მალდივის კუნძულები

რომელი საერთაშორისო მიმართულებები იხსნება ტურისტებისთვის?

(CNN) – მიუხედავად იმისა, რომ მთავრობების უმეტესობა მოქალაქეებს მოუწოდებს თავი შეიკავონ „არააუცილებელი“ საერთაშორისო მოგზაურობებისგან, ბევრი პოპულარული მიმართულება იწყებს Covid-19-ის გამო დაწესებული შეზღუდვების შემსუბუქებას და ტურისტების მიღებას.

ამ თვის დასაწყისში ევროკავშირმა წარადგინა სამოქმედო გეგმა ზაფხულის პერიოდში შიდა საზღვრების გახსნასთან დაკავშირებით, ხოლო ესტონეთის, ლატვიის და ლიტვის ქვეყნებმა ე.წ. „სამოგზაურო ბუშტები“ (“travel bubbles”) შექმნეს და ერთმანეთის მოქალაქეებისთვის დაწესებული შეზღუდვები მოხსნეს.

ივნისში უცხოელი ვიზიტორების მიღებისთვის ემზადება კარიბის მრავალი კუნძული, ასევე მომდევნო კვირებში რეგიონების გახსნას გეგმავს მექსიკა და ტაილანდი.

თუ თქვენ ერთ-ერთი ხართ იმ მრავალ მოგზაურს შორის, რომელიც მოუთმენლად ელოდება სიახლეებს იმის შესახებ თუ სად შეუძლია იმოგზაუროს წელს, გთავაზობთ იმ ძირითადი მიმართულებების გზამკვლევს, რომლებიც საზღვრების გახსნას გეგმავს, ისევე როგორც იმ მიმართულებებისა, რომელთა საზღვრები ჯერ კიდევ ჩაკეტილი რჩება.

კვიპროსი

კვიპროსმა განაცხადა, რომ დაფარავს იმ ტურისტებისა და მათი ოჯახების ხარჯებს, რომელებიც COVDI-19-ით დაინფიცირდებიან.

კვიპროსი დაინტერესებულია ტურიზმის ინდუსტრიის ჩვეულ კალაპოტში დაბრუნებით, ხელისუფლება გვთავაზობს, რომ დაფარავს ყველა იმ მოგზაურის ხარჯებს, ვინც COVDI-19-ით ხმელთაშუა ზღვის კუნძულოვან ქვეყანაში დასვენების დროს დაინფიცირდება.

CNN-ისთვის გადაცემული წერილის თანახმად, კვიპროსის მთავრობა იმ ტურისტების საცხოვრებლის, საკვების, სასმელისა და მედიკამენტების ხარჯებს დაფარავს, რომლებიც კორონავირუსით ვიზიტის დროს დაინფიცირდებიან.

დეტალური გეგმა მოცემულია ხუთგვერდიან წერილში, რომელიც მთავრობებს, ავიაკომპანიებსა და ტურ-ოპერატორებს 26 მაისს გადაეცა.

ხელისუფლების მიერ უცხოელი მოგზაურებისთვის გამოყოფილი იქნება 100-ადგილიანი საავადმყოფო, ხოლო 500-ადგილიანი „საკარანტინე სასტუმრო“ ხელმისაწვდომი იქნება პაციენტთა ოჯახებისთვისა და „ახლო კონტაქტებისთვის“.

 „მოგზაურს მხოლოდ აეროპორტში ტრანსფერისა და სამშობლოში დასაბრუნებლად ფრენის ხარჯების დაფარვა მოუწევს, აგენტთან და/ან ავიაკომპანიასთან თანამშრომლობით“, – ნათქვამია წერილში.

ახალი ამბავი მას შემდეგ გავრცელდა. რაც კვიპროსის ტრანსპორტის მინისტრმა იანის კარუსოსმა განაცხადა, რომ ქვეყანაში სასტუმროები 1 ივნისს გაიხსნება, ხოლო საერთაშორისო ფრენები 9 ივნისიდან აღდგება.

როგორც კი აღნიშნული მიმართულება გაიხსნება, ქვეყანაში შესვლა მხოლოდ შერჩეული ქვეყნებიდან ვიზიტორებს შეეძლებათ.

მთავრობამ იმ ქვეყნების სია გამოაქვეყნა, რომელთაც კვიპროსზე შესვლა ორ ცალკეულ ეტაპად შეეძლებათ.

პირველ რიგში დაიშვება ფრენები შემდეგი ქვეყნებიდან: საბერძნეთი, მალტა, ბულგარეთი, ნორვეგია, ავსტრია, ფინეთი, სლოვენია, უნგრეთი, ისრაელი, დანია, გერმანია, სლოვაკეთი და ლიტვა.

20 ივნისიდან კვიპროსი ასევე დაუშვებს ფრენებს შვეიცარიიდან, პოლონეთიდან, რუმინეთიდან, ხორვატიიდან, ესტონეთიდან და ჩეხეთიდან.

სიაში არ შედის დიდი ბრიტანეთი და აშშ, რომლებიც Covid-19-ით გარადაცვლილთა ყველაზე მაღალი რიცხვის მქონე ქვეყნებს შორისაა.

თუმცა სია გაფართოვდება და მომდევნო თვეებში დამატებით 23 ქვეყანა შევა.

კვიპროსზე მოგზაურმა ტურისტებმა უნდა წარმოადგინონ მოქმედი სერტიფიკატი, რომელიც ადასტურებს, რომ მათ Covid-19-ის ტესტზე უარყოფითი პასუხი აქვთ, ჩამოსვლისთანავე კი ისინი თერმოსკრინინგს, ხოლო მოგზაურობის დროს შემთხვევით შემოწმებას გაივლიან.

ქვეყანაში უკვე მიღებულია ზომები მოგზაურებისა და მაცხოვრებლების დასაცავად, მაგალითად, სასტუმროს პერსონალს ნიღბები და ხელთათმანები უნდა ეკეთოს, აუცილებელია შეზლონგების რეგულარული დეზინფექცია, რესტორნებში, ბარებში, კაფეებსა და პაბებში კი მაგიდებს შორის სულ მცირე ორმეტრიანი დისტანციის დაცვა.

ტურიზმი კვიპროსის ეკონომიკის მინიმუმ 15% -ს შეადგენს.

ბალი

2019 წელს ბალის სულ მცირე 6.3 მილიონი ადამიანი ეწვია.

ბალიმ ასევე მოახერხა კორონავირუსის გავრცელების შეფერხება, რასაც ადასტურებს 350-ზე ნაკლები დადასტურებული შემთხვევა და სტატიის გამოქვეყნების დროისთვის, სულ ოთხი ადამიანის გარდაცვალების შემთხვევა.

ამჟამად ინდონეზიის კუნძული იმედოვნებს, რომ ტურისტებს ოქტომბრის თვისთვის მიიღებს, იმ პირობით, რომ მისი ინფიცირების მაჩვენებელი დაბალი დარჩება.

მინისტრის მდივნის, ნი ვაიან გირი ადნიანის განცხადებით, ჯოკიაკარტა, რომელიც კუნძულ იავაზე მდებარეობს, რიაუს კუნძულების პროვინციასთან ერთად სავარაუდოდ ერთ-ერთი პირველი გაიხსნება.

ბალის ეკონომიკა დიდწილად ტურიზმზეა დამოკიდებული, ბოლო წლების განმავლობაში ვიზიტორთა რიცხვი იზრდებოდა, მაგალითად 2019 წელს მას დაახლოებით 6.3 მილიონი ადამიანი ეწვია.

„კორონავირუსმა ბალის ეკონომიკა გაანადგურა… იგი მკვეთრად დაეცა [მარტის შუა რიცხვებიდან], როდესაც სოციალური დისტანციის დაცვის ვალდებულება დაწესდა,” – აპრილში ABI News-ს განუცხადა მანგკუ ნიომან კანდიამ, ბალის ტურისტულმა გიდმა. „არ არის ტურისტი, არ არის ფული.“

ამჟამად ინდონეზიის დატოვება ეკრძალება ყველა უცხო ქვეყნის მოქალაქეს, გარდა დიპლომატებისა, მუდმივი მაცხოვრებლებისა და ჰუმანიტარული მუშაკებისა, ხოლო კუნძულზე ჩასულმა ნებისმიერმა პირმა უნდა ჩააბაროს ტესტი და წარმოადგინოს წერილი, რომელიც ადასტურებს, რომ იგი Covid-19-ით ინფიცირებული არ არის.

გაურკვეველია თუ რა მოთხოვნები იქნება ქვეყანაში შესვლაზე, თუკი შეზღუდვები ამ წლის ბოლოს, უფრო მოგვიანებით მოიხსნება, ან მიიღებს თუ არა ბალი მოგზაურებს პანდემიით ძლიერ დაზარებული რეგიონებიდან.

ამასთან, ტურიზმის ოფიციალური წარმომადგენლები ბალის და ავსტრალიას შორის „სამოგზაურო ბუშტის“ შექმნისკენ მოუწოდებენ.

ტაილანდი

ტაილანდი სხვადასხვა რეგიონის ეტაპობრივად გახსნას 2020 წლის ბოლოსთვის გეგმავს.

ტაილანდი მოგზაურებისთვის უკვე დიდი ხანია ერთ-ერთი მთავარი მიმართულებაა, რომელმაც შარშან დაახლოებით 40 მილიონი უცხოელი ტურისტი მიიღო.

მაგრამ პანდემიის გამო მარტის თვიდან ვიზიტორებს სამხრეთ აზიის ქვეყანაში შესვლა აეკრძალათ.

მიუხედავად იმისა, რომ აქ შემთხვევების რაოდენობა შედარებით დაბალია სხვა მიმართულებებთან შედარებით – ტაილანდი 3000-ზე მეტი დადასტურებული შემთხვევისა და 50-ზე მეტი გარდაცვლილი ადამიანის შესახებ იტყობინება – ხელისუფლება თავს საფრთხეში არ იგდებს, როდესაც საქმე ქვეყნის გახსნას ეხება.

 „ეს ჯერ კიდევ ვირუსის გავრცელების ვითარებაზეა დამოკიდებული, მაგრამ ვფიქრობ, რომ ტურისტების დაბრუნებას ყველაზე ადრე ამ წლის მეოთხე კვარტალში უნდა ველოდოთ.” – CNN Travel-ს განუცხადა ტაილანდის ტურიზმის სამმართველოს (TAT) მმართველმა, იუტასაკ სუპასორნმა.

მმართველმა ხაზგასმით აღნიშნა, რომ დაწესდება შეზღუდვები თუ ვის შეუძლია ეწვიოს ქვეყანას და შეზღუდვების შემსუბუქების შემდეგ რომელ რეგიონებში არის შესაძლებელი ჩასვლა.

„ჩვენ არ ვაპირებთ ყველაფრის ერთდროულად გახსნას,” – დასძინა მან. „ჩვენ ჯერ კიდევ მაღალი მზადყოფნის რეჟიმში ვართ, მაგრამ შეზღუდვებს ჯერჯერობით ვერ შევამსუბუქებთ.

„ჩვენ უნდა დავაკვირდეთ [მოგზაურთა] წარმოშობის ქვეყანას, რათა შევაფასოთ, ნამდვილად გაუმჯობესდა თუ არა მათი მდგომარეობა.”

ეს რეალურად ნიშნავს, რომ ნაკლებად სავარაუდოა, რომ ტაილანდმა თავისი საზღვრები გაუხსნას მოგზაურებს ისეთი ქვეყნებიდან, რომლებიც, როგორც ჩანს, ვერ აკონტროლებენ კორონავირუსთან დაკავშირებულ მდგომარეობას.

მათ, ვისაც შესვლის ნებართვა მიეცემათ, შეიძლება შესთავაზონ „ხანგრძლივად დარჩენის პაკეტი“ ისეთ იზოლირებულ ადგილებში, „სადაც ჯანმრთელობის მდგომარეობის მონიტორინგი მარტივად კონტროლდება“, მაგალითად, კო ფა-ნგანისა და კო სამუის შორეულ კუნძულებზე.

თუმცა, ამჟამად ტაილანდის საზღვრები ჩაკეტილი რჩება.

30 ივნისამდე გაგრძელდა საერთაშორისო კომერციული რეისების აკრძალვა, გარდა რეისებისა სამშობლოში დასაბრუნებლად, ხოლო ფუკეტის საერთაშორისო აეროპორტი კვლავ დახურული რჩება.

შედეგად, TAT-ის ვარაუდით წელს ტურისტების რაოდენობა 14-დან 16 მილიონამდე შემცირდება.

სხვა მრავალი საერთაშორისო მიმართულების მსგავსად, ამჟამად ტაილანდი იმედს შიდა ტურიზმზე ამყარებს.

მართლაც, ზოგიერთ კურორტსა და სასტუმროს უკვე მიეცათ გახსნის ნებართვა – ერთ-ერთი მათგანია ჰუა ჰინი, რომელიც ბანგკოკის სამხრეთით დაახლოებით 200 კილომეტრში მდებარეობს.

ასევე გახსნილია სავაჭრო ცენტრები, მუზეუმები, ბაზრები და რამდენიმე ტურისტული ღირსშესანიშნაობა. ბანგკოკის სამეფო სასახლე 4 ივნისს უნდა გაიხსნას.

საფრანგეთი

საფრანგეთის მაცხოვრებლებს ქვეყნის შიგნით დასვენება ივლისსა და აგვისტოში შეეძლებათ.

კორონავირუსის პანდემიამდე საფრანგეთი მსოფლიოში ყველაზე მონახულებადი ქვეყანა იყო.

ამჟამად, ისევე როგორც ევროკავშირის დანარჩენ ქვეყნებში, შეზღუდვები მოქმედებს ყველა არააუცილებელ მოგზაურობაზე შენგენის ზონის ფარგლებს გარეთ (26 ქვეყნის ჯგუფი, რომლებსაც ჩვეულებრივ ღია საზღვრები აქვთ).

ქვეყანაში შემოსული მოგზაურები, ევროკავშირის მოქალაქეების ან დიდი ბრიტანეთიდან ჩამოსული პირების გარდა, სავალდებულო 14-დღიანი საკარანტინო პროცედურის გავლას ექვემდებარებიან მინიმუმ 24 ივლისამდე.

მიუხედავად იმისა, რომ მთავრობა თანდათანობით ამსუბუქებს საკარანტინო ზომებს: ამჟამად დაშვებულია ავტომობილით მგზავრობა 100 კილომეტრის მანძილზე და იხსნება პლაჟები, ოფიციალური პირები განმარტავენ, რომ ქვეყანა არ ჩქარობს საერთაშორისო მოგზაურთათვის დაწესებული სასაზღვრო შეზღუდვების შემსუბუქებას.

„კრიზისის დასაწყისიდან საზღვრების ჩაკეტვა არის წესი, ხოლო საზღვრის გადაკვეთის ნებართვის მიღება – გამონაკლისი.“

„ჩვენ ეს დაცვა ძალაში უნდა დავტოვოთ, რაც უახლოეს მომავალში არ შეიცვლება,” – განაცხადა საფრანგეთის შინაგან საქმეთა მინისტრმა კრისტოფ კასტანერმა თვის დასაწყისში გამართულ პრესკონფერენციაზე.

პრემიერ-მინისტრმა ედუარდ ფილიპმა ახლახან წარადგინა სტიმულირების პაკეტი 19,4 მილიარდი აშშ დოლარის ოდენობით, რომელიც მიზნად ისახავს დასუსტებული ტურიზმის სექტორის მხარდაჭერას.

„რაც კარგია ტურიზმისთვის, ხშირად კარგია საფრანგეთისთვის, რაც ზიანს აყენებს ტურიზმს, ზიანს აყენებს საფრანგეთს”, – განაცხადა მან პრესკონფერენციაზე.

მიუხედავად იმისა, რომ ზოგიერთმა კომპანიამ მიიღო გახსნის ნებართვა, ქვეყანაში სასტუმროები, ბარები, რესტორნები და კაფეები მინიმუმ 2 ივნისამდე დახურული რჩება.

მაშინაც კი ნაკლებად სავარაუდოა, რომ პარიზის იმ დაწესებულებებმა, რომლებსაც ხელისუფლება კორონავირუსის „წითელ ზონად“ მიიჩნევს, ახლო მომავალში გახსნის ნებართვა მიიღონ.

29 მაისს გამოცხადდა, რომ ქვეყნის ყველაზე მონახულებადი მუზეუმი, ლუვრი, 6 ივლისს გაიხსნება.

„ტურიზმი სავარაუდოდ, თანამედროვე ისტორიის უდიდესი გამოწვევის წინაშე დგას”, – დასძინა ფილიპმა. „ვინაიდან იგი საფრანგეთის ეკონომიკის ერთ-ერთი უმთავრესი მარგალიტია, მისი გადარჩენა ეროვნული პრიორიტეტია.”

შემდეგ მან აღნიშნა, რომ მაცხოვრებლებს ქვეყნის შიგნით დასვენება ივლისსა და აგვისტოში შეეძლებათ.

გახსნისთანავე ქვეყნის სასტუმროები შიდა ტურიზმზე იქნება დამოკიდებული, რადგან ყველა ნიშანი იმაზე მიუთითებს, რომ უახლოეს მომავალში საერთაშორისო მოგზაურები ვერ შეძლებენ საფრანგეთში შესვლას.

„საკარანტინო ზომების შემსუბუქების შემდეგ, ფრანგი ტურისტები მოკლევადიან პერსპექტივაში, სავარაუდოდ სახლთან ახლოს ყოფნას მოისურვებენ” – ამ თვის დასაწყისში CNN Travel-s ფრანგული სასტუმროების ქსელის Accor-ის წარმომადგენელმა განუცხადა.

„ეს მათ მისცემთ საშუალებას თავიანთი ქვეყანა ხელახლა აღმოაჩინონ, ჩვენ კი მზად ვიქნებით მათ მისაღებად.”

საბერძნეთი

საბერძნეთის მთავრობა ქვეყნის საზღვრების გახსნას 15 ივნისიდან გეგმავს.

ტურიზმს საბერძნეთის მთლიანი შიდა პროდუქტის თითქმის 20% უჭირავს, ისევე როგორც ხუთიდან ერთი სამუშაო ადგილი, ამიტომ გასაკვირი არ არის, რომ ხმელთაშუა ზღვის ქვეყანა ტურისტებისთვის საზღვრების გახსნას რაც შეიძლება სწრაფად აპირებს.

ევროპის ქვეყანა, რომელმაც კორონავირუსის შემთხვევების დაბალი მაჩვენებლების შენარჩუნება შეძლო მკაცრი საკარანტინო შეზღუდვების ადრეულ ეტაპზე დაწესებით, მოგზაურების მიღებას 15 ივნისიდან გეგმავს.

„ტურისტული სეზონი 15 ივნისს იწყება, როდესაც სეზონურ სასტუმროებს გახსნის ნებართვა მიეცემათ,” – 20 მაისს განაცხადა პრემიერ-მინისტრმა კირიაკოს მიცოტაკისმა.

„მოდით, ეს ზაფხული [Covid -19-ის] კრიზისის ეპილოგად ვაქციოთ”, – დასძინა მან.

მიცოტაკისმა ასევე აღნიშნა, რომ პირდაპირი საერთაშორისო ფრენები საბერძნეთის მიმართულებით თანდათანობით 1 ივლისიდან განახლდება და ტურისტებს აღარ მოუწევთ Covid-19-ზე ტესტის ჩაბარება ან კარანტინის გავლა.

ამასთან, ტურიზმის მინისტრმა ჰარის თეოჰარისმა აღნიშნა, რომ ჯანდაცვის წარმომადგენლები აუცილებლობის შემთხვევაში შერჩევით ტესტებს ჩაატარებენ.

„ამ ზაფხულში ტურიზმის გამოცდილება წინა წლებისგან შესაძლოა ოდნავ განსხვავდებოდეს”, – ამ თვის დასაწყისში CNN- ს მიცოტაკისმა განუცხადა.

„შესაძლოა ვერ გაიხსნას ბარები, ან არ იყოს ხალხმრავლობა, მაგრამ საბერძნეთში თქვენ მაინც შეძლებთ მიიღოთ საოცარი გამოცდილება – იმ პირობით, რომ გლობალური ეპიდემია დაღმავალ გზაზე წავა”.

საბერძნეთმა კუნძულებზე რეგულარული საბორნე მიმოსვლა 25 მაისს განაახლა, ხოლო ქვეყნის შიგნით მოგზაურობის შეზღუდვები 18 მაისს მოიხსნა, კუნძულების გარდა „ერთი პრეფექტურიდან მეორეში გადაადგილების შესაძლებლობით”.

ბარებსა და რესტორნებს უკვე მიეცათ მუშაობის უფლება, ხოლო ქალაქის სასტუმროების გახსნა 1 ივნისს იგეგმება, ივლისში კი სეზონური სასტუმროებიც გაიხსნება.

ადრე ყველა საერთაშორისო მგზავრს ჩამოსვლისთანავე Covid-19-ზე ტესტის ჩაბარება ან 14-დღიანი კარანტინის გავლა უწევდა.

მიცოტაკისის შემოთავაზებით სიფრთხილის დამატებითი ზომის სახით ტურისტებს ვიზიტამდე ტესტის გავლა მოუწევთ, მაგრამ, როგორც ჩანს, ეს ასე აღარ არის.

გერმანია

გერმანიაში შეზღუდვები თანდათანობით იხსნება, რადგან ქვეყანა ტურიზმის ინდუსტრიის აღდგენისთვის ემზადება.

მიუხედავად იმისა, რომ ამჟამად გერმანიაში არაუცილებელი ვიზიტები აკრძალულია, გერმანიის საგარეო საქმეთა მინისტრის ჰეიკო მაასის თანახმად პოეტებისა და მოაზროვნეების მიწა ევროკავშირის ქვეყნებისთვის შეზღუდვების მოხსნას 15 ივნისიდან გეგმავს.

ხელისუფლება ასევე განიხილავს ვიზოტორების მიღების შესაძლებლობას თურქეთიდან, დიდი ბრიტანეთიდან, ისლანდიიდან, ლიხტენშტეინიდან, ნორვეგიიდან და შვეიცარიიდან, თუმცა საბოლოო გადაწყვეტილება ჯერ მიღებული არ არის.

ეს წინადადება შევიდა დოკუმენტში სახელწოდებით „კრიტერიუმები შიდა ევროპული ტურიზმის უზრუნველსაყოფად“, რომელშიც შემოთავაზებულია, რომ ამჟამად არსებული სამოგზაურო გაფრთხილებები თითოეული ქვეყნის მიმართ ინდივიდუალური სამოგზაურო რეკომენდაციებით შეიცვალოს.

„ტურიზმის აღდგენა მნიშვნელოვანია როგორც მოგზაურთათვის, ისე გერმანიის ტურიზმის ინდუსტრიისთვის, ისევე როგოროც შესაბამისი სამიზნე ქვეყნების ეკონომიკური სტაბილურობისთვის”, – ნათქვამია მასში.

იხსნება სახმელეთო საზღვარი ავსტრიასა და გერმანიას შორის – 15 ივნისიდან შესაძლებელია მოგზაურობა ავსტრიასა და გერმანიას შორის, ასევე შემსუბუქდება ქვეყნის ტერიტორიაზე მოქმედი შეზღუდვები.

მიუხედავად იმისა, რომ ბარები ჯერ კიდევ დაკეტილი რჩება, რესტორნების გახსნა 18 მაისიდან დაიწყო, ხოლო სასტუმროებმა ხელახალი გახსნის ნებართვა 29 მაისიდან მიიღეს.

გერმანიის კანცლერმა ანგელა მერკელმა სოციალური დისტანცირების შეზღუდვა 29 ივნისამდე გააგრძელა.

ეგვიპტე

საერთაშორისო ფრენები ეგვიპტეში სავარაუდოდ ივნისსა და ივლისში განახლდება.

ეგვიპტე ყოველთვიურად დაახლოებით 1 მილიარდი დოლარის შემოსავალს იღებს ტურიზმიდან, ამიტომ პანდემიით გამოწვეულმა სამგზავრო შეზღუდვებმა მნიშვნელოვანი გავლენა იქონია.

მთავრობამ სამგზავრო ფრენები მარტში შეაჩერა, ყველა სასტუმრო, რესტორანი და კაფე დაიხურა, ღამით კი კომენდატის საათი დაწესდა.

ეს შეზღუდვები ამჟამად შემსუბუქებულია: სასტუმროები, რომლებიც გარკვეულ მოთხოვნებს აკმაყოფილებენ, მაგალითად, კლინიკის ხელმისაწვდომობას ადგილზე მომუშავე ექიმით, ნაკლები დატვირთვით მუშაობის ნებართვას მიიღებენ ადგილობრივი ვიზიტორებისთვის.

თუმცა კომენდანტის საათი ძალაში რჩება საღამოს 8 საათიდან დილის 5 საათამდე. ასევე მთავრობის დადგენილებით სავალდებულოა ნიღბების ტარება საჯარო ადგილებში და საზოგადოებრივ ტრანსპორტში.

მიუხედავად იმისა, რომ საერთაშორისო ფრენები ჯერ არ განახლებულა, რამდენიმე შერჩეული მარშრუტის გარდა, მინისტრთა კაბინეტის წარმომადგენელმა ნადერ საადმა ახლახან განაცხადა, რომ ფრენები შესაძლოა თანდათანობით განახლდეს ივნისსა და ივლისში.

„ჩვენ უნდა მოვემზადოთ“, – განაცხადა საადმა სატელევიზიო ინტერვიუს დროს.

„მრავალმა საერთაშორისო გადამზიდავმა გამოთქვა ეგვიპტეში ივლისში ფრენების განახლების სურვილი, შედეგად, ჩვენ განვიხილავთ საერთაშორისო ფრენების ეტაპობრივ განახლებას ამ თვის ბოლოს და ივლისის პირველ ნახევარში.“

მექსიკა

უახლოეს კვირებში მექსიკა სხვადასხვა რეგიონის გახსნას იწყებს.

მექსიკა ვიზიტორების მიღებას რამდენიმე კვირაში გეგმავს.

მიუხედავად იმისა, რომ ქვეყანაში კვლავ კარანტინი მოქმედებს და სასტუმროებსა და რესტორნებს თავიანთი საქმიანობა ჯერ არ განუახლებიათ, ხელისუფლება ქვეყნის ეტაპობრივად გახსნას გეგმავს იმგვარად, რომ ყველაფერი ჩვეულ რეჟიმს დაუბრუნდეს.

„გეგმის თანახმად ქვეყანა ეტაპოვრივად და რეგიონების მიხედვით გაიხსნება,” – ცოტა ხნის წინ CNN Travel-ს WTTC-ს გენერალურმა დირექტორმა გლორია გუევარამ განუცხადა.

„მიზანს, პირველ რიგში, ადგილობრივი მოგზაურები წარმოადგენენ, რომლებსაც თან მოსდევენ მოგზაურები აშშ-დან და კანადიდან, შემდეგ კი მსოფლიოს სხვა ქვეყნებიდან.“

აშშ-სა და მექსიკას შორის საზღვარი დაკეტილია „არააუცილებელი“ მოგზაურობებისთვის სულ მცირე 22 ივნისამდე, ხოლო საერთაშორისო ფრენების უმეტესობა მექსიკის საკვანძო აეროპორტებში შეჩერებული ან მნიშვნელოვნად შემცირებულია.

ამასთან, ავიახაზები Delta Air უახლოეს კვირებში სხვადასხვა რეისის დამატებას და/ან განახლებას გეგმავს აშშ-დან კანკუნში, მეხიკოში, ლოს კაბოსში და პუერტო ვალარტაში.

ტურიზმის სახელმწიფო მდივნის მარისოლ ვანეგასის აზრით, კინტანა როო, შტატი მექსიკაში კარიბის ზღვის სანაპიროზე, რომლის შემადგენლობაშია ისეთი ქალაქები, როგორიცაა კანკუნი, პლაია დელ კარმენი და ტულუმი, გახსნას ივნისის შუა რიცხვებში იმედოვნებს.

„ჩვენ ტურიზმის აღდგენა გვსურს და ღირსშესანიშნაობებისა და სასტუმროების გახსნას სადღაც 10-დან 15 ივნისამდე ვგეგმავთ, თუმცა ჯერ არ ვიცით რომლების“, განაცხადა მან.

„ეს დამოკიდებულია იმაზე, თუ რის ნებართვას მოგვცემს ფედერალური მთავრობა.“

ამავდროულად, ლოს კაბოსში ტურიზმის აღდგენის ხუთსაფეხურიანი გეგმის განხორციელება ივნისიდან იწყება.

როდრიგო ესპონდა, ლოს კაბოსის ტურიზმის საბჭოს მმართველი დირექტორი, ამბობს, რომ იმედოვნებს, რომ როგორც საერთაშორისო, ისე შიდა ტურისტების მიღებას ქვეყანა აგვისტოსა და სექტემბერში შეძლებს.

ამასთან, რივიერა ნაიარიტის კონვენციებისა და ვიზიტორთა ბიუროს საზოგადოებასთან ურთიერთობის მენეჯერის, რიჩარდ ზარკინის თანახმად, რივიერა ნაიარიტის პლაჟის კურორტს, რომელიც მდებარეობს პუერტო ვალტარას ჩრდილოეთით, ამჟამად ტურისტების დაბრუნების გეგმა არ გააჩნია.

თურქეთი

თურქეთი საერთაშორისო სტუმრების მასპინძლობას ივნისის შუა რიცხვებიდან გეგმავს.

2019 წელს თურქეთმა 34,5 მილიარდ დოლარზე მეტი ტურიზმიდან გამოიმუშავა, ამჟამად ტრანსკონტინენტური ქვეყანა ბიზნესში დაბრუნებას ცდილობს.

ტურიზმის მინისტრის მეჰმედ ნური ერსოის თანახმად, ქვეყანა შიდა ტურიზმის განახლებას მაისის ბოლოს გეგმავს, ივნისის შუა რიცხვებიდან კი საერთაშორისო სტუმრების მიღებას იმედოვნებს.

თურქეთის საინფორმაციო არხ NTV-სთან ინტერვიუს დროს ერსოიმ აღნიშნა, რომ თურქეთმა შესაძლოა საზღვრები გახსნას პირველ რიგში აზიის ქვეყნებისთვის, მაგალითად, ჩინეთისა და სამხრეთ კორეისთვის.

ქვეყანამ სასტუმროებისა და საკურორტო ობიექტებისთვის ახალი წესები შეიმუშავა, როგორიცაა შესასვლელებში თერმოსკრინინგი და ნომრის განიავება სასტუმროდან გაწერის შემდეგ მინიმუმ 12 საათის განმავლობაში. სტუმრებს ნიღბების ტარება და სოციალური დისტანციის დაცვა მოეთხოვებათ.

„რაც უფრო გამჭვირვალე და დეტალურ ინფორმაციას მივაწვდით, ტურისტების მით უფრო მეტ ნდობას მოვიპოვებთ,” – ამ თვის დასაწყისში როიტერს ტურიზმის მინისტრმა მეჰმეტ ერსოიმ განუცხადა, რომელმაც გაგვაცნო გეგმა თურქეთის სასტუმროების გახსნის შესახებ.

ამავდროულად, მოიხსნა შეზღუდვები საქალაქთაშორისო მოგზაურობებზე, ხოლო რესტორნები, კაფეები, პარკები და სპორტული ობიექტები პლაჟებსა და მუზეუმებთან ერთად 1 ივნისიდან გაიხსნა.

1 ივნისს ასევე გახსნისთვის ემზადება სტამბოლის „Grand Bazaar“, მსოფლიოს ერთ-ერთი უდიდესი ბაზარი.

იტალია

ტურისტების მოზიდვის მიზნით იტალია უარს ამბობს სავალდებულო კარანტინზე ჩამოსული სტუმრებისთვის „გათვლილი რისკის” გათვალისწინებით.

იტალია ერთ-ერთი იმ ქვეყანათაგანია, რომელიც პანდეემიის შედეგად ყველაზე მეტად დაზარალდა, მაგრამ ტურისტებს შორის პოპულარული ევროპის ქვეყანა ტურიზმის ინდუსტრიის აღდგენას ცდილობს და ინფიცირების შემთხვევების შემცირებას აღნიშნავს.

3 ივნისიდან მოგზაურებს ევროკავშირიდან, დიდი ბრიტანეთიდან და ანდორას, მონაკოს, სან მარინოსა და ვატიკანის ჯუჯა სახელმწიფოებიდან და სამთავროებიდან ქვეყანაში შესვლა კარანტინის გარეშე შეეძლებათ, რომელსაც მთავრობამ „გათვლილი რისკი“ უწოდა.

„ჩვენ გათვლილი რისკის წინაშე ვდგავართ, რადგან ვაცნობიერებთ, რომ ინფიცირების მრუდი შესაძლოა კვლავ გაიზარდოს,” – განაცხადა პრემიერ-მინისტრმა ჯუზეპე კონტემ იტალიის მოსახლეობისადმი სატელევიზიო მიმართვაში.

„ჩვენ ეს უნდა მივიღოთ, წინააღმდეგ შემთხვევაში ვერასდროს შევძლებთ დაწყებას თავიდან.”

ადრე ქვეყანაში შესვლის უფლების მოპოვებამდე ვიზიტორებს ორკვირიანი კარანტინის გავლა უწევდათ.

მაისის განმავლობაში თანდათანობით გაიხსნა ყველა მუზეუმი, მათ შორის რომში მდებარე ვატიკანის მუზეუმი, სოციალური დისტანცირების წესების მკაცრი დაცვით. 18 მაისს ბარებმა და რესტორნებმა გახსნის ნებართვა მიიღეს სტუმრების უფრო ნაკლები რაოდენობითა და მომხმარებლებს შორის პლასტიკური დამცავი ფარებით განცალკევების უზრუნველყოფით.

ორთვიანი კარანტინის შემდეგ 18 მაისს ასევე გაიხსნა ვატიკანის წმინდა პეტრეს ტაძარი. ასევე გაიხსნა პიზის დახრილი კოშკი, ხოლო ვენეციის სიმპლონის აღმოსავლეთ-ექსპრესი ლიანდაგებზე 8 ივლისს დაბრუნდება.

ესპანეთი

2019 წელს ესპანეთს სულ მცირე 84 მილიონი ადამიანი ეწვია.

ესპანეთის საკარანტინო შეზღუდვები ერთ-ერთი ყველაზე მკაცრი იყო ევროპაში, მაგრამ ისინი თანდათანობით მოიხსნება. პლაჟები ივნისში უნდა გაიხსნას, ხოლო ქვეყნის ზოგიერთ ნაწილში სასტუმროებს მუშაობის განახლება უკვე შეუძლიათ.

1 ივლისიდან ესპანეთი, რომელმაც 2019 წელს რეკორდული რაოდენობის 84 მილიონი ვიზიტორი მიიღო, მოგზაურებს ევროკავშირიდან ქვეყანაში შესვლის ნებართვას ორკვირიანი კარანტინის გავლის გარეშე მისცემს.

„ივლისიდან უცხოელ ტურისტებს ესპანეთში შესვლის უფლება უსაფრთხოების პირობების დაცვით მიეცემათ,” – პრემიერ-მინისტრმა პედრო სანჩესმა პრესკონფერენციაზე განაცხადა.

„ჩვენ გარანტიას ვიძლევით, რომ ტურისტებს საფრთხე არ ემუქრებათ და ისინიც არ წარმოადგენენ საფრთხეს (ესპანეთისთვის).”

მიუხედავად იმისა, რომ ევროკავშირის ფარგლებს გარეთ მდებარე ქვეყნების მოგზაურებისთვის საზღვრების გახსნის შესახებ ცოტა რამ იყო ნათქვამი, ითვლება, რომ ესპანეთი იმედოვნებს, რომ ისეთი მიმართულებების მაგალითს მიჰყვება, როგორიცაა ლიტვა და ჩეხეთი, უსაფრთხო დერეფნების ან „სამოგზაურო ბუშტების“ შექმნით იმ მეზობელ მიმართულებებთან, რომლებმაც ვირუსის გავრცელების გაკონტროლება შეძლო.

„როდესაც საერთაშორისო ტურიზმი გაიხსნება, ჩვენ უნდა ვუზრუნველვყოთ, რომ ის ვინც ესპანეთში ჩადის, საფრთხეს არ წარმოდგენს”, – ადგილობრივ გაზეთ El Pais-ს განუცხადა ესპანეთის ტურიზმის მინისტრმა რეიეს მარტომ.

„საზღვრების საკითხს ჯანდაცვის კრიზისის ევოლუცია მოსდევს.”

ამჟამად, 6 წლისა და მეტი ასაკის ყველა პირი ვალდებულია ატაროს სახის დამცავი ნიღბები საჯარო ადგილებში, როგორც დახურულ, ისე ღია სივრცეში, „სადაც შეუძლებელია [ინტერპერსონალური) დისტანციის დაცვა“.

მალდივები

პირადი თვითმფრინავები და ლუქს კლასის იახტები მალდივებში 1 ივნისიდან დაიშვება.

მალდივის კუნძულები მსოფლიოში ერთ-ერთი ყველაზე მდიდრული მიმართულებაა, მაგრამ საზღვრების გახსნის შემდე მალდივები კიდევ უფრო ექსკლუზიური გახდება.

1000-ზე მეტ კუნძულზე მდებარე ქვეყანამ თავისი საზღვრები ჩაკეტა და ყველა ფრენა გააუქმა მას შემდეგ რაც მარტში კორონავირუსის პირველი ორი შემთხვევა დაფიქსირდა.

ამასთან, აქ დაახლოებით 30 კურორტი არ დაკეტილა, სადაც ტურისტები სახლში დაბრუნებას თვითიზოლაციას ამჯობინებენ.

მალდივებში დაახლოებით 1,457 დადასტურებული შემთხვევა და Covid-19-ის შედეგად გარდაცვალების ხუთი შემთხვევა დაფიქსირდა.

მიუხედავად იმისა, რომ ადრე გაკეთდა განცხადება, რომ ქვეყანა საზღვრებს წლის ბოლოს გახსნიდა, ხელისუფლებამ იგი ივლისისთვის გადმოიტანა.

შემოთავაზებულია ეტაპობრივი გახსნა, რომლის თანახმად პირად თვითმფრინავებსა და ლუქს კლასის იახტებს შესვლა 1 ივნისიდან შეეძლებათ.

ამასთან, ადრე გავრცელებული ინფორმაციით გაუქმდა ტურისტული ვიზის მოსაკრებლისა და 50,000 აშშ დოლარის ოდენობის ჩარტერული რეისებისა და პირადი თვითმფრინავების აფრენა-დაფრენის მოსაკრებლის თანხის გადახდის ვალდებულება.

„ვიზიტორებისთვის საზღვრების გახსნას 2020 წლის ივლისში ვგეგმავთ”, – ნათქვამია ტურიზმის სამინისტროს 30 მაისის განცხადებაში.

„ასევე გვსურს დავარწმუნოთ ჩვენი სტუმრები, რომ მალდივებში ჩამოსასვლელად მათ არ მოუწევთ რაიმე დამატებითი გადასახადის გადახდა“.

მთავრობამ ასევე გამოსცა „უსაფრთხო ტურიზმის ლიცენზია“ იმ ტურისტული ობიექტებისთვის, რომლებიც შეესაბამება სახელმწიფო კანონმდებლობასა და უსაფრთხოების გარკვეულ მოთხოვნებს, მაგალითად სერტიფიცირებული სამედიცინო მუშაკის ადვილი ხელმისაწვდომობა და პირადი დამცავი აღჭურვილობის „ადეკვატური მარაგის“ არსებობა.

მალდივის კუნძულებზე მოგზაურებს უნდა ჰქონდეთ „უსაფრთხო ტურიზმის ლიცენზიის“ მქონე ტურისტული ობიექტის მიერ დადასტურებული ჯავშანი, აგრეთვე სპეციალური ტურისტული ვიზა მათთვის, ვინც ქვეყანაში მინიმუმ 14 დღით ყოფნას გეგმავს.

ვიზიტორებმა ასევე უნდა წარმოადგინონ მოქმედი სამედიცინო სერტიფიკატი, რომელიც ადასტურებს, რომ მათ Covid-19-ის ტესტზე უარყოფითი პასუხი აქვთ,

2019 წელს მალდივებმა 1.7 მილიონ ვიზიტორს უმასპინძლა, ხოლო 2020 წელს ქვეყანა ტურისტების რიცხვის 2 მილიონამდე ზრდას ელოდება.

სენტ-ლუსია

სენტ-ლუსია ეტაპობრივ გახსნას 4 ივნისიდან იწყებს.

სენტ-ლუსია კარიბის ზღვაში მდებარე კუნძულია, რომელიც ტურისტების დაბრუნებას ცდილობს.

ტროპიკული ქვეყანა, რომელმაც უცხოელი მოგზაურებისთვის საზღვრები 23 მარტს დახურა, ეტაპობრივ გახსნას 4 ივნისიდან იწყებს, როდესაც საზღვრებს გაუხსნის ვიზიტორებს შეერთებული შტატებიდან.

ქვეყანაში მოგზაურობის მსურველებმა უნდა წარმოადგინონ Covid-19-ზე უარყოფითი ტესტის „დამოწმებული მტკიცებულება“, რომელიც ფრენამდე 48 საათის განმავლობაში ჩატარდა.

სტუმრებს ასევე მოუწევთ ნავსადგურის ჯანდაცვის სამსახურის მიერ ჩატარებული თერმოსკრინინგის გავლა, ვიზიტის დროს კი მათ სახის დამცავი ნიღბების ტარება და სოციალური დისტანციის დაცვა მოეთხოვებათ.

ხელისუფლება ასევე აწესებს უსაფრთხოების ახალ ზომებს ტაქსის მძღოლებისა და მგზავრების განცალკევების მიზნით.

„ჩვენი ახალი პროტოკოლები საგულდაგულოდ იქნა შემუშავებული და ხელს შეუწყობს მოგზაურებსა და ჩვენ მოქალაქეებს შორის ნდობის გაზრდას.” – განაცხადა ტურიზმის მინისტრმა დომინიკ ფედემ.

„სენტ-ლუსიას მთავრობას მტკიცედ აქვს განზრახული დაიცვას როგორც სიცოცხლე, ისე საარსებო საშუალებანი, რადგან იგი ეკონომიკის სტიმულირებას იწყებს.”

ადგილობრივ კომპანიებს ასევე მიეცათ ხელახალი გახსნის ნებართვა იმ პირობით, რომ ისინი უზრუნველყოფენ სათანადო სადეზინფექციო ღონისძიებების გატარებას და სოციალური დისტანციის დაცვას.

უახლოეს კვირებში გამოცხადდება კუნძულის გახსნის მეორე ეტაპის დეტალები, რომელიც 1 აგვისტოდან უნდა დაიწყოს.

პორტუგალია

პორტუგალიის საგარეო საქმეთა მინისტრმა აუგუსტო სანტოშ სილვამ განაცხადა, რომ „პორტუგალიის კარი ტურისტებისთვის ღიაა“.

პორტუგალია ჯერ კიდევ შეზღუდვების შემსუბუქების პროცესშია, რაც რესტორნებს, მუზეუმებსა და კაფეებს მაისის შუა რიცხვებიდან ნაკლები დატვირთვით გახსნის შესაძლებლობას აძლევს.

მაგრამ ევროპის ქვეყანას რთულ ვითარებაში მყოფი ტურიზმის ინდუსტრიის აღდგენა სურს, რასაც ადასტურებს საგარეო საქმეთა მინისტრის აუგუსტო სანტოშ სილვას მიერ გაკეთებული განცხადება, რომ „პორტუგალიის კარი ტურისტებისთვის ღიაა“.

მიუხედავად იმისა, რომ ევროკავშირის ფარგლებს გარეთ მდებარე ქვეყნებიდან ვიზიტორებს მოგზაურობა მინიმუმ 15 ივნისამდე ეკრძალებათ, ზოგიერთი მარშრუტი პორტუგალიურენოვანი ქვეყნებიდან, მაგალითად ბრაზილიიდან, კვლავ ფუნქციონირებს.

ტურისტებისთვის მარტიდან ჩაკეტილი სახმელეთო საზღვარი პორტუგალიასა და ესპანეთს შორის ნაკლებად სავარაუდოა გაიხსნას მანამ, სანამ ევროკავშირში მოგზაურობაზე დაწესებული შეზღუდვები შემსუბუქდება.

„ჩვენ თანდათანობით ვიწყებთ სასაზღვრო კონტროლის მოხსნას.” – ამ თვის დასაწყისში განაცხადა შინაგან საქმეთა მინისტრმა ედუარდო კაბრიტამ.

მიუხედავად იმისა, რომ უცხოელი ტურისტებისთვის საზღვრების გახსნის პერსპექტივა ჯერ არ ჩანს, ხელისუფლება იღებს ზომებს იმის უზრუნველსაყოფად, რომ უცხოელ მოგზაურებს დარწმუნებით შეეძლოთ დაბრუნება, როდესაც ეს შესაძლებელი იქნება.

რიტა მარკესმა, ტურიზმის საკითხებში სახელმწიფო მდივანმა, შეიმუშავა სქემა „ნუ გაუქმებ, გადაავადე“, რომელიც საშუალებას აძლევს ტურისტებს წინასწარ დაგეგმილი შვებულება პორტუგალიაში გასატარებლად 2021 წლის ბოლოსთვის გადაიტანონ.

აღნიშნული მოქმედებს აკრედიტებული ტურისტული სააგენტოების, სასტუმროების ან Airbnbs-ის მეშვეობით განხორციელებულ ყველა ჯავშანზე იმ მოგზაურობებისთვის, რომლებიც დაგეგმილია 2020 წლის 13 მარტიდან 30 სექტემბრამდე.

გარდა ამისა, ვიზიტორთა ნდობის გაზრდის მიზნით ტურიზმის ეროვნულმა სამმართველომ „Turismo de Portugal“ შექმნა ჰიგიენის შესამოწმებელი უფასო ბეჭედი, რათა განასხვავოს „სუფთა და უსაფრთხო“ ტურიზმის საწარმოები.

Covid-19-ის გავრცელების თავიდან აცილებისა და კონტროლის მიზნით აღნიშნული ბეჭდის მისაღებად კომპანიებს ჰიგიენური და დასუფთავების მოთხოვნების დაცვა მოუწევთ. ბეჭედი ერთი წლის განმავლობაში მოქმედებს.

სანტოშ სილვას თქმით, ჩასულ ტურისტებს პორტუგალიის აეროპორტებში ჯანმრთელობის გარკვეული შემოწმების გავლა მოუწევთ, თუმცა ჩასული პირებისთვის სავალდებულო კარანტინი არ დაწესდება.

არუბა

არუბამ საზღვრების გახსნის „საორიენტაციო” თარიღი დაასახელა – 15 ივნისიდან 1 ივლისის პერიოდში.

კარიბის ზღვის კუნძული არუბა მოგზაურთათვის საზღვრების გახსნას 15 ივნისიდან და 1 ივლისის პერიოდში გეგმავს.

ამასთან, კარიბის კუნძულების ვიზიტორთა ბიურომ, რომელმაც კორონავირუსის 100-ზე მეტი შემთხვევა დაადასტურა, ნათქვამია, რომ ეს „საორიენტაციო” თარიღი შეიძლება შეიცვალოს, თუ არუბა „საჭიროების შემთხვევაში დამატებითი ზომების მიღებას“ გადაწყვეტს.

თუმცა ქვეყანაში ჩამოსასვლელად Covid-19-ზე ტესტირების რაიმე მოთხოვნა არ არის დაწესებული, ტურისტებმა ჩამოსვლისთანავე თერმოსკრინინგი უნდა გაიარონ.

მიუხედავად იმისა, რომ მცირე კომპანიები, მათ შორის სავაჭრო ცენტრები, კინოთეატრები, სილამაზის სალონები და ღია რესტორნები 25 მაისს გაიხსნა, კუნძულზე 22 საათიდან დილის 5 საათამდე მოქმედი კომენდანტის საათი კვლავ ძალაში რჩება.

ეს კი ნიშნავს, რომ ასეთი დაწესებულებები საღამოს 10 საათისთვის უნდა დაიხუროს.

გარდა ამისა, საზოგადოებრივი ჯანმრთელობის დეპარტამენტმა „არუბას ჯანმრთელობისა და ბედნიერების კოდექსი“ შეიმუშავა, რომელიც წარმოადგენს დასუფთავებისა და ჰიგიენური სავალდებულო სერტიფიცირების პროგრამას ტურიზმთან დაკავშირებული ყველა ბიზნესისთვის.

საქართველო

საქართველო უცხოელი ტურისტების მისაღებად მზად 1 ივლისიდან იქნება.

კორონავირუსის პანდემიამდე საქართველოში ადგილი ჰქონდა ტურისტულ ბუმს – 5 მილიონი სტუმარი 2019 წელს, რაც წინა წელთან შედარებით 7%-იანი ზრდაა.

თუმცა ქვეყანა იძულებული გახდა კრიზისის გამო მარტში ზამთრის კურორტები დაეხურა და უცხოელი ვიზიტორებისთვის ქვეყანაში შესვლა აეკრძალა.

ქვეყნის ხელისუფლება, რომელსაც ტურიზმის სექტორის აღორძინება სურს, აცხადებს, რომ ქვეყანა უცხოელი მოგზაურებისთვის 1 ივლისიდან გაიხსნება.

ხელისუფლებამ სამ ეტაპიანი „ანტიკრიზისული“ გეგმა წარადგინა, რომელიც მოიცავს მარკეტინგულ კამპანიას და საქართველოს, როგორც „უსაფრთხო ტურისტული მიმართულების“, პოპულარიზაციას.

შემდგომი ეტაპი შიდა ტურისტებს მოგზაურობის ნებას დართავს „უსაფრთხო“ ტურისტულ ზონებში, ხოლო ბოლო ეტაპზე გაიხსნება საზღვრები და აღდგება ფრენა ზოგიერთი მიმართულებით.

„ჩვენ გადავდივართ [კორონავირუსზე რეაგირების] მე-3 ეტაპზე, რაც გულისხმობს ეკონომიკის კრიზისის შემდგომ მართვას და სხვადასხვა სექტორის აღდგენის გეგმის შემუშავებას“, – განაცხადა საქართველოს პრემიერ-მინისტრმა, გიორგი გახარიამ კორონავირუსთან ბრძოლის საბჭოს ერთ-ერთ ბოლო სხდომაზე.

„ტურიზმის სექტორი იქნება პირველი, რომელსაც ანტიკრიზისული ზომები შეეხება“.

გაერთიანებული სამეფო

8 ივნისიდან გაერთიანებულ სამეფოში ჩამოსული ყველა ვიზიტორისთვის 14-დღიანი სავალდებულო კარანტინია დაწესებული.

მაშინ როდესაც სხვა ქვეყნები სამოგზაურო შეზღუდვებს ამსუბუქებენ და იღებენ ზომებს ტურისტების მოსაზიდად, გაერთიანებული სამეფო მკაცრი წესების შენარჩუნებას ამჯობინებს.

მიუხედავად იმისა, რომ ადრე მთავრობამ მოგზაურთათვის სავალდებულო კარანტინის გავლა არ დააწესა, ახლახან მთავრობამ განაცხადა, რომ 8 ივნისიდან ყველა ჩამოსულ მოგზაურს 14-დღიანი თვითიზოლაციის გავლა მოეთხოვება.

ახალი წესების თანახმად, ყველა ჩამოსულმა პირმა უნდა წარმოადგინოს მისამართი, სადაც ისინი ორი კვირის განმავლობაში უნდა დარჩნენ.

მათ, ვინც წესებს არ დაემორჩილება, ჯარიმის სახით 1,218 აშშ დოლარის გადახდა მოუწევთ.

გადაწყვეტილებამ, რომელიც ყოველ სამ კვირაში იქნება გადახედილი, უახლოეს კვირებში საერთაშორისო ტურიზმის გადარჩენის ყველა იმედი დაამსხვრია.

როგორც ვარაუდობენ, ეს ნაბიჯი ავიაკომპანიებს ხელს შეუშლის სწრაფად აღადგინონ ფრენები, მაშინ როდესაც ხელისუფლება მოქალაქეებს აფრთხილებს, რომ ნაკლებად სავარაუდოა, რომ ამ ზაფხულს მათ საზღვარგარეთ გამგზავრება შეძლონ.

„ვაცხადებ, რომ ამჟამად საზღვარგარეთ ვერ იმოგზაურებთ,” – განაცხადა ტრანსპორტის მინისტრმა გრანტ შაპსმა BBC-ს სატელევიზიო ინტერვიუს დროს, როდესაც ჰკითხეს, შეუძლიათ თუ არა ბრიტანეთის მოქალაქეებს ივლისში ფრენების დაჯავშნა.

დიდ ბრიტანეთში კარანტინის გამოცხადების შემდეგ 10 რეისიდან დაახლოებით ცხრა გაუქმდა.

ამ ეტაპზე სასტუმროები ივლისის დასაწყისში უნდა გაიხსნას, მაგრამ იმის გამო, რომ ევროკავშირის სასაზღვრო შეზღუდვები ჯერ კიდევ ძალაშია, სავარაუდოდ, დიდი ბრიტანეთი შიდა ტურიზმზე გააკეთებს აქცენტს.

ქალაქგარეთ მდებარე ძვირადღირებული სასტუმრო Beaverbrook ერთ-ერთია იმ დაწესებულებებს შორის, რომელიც მოუთმენლად ელოდება შესაძლებლობას ხელახლა გააღოს კარი, ამავდროულად მნიშვნელოვანი ცვლილებები შემოაქვს სტუმრებისა და პერსონალის დასაცავად.

„ჩვენ მთავრობისგან კიდევ უფრო მეტ სიცხადეს ველოდებით, თუ როდის შეიძლება სასტუმროს გახსნა, მაგრამ ჩვენ კულისებს მიღმა ვმუშაობთ, რათა ჩვენი ქმედებების ადაპტირება მოვახდინოთ ჩვენი თანამშრომლებისა და სტუმრებისთვის დამატებითი უსაფრთხოების უზრუნველყოფის მიზნით”, – ამ თვის დასაწყისში CNN Travel-ს სასტუმრო Surrey-ს წარმომადგენელმა განუცხადა.

„ყველა ვიზიტორსა და თანამშრომელს ჩასვლისთანავე თერმოსკრინინგის გავლა მოუწევთ, ხოლო სასტუმროს ყველა შენობის შესასვლელთან მათ ხელების დეზინფეცია მოეთხოვებათ“.

წყარო CNN

Posted in ბლოგი, სიახლეები and tagged , , .