ფილმები მოგზაურობაზე

TOP-7 ყველაზე საინტერესო ფილმი მოგზაურობის შესახებ

რატომ გვიყვარს ფილმები მოგზაურობის შესახებ? იმიტომ, რომ გარკვეული დროით ჩვენ თავად მათთან ერთად ვეშვებით თავგადასავლების სამყაროში. იმიტომ, რომ ფილმი მოგზაურობის შესახებ – ყოველთვის მრავალმხრივი ისტორიაა, რომლებიც არა მხოლოდ მშვენიერი პეიზაჟების შესახებ, არამედ, უპირველეს ყოვლისა, იმ საოცარი ცვლილებების შესახებაა, რომლებითაც ადამიანს ასაჩუქრებს მოგზაურობა მსოფლიოს გარშემო. ყველა იმ ადამიანისთვის, ვინც ამ ზაფხულში უკვე იმყოფებოდა შვებულებაში, ან ვინც ჯერ კიდევ მოლოდინშია, Aviabiletebi.org-მა შეადგინა ყველაზე საინტერესო ფილმების სია მოგზაურობის შესახებ, რომლებიც თქვენში ახალი შთაბეჭდილებების წყურვილს „გააღვიძებს“.

„ველურ პირობებში“ (2007 წ.), რეჟ. შონ პენი

თითოეულ ჩვენგანს ერთხელ მაინც თავის ცხოვრებაში სურდა მიეტოვებინა ყველაფერი, დამშვიდობებოდა ყველაფერს, რაც მის ცხოვრებას ამძიმებს და უგზო-უკვლოდ წასულიყო. მრავალი მეოცნებისგან განსხვავებით, კრისტოფერ მაკ-კენდლესი სწორედ ასე მოიქცა: კოლეჯში სწავლის დასრულების შემდეგ, მან დატოვა მთელი თავისი ქონება, წლების განმავლობაში დაგროვილი 24 000 დოლარი საქველმოქმედო ფონდს შესწირა და სრულ მარტოობაში გაემგზავრა ალასკაზე. მან ჩასვლა „ავტოსტოპით“ გადაწყვიტა, რომელიც არა მხოლოდ თავგადასავლების ერთგულ გენერატორს, არამედ საინტერესო ადამიანების გაცნობის შესაძლებლობას წარმოადგენს.

კრისტოფერს (ან, როგორც თავის თავს უწოდებდა „ალექს სუპერმაწანწალას“) გზად სხვადასხვა თანამგზავრი შეხვდება, რომლებიც არ იყვნენ შემთხვევითი ადამიანები. ყველა მათგანმა, ასე თუ ისე, დატოვა კვალი მის ცხოვრებაზე, აზრებსა და მისწრაფებებზე. მან შეძლო წარმოუდგენელი თავისუფლება ეგრძნო. და რაც ყველაზე აღსანიშნავია – ფილმი რეალურ მოვლენებზეა დაფუძნებული, რომლის გმირს რეალური პროტოტიპი ჰყავს.

მიღებულ შთაბეჭდილებას ავსებს ბუნების პეიზაჟები, რომლებიც კიდევ უფრო მეტად გაგიღვიძებთ სურვილს ზურგჩანთა მხრებზე მოიგდოთ, დაივიწყოთ ყველაფერი და თავგადასავლების საძიებლად გაემართოთ.

„ველური“ (2014 წ.), რეჟ. ჟან-მარკ ვალე

სასოწარკვეთილი მოგზაურების როლში ყველას მხოლოდ მამაკაცები წარმოუდგენია, მაგრამ აქ ჩვენს წინაშე წარსდგება სულით ძლიერი, გაბედული შერილი, რომელიც დამოუკიდებლად გაემგზავრა წყნარი ოკეანის ქედის გასწვრივ 3 თვიან სახიფათო მოგზაურობაში. იგი ავდარში მარტო გაივლის ტყეებს, მდინარეებს, ჩანჩქერებსა და უდაბნოებს, ავა მაღალ კლდეებზე და დაძლევს თავის შიშებს. და მოგონებებს.

და დასაძლევი მართლაც ბევრი აქვს. რა არ ყოფილა შერილის ცხოვრებაში: წარუმატებელი ქორწინება და დედის გარდაცვალება, ნარკოტიკებთან ბრძოლა, უეცარი ორსულობა… და ამ ტვირთით გულზე და აღჭურვილობით მხრებზე, იგი სამოგზაუროდ მიემგზავრება.

ეს ისტორიაც რეალურ მოვლენებზეა დაფუძნებული, ფილმი გადაღებულია წიგნის საფუძველზე „ველური. სახიფათო მოგზაურობა, როგორც საკუთარი თავის პოვნის საშუალება“, რომელიც თავად შერილ სტრეიდმა დაწერა.

„მატარებელი დარჯილინგის მიმართულებით. შეუპოვარი მოგზაურები“ (2007 წ.), რეჟ. უეს ანდერსონი

მამის გარდაცვალებიდან მათ ერთი წლის განმავლობაში კავშირი არ ჰქონიათ ერთმანეთთან. და აი, სამი ძმა აღმოჩნდა მატარებელში, რომელიც ინდოეთისკენ მიემართება, სადაც ისინი დედის პოვნას შეეცდებიან. დიახ, ისინი ცოტა უცნაურები და სრულიად განსხვავებულები არიან, როგორც გარეგნულად, ისე ხასიათით, ხშირად ილანძღებიან, ჩხუბობენ, კამათობენ, მაგრამ გზაში მათ მაინც მოუწევთ როგორმე იპოვონ საერთო ენა. ისინი სხვადასხვა ვითარებაში მოხვდებიან, მათ ურიცხვი ნარინჯისფერი ჩემოდნების თრევა და კისერზე ხასხასა ფერების ყვავილების ტარება მოუწევთ, ისინი ინდოეთს შეიცნობენ, მასთან ერთად კი ერთმანეთს.

ფილმი ცოტათი სევდიანია, მაგრამ მხიარული მომენტებიც საკმაოდაა, ცოტა მელანქოლიური, მაგრამ ამავდროულად ძალიან კეთილი და მრავალი რამის ახლებურად გააზრებას გაიძულებთ. თუმცა, სხვაგვარად არც შეიძლება ყოფილიყო, თუ რეჟისორი უეს ანდერსონია! ფილმი გვასწავლის, რომ მოგზაურობა არის შესაძლებლობა არა მხოლოდ სხვაგვარად შევხედოთ ცხოვრებას, არამედ მნიშვნელოვან, საჭირო ადამიანებთან დაახლოების შესანიშნავი გზაა.

„გზა“ (2010 წ.), რეჟ. ემილიო ესტევესი

ტომ დენიელის ვაჟი სალოცავად გაემართება წმინდა იაკობის გზით (The Camino de Santiago), მაგრამ მოგზაურობის დასაწყისშივე დაიღუპება საშინელი შტორმის დროს. ტომი შვილის ცხედრის გადმოსასვენებლად გაემგზავრება და საკუთარი თავისთვის მოულოდნელად, ჩამოყალიბებული მამაკაცი, ექიმი კალიფორნიიდან და თანაც არცთუ ახალგაზრდულ ასაკში გადაწყვეტს, რომ დენიელის ნაცვლად მთელი გზა ფეხით გაიაროს. ეს კი არც მეტი, არც ნაკლები 800 კილომეტრია.

მისი გრძელი მოგზაურობა სავსეა სასაცილო, უცნაური შემთხვევებით, ზოგჯერ კი ნამდვილი ხათაბალით. მაგრამ ამ თავგადასავლებისა და დაბრკოლების დროს იგი პოულობს სამ შემთხვევით თანამგზავრს, რომლებიც მისთვის ნამდვილი მეგობრები გახდნენ – იუსტას ამსტერდამიდან, სარას კანადიდან და ჯეკს ირლანდიიდან. თითოეულ მათგანს თავისი მიზეზი ჰქონდა, რომ ეს გზა გაევლო, მაგრამ ფინიშთან ატლანტის ოკეანის სანაპიროზე ისინი ერთად მივლენ. მოგზაურობისას კი მათ შეძლეს ბევრად უფრო მეტი ეპოვათ, ვიდრე გზის დასაწყისში მოელოდნენ.

„უოლთერ მიტის წარმოუდგენელი ცხოვრება“ (2013 წ.), რეჟ. ბენ სტილერი

ფილმი, რომელიც გაიძულებთ ირწმუნოთ, რომ ყველაზე მოკრძალებული, მაგრამ ასეთი სანუკვარი ოცნებებიც კი აუცილებლად უნდა ახდეს. უოლთერი რთული ცხოვრებით ცხოვრობს, მაგრამ ოცნება – სწორედ ისაა, რაც მას ცხოვრების გაგრძელებას აუძულებს. თავის სურვილებში იგი ხან მოგზაურია, ხანაც კოსმონავტი, სინამდვილეში კი – მხოლოდ ილუსტრატორი ჟურნალში. მაგრამ უცებ ჭორი ვრცელდება, რომ ჟურნალის მომდევნო ბეჭდური გამოცემა ბოლო იქნება.

ბოლო ყდაზე განსათავსებელი ნათელი, საოცარი ფოტოს საძიებლად უოლთერი ხანგრძივი მოგზაურობით გაემგზავრება გრენლანდიაში, ისლანდიაში, ჰიმალაიებში, სადაც მისი ოცნებები ბოლოს და ბოლოს ახდება. ფილმი, რომელიც გამბედაობას გვასწავლის, რომ არა მხოლოდ მოურიდებლად შეგვიძლია ვიოცნებოთ, არამედ ჩვენი ჩანაფირებიც უნდა განვახორციელოთ.

„მოგზაურობის ხელოვნება“ (2008 წ.), რეჟ. ტომას ვილანი

ფილმის მთავარი გმირი თითქოს გვეუბნება: „კეთილი იყოს თქვენი მობრძანება სპონტანურობისა და თავისუფლებისმოყვარეობის სამყაროში!” ეს არის კიდევ ერთი ისტორია ადამიანზე, რომელიც არ შეშინდა რაღაც შეეცვალა თავის ცხოვრებაში და თავგადასავლების საძიებლად გამგზავრებულიყო. კონორი 19 წლისაა, იგი უნივერსიტეტში ჩაბარებას აპირებდა, აპირებდა დაქორწინებას იმ გოგონაზე, რომელსაც არაერთი წელი ხვდებოდა, მაგრამ მოულოდნელად თავისთვის და ოჯახისათვის გადაწყვეტს ბედის მატარებლი სხვა მიმართულებით მიმართოს და გაემართება მოგზაურობაში ცენტრალურ ამერიკაში.

ნიკარაგუას რესპუბლიკა, უძველესი მაჩუ-პიკჩუ, დარიენის ყურის სახიფათო ჯუნგლები, პერუ, კოლუმბია, ბოლივია და ტბა უიუნი, პანამა… ფილმი სავსეა მოვლენებითა და მოულოდნელი გარდატეხით, ნათელი პეიზაჟებითა და ცვლილებების წყურვილით. აგრეთვე ისტორიებით მეგობრობისა და სიყვარულის შესახებ, რომელსაც ასევე შეიძლება სპონტანურად შეხვდეთ გზად.

„ვიკი, კრისტინა ბარსელონა“ (2008), რეჟ. ვუდი ალენი

/ეს ქალაქი რომანტიკით სავსეა. ჩვენ ცოცხლები ვართ. განა ეს ცოტაა?/

კინოს დიდებული გენიოსი ვუდი ალენი ყველას იწვევს ბარსელონაში რომანტიკულ მოგზაურობაში გასამგზავრებლად მომხიბლავ გმირებთან – ვიკისთან და კრისტინასთან ერთად. ეს ყველაფერი კი იმით დაიწყო, რომ ორი ამერიკელი ქალი ბარსელონაში ჩაფრინდა არდადების გასატარებლად. ბუნებრივია, რომ ქალაქმა ისინი მოხიბლა თავისი ატმოსფეროთი და არქიტექტურით. მაგრამ ისინი ასევე მოხიბლა მხატვარმა ვინმე ანტონიომ, რომელსაც, როგორც გაირკვა, ჰყავს მეუღლე.

ეს სურათი თითქოს ბარსელონადან გამოგზავნილი რომანტიკული ღია ბარათია, რომელიც გვაცნობს ქალაქის ხასიათსა და განწყობას, ისევე როგორც მის ძალიან ემოციურ მაცხოვრებლებს. გასაკვირი არ არის, რომ მისი ნახვის შემდეგ, ბევრს სურს ბარსელონაში გამგზავრება, მის პატარა ქუჩებსა და კვარტლებში დაკარგვა და საკუთარი წარმოუდგენელი ისტორიის შექმნა.

P.S. ეს, რა თქმა უნდა, არ არის მოგზაურობის შესახებ ყველა საყურადღებო ფილმის სრული ჩამონათვალი. და ჩვენ გავაგრძელებთ თქვენთვის საინტერესო ფილმების შერჩევას.

Posted in ბლოგი, ფილმები მოგზაურობაზე and tagged , .