MADE IN CHINA: მოგზაურობა ჩინეთში

მსოფლიოს რომელ წერტილშიც არ უნდა ჩახვიდეთ, აუცილებლად შეხვდებით ჩინელ ტურისტებს, რომლებიც რომელიმე ღირსშესანიშნაობას გატაცებით უღებენ სურათს. ზოგჯერ მოგეჩვენებათ, რომ ეს ყველაზე მეტად მოგზაური ერია მსოფლიოში! მოდით გადავდგათ ნაბიჯი და სამოგზაუროდ ჩინეთში გავემგზავროთ. თუ რა უნდა გაითვალისწინოთ, რა უნდა ნახოთ და როგორ უნდა ჩახვიდეთ ცისქვეშეთში – ამ სტატიაში გაეცნობით.

ჩინეთი იმდენად დიდი და მრავალფეროვანია, რომ ნებისმიერ სტუმარს შეუძლია შესთავაზოს რაც მის გულს მოესურვება: უდაბნოები, უკიდეგანო სტეპები, ბრინჯის მინდვრები, მთები, ზღვები, კუნძულები, მეგაპოლისები, სოფლები, ტაძრები, მონასტრები – სუფთა სინდისით შეგვიძლია ვთქვათ, რომ ამ ქვეყანაში ყველაფერია. ყველაზე დახვეწილი მოგზაურიც კი ყოველთვის იპოვის რაიმე მისთვის ახალსა და შეუცნობს.

როგორ უნდა ჩამოხვიდეთ აქ?

ჩინეთში ფრენა უმჯობესია რეისით თბილისი-პეკინი. ბილეთების ღირებულება 445 აშშ დოლარიდან იწყება ორივე მიმართულებით. გაითვალისწინეთ, რომ ჩინეთში გასამგზავრებლად ვიზა დაგჭირდებათ, რომელსაც 7 დღეში უპრობლემოდ აიღებთ ჩინეთის საკონსულოში.

პეკინი

პეკინი, ან როგორც მას ჩინელები უწოდებენ ბეიცზინი, ერთნახევარ მილიარდიანი ქვეყნის დედაქალაქის სტატუსს ამართლებს. ამ ქალაქში პირველივე წუთიდან ხალხის, მანქანების, მოპედებისა და სხვა ობიექტების, მოწყობილობებისა და ცხოველების ორომტრიალში მოხვდებით. რამდენიმე საათი მხოლოდ იმისთვის დაგჭირდებათ, რომ ცხოვრების წარმოუდგენლად სწრაფ ტემპს შეეჩვიოთ, მაგრამ შემდეგ ამ ნაკადს შეუერთდებით და თავს ბუნებრივად იგრძნობთ ამ ჭეშმარიტად მონუმენტურ ქალაქში.

რთულია იმ ყველაფრის ჩამოთვლა, რაც პეკინში უნდა მოინახულოთ და იხილოთ. მაგრამ არსებობს შვიდი ძირითადი ადგილი, რომლებიც არ უნდა დატოვოთ ყურადღების მიღმა:

  1. აკრძალული ქალაქი (შეტანილია იუნესკოს მსოფლიო მემკვიდრეობის  ძეგლთა სიაში), რომლის ფართობი 720 ათასი მ2 შეადგენს და სადაც 980 შენობაა განლაგებული. ამ ქალაქში ჩინეთის იმპერატორები და მათი ოჯახის წევრები ცხოვრობდნენ 1420-1912 წლებში.
  2. ტიანანმენის მოედანი – ყველაზე დიდი მოედანი მსოფლიოში, სადაც რამდენიმე ძირითადი ისტორიული ნაგებობაა განთავსებული:
  3. მაო ძედუნის მავზოლეუმი; ჩინეთის ეროვნული მუზეუმი; სახალხო კრების შენობა (ჩინეთის სახალხო რესპუბლიკის უმაღლესი საკანონმდებლო ორგანო); ზეციური სიმშვიდის კარიბჭე.
  4. საზაფხულო საიმპერატორო სასახლე, რომელიც ასევე შედის იუნესკოს ძეგლთა დაცვის სიაში. კომპლექსი  3000-ზე მეტი შენობისგან შედგება. მის ტერიტორიაზე მდებარეობს მსოფლიოში ყველაზე გრძელი მოხატული სამხატვრო გალერეა, რომლის სიგრძე 728 მეტრია, ხოლო მის კედლებზე 8000 ნახატი შეგიძლიათ იხილოთ.
  5. იუნესკოს მსოფლიო მემკვიდრეობის კიდევ ერთი ძეგლია ცის ტაძარი (ან მოსავლის ტაძარი). ტაძარი 600 წლისაა, უძველესი დროიდან რელიგიური ნაგებობის სახით ცისა და მზის თაყვანსაცემად იყენებდნენ, სწორედ აქედანაა ორი სახელწოდება: ძველი ჩინური რწმენის თანახმად, სწორედ მზე აგზავნიდა  დედამიწაზე მოსავალს ან გვალვას.
  6. პეკინის ატმოსფერო სრულად რომ შეიგრძნოთ, უბრალოდ უნდა ეწვიოთ ვანგფუჯინგს (Wangfujing) – უძველეს სავაჭრო ქუჩას, რომელსაც ზოგჯერ „პირველ“ ქუჩასაც უწოდებენ. აქ ცნობილი ბრენდების დაახლოებით 300 მაღაზიაა განთავსებული, ქუჩის ნაწილზე კი  საკვები ობიექტების დიდი კომპლექსია, სადაც იპოვით მომზადებულ მწერებს, ძაღლებს, კატებს და სხვა ჩინურ „დელიკატესებს“, რომლებიც ხშირად აცბუნებს დასავლური კულტურის ადამიანებს.
  7. და, რა თქმა უნდა, ჩინეთის დიდი კედელი, რომელიც ქალაქისა და მთლიანად ქვეყნის მთავარი სავიზიტო ბარათია. პეკინის მახლობლად, კედლის რამდენიმე კარგად შემონახული მონაკვეთი მდებარეობს, სადაც მცირე რეკონსტრუქციის შემდეგ სიამოვნებით იღებენ სტუმრებს. ოფიციალური მონაცემებით, მთელი კედლის სიგრძე 8851,9 კმ, რაც თბილისიდან ბარსელონამდე დაახლოებით 2-ჯერ მეტ მანძილზე მდებარეობს მთელი ევროპის გავლით.

სასტუმროები და ტრანსპორტი პეკინში

პეკინის სასტუმროებში ორადგილიანი ნომრის ღირებულება 20 დოლარიდან იწყება და  დაახლოებით 1000 დოლარზე მთავრდება.  საზოგადოებრივი ტრანსპორტით სარგებლობა 30 ცენტიდან 2 დოლარამდე დაგიჯდებათ, მანძილისა და ტრანსპორტის ტიპის მიხედვით. ავტობუსები უფრო იაფია, მაგრამ მეტროს შემთხვევაში ცოტა მეტის გადახდა მოგიწევთ. ადგილობრივ ჩინურ კაფეებში დაახოლებით $2-3 ისადილებთ. საკუთრივ, ფასები მთელს ჩინეთში თითქმის ერთნაირია და დაახლოებით 10%-ის ფარგლებში მერყეობს.

პეკინის საფუძვლიანად დათვალიერების შემდეგ, შეგიძლიათ გზა განაგრძოთ. პირველ რიგში, თქვენ უნდა გადაწყვიტოთ თუ რა ტიპის დასვენება მოგწონთ, რადგან, როგორც აღვნიშნეთ, ჩინეთს უამრავი საინტერესო ვარიანტი შეუძლია შემოგთავაზოთ.

სად წავიდეთ ჩინეთში?

მთის პეიზაჟების, ტრეკინგისა და მთამსვლელობის მოყვარულები ქალაქ ჩენდუს უნდა ეწვიონ, რომელიც ჩინეთის სახალხო რესპუბლიკის შუაგულში, ტიბეტის საზღვართან მდებარეობს, სადაც არ არის ადვილი მოხვედრა, რადგან ამისათვის ჩინეთის ხელისუფლების სპეციალური ნებართვა დაგჭირდებათ და მხოლოდ ტურისტული ჯგუფის შემადგენლობაში შეძლებთ მოგზაურობას. ამგვარი ვიზიტები წინასწარ უნდა დაგეგმოთ და ადგილობრივ ტურისტულ კომპანიებს უნდა მიმართოთ.

მათთვის, ვისაც არ აქვს დრო და სურვილი, ჩენდუში დარჩენას ვურჩევთ, რადგან ეს უკვე ტიბეტის მთების დასაწყისია. აქ მდებარეობს ჩინეთის ერთ-ერთი ყველაზე დიდი  პანდების პარკი, სადაც მათ ნახვას და  მოფერებასაც კი შეძლებთ.

  • პეკინი-ჩენდუ ავიაბილეთების ღირებულებაა $80;
  • მატარებელი-კუპე – $110;
  • მატარებელი დასაჯდომი ადგილებით – $40, მაგრამ გაითვალისწინეთ, რომ მატარებლით მგზავრობის ხანგრძლოვობა დაახლოებით 30 საათს შეადგენს, რადგან ქალაქებს შორის მანძილი 2000 კმ-ია;
  • ასევე არსებობს ჩქაროსნული მატარებელი, რომლის ღირებულებაა $200 ადამიანზე, მგზავრობის ხანგრძლივობა 14 საათია;
  • თბილისიდან ფრენის ღირებულებაა 350-400 აშშ დოლარი ერთი გზა.

ფრენა, რა თქმა უნდა, უფრო სწრაფია, მაგრამ მატარებლით ჩინეთის ყოფის კოლორიტითა და ფანჯრიდან ხედებით დატკბობას შეძლებთ. ფაქტობრივად  თქვენ ქვეყნის 2/3 გადაკვეთთ დიაგონალზე – არჩევანი თქვენზეა!

ზღვის მოყვარულებიც კმაყოფილი დარჩებიან, რადგან ჩინეთის მთელი აღმოსავლეთ ნაწილი გრძელ ზღვის სანაპიროს წარმოადგენს. გარდა ამისა, ქვეყანას უამრავი კუნძული აქვს სხვადასხვა ზღვაში. ზოგიერთ მათგანზე ჯერ კიდევ საერთაშორისო დავა მიმდინარეობს, მაგალითად, ტაივანი – კუნძული, რომლის დამოუკიდებლობა ჯერ კიდევ არ არის აღიარებული მსოფლიოს ბევრი ქვეყნის მიერ, ხოლო ჩინურ რუკებზე აღნიშნულია როგორც ჩინეთის სახალხო რესპუბლიკის ნაწილი.

თუ თქვენ, პეკინში ჩამოსვლისა და ექსკურსიებზე წასვლის შემდეგ ზღვაზე დასვენება გადაწყვიტეთ, მაშინ ამ სურვილის ასრულება  აღმოსავლეთ სანაპიროს ნებისმიერ ადგილზე შეგიძლიათ, რადგან პრაქტიკულად ყველა ქალაქში მრავალი კარგად მოვლილი პლაჟი და შესანიშნავი ინფრასტრუქტურაა. მაგრამ დასვენების საუკეთესო ადგილია ჰაინანის კუნძული, რომელიც ჩინეთის სამხრეთ ნაწილში მდებარეობს, ვიეტნამის საზღვართან ახლოს. აქ თითქმის მთელი წლის განმავლობაში თბილა,  შესაძლებელია ბანაობა და გარუჯვა. ამ კუნძულის პეწი – მანგოს, ყავის, ჩაის, ანანასის, ბანანის, ქოქოსის და სხვა მრავალი ეგზოტიკური მცენარის პლანტაციებია.

  • პეკინიდან ფრენა $150 დაგიჯდებათ;
  • თბილისიდან – $450 ერთი გზა.

ამ უკიდეგანო ქვეყანაში ღია სივრცეებისა და ბუნებაში დასვენების მოყვარულთათვისაც შესანიშნავი ადგილი მოიძებნება. საუბარია ჩინეთის ჩრდილო-დასავლეთში მდებარე გობის უდაბნოზე, რომლის ცენტრი ქალაქ ურუმჩიშია (Urumqi). ეს რეგიონი დასავლეთით ყაზახეთს, ხოლო ჩრდილო-აღმოსავლეთით მონღოლეთს ესაზღვრება და თუ არ ჩავთლით ტიბეტის მთებს, მთელს ქვეყანაში ყველაზე ნაკლებად დასახლებული ადგილია. ვინაიდან ცოტა ხნის წინ აქ ხალხი თითქმის არ ცხოვრობდა, გზად მდებარე ყველა ქალაქი ჩინეთის მრეწველობის, ეკონომიკისა და ურბანიზაციის ზეაქტიური განვითარების მაგალითია.

რამდენიმე მილიონი ადამიანის მოსახლეობის მქონე ქალაქები ბოლო 40 წლის მანძილზე აშენდა. უდაბნოში გავლის დროსაც კი, სადღაც ჰორიზონტზე მაღალსართულიან შენობებს დაინახავთ. მართლაც, ეს სახელმწიფო წარმოუდგენელი განვითარების ტემპს აჩვენებს. თუმცა სტეპებსა და უდაბნოებში ჯერ კიდევ შეძლებთ იპოვოთ მონღოლებისა და ჩინელების მომთაბარე ტომები, რომლებიც კარვებში ცხოვრობენ და ცხენებითა და აქლემებით გადაადგილდებიან. შთამბეჭდავია ცათამბჯენებსა და მომთაბარეებს შორის არსებული კონტრასტი.

  • პეკინიდან ფრენა – $135;
  • თბილისიდან ფრენა – $300.

და ბოლოს, რჩევა ეგზოტიკური და ტროპიკული კლიმატის მოყვარულთათვის. თქვენ აუცილებლად უნდა ეწვიოთ იუნანის პროვინციას სამხრეთ ჩინეთში. იგი ერთდროულად სამხრეთ-აღმოსავლეთ აზიის სამ ქვეყანას ესაზღვრება: ვიეტნამს, ლაოსსა და მიანმას (ბირმას). ყველა, ვინც ეს ადგილი მოინახულა, მას ამ უზარმაზარი ქვეყნის მშვენებას უწოდებენ. ამ პროვინციაში ჩინეთის, ტაილანდის, ლაოსის, ვიეტნამისა და ბირმის ტრადიციებია შერეული და ეს ყველაფერი კოლონიზაციის პერიოდის ევროპული კულტურის გავლენითაა შეზავებული. ქალაქებში წარწერების უმრავლესობა  სამ ენაზეა დუბლირებული: ჩინურ, ტაილანდურ და ინგლისურ.

თუ ამ ადგილს ეწვევით,  არავითარ შემთხვევაში არ გაჩერდეთ ერთ ადგილზე. აუცილებლად ეწვიეთ ქალაქებს  Dali, Yuxi, Pu’er, ასევე Xishuangbanna, სადაც ჩინელებმა საკუთარი ტაილანდი ააშენეს – მათთვის, ვინც „ორიგინალ“ ტაილანდში გამგზავრებას ვერ შეწვდება. მთელი ქალაქი ტაძრებით, ტაილანდური არქიტექტურით, რესტორნებით, სასტუმროებით – ყველაფერი როგორც ტაილანდშია. ამ რეგიონის კიდევ ერთი თავისებურება იმაში მდგომარეობს, რომ მისი ნაწილი მთებითაა დაფარული, ამიტომ გირჩევთ ავტომობილით ან ავტობუსით იმოგზაუროთ.

აქ თქვენ შეძლებთ გაისეირნოთ ხიდებზე, რომლებიც ხეობაში თავბრუდამხვევ სიმაღლეზე მდებარეობს,  ან მრავალკილომეტრიან გვირაბში გაიაროთ, რომელიც მოგეჩვენებათ, რომ არასდროს დასრულდება.  ფანჯრებიდან ჩანს თუ როგორ ეცემა ბანანები გორაკის ფერდობებიდან  პირდაპირ გზაზე, რომელიც თხელი ნისლითაა დაფარული. აქ ყოველთვის მაღალი ტენიანობაა და მიწისა და ბალახეულის სუნი დგას. თუ წასახემსებლად შეჩერდებით, ფრთხილად იყავით, რომ  შემთხვევით ხვლიკს არ დააბიჯოთ, რომელიც მშვიდობიანად ეფიცხება მზეს. აქ ბუნებისა და ადამიანის იდილიაა, რომელსაც მხოლოდ გამვლელი მანქანების ხმა არღვევს.

  • ფრენა პეკინი-კუნმინი, პროვინციის ცენტრი — $110;
  • მატარებელი-კუპე – $125;
  • მატარებელი დასაჯდომი ადგილებით – $50, მგზავრობის მინიმალური ხანგრძლოვობა – 35 საათი;
  • თბილისიდან ფრენა –  $825.

არ შეგეშინდეთ ჩინეთში უჩვეულო საკვების დაგემოვნება, ხალხის გაცნობა და ადგილობრივ კულტურაში ჩართვა. საკვები ძალიან გემრიელი, ხალხი კეთილგანწყობილი, კულტურა კი იმდენად ძველი და კოლორიტულია, რომ მაღალი ალბათობით, თქვენ ეს ყველაფერი მთელი ცხოვრება დაგამახსოვრდებათ.

Unfortunately we don't have actual data for flights from Tbilisi to Beijing. Find tickets from Tbilisi to Beijing

იაფი ავიაბილეთები თბილისიდან ურუმჩი

გაფრენის თარიღი დაბრუნების თარიღი გაჩერება ავიაკომპანია ბილეთების მოძებნა

16.12.2019

23.12.2019

1 stop

ფასი 1 342

 

Posted in ბლოგი, იდეები მოგზაურობისთვის and tagged , , .