ვმოგზაურობთ მსუბუქად: როგორ უნდა ჩავალაგოთ ხელბარგი ისე, რომ ყველაფერი მოვათავსოთ?

თუ იაფად ფრენა გსურთ – წასაღები ნივთების მინიმალურ რაოდენობას უნდა დაჯერდეთ. ზურგჩანთა თუ ჩემოდანი? რა უნდა წაიღოთ და რა არა, როგორ უნდა შეფუთოთ ეს ყველაფერი?

ჩვენ ეს ინსტრუქცია მათთვის მოვამზადეთ, ვისაც ბარგის გარეშე არ უმოგზაურია, მაგრამ სურს ისწავლოს!

ვეცნობით ავიაკომპანიის მოთხოვნებს

დაბალბიუჯეტიანი ავიაკომპანიები გულდასმით აკონტროლებენ ჩემოდნების ზომასა და წონას, ამიტომ ბილეთების შეძენამდე მნიშვნელოვანია გაიგოთ ნორმები და გადაწყვიტოთ, გჭირდებათ თუ არა ბარგი ან ხელბარგის დამატებითი ერთეული. მაგალითად, Ryanair-ის მგზავრებს ბორტზე უფასოდ შეუძლიათ აიტანონ 40 x 25 x 20 სმ ზომის ერთი ჩანთა. უფრო დიდი ზომის ზურგჩანთის ან ჩემოდნის შემთხვევაში, Priority-ს გადახდა მოგიწევთ.

თუ მოგზაურობის დროს რამდენიმე გადამზიდავის მომსახურებას გამოიყენებთ, ორიენტაცია ყველაზე მკაცრ მოთხოვნებზე აიღეთ.

• 

• 

ვირჩევთ ზურგჩანთა თუ ჩემოდანი

მრავალი მწარმოებელი აწარმოებს ჩემოდნებს, რომლებიც პოპულარული ავიაკომპანიების მოთხოვნებს აკმაყოფილებს. ერთი ასეთი ჩემოდნის შეძენა ჯობს თუ უპირატესობა ზურგჩანთას უნდა მიანიჭოთ? მოდით განვიხილოთ, თუ რითი არის ცუდი და კარგი თითოეული ვარიანტი.

ჩემოდნის დადებითი მხარეები:

• მსხვრევად სუვენირებსა და ტექნიკას უფრო მეტი ალბათობით ჩაიტანთ დაუზიანებელს;
• ბორბლებიანი ჩემოდანი შეგიძლიათ გააგოროთ;
• ზოგიერთი მოდელის სახელურებში ჩამონტაჟებულია სასწორი.

ჩემოდნის უარყოფითი მხარეები:

• მათი წონა მინიმუმ 2.5 კგ-ია, რაც მნიშვნელოვანია, როდესაც ხელბარგის მაქსიმალური წონა 7 კგ-ია;
• ბორბლები ხშირად ყველაზე შეუფერებელ მომენტში ძვრება და ხელით ტარება მოგიწევთ;
• შესაფერისია მხოლოდ სწორი ზედაპირებისთვის;
• მოითხოვს გარკვეულ სივრცეს შენახვისთვის.

ზურგჩანთის დადებითი მხარეები:

• ცოტას იწონის, უფრო მეტი ნივთი შეგიძლიათ წაიღოთ;
• როგორც წესი, არ აქვს მყარი გამოზნექილი დეტალები, რის გამოც ადვილად თავსდება ჩარჩოში შემოწმების დროს. თუ არ გადაავსებთ, შეგიძლიათ იმოგზაუროთ ზურგჩანთით, რომელიც ნორმას რამდენიმე სანტიმეტრით აჭარბებს;
• აქვს გარე ჯიბეები წვრილმანებისთვის, რომლებიც შეიძლება ფრენის დროს დაგჭირდეთ;
• შეგიძლიათ მიამაგროთ ზედა ტანსაცმელი, თუ „ზამთრიდან ზაფხულში“ მიფრინავთ;
• კომპაქტურია, არ იკავებს დიდ ადგილს შენახვის დროს.

ზურგჩანთის უარყოფითი მხარეები:

• შეგიძლიათ მხოლოდ ატაროთ, რაც არ არის შესაფერისი ხერხემლის პრობლემების მქონე ადამიანებისთვის;
• თასმები ზოგჯერ ბარგის ასაღებ ბილიკში იჭედება;
• ნივთები იჭმუჭნება;
• არ იცავს მსხვრევად შიგთავსს დაცემისას;
• პრობლემატურია ფსკერზე მოთავსებული ნივთების აღება, თუ ზურგჩანთას არ აქვს ქვედა გასახსნელი;
• სველდება, წვიმისა და თოვლის დროს აუცილებელია წვიმისგან დამცავი საფარის გამოყენება.

ასევე გაეცანით: დატოვეთ: რისი ტრანსპორტირებაა აკრძალული ხელბარგით

გადავწყვიტოთ თუ რა უნდა წავიღოთ ხელბარგით

დაიწყეთ იმ ჩამონათვალის შესწავლით, თუ რისი ატანა იკრძალება ბორტზე – არ მოგიწევთ აეროპორტის უსაფრთხოების სამსახურისთვის ახსნა-განმარტების მიცემა.

ჰიგიენური საშუალებები (შამპუნი, კბილის პასტა და ა.შ.) უნდა შეიძინოთ მინი ვერსიებში ან გადაიტანოთ 100 მლ-მდე მოცულობის კონტეინერებში, შემდეგ მოათავსოთ საკეტიან პაკეტში ან გამჭვირვალე კოსმეტიკის ჩანთაში. შეგიძლიათ არ წაიღოთ და ადგილზე შეიძინოთ, მაგრამ ეს დამატებითი ხარჯები და ზედმეტი ნივთებია (ნარჩენებს თან ვერ წაიღებთ, გადაგდება მოგიწევთ).

შემდგომი მოქმედებები დამოკიდებულია იმაზე, თქვენ ბარგი გაქვთ თუ მხოლოდ ხელბარგი.

თუ რეგისტრირებული ბარგი გაქვთ, ნივთების ძირითად ნაწილი აქ მოათავსეთ. ხელბარგში დატოვეთ:

1. ბილეთები/ჩასასხდომი ბარათები. იმ შემთხვევაშიც კი, თუ ავიაკომპანია ელექტრონული ვერსიის გამოყენების საშუალებას იძლევა, უმჯობესია, ყოველი შემთხვევისთვის თან წაიღოთ ამონაბეჭდი.
2. დოკუმენტები: პასპორტები, სადაზღვევო პოლისები, ბავშვების დაბადების მოწმობები. თუ ბავშვი ერთ-ერთ მშობელთან ერთად მოგზაურობს, არ დაგავიწყდეთ მეორე მშობლის ნოტარიულად დამოწმებული ნებართვა.
3. ფული: ნაღდი ფული და ბარათები. გააფრთხილეთ ბანკი, რომ აპირებთ ბარათის საზღვარგარეთ გამოყენებას და საჭიროების შემთხვევაში გაზარდეთ ლიმიტები.
4. ტექნიკა: ლეპტოპი, პლანშეტი, ფოტოაპარატი და ა.შ.
5. პირველადი დახმარების აფთიაქი შემდეგი შემადგენლობით: თავის ტკივილის, დიარეის საწინააღმდეგო პრეპარატები, პლასტირი. თუ რომელიმე მედიკამენტს რეგულარულად იღებთ, რამდენიმე დღის მარაგი ზურგჩანთაში ჩადევით (ბარგის დაკარგვის შემთხვევაში). მათ შორის რეცეპტით გამოწერილი მედიკამენტებია? არ დაგავიწყდეთ რეცეპტი და ორიგინალი შეფუთვა ინსტრუქციებით! აქ ჩვენ დავწერეთ, თუ როგორ უნდა დააკომპლექტოთ პირველადი დახმარების აფთიაქი, რომ საზღვარზე პრობლემები არ შეგექმნათ.
6. „ფაუერ ბანკი“, ტელეფონისა და სხვა მოწყობილობების დამტენი საშუალებები.
7. ტანსაცმლის ერთი კომპლექტი.
8. გასართობი საშუალებები: წიგნი, პლეერი ყურსასმენებით და ა.შ.
9. ჭურჭელი წყლისთვის. უსაფრთხოების კონტროლი ცარიელით გაიარეთ, რის შემდეგაც შეგიძლიათ აავსოთ წყლით და ბორტზე ახვიდეთ (ბევრ აეროპორტში არის სასმელი წყლის შადრევნები). ყურადღება მიაქციეთ დასაკეც სამოგზაურო ბოთლებს, რომლებიც მინიმალურ ადგილს იკავებს.
10. წასახემსებელი. შეარჩიეთ ისეთი პროდუქტები, რომლებსაც არ აქვთ მკვეთრი სუნი და არ იფშვნება. გაითვალისწინეთ, რომ იოგურტი თხევად საკვებად ითვლება, ამიტომ ისინი არაუმეტეს 100 მლ მოცულობის უნდა შეიძინოთ.

თუ მხოლოდ ხელბარგით მიფრინავთ, ყველა გრამი მნიშვნელოვანია. ვმოქმედებთ შემდეგნაირად:

1. შეისწავლეთ ამინდის პროგნოზი დანიშნულების პუნქტში. მაგალითად, ევროპაში ზამთარი საკმაოდ რბილია – ნაქსოვი სვიტერები და დათბილული გამაშები შეგიძლიათ სახლში დატოვოთ.
2. გაითვალისწინეთ ის პირობები, რომელშიც იცხოვრებთ. თუ ერთი კვირით მიემგზავრებით, მაგრამ ბინაში არის სარეცხი მანქანა გაშრობის ფუნქციით, შეგიძლიათ ტანსაცმლის მინიმალური რაოდენობა წაიღოთ.
3. ვირჩევთ ისეთ ნივთებს, რომლებიც არ იჭმუჭნება და ნაკლებ ადგილს იკავებს.
4. მოცულობით დიდი კი – ჩაიცვით.

როგორ უნდა შევფუთოთ ხელბარგი

1. დოკუმენტები იქ ჩადეთ, საიდანაც სწრაფად შეძლებთ ამოიღოთ ისე, რომ არ დაგჭირდეთ ჩემოდნის ან ზურგჩანთის გახსნა. ამ მიზნებისათვის შეგიძლიათ შეიძინოთ წელის ჩანთა – მოსახერხებელი და უსაფრთხოა (აეროპორტში, იგი ტანსაცმლით დაფარეთ, წინააღმდეგ შემთხვევაში, ხელბარგის ცალკეულ ერთეულად შეიძლება ჩათვალონ).
2. ფული რამდენიმე ნაწილად დაყავით და სხვადასხვა შიდა ჯიბეში დამალეთ ისე, რომ ყველაფერი ერთდროულად არ დაკარგოთ.
3. თქვენს წინ დააწყვეთ ის ნივთები, რომელთა წაღებაც გსურთ. დალიეთ ყავა, დაბრუნდით და კიდევ ერთხელ შეამოწმეთ – ნამდვილად გჭირდებათ ეს ყველაფერი თუ რამდენიმეს დატოვებას შეძლებთ?
4. დაფიქრდით, შესაძლებელია თუ არა რომელიმიე ნივთის ნაკლებად მოცულობითი ანალოგით ჩანაცვლება: მაგალითად, ქოლგის ნაცვლად წაიღეთ საწვიმარი, თმის ჯაგრისის ნაცვლად – სავარცხელი.
5. ჩაალაგეთ ყველაზე მძიმე: ლეპტოპი, ფოტოაპარატი და ა.შ. ამგვარად თქვენ მიხვდებით, თუ რამდენი ადგილი და წონა დარჩა სხვა დანარჩენი ნივთებისთვის.
6. ახლა დაიწყეთ ტანსაცმლის დაგრაგნა, შემდეგ კი ტექნიკას შემოუწყვეთ იმ შემთხვევაში, თუ ზურგჩანთა დაგივარდებათ ან რაიმეს გამოსდებთ.
7. საცვლები და წინდები პაკეტებში გადაანაწილეთ (შემდეგ გამოგადგებათ ბინძური ნივთების ტრანსპორტირებისთვის) და შეავსეთ დარჩენილი ადგილები.
8. ზურგჩანთით მიფრინავთ? ჩამოაცვით წვიმისგან დამცავი საფარი, თუნდაც გაწვიმებას არ აპირებდეს: დაიცავს ჭუჭყისა და ქურდებისგან.
9. გაზომეთ და აწონეთ ჩალაგებული ჩანთები. ნორმის ფარგლებში ეტევით? გილოცავთ, ყოჩახი ხართ. დარწმუნდით, რომ ბილეთები აიღეთ და თავგადასავლების საძიებლად გაემგზავრეთ!

ასევე წაიკითხეთ: შეცდომებზე მუშაობა: როგორ გავასწოროთ შეცდომა ავიაბილეთში და რა ღირს ეს