ზანზიბარი: რა უნდა იცოდეთ „აფრიკულ მალდივებზე“ დასვენების შესახებ

მოგზაურთა უმრავლესობისთვის ზანზიბარი კვლავ terra incognita რჩება, თუმცა ბოლო წლების განმავლობაში ეს კუნძული აფრიკის უცნობი  გადაკარგული ადგილიდან პოპულარულ, ხელმისაწვდომ და საინტერესო კურორტად იქცა . იმისათვის, რომ ეჭვი გავუქარწყლოთ ყველას, ვისაც ჯერ კიდევ ვერ გადაუწყვეტია ზანზიბარზე გამგზავრება, მოგზაურებისთვის საინტერესო ყველა კითხვაზე მოვამზადეთ პასუხი.

ვისთვის არის ეს სტატია?

მათთვის, ვისაც ეგვიპტე უკვე მოსწყინდა, აზია კი უკვე ღიაა და სული  ახალ შთაბეჭდილებებს სთხოვს გონივრულ ფასად.

სად მდებარეობს ზანზიბარი და როგორ ჩავიდეთ?

ზანზიბარი – ეს არის სამოთხის კუნძული, რომელიც ტანზანიას ეკუთვნის და ყველა მხრიდან თბილი ინდოეთის ოკეანითაა  გარშემორტყმული, მისი დედაქალაქი კი იგივე სახელწოდებას ატარებს . სწორედ აქ  ის ყველაზე უსასრულო თეთრი ქვიშის პლაჟები და წარმოუდგენელი ფირუზისფერი წყალია, რომელიც  სარეკლამო პლაკატებზე შეგხვედრიათ ხოლმე, ზანზიბარი – მომაჯადაოებელი ბუნება და მომხიბლავი ადგილობრივი კოლორიტია.

ზანზიბარი შესაფერისია როგორც თავგადასავლების მაძიებლებისთვის, რომლებსაც ჯუნგლებში გასეირნება, კუნძულებზე ექსქურსია, დაივინგი, კაიტსერფინგი ელოდებათ… ასევე იმ მოგზაურებისთვის, რომლებსაც მშვიდი, წყნარი დასვენება სურთ – კუნძულზე ძალიან წყნარი და დამამშვიდებელი გარემოა.

საქართველოდან პირდაპირი რეისები არ არის, თბილისიდან ზანზიბარში  გადაჯდომით მგზავრობის ორი გზის ღირებულება 692 ევროა.

რამდენად საშიშია მგზავრობა?

ზანზიბარის ხსენებაზე ჯერ კიდევ ბევრ ადამიანს უჩნდება კითხვა საშიშია თუ არა აქ ჩამოსვლა . დროა დავივიწყოთ სტერეოტიპები, რადგან დღეს ზანზიბარი ცივილიზებული და ძალიან მშვიდი კუთხეა, სადაც თქვენ და თქვენს შვებულებას საფრთხე არ ემუქრება . თანამედროვე სასტუმროები, კაფეები და რესტორნები, უამრავი გასართობი ადგილი საოცარი ბუნებით, თბილი ოკეანითა და კეთილგანწყობილი ადგილობრივი მოსახლეობით – ყველაფერი  ეს ზანზიბარში გელოდებათ.

განთავსების რა ვარიანტებს სთავაზობენ დამსვენებლებს?

ნებისმიერი ეგზოტიკური კუნძულის მსგავსად, სტანდარტული სასტუმროებისა და კომპლექსების გარდა, ზანზიბარი ოკეანის სანაპიროზე განთავსებულ ლოჯებსა და ბუნგალოებს გვთავაზობს . ამ სიამოვნების ღირებულებაა €20 ერთი ღამე ორი ადამიანისთვის . აქვეა ელიტური კომპლექსები ბუნგალოებით იმ დამსვენებლებისთვის, რომლებიც უფრო ველურ, თუმცა კომფორტულ დასვენებას ამჯობინებენ, სადაც ჩალის სახურავის ქვეშ ცხოვრების ღირებულება 100 ევროდან იწყება.

სასტუმრო სახლებში, დაბალფასიან სასტუმროებსა და ლოჯებში ორადგილიანი ნომრის ღირებულება 35 ევროდან იწყება (ფასში შედის ტრანსფერი აეროპორტიდან!) . ბევრი მათგანი, რაც საკმაოდ მნიშვნელოვანია, ოკეანის სანაპიროზე მდებარეობს. 5* სასტუმროები არაფრით ჩამოუვარდება პოპულარულ კურორტებზე მდებარე ანალოგიურ სასტუმრებს, არც მომსახურებითა და არც ფასით, ორადგილიანი ნომრის ღირებულებაა 170 ევროდან (ერთი ღამე).

მათთვის, ვისაც განთავსებაზე დანაზოგის გაკეთება სურს, არსებობს ჰოსტელები და კემპინგები . ადგილის ფასია – 15 ევროდან.

როდის არის უმჯობესი წასვლა და სად შეიძლება ღამის გათევა?

ზანზიბარზე დასვენების საუკეთესო დრო ზამთარი და ივნისიდან ოქტომბრამდე პერიოდია, სხვა დროს კი აქ წვიმების სეზონია (ოქტომბერი-ნოემბერი, მარტი-მაისი) და საკმაოდ ცივი ამინდია . წლის განმავლობაში კუნძულზე ჰაერის ტემპერატურაა +28-35°C, ხოლო ოკეანის წყლის ტემპერატურაა +27-29°C.

რაც შეეხება იმ საკითხს, თუ სად შეიძლება გაათენოთ ღამე, თქვენი უპირატესობები უნდა გაითვალისწინოთ .

მშვიდი  და პლაჟზე დასვენების მოყვარულების შესაფერისი დასავლეთ სანაპიროა, სადაც სიმშვიდე და წყნარი ზღვაა, ხოლო წყლის სპორტის სახეობების მოყვარულებისთვის – სამხრეთ-აღმოსავლეთ ნაწილი, სადაც დროდადრო კარგი ტალღების „დაჭერას“ შეძლებთ.

ჩრდილოეთი ნაწილისთვის დამახასიათებელია ტალღები და ზღვის მოქცევა, ამიტომ აქ უბრალოდ ცურვა სავარაუდოდ არ გამოგივათ . თუმცა ეს კუნძულის ერთ-ერთი ყველაზე აქტიური ადგილია, სადაც უამრავი ბარი, კაფე და რესტორანია.

საჭიროა თუ არა ვიზა?

დიახ, ვიზა საჭიროა . 90 დღემდე ვადით ვიზის გაფორმება  აეროპორტში ჩამოსვლისთანავეა შესაძლებელი . ტურისტული ვიზის ღირებულება 50 დოლარია.

რითი შეიძლება გაერთოთ კუნძულზე და რა უნდა მოინახულოთ?

რასაკვირველია, ზანზიბარს  საკურორტო გართობის სტანდარტული  სიის შემოთავაზება შეუძლია: დაივინგი, სნორკელინგი, კაიტსერფინგი, აქვეა ამ ყველაფრის შემსწავლელი სკოლები . შეგიძლიათ თევზჭერის ტურებში მიიღოთ მონაწილეობა, მათ შორის ექსკურსიებში მეთევზეთა სოფლებში, სადაც შეგიძლიათ   არა მხოლოდ დაიჭიროთ თევზი ვახშმისთვის, არამედ ადგილობრივ მაცხოვრებლებს შეხვდეთ.

ზანზიბარის ერთ-ერთი მთავარი გასართობია ყველა სახის საზღვაო გასეირნება და ექსკურსია . თქვენ შეგიძლიათ გაემგზავროთ: სანელებლების კუნძული, სადაც  მოჰყავთ ტროპიკული ხილი, სანელებლები, სამკურნალო მცენარეები, და ეს ყველაფერი, რა თქმა უნდა, შეგიძლიათ დააგემოვნოთ; ყურე, სადაც დელფინებთან ერთად შეგიძლიათ იცურაოთ; ბორიბის რიფი დაივინგის მოყვარულთათვის; ასევე კუების, ზღვის წყალმცენარეების ფერმები, მეზობელ კუნძულებზე გასეირნება და უამრავი სხვა რამ.

ველური ბუნების მოყვარულებს ეროვნული პარკი – „ჯოზანის ტყე“ ელოდებათ – ზანზიბარის ერთ-ერთი მთავარი ღირსშესანიშნაობა . ეს არის ტროპიკული ტყე, ჯუნგლები მანგროს ხეებით, სადაც ხის ტოტებზე მაიმუნები სხედან, ლეოპარდები ბინადრობენ და გველები ცოცავენ . მათ, ვისაც უფრო მეტის ხილვა სურს, კონტინენტზე გამგზავრება და საფარიზე წასვლა შეუძლიათ: ტანზანიის პარკებში ლომების, ლეოპარდების, სპილოების, ჟირაფების, ანტილოპების, აფთრების, ზებრების, მარტორქების, ბაბუინების, ფლამინგოებისა და სხვა უამრავი ცხოველის ნახვა შეგიძლიათ მათი ბინადრობის ბუნებრივ გარემოში.

ზანზიბარის ერთ-ერთი ყველაზე საინტერესო ადგილია Prison Island . დიახ, დიახ, მკაცრი რეჟიმის ციხე . ყოველ შემთხვევაში ადრე იყო, დღეს კი ეს ულამაზესი კუნძულია, სადაც გიგანტური კუები ბინადრობენ, რომლებზეც არა მხოლოდ ცქერა, არამედ ხელით შეხებაც შეგიძლიათ . კუნძულზე შემონახული ციხის შენობებისგან „ციხის სასტუმრო“ და „ციხის რესტორანი“ გახსნეს, ხოლო ადგილობრივი გიდები კუნძულის ბნელი წარსულის შესახებ გიამბობენ.

ზანზიბარი ვერ დაიკვეხნის ღირსშესანიშნაობების დიდი რაოდენობით, მისი ძირითადი კოზირი ბუნებაა . თუმცა, არსებობს საინტერესო ადგილები, რომელთა მონახულებას გირჩევთ:

• Stone Town ან ქვის ქალაქი – ქალაქ ზანზიბარის სავიზიტო ბარათი, მისი უძველესი ნაწილი, რომელიც იუნესკოს მსოფლიო მემკვიდრეობის ძეგლების სიაშია შეტანილი . ტაძრები, მეჩეთი, არაბული ფორტი და სახალხო სასახლე, დეივიდ ლივინგსტონის სახლ-მუზეუმი და უამრავი სხვა რამ შეგიძლიათ იხილოთ ზანზიბარის ძველ ქუჩებში, რაც ბევრ დროს არ წაგართმევთ.

• მონების მღვიმე, მონების ბაზარი – კუნძულის მოსახლეობა არ ივიწყებს ქვეყნის ბნელ წარსულს, ამიტომ დღესაც შეგიძლიათ დაათვალიეროთ და მოინახულოთ ის საშინელი ადგილები, სადაც ოდესღაც მონებს ყიდდნენ.
• „საოცრებათა სახლი“ – ადრე ეს იყო ზანზიბარის ბოლო სულთნის რეზიდენცია, შემდეგ აქ სადღესასწაულო რიტუალების სასახლე დაარსდა, დღეს კი ისტორიისა და კულტურის მუზეუმია – ადგილი, სადაც შეგიძლიათ გაიგოთ ყველაფერი, რაც ზანზიბარის შესახებ გაინტერესებთ.
• ფრედი მერკურის ბინა-ნომერი – ცოტამ თუ იცის, რომ მსოფლიოში ცნობილი მუსიკოსი ფრედი მერკური დაიბადა და ბავშვობა გაატარა ზანზიბარში . და დღეს ადგილი, სადაც ის ცხოვრობდა – ქალაქის ერთ-ერთი მთავარი „ხრიკია“ . მიუხედავად იმისა, რომ ეს ადგილი სასტუმროდ აქციეს, სადაც ყველას შეუძლია ღამის გათევა, უბრალოდ დათვალიერება ნებისმიერ მსურველს შეუძლია.

რა დაგიჯდებათ ზანზიბარზე დასვენება?

განთავსებისა და ფრენის ფასების შესახებ ჩვენ ზემოთ დავწერეთ, ახლა კი სხვა ხარჯები განვიხილოთ . ზანზიბარს ვერ ვუწოდებთ ბიუჯეტური მოგზაურისთვის იდეალურ ადგილს, ტაილანდში ან ვიეტნამში ფასები  ბევრად უფრო იაფია, მაგრამ ეს ადგილი მაინც ბევრად უფრო ხელმისაწვდომია, ვიდრე სხვა მსგავსი კურორტები.

კვება. კვების ფასები  იმაზეა დამოკიდებული, თუ სად აპირებთ ვახშმობას . მაგალითად,  სანაპიროზე მდებარე რესტორანში ორ ადამიანზე ვახშმის ღირებულებაა 65-დან 70 დოლარამდე, ხოლო პატარა კაფეში სადილობა $15-30 დაგიჯდებათ . დანაზოგის გაკეთების მოყვარულებს შეუძლიათ საკვები ბაზარზე შეიძინონ, რაც შეეხება ხილსა და სანელებლებს, ეს ნამდვილად მომგებიანია . თუმცა, არ გირჩევთ ბაზარზე თევზის ან ფრინველის ყიდვას, რადგან მათ სრულ ანტისანიტარიულ პირობებში ინახავენ.

ექსკურსიები. ქალაქ ზანზიბარის ცენტრალურ ძველ უბანში გიდის მომსახურებით ექსკურსიის ღირებულებაა $20 – 2-3 საათი . ზღვაზე გასეირნების ექსკურსიები და თევზაობა – 50 დოლარიდან, ხანგრძლივი გასეირნება რამდენიმე კუნძულის მონახულებით, ბანაობითა და ფერმებზე ვიზიტებით – 200 დოლარიდან.

წყლის სპორტი სახეობები. დაივინგი, სნორკელინგი: საშუალო ღირებულებაა $45, ღამის დაივინგი – $50, კაიტსერფინგი –  $60.

გთავაზობთ რამოდენიმე ტურს ზანზიბარში, ჩვენი პარტნიორი კომპანიისგან

რამდენად სპეციფიკურია ადგილობრივი სამზარეულო და არის თუ არა ტრადიციული ევროპული სამზარეულოს კვების ობიექტები?

ზანზიბარის სამზარეულო საოცრად აერთიანებს რამდენიმე კულინარულ ტრადიციას: აფრიკულ, არაბულ და სპარსულ . მთავარი კერძებია – ხორცი და თევზი ბრინჯის, პარკოსნების ან კარტოფილის გარნირით, ასევე სხვადასხვა ცხარე სოუსითა და ხილით, ასევე ფრიტიურში შემწვარი ზღვის პროდუქტები, შემწვარი საქონლის ხორცი ხილით, წიწილა მოშუშული ბანანით და სირაქლემას ხორცი სხვადასხვა საწებლით . ყველაზე ტრადიციული გარნირია არატკბილი ბანანი, რომელსაც აქ წვავენ, აცხობენ, შუშავენ  და თითქმის ყველა კერძთან ერთად მიირთმევენ.

სხვა სიტყვებით რომ ვთქვათ, ტრადიციული სამზარეულო ჩვენთვის ცოტაოდენ უჩვეულოა, მაგრამ არა სპეციფიკური, იმის გათვალისწინებით, რომ თქვენ შეგიძლიათ წინასწარ შეთანხმდეთ მზარეულებთან, რომ კონკრეტული სანელებელი ან საწებელი არ დაამატონ . და ნუ იდარდებთ  თუ ადგილობრივი სამზარეულო არ მოგეწონებათ, რადგან კუნძულზე  ევროპული სამზარეულოს უამრავი კვების ობიექტია განთავსებული.

ბევრს სმენია ტანზანიის კულინარული ეგზოტიკის შესახებ და, რასაკვირველია, ცოდნისმოყვარე ტურისტები კიდეც იპოვიან მას . ადგილობრივ რესტორნებში შეგიძლიათ დააგემოვნოთ სპილოს და ნიანგის ფილე, კუს ან ანტილოპას რაგუ, მაგრამ წინასწარ უნდა გაიგოთ თუ სად შეგიძლიათ მათი დაგემოვნება, რადგან ტურისტული სტერეოტიპების მიუხედავად, ეს არ არის ადგილობრივი მოსახლეობის ყოველდღიური საკვები.

საჭიროა თუ არა აცრები ? და სისუფთავეა თუ არა?

ზანზიბარში გასამგზავრებლად არანაირი აცრა არ გჭირდებათ, მაგრამ თუ რომელიმე აფრიკულ ქვეყანაში გადაჯდომით გაქვთ ფრენა და ამ ქვეყნის მონახულება გსურთ, შესაძლებელია დაგჭირდეთ აცრების გაკეთება – გირჩევთ ეს საკითხი დამატებით დააზუსტოთ.

რაც შეეხება სისუფთავეს, ტანზანიის კურორტების უმრავლესობა – ეს არის სუფთა პლაჟები, თეთრი ქვიშა და კრისტალურად სუფთა წყალი, ხოლო კუნძულის სასტუმროები კარგი სერვისითაა ცნობილი . ერთადერთი ადგილი, სადაც ფრთხილად უნდა იყოთ არის ბაზარი: გირჩევთ აქ არაფერი შეიძინოთ გარდა ხილისა, შეძენილი კი აუცილებლად გულდასმით უნდა გარეცხოთ.

კიდევ რა უნდა იცოდეთ ზანზიბარში გამგზავრებამდე?

მიუხედავად იმისა, რომ ტანზანია მუსულმანური ქვეყანაა, არ არსებობს დოგმები ან მკაცრი მოთხოვნები ტურისტების მიმართ, მათ თავიანთი შეხედულებისამებრ შეუძლიათ ჩაიცვან . ზოგადად, ზანზიბარის მკვიდრები ძალიან მეგობრული, გულღია და გულწრფელი არიან სტუმრების მიმართ, ისინი სიამოვნებით დაგეხმარებიან, გირჩვენ და მიგასწავლიან . აქ ძირითადად ინგლისურ და სუაჰილურ ენებზე საუბრობენ . ადგილობრივ მოსახლეობას განსაკუთრებით სიამოვნებს თუ მოგზაურები რამდენიმე სიტყვაც მაინც იტყვიან სუაჰილზე, მაგალითად, „სანა“ – მადლობა, ან „ჯამბო“ – სალამი . გაითვალისწინეთ 😉

ტანზანიის, კერძოდ კი ზანზიბარის ვალუტაა – ტანზანიური შილინგი, მაგრამ ასევე შეგიძლიათ  გადაიხადოთ დოლარით, დოლარს იღებენ კაფეებში, სუვენირების მაღაზიებში, სასტუმროებში, და ხშირად ფასები სწორედ დოლარშია მითითებული.

არ დაიზაროთ შევაჭრება – სუპერმარკეტების გარდა ყველგან შეგიძლიათ შეევაჭროთ . ბაზრები, სუვენირების მაღაზიები – ნუ მოგერიდებათ ფასის დაკლება, როგორც წესი, მისი მინიმუმ ორჯერ შემცირებაა შესაძლებელი.

თუ სუვენირის სახით ველური ცხოველების ტყავის, სპილოს ძვლის, მარტორქის რქის, ოქროს ნივთების შეძენა გადაწყვიტეთ, ქვეყნიდან მათ გატანას ვერ შეძლებთ  მათი შეძენის შესახებ სერთიფიკატის გარეშე.

რაც შეეხება უსაფრთხოებასა და ჯანმრთელობას: ოკეანეში ცურვის დროს, ფრთხილად იყავით, რადგან ყოველთვის არსებობს ზღვის ზღარბებთან შეხვედრის რისკი; წვიმების სეზონსა და სეზონთაშუა პერიოდის განმავლობაში მალარიის კოღოების კბენის ალბათობა იზრდება – თან იქონიეთ მწერების რეპელანტები და პროფილაქტიკური საშუალებები . ნუ  შეგეშინდებათ შხამიანი გველების და სხვა ქვეწარმავლების – დიახ, ისინი კუნძულზე ბინადრობენ, მაგრამ მხოლოდ ჯუნგლებში, რომელსაც იშვიათად სტუმრობს ადამიანი.