვეწილ რატუშას (Renaissance-Rathaus), ხელოსანთა გილდიის შენობასა (Grosszunft) და მე-15 საუკუნის ქალაქის ადმინისტრაციას (Steuerhaus).
  • Sankt Martinskirche – მე-14 საუკუნის წმინდა მარტინის ეკლესია, რომელიც ერთ-ერთი უძველესია ბავარიაში. მისი 65 მეტრიანი კოშკი ქალაქის ყველაზე მაღალი შენობაა.

ბავარიული სამზარეულო: ბრეტცელი, ძეხვი, ლუდი

ზამთარში ბავარიაში ნამდვილად არ გაიყინებით, რადგან ადგილობრივი სამზარეულო ნებისმიერ ამინდში გაგათბობთ. აუცილებლად დააგემოვნეთ განთქმული ბავარიული ძეხვეული და დაბრაწული ბრეტცელები მსუბუქი გერმანული ლუდით. ძეხვთან ასევე გემრიელია Sauerkraut (კომბოსტოს მწნილის ადგილობრივი ნაირსახეობა). ამისათვის თქვენ რესტორანში წასვლაც კი არ გჭირდებათ, ყველაფერი სუპერმარკეტში შეგიძლიათ შეიძინოთ (თუმცა, სოსისი უნდა შეწვათ). ჩვენ ეს კერძები დავაგემოვნეთ როგორც დაწესებულებაში, ისე მაღაზიიდან – ფასის გარდა განსაკუთრებული სხვაობა არ გვიგრძვნია. მაგრამ არსებობს რამდენიმე კერძი და სასმელი, რომლებიც უმჯობესია რესტორანში დააგემოვნოთ. გთავაზობთ რამდენიმე ადგილს, სადაც ძალიან გემრიელი კერძებია:

Barfüsser die Hausbrauerei – საკუთარი ლუდსახარშის მქონე რესტორანი, სადაც როგორც ტურისტებს, ისე ადგილობრივებს უყვართ ვახშმობა. რესტორნის დარბაზის გვერდით თავად ლუდის წარმოება მდებარეობს და ამ პროცესს შუშის კედლის მიღმა შეგიძლიათ დააკვირდეთ. შეუკვეთეთ აქ პოპულარული ბავარიული კერძი Haxentopf (შემწვარი ხარის კუდი) და გარნირად Kartoffelsalat (კარტოფილის სალათი). და, რა თქმა უნდა, საავტორო ლუდი! ულუფა დიდია, ამიტომ ამ ადგილს ეწვიეთ ან ძალიან მშიერი, ან ორ პესონაზე ერთი კერძი შეუკვეთეთ.

Rohrback’s – რეკომენდაცია ადგილობრივი მკვიდრისგან, როგორც „ფასისა და ხარისხის“ საუკეთესო თანაფარდობა. აქ სპორტული ბარის ატმოსფეროა, სადაც სამსახურის შემდეგ ადგილობრივი მოსახლეობა ისვენებს და თან ხელბურთის მატჩს უყურებს. კერძი, რომელიც ნამდვილად უნდა დააგემოვნოთ არის შნიცელი (დაახლოებით 12 ევრო). მიუხედავად იმისა, რომ იგი წარმოშობით ავსტრიიდანაა, ბავარიაშიც გავრცელებულია და თამამად ითვლება ადგილობრივ სამზარეულოდ. და გახსოვდეთ, ულუფა უზარმაზარი იქნება!

Weinstube zum goldenen Löwen – აი აქ უმჯობესია მაძღარი მოხვიდეთ. ეს ღვინის პაბია, რომელიც 1590 წლიდან ფუნქციონირებს! აქ შეგიძლიათ დააგემოვნოთ უნიკალური ღვინო ბავარიიდან და გერმანიის სხვა რეგიონებიდან. თუმცა, სამზარეულო მხოლოდ ღვინოზე დასაყოლებლით შემოიფარგლება. ფასები საშუალოზე მაღალია, ამიტომ გირჩევთ აქ უბრალოდ ადგილობრივი ღვინის დასაგემოვნებლად მოხვიდეთ.

დესერტისთვის გირჩევთ ერთ-ერთ საცხობს ეწვიოთ (Bäckerei). გერმანელებს ძალიან უყვართ სხვადასხვა ფუნთუშეული და მხოლოდ ბრეტცელით არ შემოიფარგლოთ. საცხობები დილით ადრე იღება, რათა საუზმისთვის ახალგამომცხვარი ფუნთუშები გაყიდონ. დღისით კი საცხობს შეგიძლიათ ეწვიოთ და უბრალოდ ფინჯანი ჩაი ან ყავა შტრუდელთან ერთად მიირთვათ. აქ ჩვეულებრივ ბევრი მაგიდა არ არის, მაგრამ ატმოსფერო მყუდროა და გემრიელი ფუნთუშების არომატი ტრიალებს. ყავახანებისგან განსხვავებით, სადაც ფინჯანი ყავა მინიმუმ 4 ევრო ღირს, აქ ფასებიც მოგეწონებათ.

დღე 3. მიუნხენი

ბავარიის დედაქალაქის დათვალიერებას ჩვენ ერთი დღე დავუთმეთ, თუმცა ერთი კვირაც არ არის საკმარისი! ეს არის უძველესი არქიტექტურის, მდიდრული ავტომობილებისა და მეფეთა ღირსი ლუდის ქალაქი. მიუნხენი, უპირველეს ყოვლისა, ცნობილია ლუდის ფესტივალით Oktoberfest, მაგრამ დაგვიჯერეთ, რომ აქ არა სეზონზეც უამრავ გასართობს იპოვით.

როგორ ჩავიდეთ მემინგენიდან მიუნხენში?

თუ მემინგენში ავტომობილს არ ქირაობთ, ეს სამი ვარიანტი განიხილეთ:

  1. მატარებელი (ბილეთი 25 ევრო ერთი გზა და მგზავრობის ხანგრძლივობა 2-2,5 საათი). ჩვენი აზრით, ეს ვარიანტი ყველაზე მოუხერხებელია, რადგან მოგზაურობას დიდი დრო სჭირდება, ხშირად გადაჯდომითაც კი, თანაც საკმაოდ მაღალ ფასად.
  2. Flixbus ავტობუსი (ბილეთი 6 ევრო, მგზავრობის ხანგრძლივობა – 1 ​​საათი). ეს ვარიანტი მოსახერხებელია და ბიუჯეტურია. ამ კომპანიის ავტობუსები მთელს ევროპაში კურსირებს, რაც საშუალებას მოგცემთ სწორი მარშრუტი შეარჩიოთ. თქვენ კომფორტულად, სწრაფად და სასიამოვნოდ იმგზავრებთ. ბილეთების წინასწარ დაჯავშნა შესაძლებელია ამავე სახელწოდების აპლიკაციაში. ერთადერთი უარყოფითი მხარეა – ზამთარში მიუნხენის მიმართულებით რეისები ყოველდღე არ ხორციელდება, განსაკუთრებით სამუშაო დღეებში.
  3. ერთობლივი მოგზაურობა ადგილობრივ მაცხოვრებელთან, რომლის დაჯავშნა შესაძლებელია Bla Bla Car-ის აპლიკაციით (ერთი მგზავრის ღირებულება დაახლოებით 5 ევროა, მგზავრობის ხანგრძლივობა – 1 საათი). ეს მოსახერხებელი და საინტერესო საშუალებაა, რომლის წყალობითაც ადგილობრივებ მაცხოვრებლებთან ისაუბრებთ და სასარგებლო რჩევებს მიიღებთ (იმ პირობით, რომ გერმანულად ან ინგლისურად საუბრობთ). Bla-Bla Car-ის სერვისის კიდევ ერთი თავისებურება იმაში მდგომარეობს, რომ აქტუალური შეთავაზებები მოგზაურობამდე რამდენიმე დღით ადრე ჩნდება და შესაძლოა რამდენიმე საათით ადრე გაუქმდეს მძროლის მიერ. ასე რომ, თუ წინასწარ დაგეგმვის ფანატი ბრძანდებით, ამ ვარიანტმა შესაძლოა გაგაღიზიანოთ.

მიუნხენის დასათვალიერებლად ჩვენ Bla-Bla Car გამოვიყენეთ და ერთი წუთითაც არ გვინანია. მოგზაურობა სწრაფი და კომფორტული იყო, მძღოლმა მეტროს სადგურის მახლობლად ჩამოგვსვა და აგვიხსნა, თუ როგორ უნდა მოვხვდეთ ქალაქის ცენტრში. მიუნხენის მეტრო საკმაოდ დიდი და ტექნოლოგიურია, ბილეთების შეძენის რთული სისტემით. მთელი ქალაქი ზონებად არის დაყოფილი და თითოეულ ზონაში მგზავრობის საფასური განსხვავდება. მეტროს შესასვლელთან მდებარე ავტომატში ბილეთის შეძენამდე, ყურადღებით დააკვირდით რუკაზე თუ რომელ ზონებში გადის თქვენი მარშრუტი. როგორც გერმანელებმა გვირჩიეს, მთავარ ღირსშესანიშნაობებს შორის მგზავრობისთვის საუკეთესოა ერთდღიანი ბილეთი (Gruppen-Tageskarte für 2-3 Personen) 12,80 ევროდ ორ ადამიანზე. ძვირია? გვერწმუნეთ, ეს ყველაზე მომგებიანი ვარიანტი აღმოჩნდა ჩვენი მარშრუტისთვის.

რა შეიძლება ნახოთ მიუნხენში 1 დღეში?

Marienplatz – მიუნხენის ცენტრალური მოედანი და ამავე სახელწოდების მეტროსადგური. პირველივე წამიდან იგი უბრალოდ გაგაოცებთ თავისი შუასაუკუნეების არქიტექტურით! აქ უნდა ისეირნოთ, გაიკვირვოთ და ისიამოვნოთ.

Olympiaturm – კარგ ამინდში, აუცილებლად ადით ამ 291 მეტრიან კოშკზე (ბილეთი 9 ევრო). აქ მთელ ქალაქს იხილავთ არა მხოლოდ მინის ფანჯრებს მიღმა, არამედ ღია სათვალთვალო მოედნიდან. მეტროს გაჩერება Olympiazentrum.

BMW Welt – ცნობილი საავტომობილო ბრენდის საგამოფენო დარბაზი (Olympiaturm-ის გვერდით). სპორტული და მდიდრული, მინი და როგორც „ბინა ბორბლებზე“, აქ ყველა ავტომობილი თითქოს საჭესთან გიხმობთ. და ეს შეგიძლიათ გააკეთოთ კიდეც! შესვლა უფასოა, შთაბეჭდილებები კი – ზღვა! თუ გაქვთ დრო და სურვილი, რომ BMW-ს შესახებ კიდევ უფრო მეტი გაიგოთ, ეწვიეთ საგამოფენო დარბაზის გვერდით მდებარე მუზეუმს (შესვლა ფასიანია).

Hofbräuhaus – მე-16 საუკუნის სამეფო კარის ლუდსახარშია. ეს არის ლუდის კულტურის ცენტრი, რომელიც გაგაოცებთ თავისი მასშტაბით! უზარმაზარი დარბაზების 3 სართული, ასობით მაგიდა, ათასობით ვიზიტორი და ზღვა ლუდი! აქ დამცინავად შემოგხედავენ, თუ 1 ლიტრზე ნაკლებ ჭიქა ლუდს შეუკვეთავთ. მაგრამ მზად იყავით, რომ სამეფო ლუდსახარშში ფასებიც შესაბამისია. ჩვენს ლანჩში 35 ევრო გადავიხადეთ, მაგრამ საკმაოდ მოკრძალებული ვიყავით.

დღე 4. ნოიშვანშტაინი

ზღაპრული სასახლე, რომელიც დათოვლილ ალპებშია მიმალული… დიდებული მთები სულის შემკვრელი სანახაობაა და, უცებ, მწვერვალებს შორის, მირაჟის მსგავსად ნოიშვანშტაინი ჩნდება! იგი არ აშენებულა როგორც თავდაცვითი ნაგებობა, აქ არ არის თხრილები და არც სქელი კედლები. ეს სასახლე წარმოადგენს მეოცნებე მეფე ლუდვიგ II ბავარიელის ფანტაზიის ნაყოფს, რომელიც რიჩარდ ვაგნერის მუსიკამ შთააგონა. ნოიშვანშტაინის სასახლის „წარმოუთქმელი“ სახელი პოეტურად შეიძლება ითარგმნოს, როგორც „გედის ახალი ბუდე“.

როგორ ჩავიდეთ ნოიშვანშტაინის სასახლეში?

მემინგენიდან პირდაპირი მარშრუტი არ არსებობს, ჯერ უნდა ჩახვიდეთ ალპებში მდებარე ქალაქ ფიუსენში(Füssen), შემდეგ კი სოფელ შვანგაუში (Schwangau). Flixbus-ის ავტობუსები ფიუსენამდე ჩაგიყვანთ, მაგრამ, სამწუხაროდ, ზამთარში ყოველდღე არ მოძრაობს. ვიზიტი უმჯობესია შაბათ-კვირას დაგეგმოთ. მოგზაურობის ხანგრძლივობა დაახლოებით 1 საათია და ერთი გზა 5 ევრო დაგიჯდებათ. ფიუსენში ჩამოსვლის შემდეგ, ავტოსადგურამდე გასეირნება მოგიწევთ, საიდაც ავტობუსები შვანგაუს მიმართულებით გადიან (ბილეთის ღირებულებაა 4,8 ევრო, ორი გზა).

ასევე შეგიძლიათ ტაქსით იმგზავროთ, რომელიც ავტოსადგურთან ახლოს საკმაოდ ბევრია. შვანგაუმდე მგზავრობას დაახლოებით 7 წუთი სჭირდება, თუ დრო და სურვილი გაქვთ, ფეხით გაისეირნეთ და ალპების თვალწარმტაცი ხედებით დატკბით.

შვანგაუში ჩამოსვლისთანავე, გადაწყვიტეთ გსურთ თუ არა სასახლის შენობაში შესვლა, რადგან შესასვლელი ბილეთების (13 ევრო) შეძენა მხოლოდ სასახლის მთის ძირში შეგიძლიათ. ტურისტების დიდი რაოდენობის გამო (არა სეზონშიც კი!) სასახლის დასათვალიერებლად დიდი დრო არ გექნებათ, დაახლოებით 30 წუთი. თანაც, შესასვლელში რიგში დგომაც მოგიწევთ. სასახლის ასეთი პოპულარობის გამო, ყველა ადგილობრივსაც კი არ უნახავს იგი შიგნიდან.

ჰოენშვანგაუს სასახლე

ჩვენთვის სასიამოვნო ბონუსი აღმოჩნდა მეორე სასახლე შვანგაუში – Hohenschwangau, რომელსაც ნოიშვანშტაინში გამგზავრებამდე გირჩევთ ეწვიოთ. ეს არის ლუდვიგ II-ის რეზიდენცია, რომელშიც იგი ცხოვრობდა სანამ მისი ფანტასტიკური სასახლე შენდებოდა. პატარა, მყუდრო სასახლე, რომელშიც ამჟამად სასტუმრო მდებარეობს. მისი ტერიტორიიდან ნოიშვანშტაინის შესანიშნავი ხედი იშლება.

Hohenschwangau-ში გასეირნების შემდეგ, ჩვენი მთავარი მიზნისკენ – ნოიშვანშტაინისკენ გავემართეთ. აქ გზა მიხვეულ-მოხვეული და ძალიან თვალწარმტაცია. ტურისტები ზემოთ ცხენებს ამოჰყავთ, მაგრამ ჩვენ ფეხით ასვლა ვამჯობინეთ. ყოველი მოსახვევის შემდეგ, სასახლე უფრო და უფრო დიდი ხდებობა, ისევე როგორც ჩვენი აღფრთოვანება. დაახლოებით 20 წუთის შემდეგ ჩვენს მიზანს მივაღწიეთ. შთაბეჭდილება: უბრალოდ საოცარი! წარმოუდგენელი სილამაზე! მხოლოდ უამრავი ტურისტია… მაგრამ ზაფხულში კიდევ მეტი იქნება).

სასახლის ფონზე ფოტოსურათის გადაღებისთვის საუკეთესო ადგილია – ხიდი მეზობელ გორაკებს შორის. მაგრამ ზამთარში იგი დახურულია. ასევე, დიდი ცისფერი ტბა, რომელიც ხშირად მოჩანს სასახლის ძირში გადაღებულ ფოტოებში, ზამთარში წყალი იკლებს და საერთოდ არ ჩანს, მაგრამ ირგვლივ ქათქათა თოვლი ყველაფერს ანაზღაურებს!

ყველაზე იაფი ავიაბილეთები Kutaisi-დან Memmingen-მდე 1 წლის განმავლობაში

გაფრენის თარიღი დაბრუნების თარიღი გაჩერება ავიაკომპანია ბილეთების მოძებნა

13.12.2019

16.12.2019

Direct

ფასი 337

17.01.2020

20.01.2020

Direct

ფასი 153

07.02.2020

10.02.2020

Direct

ფასი 117

20.04.2020

24.04.2020

Direct

ფასი 502

21.07.2020

01.08.2020

2 stops

ფასი 1 728

Posted in ბლოგი, პირადი გამოცდილება and tagged , , .