დატოვეთ: რისი ტრანსპორტირებაა აკრძალული ხელბარგით

რისი გადატანაა შესაძლებელი ხელბარგით? ამ კითხვაზე პასუხი ყველა მოგზაურმა უნდა იცოდეს.

ზოგჯერ ნამდვილად მოგესურვებათ, რომ ყველაზე საჭირო ან თუნდაც  ძვირფასი ნივთი თქვენთან ერთად მგზავრობდეს, და არა განმარტოებულად  სატვირთო განყოფილებაში. თუმცა  მკაცრი, მაგრამ სამართლიანი ტრანსპორტირების წესები არ გვაძლევს საშუალებას ბორტზე ზოგიერთი ფასეული ნივთი ავიტანოთ. იმისათვის, რომ ფრენამდე ყველა ბარგის ხელახლა შეფუთვა არ მოგიწიოთ,გირჩევთ გაეცნოთ იმ ნივთების სიას, რომელთა ატანა თვითმფრინავის ბორტზე აკრძალულია.

სამგზავრო განყოფილებაში ნივთების ტრანსპორტირების წესებეი შესაძლოა განსხვავდებოდეს გამგზავრებისა ქვეყნისა და გადამზიდავი კომპანიის მიხედვით. ამიტომ გამგზავრებამდე აუცილებლად გაეცანით ავიაკომპანიის პირობებს. ზედმეტი პრობლემები ნამდვილად არ გჭირდებათ.

რისი ტრანსპორტირებაა აკრძალული თვითმფრინავით?

საავიაციო უსაფრთხოების წესების მიხედვით, თვითმფრინავით აკრძალულია შემდეგი ნივთების ტრანსპორტირება (რეგისტრირებული ბარგითაც კი):

  • ფეთქებადი და ადვილად აალებადი ნივთიერებები: ფეიერვერკი, საბრძოლო მასალა, აალებადი საწვავი (დიზელი, ბენზინი), ასანთი, სანთებელა, საღებავების გამხსნელი და საღებავი აეროზოლი, ალკოჰოლური სასმელები 70%-ზე მეტი ეთანოლის შემცველობით, ეთილის სპირტი.
  • ტოქსიკური ნივთიერებები, მათ შორის მჟავები, გაზის ბალონები, ქლორი, შხამი და ქიმიკატები, ვერცხლისწყლის თერმომეტრი.
  • ცეცხლსასროლი იარაღი. თუ თქვენ გაქვთ შენახვისა და ტარების ნებართვა, ავიაკომპანია მოგცემთ ტრანსპორტირების უფლებას, მაგრამ მხოლოდ სატვირთო განყოფილებაში, დაცლილ და დაშლილ მდგომარეობაში, სპეციალურ ჩანთაში.
  • ზოგიერთ ქვეყანაში აკრძალულია კონკრეტული პროდუქტების შემოტანა/გატანა. ფრენამდე გირჩევთ გაითო თუ რა ტაბუ არსებობს. მაგალითად, ტაილანდიდან არ შეიძლება დურიანის გატანა, ვიეტნამიდან კი – თევზის სოუსის ნიოკ მამი.

რისი ტრანსპორტირებაა აკრძალული ხელბარგით?

სითხეები

არსებობს შეზღუდვები კრემების, ზეთების, ლოსიონების, შამპუნების, სუნამოების, სპრეის, სასმელებისა და წყლის ტრანსპორტირებაზეც კი. ამ ყველაფრის ტრანსპორტირება შეიძლება მხოლოდ 100 მლ-მდე ტევადობის კონტეინერებით. მნიშვნელობა სწორედ კონტეინერის მოცულობას აქვს: თქვენ ნამდვილად ჩამოგართმევენ ფორთხოლის წვენის ორი ლიტრიან ბოთლს, რომელშიც სულ რამდენიმე ყლუპი დარჩა.  მნიშვნელოვანი მომენტია: პატარა ბოთლი უნდა მოათავსოთ გამჭვირვალე პლასტიკურ პაკეტში საკეტით (იდეალურია ხილის გაყინვისთვის განკუთვნილი ზიპ-პაკეტები ან კოსმეტიკის ჩანთა). გაითვალისწინეთ, რომ სითხის მოცულობა ჯამში 1 ლიტრს არ უნდა აღემატებოდეს. თუ წესებს არ შეესაბამებით, თქვენი ავლადიდება ბარგში უნდა ჩააბაროთ. სხვათა შორის, ზოგიერთ აეროპორტში აკრძალულია კბილის პასტის ტრანსპორტირება, ამიტომ  გირჩევთ წინასწარ დააზუსტოთ.

არსებობს მგზავრთა ორი კატეგორია, რომლებზეც არ ვრცელდება სითხის ტრანსპორტირების შეზღუდვა:

  • მგზავრები ორ წლამდე ასაკის  ბავშვებით. რძე, წვენი, პიურე და სხვა  ბავშვთა საკვები შეგიძლიათ თან იქონიოთ ნებისმიერი ზომის შეფუთვითა და ფრენის განმავლობაში აუცილებელი რაოდენობით.
  • ისინი, ვინც წამლებს რეგულარულად იღებენ. ამ შემთხვევაში, ნებადართულია პრეპარატის იმ შეფუთვით ტრანსპორტირება, რომლის მოცულობაც 100 მლ-ს აღემატება. აუცილებლად დაგჭირდებათ ცნობა მკურნალი ექიმისგან.

როგორ გადავიტანოთ  უბაჟო ვაჭრობის (duty free )პუნქტში შეძენილი სითხე?

შეზღუდვები ასევე არ ვრცელდება უბაჟო ვაჭრობის პუნქტში შეძენილ სითხეზე. გამყიდველმა თქვენი ტრანსპორტირებისთვის განკუთვნილი სასმელი ან კოსმეტიკა ჰერმეტულ პაკეტში უნდა მოათავსოს. ამავდროულად, შეფუთვა არ უნდა იყოს დაზიანებული, წინააღმდეგ შემთხვევაში, სავარაუდოდ, თქვენს შენაძენთან დამშვიდობება მოგიწევთ.

სირთულეები შეიძლება წარმოიშვას, თუ გადაჯდომით მგზავრობთ. მაგალითად, ევროკავშირში აკრძალულია 100 მლ-ზე მეტი სითხის იმპორტირება,   თუ იგი ევროკავშირის  ფარგლებს გარეთაა შეძენილი. ანუ, თუ თქვენ თბილისიდან პრაღაში მიფრინავთ ვარშავას გავლით, საქართველოს უბაჟო ვაჭრობის პუნქტში შეძენილი ღვინის ბოთლის კონფისკაციას მოახდენენ  გადასაჯდომ პუნქტში. თუ თქვენ ევროკავშირში მოგზაურობთ, უბრალოდ არ გახსნათ პაკეტი და თან იქონიეთ ქვითარი, რომელიც ადასტურებს, რომ შენაძენი ერთი დღე-ღამის განმავლობაშია გაკეთებული. ბოლო სიტყვა ნებისმიერ შემთხვევაში – აეროპორტის თანამშრომელზეა.

საჩხვლეტ-საჭრელი ნივთები

ხელბარგით აკრძალულია იმ ნივთების ტრანსპორტირება, რომლებითაც შესაძლებელია ტრავმის მიყენება. ჩვენ კარგად გვესმის, რომ თბილისიდან ნიუ-იორკში ფრენის დროს სვიტერის მოქსოვა და სურათის მოქარგვაცაა შესაძლებელი, მაგრამ საქსოვი ჩხირები, ნემსები, მაკრატელი და სხვა ბასრი ნივთები აკრძალულია. არც კი ეცადოთ ჩანთით გადაიტანოთ კორპსაძრობი, ლითონის ფრჩხილების ქლიბი, საჭრელი, სახრახნისი და ა.შ.

სპორტული ინვენტარი

თხილამურების, სნოუბორდსი, ციგურების, გოლფის ჯოხების, ჩოგბურთის ჩოგნების, სკეიტბორდებისა და სხვა სპორტული ინვენტარის სალონში ატანა აკრძალულია. ამ ნივთების ტრანსპორტირება, როგორც წესი,  დარეგისტრირებული ბარგით ხორციელდება ან როგორც არაგაბარიტული ტვირთი სპეციალური ტარიფით (მაგალითად, თუ საუბარია თხილამურებზე ან სნოუბორდზე).

მუსიკალური ინსტრუმენტები

ალბათ, დიდ მანძილზე ფრენა უფრო სასიამოვნო იქნებოდა, თუ ერთ-ერთი მგზავრი გიტარაზე ან ბაიანზე შეასრულებდა მოდურ ჰიტებს. მაგრამ გაბარიტული მუსიკალური ინსტრუმენტების ბორტზე ატანა აკრძალულია.  ასეთი ნივთები სატვირთო განყოფილებაში უნდა იყოს. ზოგიერთი ავიაკომპანია მგზავრებს უფლებას აძლევს მცირე მუსიკალური ინსტრუმენტები  იქონიონ თან  თვითმფრინავის სალონში, რომელთა ზომაც არ აღემატება ხელბარგის დასაშვებ ზომას (მაგალითად, ფლეიტა, ვიოლინო).

ზოგიერთი საკვები პროდუქტი

კონსერვირებული საკვები, რბილი ყველი და მალფუჭებადი პროდუქტები –  სამგზავრო განყოფილებაში აკრძალულია. მაგრამ ბორტზე შეგიძლიათ აიტანოთ ცოტა ბოსტნეული, ხილი, ორცხობილა, თხილი, კანფეტი ან შოკოლადი. რა თქმა უნდა, ეს არ არის სადღესასწაულო სუფრა, მაგრამ მაინც კარგია.

ცხოველები

ყოველ ავიაკომპანიას თავისი წესები აქვს, ამიტომ უმჯობესია თუ მათ წინასწარ გაეცნობით. მაგალითად, უკრაინის საერთაშორისო ავიახაზები მხოლოდ კონტეინერში მოთავსებული 8 კგ-მდე ძაღლებისა და კატების სალონში ტრანსპორტირების უფლებას იძლევა. უფრო დიდი ზომის ცხოველები სატვირთო განყოფილებით გადაჰყავთ.  უფასოდ მგზავრობენ  სამსახურებრივი დანიშნულების ცხოველები (მაგალითად, ძაღლი-გამძღოლი), სხვა შინაური  ცხოველების  ტრანსპორტირებისთვის სპეციალური ტარიფის გადახდა მოგიწევთ. მფლობელმა თან უნდა იქონიოს სამედიცინო ცნობა, ვაქცინაციის დამადასტურებელი დოკუმენტები და ექსპორტის ნებართვა.

წინასწარ აცნობეთ ავიაკომპანიას, რომ თქვენ ცხოველთან ერთად გეგმავთ ფრენას. თქვენი ცხოველისთვის რეისზე  ადგილი უნდა გამოყონ  (რაოდენობა ყოველთვის შეზღუდულია).

სათამაშო იარაღი

ხელბარგით ტრანსპორტირება აკრძალულია პლასტმასის პისტოლეტების, დანებისა და სხვა სათამაშოების, რომლებიც იარაღის იმიტაციას ახდენენ. უმჯობესია, თუ თქვენი შვილისთვის რბილ დათუნიას წამოიღებთ. იგი ბავშვს გაართობს თვითმფრინავში, და ამავდროულად მსოფლიოს მოინახულებს.

Posted in ბლოგი, ლაიფჰაკი and tagged , , .