ფილმები ვენეციაზე

ვენეციით შთაგონებულნი: 5 საინტერესო ფილმი

ვენეცია ​​ალბათ არასდროს დაკარგავს პოპულარობას, როგორც შეყვარებულთა მოგზაურობისთვის მთავარი დანიშნულების ადგილი. შემთხვევითი არ არის ის, რომ მრავალი კინორეჟისორი სწორედ ამ ადგილს ირჩევს რომანტიკული ისტორიის გადასაღებად. გთავაზობთ 5 შესანიშნავ ფილმს, რომელთა მოვლენები სწორედ საოცარ ვენეციაში ვითარდება.

„ყველა ამბობს, რომ მე შენ მიყვარხარ“

რომანტიკული კომედიების ოსტატი, ვუდი ალენი, ცნობილია თავისი სიყვარულით ნატურული გადაღებებისადმი ლამაზ ლოკაციებზე. 1996 წელს გადაღებულ ნამუშევარში, დიდებულ ვენეციას ერთ-ერთი მთავარი როლი ერგო. მის ფონზე ერთდროულად რამდენიმე დახლართული ისტორია ვითარდება: გმირები ერთმანეთს პოულობენ და ერთმანეთი უყვარდებათ, შემდეგ შორდებიან და ქორწილებს გეგმავენ, მათი გულები იმსხვრევა და კვლავაც ერთმანეთს ხვდება – ეს ყველაფერი კი იუმორითა და მუსიკალური ნომრებით. მსახიობთა შემადგენლობა უბრალოდ საოცარია, ფილმში მონაწილეობენ დრიუ ბერიმორი, ედვარდ ნორტონი, ტიმ როტი, ჯულია რობერტსი, ნატალი პორტმანი და გოლდი ჰოუნი.

„ტურისტი“

პეგი გუგენჰაიმის კოლექცია, ბიბლიოთეკა მარჩიანა, მადონა დელ ორტოს ტაძარი, არსენალის შენობა და მრავალი სხვა ცნობილი ვენეციური ღირსშესანიშნაობა შეგიძლიათ იხილოთ გერმანელი რეჟისორის ფლორიან ჰენკელ ფონ დონერსმარკის ფილმში „ტურისტი“. ფილმში მონაწილეობს ჰოლივუდის ორი აღიარებული სექს-სიმბოლო – ანჯელინა ჯოლი და ჯონი დეპი. ფილმში არის როგორც ლირიკული ხაზი და ძლიერი ინტრიგა, ისე ამაღელვებელი დევნა კატარღებით მსოფლიოს ყველაზე ცნობილ არხებზე.

„დაბრუნება ბრაიდსჰედში“

ეს არის ინგლისელი მწერლის, ივლინ ვოს ამავე სახელწოდების ნაწარმოების ეკრანიზაცია. ფილმი 2008 წელს გამოვიდა და, უნდა ითქვას, რომ სრულად გაამართლა მაყურებელთა მოლოდინი. ამ ისტორიას იდეალურად შეესაბამა ვენეციის ფონი. პერიპეტიები მთავარი პერსონაჟების ცხოვრებაში გაგიტაცებთ, ულამაზესი ვენეცია კი თვალს ახარებს.

„კაზანოვა“

მორალური პრინციპებით არცთუ ისე გამორჩეული, მაგრამ ამით არანაკლებ პოპულარული კაზანოვა, შესაძლოა, უბრალოდ, დაემორჩილა ვენეციის ხიბლს! ლასე ჰალსტრემმა, რომელიც ცნობილია ისეთი ფილმებით, როგორიცაა „შოკოლადი“, „რა აწუხებს გილბერტ გრეიფს“, ლეგენდარული მექალთანის ბიოგრაფიის გადაღება გადაწყვიტა. მთავარ როლს ფილმში ავსტრალიელი მსახიობი ჰით ლეჯერი ასრულებს.

„მხოლოდ შენ“

ამ ფილმში შეგიძლიათ იხილოთ ვენეციის განმარტოებული კუთხეები, სადაც შეყვარებულ წყვილებს უყვართ სეირნობა. ექსკლუზიურ ტურს ასეთ ადგილებში უძღვება, მაშინ ჯერ კიდევ არანაირი „რკინის კაცი“ – რობერტ დაუნი უმცროსი. მისი გმირი საკმაოდ კარგად ფლობს იტალიურ ენას, ასე რომ, ფილმიდან რამდენიმე სასარგებლო ფრაზაც შეგიძლიათ ისწავლოთ. ფილმი ახალგაზრდა ქალის შესახებაა (მარისა ტომეის შესრულებით), რომელიც ვენეციაში ჩადის თავისი „საბედოს“ კვალდაკვალ და შედეგად ვერ (უფრო სწორად კი სულ სხვა რამეს) პოულობს იმას, რასაც ეძებდა.

Posted in ბლოგი, ფილმები მოგზაურობაზე and tagged , .