სკუტერი პიზა

იტალიაში შაბათ-კვირას: TOP 5 ქალაქი ხანმოკლე მოგზაურობისთვის

იტალია – დიდი და მრავალფეროვანი ქვეყანაა. იმისათვის, რომ იგი კარგად გაიცნოთ შეიძლება მთელი წელი, ან იქნებ რამდენიმეც კი დაგჭირდეთ. და რა მოხდება, თუ მხოლოდ რამდენიმე დღე გაქვთ? პლაჟის დასვენებისთვის ეს ცოტა დროა, რომში ან ფლორენციაში შაბათ-კვირის გასატარებლად – აშკარად არასაკმარისია იმისათვის, რომ გარშემო ყველაფერი მოიაროთ და დაათვალიეროთ… მაგრამ კომპანიამ Aviabiletebi.org  იტალიის 5 თქვენთვის საინტერესო ქალაქი შეარჩია, რომელთა მონახულებაც შეგიძლიათ  თუ დასასვენებლად მხოლოდ რამდენიმე დღე გაქვთ.

პიზა

ქალაქი, რომელიც მთელს მსოფლიოში არქიტექტურული სასწაულის წყალობითაა ცნობილი – პიზის კოშკით, სამრეკლოთი, რომელიც ყველა მოგზაურმა უნდა „გადაარჩინოს“ დაცემისგან, თუნდაც ფოტოზე. სწორედ ამ მიზნით ჩამოდის აქ ბევრი მოგზაური, მაგრამ ქალაქი  სხვა საინტერესო ადგილებითაც მდიდარია და გირჩევთ ამ ქალაქს რამდენიმე დღით ეწვიოთ.

ხანგრძლივი ისტორიის მანძილზე, პიზამ რამდენიმე სახელმწიფო და მმართველი შეიცვალა, მაგრამ ამავდროულად  თავისი სული და განძეული შეინარჩუნა, რაც ძირითადად ეკლესიებისა და ტაძრებისგან შედგება, რომლებიც თავად არიან არქიტექტურული შედევრები. წმინდა იოანეს ბაპტისტერია, დუომოს ტაძარი, სანტა-მარია-დელა-სპინას ეკლესია, სანტ-ფრედიანო, სან-ფრანჩესკო-დეი-ასიზი, სანტა-კატერინა და მრავალი სხვა თავისი სილამაზით მოგაჯადოებთ.

პიზა სტუდენტების ქალაქია, სწორედ აქ ჩამოდის ათობით ათასი ახალგაზრა მთელი იტალიიდან და არა მხოლოდ იტალიიდან. ისინი ქალაქის მოსახლეობის 60%-ზე მეტს შეადგენენ. და როგორც უკვე მიხვდით, პიზაში სულაც არ არის მოსაწყენი ცხოვრება, რადგან ახალგაზრდები რეგულარულად უამრავ გასართობს  აწყობენ: კონცერტები, თეატრალური წარმოდგენები, წვეულებები და ფესტივალები ქალაქის დიდ მოედნებზე, ისევე როგორც მდინარე არნოს გასწვრივ. და თუ  ყველაფრისგან გადაიღალეთ, სიწყნარისა და სიმშვიდისთვის პარკებს ან პიზის ცნობილ, მსოფლიოს უძველეს ბოტანიკურ ბაღს ეწვიეთ.

ასევე დროის დათმობას და ყურადღებას იმსახურებს პიზის გალერეები, მუზეუმები და სასახლეები. მათთვის, ვისაც უფრო მეტის გაგება სურს ქალაქის ტაძრებისა და ეკლესიების ისტორიის შესახებ, ვურჩევთ ეწვიონ – მუზეუმს ოპერა-დელ-დუომო, ხელოვნებისა და ფერწერის მოყვარულებს –  Museo della Grafica, ხოლო მეცნიერების თაყვანისმცემლები აუცილებლად უნდა ეწვიონ პიზის უნივერსიტეტს და მასთან არსებულ 5 საინტერესო მუზეუმს. და არ დაგავიწყდეთ სასახლე ტოსკანელი, სადაც ჯორჯ ბაირონმა ოდესღაც თავისი „დონ ჟუანი“ დაწერა, ისევე როგორც სამეფო სასახლე პალაცო რეალე, პალაცო ლანფრანჩი და სასახლე აგოსტინი.

განთვასების ღირებულებაა: 3* –  50 ევროდან, 5* – 100 ევროდან.

ვერონა

ვერონას ტყუილად როდი უწოდებენ  „პატარა რომს“, რადგან თუ ამ ქალაქში თუნდაც რამდენიმე დღით მოხვდით, მთელი იტალიის შეგრძნებას და გაგებას შეძლებთ.  მაგალითად,  ქვაფენილით მოპირკეთებულ პატარა ქუჩებში და დიდ მოედნებზე გაისეირნეთ, უძველეს არენა დი ვერონას და რომაული თეატრის წარმოდგენებს დაესწარით, სან-ძენო-მაჯორეს არაჩვეულებრივი ბაზილიკა იხილეთ ან ჯუსტის ბაღის მწვანე ლაბირინთებში გაისეირნეთ.

შექსპირის წყალობით, ვერონას შეყვარებულთა მსოფლიო დედაქალაქის სტატუსი მიენიჭა, რადგან სწორედ მის ქუჩებში მოხდა უკვდავი სიყვარულის ისტორია რომეოსა და ჯულიეტას სიყვარულის შესახებ. ადგილობრივი მოსახლეობა დღემდე რეგულარულად აწყობს კონცერტებს,  შექსპირის ნაწარმოებების კითხვას და თეატრალურ დადგმებს ჯულიეტას სახლთან, აგრეთვე ქალაქის მასშტაბით თემატურ ექსკურსიებს.

ვერონა იუნესკოს მსოფლიო მემკვიდრეობის ძეგლთა დაცვის სიაშია შეტანილი, და ქალაქში ჩამოსვლის შემდეგ თქვენ მიხვდებით რატომაც. აუცილებლად ეწვიეთ ძველ ციხესიმაგრეს კასტელვეკიოს, მდინარე ადიჯეს გასწვრივ გაისეირნეთ, რომელსაც უძველესი თაღოვანი ხიდები ამშვენებს, ლამბერტის კოშკზე ადით და ქალაქის ულამაზესი ხედებით დატკბით ჩიტის ფრენის სიმაღლიდან, ასევე ქალაქის ტაძრები და ბაზილიკა მოინახულეთ. და, რა თქმა უნდა, მუზეუმები. ისინი ვერონაში უხვადაა: თანამედროვე ხელოვნების მუზეუმი, ფოტოგრაფიის მუზეუმი, ლაპიადრიუმი, არქეოლოგიური მუზეუმი და სხვ. ვერონას ნებისმიერი მუზეუმის შესახებ აქ შეგიძლიათ მიიღოთ ინფორმაცია.

განთავსების ღირებულებაა: 3* –  50 ევროდან, 5* – 180 ევროდან.

ტურინი

ტურინში უამრავი მსოფლიოში ცნობილი მუზეუმია  განთავსებული. აქ არის ეგვიპტური მუზეუმი, რომელიც ძველი ეგვიპტის მემკვიდრეობის ყველაზე დიდ კოლექციას ფლობს მთელს ევროპაში (უფრო დიდიც კია, ვიდრე თავად ეგვიპტეში); და კინოს ეროვნული მუზეუმი – სადაც კინოლენტის ფორმის კიბეები და უნიკალური კინოდარბაზია, რომლის სავარძლები თავად გკარნახობენ თუ რომელი ფილმი ნახოთ (თუ დასხდებით – სერიოზულ ფილმს, დრამას ნახავთ, თუ წამოწვებით – ფილმს სიყვარულის შესახებ), და ასევე საინტერესო ინტერაქტიული დარბაზები; საავტომობილო მუზეუმი, სადაც ექსპოზიციაში ყველაფერია თავმოყრილი, ძველი ხის ოთხთვალებიდან დაწყებული ფორმულა-1-ის ბოლიდებით დასრულებული; აგრეთვე მარიონეტების მუზეუმი, კრიმინალის მუზეუმი, სამთო მუზეუმი და სხვა.

ტურინი ასევე  ევროპის ბაროკოს დედაქალაქად მიიჩნევა, რადგან ამ ქალაქში განთქმული ეპოქის სასახლეების, ციხეებისა და ნაგებობების შთამბეჭდავი რაოდენობაა შენარჩუნებული. სამეფო სასახლე, პალაცო მადამა, ვალენტინოს ციხესიმაგრეპალაცო კარინიანო, და მრავალი სხვა უამრავ სტუმარს და ქალაქის მაცხოვრებელს აღაფრთოვანებს გარე ფასადისა და შიდა  მორთულობის სილამაზით.

იტალიის ერთ-ერთი მთავარი ღირსშესანიშნაობა – სამზარეულოა, და რომელ ქალაქშიც არ უნდა მოხვდეთ, თქვენ შესაძლებლობა გექნებათ ამაში თავად დარწმუნდეთ. ტურინში ყოფნის დროს. რომელმაც მსოფლიოს რიზოტო აჩუქა, თქვენ უბრალოდ ვალდებული ხართ ეს სასარგებლო და გემრიელი კერძი დააგემოვნოთ, უმჯობესია ტურისტული ცენტრისგან მოშორებულ ადგილებში.

თუ ტურინში რამდენიმე დღის მანძილზე  რაღაც საოცარი ხერხით  ყველა საინტერესო ადგილის მონახულებას შეძლებთ და კიდევ დრო დაგრჩებათ, მოგზაურობა ქალაქის შემოგარების დათვალიერებით დაასრულეთ – ცნობილ სამეფო რეზიდენციებში, ან  ერთი დღით ალპებში გაემგზავრეთ, რადგან ქალაქი სწორედ მთის ძირში მდებარეობს.

განთავსების ღირებულებაა: 3* –  45 ევროდან, 5* – 180 ევროდან.

ლუკა

თუ თქვენ ეძებთ ადგილს იტალიაში, სადაც შაბათ-კვირას სასიამოვნოდ და საინტერესოდ გაატარებთ, ჩათვალეთ, რომ უკვე იპოვეთ – ქალაქ ლუკაში გაემგზავრეთ. ეს პატარა, მაგრამ შთამბეჭდავი ისტორიის, ულამაზესი არქიტექტურისა და შესანიშნავი რესტორნების მქონე ქალაქია.

დღემდე ლუკაში უძველესი ციხესიმაგრის კედლებია შემონახული, რომლებიც ქალაქის ცენტრალურ ნაწილს აკრავს გარს და შუა საუკუნეების აუწერელ ატმოსფეროს ინარჩუნებს. მას ქალაქის  მრავალი ტაძარი და ბაზილიკა ავსებს: წმინდა მარტინის საკათედრო ტაძარი, წმინდა ფრიდიან ლუკას ბაზილიკა, სან-მიკელე-ინ-ფოროს ბაზილიკა, სან-ჯოვანის ეკლესია და მრავალი სხვა.

ნამდვილ ვიზუალურ აღფრთოვანებას იწვევს ლუკა გაზაფხულზე, როდესაც ამწვანებულია ხეები, იფურჩქნება ყვავილები და ქალაქში ფეხით სეირნობა ერთი დიდი სიამოვნებაა. თუ ესეც გეცოტავებათ, ბოტანიკურ ბაღს ან პფანერის სასახლეს ეწვიეთ, რომელიც თავისი ულამაზესი ფასადის გარდა  შესანიშნავი ბაღით გასიამოვნებთ.

ლუკას მშიერი ნამდვილად ვერ დატოვებთ – ათობით რესტორანი ტოსკანას სამზარეულოთი მიგიზიდავთ და თითოეულ მათგანს თავისი ისტორია აქვს. რადგან ლუკა პატარა, პროვინციული ქალაქია, შეგიძლიათ საკუთარი თავი ნატურალური,  ფერმერთა პროდუქტებით გაანებივროთ.

განთავსების ღირებულებაა: 3* –  60 ევროდან, 5* – 200 ევროდან.

პადუა

კიდევ ერთი პატარა, მაგრამ თვალწარმტაცი ქალაქი, რომელსაც აუცილებლად რამდენიმე დღით უნდა ეწვიოთ – ეს არის პადუა. იგი  ვენეციის მახლობლად მდებარეობს და, სხვათა შორის, რამდენიმე მდინარის არხი და ხიდი აქვს არსენალში.

პადუა უძველესი იტალიური ქალაქია, ვიწრო ქვაფენილით მოპირკეთებული ქუჩებით, პატარა ძველი სახლებით, ბაღებით, გემოვნებიანი კაფეებითა და რესტორნებით და დიდი ხმაურიანი მოედნებით. პადუა ცნობილია იმ ფაქტით, რომ აქ ცხოვრობდა (და დღესაც განისვენებს) ქალაქის მფარველი – წმინდა ანტონი, აქ ასევე ჯოტოს წარმოუდგენელი ფრესკები შეგიძლიათ იხილოთ და ათეულობით უნიკალური არქიტექტურული ანსამბლით დატკბეთ.

ქალაქის შედარებით მოკრძალებული ზომის მიუხედავად, სწორედ პადუაში მდებარეობს  იტალიის ყველაზე დიდი, და შეთავსებით ასევე ძალიან ლამაზი მოედანი – პრატო-დელა-ვალე. ეს არის ნამდვილი მწვანე ოაზისი ქალაქის ცენტრში, გარშემორტყმული ხიდებიანი არხებითა და 76 ქანდაკებით. შაბათ-კვირას და სადღესასწაულო დღეებში აქ ყოველთვის ხმაური და მხიარულებაა, ეწყობა ბაზრობები და კონცერტები.

განსაკუთრებულ ყურადღებას პადუას ტაძრები და ბაზილიკები იმსახურებს, რომელთა მონახულებაც ნამდვილად ღირს: წმინდა იუსტინას ბაზილიკა, კაპელა სან-ფელიჩე, წმინდა ანტონის ბაზილიკა და კაპელა სან-ჯორჯიო, კაპელა ოვერტარი, ორატორიუმი სკუოლა-დელ-სანტო, კაპელა სკროვენი და მრავალი სხვა.  გარე სილამაზის გარდა, აღსანიშნავია, რომ მათი შიდა კედლები ცნობილი იტალიელი ოსტატების ფრესკებითაა მოხატული: ჯოტო, ტიციანი, პაოლო ვერონეზე.

და არ დაგიწყდეთ ეწვიოთ პადუას უნივერსიტეტს, მის ბოტანიკურ ბაღსა და სამუზეუმო კომპლექსს ერემიტანი. პადუაში გატარებული დღეები ნამდვილად დატვირთული იქნება.

განთავსების ღირებულებაა: 3* –  45 ევროდან, 4* – 75 ევროდან.

 

თეგები: , , , , , , , ,

მოძებნე ავიაბილეთი

შენთვის სასურველი მიმართულებით საუკეთესო ფასად

Leave a Comment

მობილური აპლიკაცია

მოიძიეთ და დაჯავშნეთ იაფი ავიაბილეთები პირდაპირ თქვენი სმარტფონებიდან, მიიღეთ უფრო მეტი სიამოვნება თქვენი მომავალი დასვენებისთვის.

გადმოწერა