სანტორინი ლურჯი სახლები

სანტორინი: ყველაფერი მსოფლიოს ერთ-ერთი ყველაზე ლამაზი კურორტის შესახებ

კუნძული სანტორინი ყოველწლიურად ასობით ტურისტს იღებს და არაერთხელაა აღიარებული, როგორც მსოფლიოს ერთ-ერთი ყველაზე ლამაზი კუთხე. მაშ ასე, რითი იზიდავს ხალხს საბერძნეთის ეს მარგალიტი?

მოკლე ისტორიული ექსკურსი

ექვსი ათასი წლის წინ აქ ძლიერი და უჩვეულოდ განვითარებული მინოელთა ცივილიზაცია აღმოცენდა. კუნძულს ტირას უწოდებდნენ და მისი მკვიდრნი ძალიან შრომისმოყვარენი იყვნენ: ისინი ლამაზ სასახლეებსა და ციხეებს აშენებდნენ, კერამიკის ნაკეთობებსა და მეურნეობას აწარმოებდნენ. მათი ისტორია მოგვიანებით მრავალ მითს, ლეგენდასა და ისტორიას დაედო საფუძვლად.

ლურჯი სახურავიანი სახლი სანტორინში

მაგრამ 1500 წელს ჩვ.წ.აღ-მდე კუნძულის მახლობლად მდებარე ვულკანმა გაიღვიძა, რომლის ძლიერი ამოფრქვევის შედეგად მრავალი მეცნიერის აზრით, მინოელთა დიდი ცივილიზაცია განადგურდა. უზარმაზარი სიმაღლის ტალღებმა კუნძული კრეტის მკვიდრებსა და ცნობილი კნოსოსის სასახლეს  გამოუსწორებელი ზიანი მიაყენა. კუნძული ტირას ნაწილი წყალქვეშ მოექცა, ხოლო რელიეფმა ნახევარმთვარის ფორმა მიიღო. 1204 წელს, კუნძულს სახელი გადაარქვეს ადგილობრივი მაცხოვრებლების მფარველი წმინდა ირინეს საპატივცემულოდ და მას შემდეგ კუნძული სანტორინის სახელს ამაყად ატარებს.

როგორ ვიმგზავროთ სანტორინიმდე

სანტორინიმდე მგზავრობის რამდენიმე მარშრუტი არსებობს:

  • ფრენა ქუთაისი-ათენი და ათენი-სანტორინი
  • ფრენა თბილისი-ათენი-სანტორინი ტრანზიტულ რეისს ავიაკომპანია ეგეოსის ავიახაზები ასრულებს
  • ფრენა ქუთაისი-ათენი, შემდეგ ჩქაროსნული ბორანი სანტორინიმდე
  • ფრენა კუნძულ როდოსამდე თბილისიდან, შემდეგ კი ბორნით სანტორინიმდე
  • ფრენა კუნძულ კრეტამდე (ჰერაკლიონი), შემდეგ კი ბორნით სანტორინიმდე

საბორნე მიმოსვლის განრიგის ნახვა აქ შეგიძლიათ.

შემდეგ კი, კუნძულის მწვერვალზე, უახლოეს ქალაქში ან დასახლებაში ასვლა შემდეგი საშუალებებით შეგიძლიათ:

  • ვირით
  • ფუნიკულიორის მეშვეობით
  • ფეხით ასობით საფეხურის გადალახვით

სანტორინის რომანტიკა

პირველი, რაც თვალში მოგხვდებათ – ეს არის დამაბრმავებლად თეთრი სახლების ენით აუწერელი სილამაზე, რომლებიც იმდენად მჭიდროდაა განთავსებული, რომ გეგონებათ თითქოს ყველა ერთმანეთის თავზე ცხოვრობს. თეთრი ფერის კონტრასტის როლს ნათელი ლურჯი ფერის სახურავები, დარაბები და ეკლესიების გუმბათები  ასრულებენ, რომელთა რაოდენობა სამასზე მეტია. და, რა თქმა უნდა, ეგეოსის ზღვისა და ძლევამოსილი ვულკანის უმშვენიერესი ხედი.

სასტუმრო სანტორინში

კუნძულის მთავარი ქალაქია ფირა, რომელიც სამართლიანად ითვლება მის დედაქალაქად. ეს არის ნამდვილი სამოთხე დასასვენებლად მყოფი ახალგაზრდებისთვის. აქ მრავალი სასტუმრო, კაფე, სუვენირების მაღაზია, ღამის კლუბი და ბარია განთავსებული.

სიდიდით მეორე ქალაქია – ოია, რომელიც თავისი წყნარი, ქვაფენილით მოპირკეთებული ქუჩებითა და მყუდრო რესტორნებით მიგიზიდავთ. ყოველწლიურად აქ უამრავი ტურისტი ჩამოდის იმისათვის, რომ წარმოუდგენელი სილამაზის მზის ჩასვლით დატკბეს.

სანტორინი ასევე თავისი ფერადი პლაჟებითაა ცნობილი. სულ დაახლოებით 15 პლაჟია, მაგრამ მათგან მხოლოდ სამია სავიზიტო ბარათი:

  • შავი – კუნძულის ყველაზე გრძელი პლაჟი წვრილი შავი ვულკანური ქვიშითა და კენჭით, უამრავი ბარითა და ტავერნით.
  • წითელი – შთამბეჭდავად ლამაზი პლაჟი წითელი კენჭით
  • თეთრი – საკმაოდ იშვიათი თეთრი კენჭიანი პლაჟი პემზის ქვის კლდეების გარემოცვაში.
პლიაჟი სანტორინზე

ტირაზე არ არის ბევრი მცენარე, ძირითადად ვენახი და კაქტუსებია. სამაგიეროდ აქ გემრიელ ღვინოს აწარმოებენ  განსაკუთრებული ტექნოლოგიებით, რომლებსაც ადგილობრივი მეღვინეები არ ახმაურებენ.

კუნძული ძალიან პოპულარულია ახალდაქორწინებულთა შორის:  აქ მათ რომანტიკული თაფლობის თვის გატარება, ლამაზი ფოტოსესიებისა და ქორწინების ცერემონიების მოწყობა უყვართ.

როდის გავემგზავროთ სანტორინიზე

სეზონი სანტორინიზე 8 თვე გრძელდება – მარტის ბოლოდან ნოემბრის ბოლომდე. სეზონის დაწყებისთანავე კუნძული ცოცხლდება და ფუსფუსიც იწყება: სახლების კედლებზე აქა-იქ ფოტოგადაღების განათება გაილვებს ხოლმე, ისმის სირტაკის მოტივები და ჰაერში ყველის სურნელი ტრიალებს. ხოლო როდესაც სეზონი მთავრდება, მშვენიერი ტირა ჩუმდება და ზამთრის ძილს ეძლევა.

რა უნდა მოვინახულოთ სანტორინიზე:

  • ქალაქები ფირა და ოია
  • უძველესი ქალაქი აკროტირის არქეოლოგიური გათხრები
  • აქტიური ვულკანი კუნძულ ნეა-კამენიზე
  • კუნძულის მთავარი პლაჟები
  • წმინდა ელიას მონასტერი კუნძულის ყველაზე მაღალ წერტილზე მომხიბლავი ხედით

რა უნდა ჩამოვიტანოთ სანტორინიდან:

  • ადგილობრივი ღვინო
  • ავსტრალიული ოპალის სამკაულები
  •  ხისა და ტყავის ხელნაკეთი ნივთები
  • პემზის ქვის ნატეხი ვულკანიდან

ჯობს მივბაძოთ ადგილობრივ მოსახლეობას საკუთარი მიწის სიყვარულში  და იმის დაფასებაში, თუ რას აძლევს იგი სანაცვლოდ. სანტორინი  – ჭეშმარიტად უნიკალური და მომხიბლავი ადგილია, რომელიც მთელი ცხოვრების მანძილზე თქვენს გულებში დარჩება. იგი გაგაოცებთ თავისი მომაჯადოებელი სილამაზით, სიმშვიდით, სიჩუმით და შთაგაგონებთ იმისთვის, რომ დააფასოთ რაც ამ მომენტში გაგაჩნიათ. ვულკანი ხომ მოქმედია, უბრალოდ სძინავს…

Posted in ბლოგი, პირადი გამოცდილება and tagged , .