მავრიკი: პლაჟები, ექსკურსიები და რომი

ყველა შესაძლო სტიქიის, ფლორის, ფაუნისა და ეროვნების შეკრების ადგილი, რომლებიც ერთმანეთთან სრულ ჰარმონიაში ცხოვრობენ. ეს მავრიკია და ახლა მას უკეთ გავიცნობთ.

უცხოური ტერიტორიების კოლონიზაციის ხანგრძლივი პერიოდის განმავლობაში ინდოეთის ოკეანეში, მადაგასკართან ახლოს მდებარე ამ პატარა კუნძულს  უამრავი მფლობელი ჰყავდა. სწორედ ამიტომ დღეს ამ კუნძულზე  მსოფლიოს სხვადასხვა კუთხიდან ათეულობით ეროვნებაა დასახლებული. აქ მრავალ სხვადასხვა დიალექტს, პოპულარულ ენას გაიგონებთ და ეს ადამიანები ერთმანეთთან სრულ სიმშვიდესა და ჰარმონიაში ცხოვრობენ.

სასარგებლო ინფორმაცია

საქართველოს მოქალაქეებს მავრიტიუსის რესპუბლიკაში (მავრიკია) 90 დღემდე გასამგზავრებლად ვიზა არ ესაჭიროებათ. კუნძულზე ვიზიტის საუკეთესო დრო დეკემბრიდან თებერვლის ჩათვლით პერიოდია.

მავრიკის აეროპორტი (პლაისანსი) სამხრეთ-აღმოსავლეთ სანაპიროზე მდებარეობს, მაებურგის მახლობლად.

კუნძულზე ცხოვრების ღირებულება ორადგილიან ნომერში 20-25 დოლარიდან იწყება.

სადილი ადგილობრივ რესტორანში ერთ ადამიანზე 5 დოლარი ღირს.

კუნძულზე ყველაზე პოპულარული ტრანსპორტი ავტობუსები და გაქირავებული ავტომობილებია.

საშუალო კლასის ავტომობილის  ქირაობა დღეში 25 დოლარს შეადგენს. გაქირავების პუნქტები განთავსებულია როგორც აეროპორტში, ისე ყველა პოპულარულ ტურისტულ ადგილზე. ავტომობილის ქირაობას თვითმფრინავის ტრაპიდან ჩამოსვლისთანავე შეძლებთ, ხოლო მისი დატოვება კუნძულის მეორე ბოლოში შეგიძლიათ, იმავე კომპანიის ან მათი პარტნიორების ოფისში.

დასვენება პლაჟზე

რა თქმა უნდა, მავრიკიაში ყველა მზის, ქვიშის და ცისფერი ლაგუნის საძიებლად მიემგზავრება. ვისაც თავისი დასვენების გატარება სანაპიროზე და ინდოეთის ოკეანის ლაჟვარდოვან წყალში სურს, ვურჩევთ კუნძულის დასავლეთ ნაწილში მდებარე ქალაქ  ფლიკ-ან-ფლაკს ეწვიოს. აქ ყველაფერია მზის ქვეშ კომფორტული დასვენებისთვის – აქ იდეალურად განვითარებული ინფრასტრუქტურაა  სხვადასხვა მოთხოვნილებისა და სურვილების მქონე ტურისტებისთვის. აქ საკმაოდ პოპულარულია დაივინგი და ბევრი საინტერესო ადგილია, რომლებიც  როგორც დამწყებ, ისე გამოცდილ დაივერებს დააინტერესებს.

დაივინგის ღირებულება დაახლოებით 40 დოლარია, 65 დოლარი კი –  სკოლაში დაივინგის სწავლების ერთი გაკვეთილის ღირებულებაა.

მავრიკიაზე დასვენების კიდევ ერთი პოპულარული ადგილი კურორტი ლე-მორნია – წყნარი კუთხე კუნძულის სამხრეთ დასავლეთ ნაწილში, უმოქმედო ვულკანი მორნ-ბრაბანის ძირას. ეს საყვარელი ადგილია განმარტოებით დასვენების მოყვარულთათვის, ასევე სერფერებისა და  „ვეივრაიდერებისთვის“, რომლებსაც გაშლილი, ნახევრად ცარიელი პლაჟები და მაღალი ტალღები სჭირდებათ სიჩქარის განსავითარებლად. ამ ადგილს თევზაობის მოყვარულებიც დააფასებენ, რადგან აქ თინუსისა ​​და ბარაკუდას დაჭერაა შესაძლებელი, ხოლო თევზჭერის შემდეგ – მათი პირდაპირ პლაჟზე, კოცონზე მომზადებას  შეძლებთ.

ყველაზე პოპულარული ადგილი ირმის კუნძულია.   თავისი სახელწოდება კუნძულმა ოდესღაც ნახევრად ველური ირმების დიდი რაოდენობის გამო მიიღო, რომლებიც ადამიანთან კონტაქტში  სიამოვნებით შედიოდნენ. ახლა აქ ყველაზე სუფთა და ლამაზი პლაჟია მთელს სანაპიროზე, რომელიც ყოველწლიურად ათასობით ტურისტს იზიდავს. ყველაზე გამოცდილი და პრეტენზიული ტურისტიც კი უკმაყოფილო ვერ დარჩება. გარდა ამისა, ირმის კუნძული დასვენებისა და სპორტის უამრავ საშუალებას გთავაზობთ – ბავშვებისა და მოზრდილთათვის, ექსტრემალებისა და მშვიდ წყლებში კატამარანის ტარების მოყვარულთათვის.

ყველა საკურორტო ზონაში განთავსების ღირებულება დაახლოებით ერთნაირია, ყველაფერი მხოლოდ სასტუმროს აბრაზე  განთავსებულ ვარსკვლავთა რაოდენობაზეა დამოკიდებული. ყველაზე იაფი სასტუმროს პოვნას  20 დოლარად შეძლებთ ორადგილიან ნომერში, ხოლო საშუალო და კომფორტ კლასის ნომრები, შესაბამისად – $50-70  და $100-150 ღირს.

სასტუმროები

ექსკურსიები

თუ თავგადასავლებისა და ღირსშესანიშნაობების საძიებლად გსურთ წასლვა, კუნძულზე მათი იმდენი რაოდენობაა, რომ დეტალური აღწერის შემთხვევაში სქელი წიგნის დაწერაა შესაძლებელი. ამიტომ ჩვენ შევეცდებით ყურადღება ყველაზე პოპულარულ და მრავალფეროვან ადგილებზე მივაპყროთ, იმისათვის, რომ კუნძულის ატმოსფერო მაქსიმალურად შეიგრძნოთ.

პირველი, უდავოდ, შამარელის ქვიშაა. ბევრი მას ბუნების სასწაულს უწოდებს, რადგან სხვა მსგავსი მოვლენა მთელს მსოფლიოში არ არსებობს. ეს არის პატარა ქვიშიანი უდაბნო, რომლის ქვიშა შვიდ სხვადასხვა ფერადაა  შეღებილი, რითაც ადგილი უცხოპლანეტელ ლანდშაფტს ემსგავსება. ყველაზე ამოუცნობი კი ის არის, რომ ფერები რაღაც სასწაულებრივი გზით არ ირევა ერთმანეთში და მთელ ტერიტორიაზე სწორ ფენებადაა განლაგებული. სუვერინის სახით ასეთი ქვიშით შევსებული კოლბა შეგიძლიათ  შეიძინოთ  – გვერწმუნეთ, ის ასე ფენა-ფენად დაწყობილი დარჩება და არ აირევა. მეცნიერები მთელი მსოფლიოს მასშტაბით დღემდე თავს იმტვრევენ ამ ფაქტზე.

ვიზიტის მომდევნო პუნქტი ეროვნული პარკი „შავი მდინარის ხეობა“ უნდა იყოს, რომელიც ქვეყნის მთლიანი ფართობის 3.5%-ს იკავებს (6500 ჰექტარი). კუნძულის ვიზიტორების უმრავლესობა ამ ადგილს მთავარ ბუნებრივ ღირსშესანიშნაობად მიიჩნევს.  აქვე კუნძულის უმაღლესი წერტილი მდებარეობს – შავი მდინარის პიკი. თქვენ უამრავ ჩანჩქერს, ხეობას, ველურ ირემს, მაიმუნს, ვარდისფერ მტრედს და ადგილობრივი ფლორისა და ფაუნის სხვა ღირსშესანიშნაობას შეხვდებით.

თუ კუნძულის სულს ეძებთ, მაშინ გრან-ბასენში გაემგზავრეთ – წმინდა ინდუისტურ ტაძარში, რომლის სახელწოდება ითარგმნება როგორც „დიდი წყალსატევი“. ტაძრის კომპლექსის შესასვლელს უძველესი ღვთაებების ქანდაკებები იცავენ – შივა და ანუამანგა. ადგილობრივი მოსახლეობის თქმულებებით, ტაძართან ახლომდებარე წყალსატევებში ინდუისტური ღვთაებების სულები ცხოვრობენ, რომლებიც ამ ადგილს იცავენ და ტაძრის ყველა ვიზიტორს წარმატებით აჯილდოვებენ.

მსოფლიოში ერთ-ერთი უძველესი ბოტანიკური ბაღი –  სერ სივუსაგურა რამგულამას სახელობის ბაღი.  წლიდან წლამდე ბაღი უამრავ ტურისტს იზიდავს მთელი მსოფლიოს მასშტაბით. მისი ფართობი – დაახლოებით 25 ჰექტარია.  აქ მრავალი უნიკალური მცენარის და ცხოველის ხილვას შეძლებთ, განსაკუთრებით კი იმ ფრინველების, რომლებიც ადრე მთელს კუნძულზე ბინადრობდნენ, მაგრამ ხალხის აქტიური დასახლების გამო თითქმის განადგურდნენ და წითელ წიგნის ნუსხაშია შეტანილი. პარკი ფრანგმა ბოტანიკოსმა დაარსა სანელებლების ახალი სახეობების გამოსაყვანად, მაგრამ დროთა განმავლობაში იგი გაფართოვდა და ნაკრძალ ზონად იქცა. მის ტერიტორიაზე  შაქრის ლერწმის გადამამუშავებელი ძველი ქარხნის ზუსტი ასლია აშენებული, რაც ვიზიტორებს ამ ტექნოლოგიასთან გაცნობისა და მონაწილეობის მიღების შესაძლელობას აძლევს.

და, რა თქმა უნდა, აუცილებლად დააგემოვნეთ ადგილობრივი რომი. იგი ყველგანაა. რომის წარმოებით თითქმის ყველა დასახლებაა დაკავებული  და იგი კუნძულის ყველაზე პატარა რესტორნებშიც კი იყიდება. აქ ჩამოხვიდეთ და ეს მაგარი სასმელი არ გასინჯოთ, ნამდვილად გაგიჭირდებათ 🙂

 

Posted in ბლოგი, იდეები მოგზაურობისთვის and tagged , , .