ტრანზიტი ლონდონში: ყველაფერი, რაც სატრანზიტო ვიზის შესახებ უნდა იცოდეთ

„ლონდონში ტრანზიტულ რეისზე არ დამიშვეს. რა უსამართლობაა, ვიჩივლებ!“ Aviabiletebi.org-ის ფოსტაზე ასობით მსგავსი შინაარსის წერილი მოდის, ხოლო Facebook-ის სივრცეში ხშირად შეხვდებით იმ მგზავრთა მრისხანე პოსტებს, რომლებიც დიდი ბრიტანეთის გავლით სატრანზიტო ფრენების მკაცრ რეალობას წააწყდნენ. დროა ამ საკითხში მეტი გარკვეულობა შევიტანოთ. ჩვენს სტატიაში იმ ყველაფრის შესახებ წაიკითხავთ, რისი გაგებაც გსურდათ, მაგრამ შეკითხვისა გეშინოდათ.

ლონდონი მსოფლიოს რუკაზე ერთ-ერთი იმ პუნქტთაგანია, რომელიც მოგზაურთა გულებში გაურკვეველ ეჭვებსა და შფოთვას იწვევს. მკაცრი მიგრაციის პოლიტიკის გამო ბრიტანეთი სავიზო საკითხს დიდი სიფრთხილით ეკიდება. შედეგად, რეისიდან რეისზე სატრანზიტო ვიზით გადაჯდომისას ორაზროვანი სიტუაცია იქმნება.

სასიხარულო ამბავი ისაა, რომ ვიზა შესაძლოა არც დაგჭირდეთ (მაგრამ ამის იმედი დიდად ნუ გექნებათ), ცუდი ამბავი კი იმაში მდგომარეობს, რომ საბაჟო კონტროლის გავლის უამრავი მოულოდნელი „წყალქვეშა ქვა“ არსებობს. ჩვენ ყველაფერს გიამბობთ, რაც ნისლიანი ალბიონის დედაქალაქში წარმატებული გადაჯდომით ფრენისთვის დაგჭირდებათ.

როგორ შევამოწმო საჭიროა თუ არა ვიზა, თუ ტრანზიტით მივფრინავ?

პირველი კითხვა, რომელიც ტრანზიტით მოგზაურებს უჩნდებათ – საჭიროა თუ არა ვიზა? სრული გარანტიის მისაღებად გირჩევთ ბრიტანეთის მიგრაციის სამსახურის ოფიციალურ ვებ-გვერდზე შეამოწმოთ ინფორმაცია სატრანზიტო რეისების შესახებ.

შემოწმების კიდევ ერთი საშუალებაა – TIMATIC-ზე შეიხედოთ. ეს არის საჰაერო ტრანსპორტის საერთაშორისო ასოციაციის IATA-ს (International Air Transportation Association) ერთიანი საინფორმაციო სისტემა. აქ ყველა წესი სრული ზედმიწევნითა და სიზუსტით არის შეგროვილი მათთვის, ვინც თვითმფრინავით მოგზაურობს. ასე რომ, იმისათვის, რომ კიდევ ერთხელ გადაამოწმოთ სატრანზიტო ვიზის გაფორმების საჭიროება TIMATIC გამოიყენეთ ერთ-ერთ შემდეგ რესურსზე:

• Skyteam;
• IATA;

გახსოვდეთ, არა აქვს მნიშვნელობა რომელ ავტორიტეტულ ფორუმებს, თქვენი ნაცნობების გამოცდილებას თუ საელჩოსგან მიღებულ პასუხებს ეყრდნობით – აეროპორტის თანამშრომელი არ დაგიშვებთ რეისზე სატრანზიტო ვიზის გარეშე, თუკი TIMATIC-ის თანახმად ეს ვიზა გჭირდებათ.

მოვლენების განვითარება ასევე დამოკიდებულია ჩამოფრენის აეროპორტზე: თუ თქვენ მანჩესტერის საერთაშორისო აეროპორტში ან ჰითროუს აეროპორტში ჩამოფრინდებით – ცხოვრება მშვენიერია და ვიზაზე შეგიძლიათ არ იღელვოთ. ამ აეროპორტების დაგეგმარება საშუალებას გაძლევთ ერთი ტერმინალიდან მეორეში ტრანზიტული ზონის დატოვების გარეშე გადახვიდეთ. ამ ტიპის ტრანზიტს airside ეწოდება.

გადაჯდომის მეორე ტიპია – landside-ტრანზიტი. Landside-ტრანზიტისას მგზავრი ტოვებს აეროპორტს და, შესაბამისად, სატრანზიტო ზონას. ამ დროს შეგიძლიათ ქალაქის გაცნობით ტურზე წახვიდეთ: რამდენიმე საათის განმავლობაში შეძლებთ იხილოთ ლონდონის ლეგენდარული ღირსშესანიშნაობები, უკეთ გაერკვეთ ქალაქის ისტორიაში და მისი განსაკუთრებული ატმოსფერო შეიგრძნოთ. ჩვეულებრივ, ასეთ შემთხვევებში სატრანზიტო ვიზა გესაჭიროებათ, მაგრამ შეიძლება არც დაგჭირდეთ, თუ ამ პირობებს დაიცავთ:

• თუ ბილეთი იმ რეისზე გაქვთ, რომელიც თქვენი ჩამოსვლის დღეს ან მომდევნო დღის შუაღამემდე მიფრინავს;
• ჩამოფრინდებით და გაემგზავრებით მხოლოდ თვითმფრინავით;
• თუ საბოლოო დანიშნულების ქვეყანაში ღია ვიზა გაქვთ ან თუ ვიზა არ არის საჭირო, სასტუმროს გადახდის ქვითარი.

მაგრამ გარდა ამისა, თან აუცილებლად უნდა იქონიოთ ერთი-ერთი შემდეგი დოკუმენტი:

• მოქმედი ვიზა ახალ ზელანდიაში, ავსტრალიაში, კანადაში, აშშ-ში და ავიაბილეთი ერთ-ერთ ამ ქვეყანაში;
• ვადაგასული ვიზა კანადაში, ავსტრალიაში, ახალ ზელანდიაში, აშშ-ში, მაგრამ ჩამოთვლილთაგან ერთ-ერთ ქვეყანაში შესვლის მომენტიდან ექვსი თვე ჯერ არ გასულა;
• ირლანდიის რესპუბლიკის მოქმედი ბიომეტრიული ვიზა (შენიშვნებში უნდა იყოს მითითებული „BC“ ან „BC BIVS“), ასევე ირლანდიაში გამგზავრების ავიაბილეთები;
• ირლანდიის მოქმედი ბიომეტრიული ვიზა (შენიშვნებში უნდა იყოს მითითებული „BC“ ან „BC BIVS“), ასევე ირლანდიიდან გამოფრენის დამადასტურებელი ავიაბილეთები – ამასთან, ამ ქვეყანაში შესვლის მომენტიდან სამი თვე ჯერ არ უნდა იყოს გასული;
• ევროკავშირის ერთ-ერთი ქვეყნის ან შვეიცარიის მიერ გაცემული გრძელვადიანი D კატეგორიის ვიზა;
• ბინადრობის მოწმობა ავსტრალიაში;
• ბინადრობის მოწმობა ახალ ზელანდიაში;
• ბინადრობის მოწმობა კანადაში (2002 წლის 28 ივნისის შემდეგ გაცემული);
• ბინადრობის მოწმობა აშშ-ში (2008 წლის 21 აპრილის შემდეგ გაცემული), მათ შორის მოქმედი ვიზა US I-551 Temporary Immigrant Visa (გაითვალისწინეთ, რომ ბრიტანეთის სასაზღვრო კონტროლის თანამშრომლები არ მიიღებენ მითითებულ დოკუმენტს „სველი“ ბეჭდით), permanent residence card (მუდმივი ბინადრობის მოწმობა), ვადაგასული I-551 ბარათი (თანდართული უნდა ჰქონდეს I-797, რომელიც ვადის გაგრძელების საშუალებას იძლევა), აშშ-ს საიმიგრაციო ფორმა 155A/155B (რომელიც შტამპდასმული ყავისფერი კონვერტით უნდა იყოს წარმოდგენილი);
• ბინადრობის მოწმობა შვეიცარიაში ან ევროპის ეკონომიკურ ზონაში შემავალ ნებისმიერ ქვეყანაში;
• დანიშნულების ქვეყანაში შესვლისთვის საჭირო ყველა დოკუმენტის ხელმისაწვდომობა.

მაგრამ ერთი ნიუანსი არსებობს – სავიზო დათმობა არ იძლევა უპრობლემო ტრანზიტის გარანტიას. თუ საბაჟო ოფიცერი საეჭვოდ მიგიჩნევთ, მას შეუძლია დიდ ბრიტანეთში შესვლაზე უარი გითხრათ, რასაც მიგრაციის წესების შეუსაბამობით დაასაბუთებს. ზოგადად კი, თქვენი ბედი ამ მომენტში მთლიანად მის გადაწყვეტილებაზეა დამოკიდებული.

ასევე წაიკითხეთ: 20 ყველაზე საინტერესო ადგილი, რომელიც ლონდონში უნდა იხილოთ

ამიტომ, საბაჟო კონტროლისთვის მოემზადეთ: ზედმეტი არ იქნება თუ სასტუმროს ჯავშანს ამობეჭდავთ თუ ღამისთევით რჩებით, ხოლო გასაუბრების დროს არ არის აუცილებელი გულწრფელად ისაუბროთ იმის შესახებ, რომ სპეციალურად აირჩიეთ გრძელი გადაჯდომა ქალაქის დათვალიერების მიზნით. აეროპორტის ტერიტორიაზე ყოფნის უფლებაზე უარს არ გეტყვიან, მაგრამ ქალაქში გასვლის უფლება შეიძლება არ მოგცენ.

საპასპორტო კონტროლის დროს თქვენ დაგჭირდებათ:

• საზღვარგარეთის პასპორტი;
• რეისებზე ავიაბილეთები შესაბამისი მარშრუტით. მაგალითად, ავიაბილეთები თბილისი-ლონდონი-ტორონტოს მიმართულებით გაცილებით უფრო დამაჯერებელია, ვიდრე თბილისი-ლონდონი-ბერლინის მიმართულებით. დიდი ბრიტანეთის საიმიგრაციო სამსახურის თანამშრომლები აშკარად მიხვდებიან, რომ თქვენ საგანგებოდ აირჩიეთ ასეთი მარშრუტი, რომ ლონდონში გესეირნების საშუალება გქონოდათ;
• დანიშნულების ქვეყნაში მოქმედი ვიზა (საჭიროების შემთხვევაში);
• მთლიანად შევსებული საიმიგრაციო ფორმა (ფორმას კონტროლის წინ მდებარე დახლთან ან ზოგიერთი ავიაგადამზიდის თვითმფრინავზე აიღებთ).

რას ვაკეთებთ?

პირველ რიგში საჭიროა თქვენი მარშრუტის ყველა დაკავშირებულ რეისზე ჩასასხდომი ბარათების ამობეჭდვა.

1. ფრენის წინ რეისზე რეგისტრაციის დროს ავიაკომპანიის თანამშრომელმა შტამპით უნდა დაადასტუროს, რომ ავიაკომპანიას შეკითხვები არ აქვს თქვენს დოკუმენტებთან დაკავშირებით. ამისათვის, მას უნდა აცნობოთ, რომ ტრანზიტით მიფრინავთ, ასევე ლონდონიდან რეისზე ჩასასხდომი ბარათი და ჩასვლის ქვეყნის მოქმედი ვიზა აჩვენოთ.
2. საპასპორტო კონტროლი გაიაროთ და ლონდონში გაფრინდეთ.
3. თვითმფრინავის ბორტზე ჩასასხდომი ბარათი – landing card შეავსოთ.
4. ლონდონში ჩამოფრენისთანავე საპასპორტო კონტროლზე უნდა წარმოადგინოთ პასპორტი, landing card და ლონდონიდან რეისზე ჩასასხდომი ბარათი.
5. მომდევნო რეისზე ჩასხდომისას, თქვენი დანიშნულების ქვეყნის ვიზის არსებობას შეამოწმებენ.

უნდა აღინიშნოს, რომ ყველაფრის მოსაგვარებლად მხოლოდ 24 საათი გაქვთ. 24 საათზე მეტი ხნის განმავლობაში დარჩენისთვის, სატრანზიტო ვიზა გესაჭიროებათ – იგი უფლებას გაძლევთ დიდი ბრიტანეთის ტერიტორიაზე 48 საათის განმავლობაში დარჩეთ.

არსებობს შემთხვევები, როდესაც ვიზა წინასწარ უნდა მიიღოთ. თუ ბრიტანეთის ვიზაზე უარი, დეპორტაცია ან სხვა ქვეყანაში შესვლაზე უარი მიიღეთ, კანონის წინაშე პრობლემები გაქვთ, ან დიდ ბრიტანეთში წინა ვიზიტის დროს სავიზო რეჟიმი დაარღვიეთ – სასაზღვრო კონტროლზე პრობლემების თავიდან აცილების მიზნით სატრანზიტო ვიზა წინასწარ უნდა გააფორმოთ.

მნიშვნელოვანია აღინიშნოს, რომ 2013 წლის გაზაფხულამდე ბევრი „ლოუკოსტ“ ავიაკომპანია, კერძოდ EasyJet, ითვლებოდა point-to-point ავიაკომპანიად, ეს კი მგზავრებს არ აძლევდა 24 საათის განმავლობაში უვიზო შესვლის საფუძველს. დღეის მდგომარეობით სიტუაცია შეიცვალა და ქვეყანაში 24 საათიანი ყოფნის ნებართვა შეგიძლიათ აიღოთ, თუ ზემოხსენებულ პირობებს დაიცავთ, მაგრამ გირჩევთ ამგვარი გადაჯდომების შესახებ ინფორმაცია იმ ავიახაზების ვებ-გვერდზე გადაამოწმოთ, რომლის ბილეთიც გაქვთ შეძენილი.

თუ ჯერ კიდევ გაქვთ შეკითხვები და ეჭვები, ამომწურავ ინფორმაციას ამ რესურსებზე იხილავთ:

• საჰაერო ტრანსპორტის საერთაშორისო ასოციაცია (IATA) – აქ იპოვით ყველაფერს, რაც უნდა იცოდეთ გადაჯდომით მგზავრობის, სატრანზიტო ზონების, სავიზო მოთხოვნებისა და სხვადასხვა აეროპორტის სპეციფიკის შესახებ;
• TIMATIC – ეს არის საერთაშორისო მონაცემთა ბაზა ავიაკომპანიებისთვის და სასაზღვრო სამსახურებისთვის, რომლის საფუძველზეც მიიღება გადაწყვეტილება კონკრეტული მგზავრის ქვეყანაში შეშვების შესახებ. რესურსზე წვდომა ფასიანია, ამიტომ თქვენს განკარგულებაშია მხოლოდ დემო-ვერსია.
• KLM ავიაკომპანიის ვებ-გვერდი – სპეციალური ფორმის შევსებით აქ მიიღებთ ინფორმაციას ნებისმიერი ქვეყნის სავიზო მოთხოვნების შესახებ.

Unfortunately we don't have actual data for flights from Kutaisi to London. Find tickets from Kutaisi to London