ჰელოუინი 2018: TOP-5 ყველაზე საშიში ადგილი პლანეტაზე

დღეს ჰელოუინია, რაც ნიშნავს, რომ დროა თქვენი ნერვები გამოსცადოთ. გთავაზობთ ჩვენი პლანეტის ყველაზე საშიში ადგილების სიას. ამ ადგილების მონახულებას ალბათ ვერავინ გაბედავს, მაგრამ მათ შესახებ ინფორმაციის მიღება საინტერესო იქნებოდა!

მკვდარი თოჯინების კუნძული (მექსიკა)

მექსიკა საკმაოდ მისტიკური ქვეყანაა თავისი შამანებითა და პეიოტებით, მაგრამ აქ ყველაზე შემაძრწუნებელი ადგილია – კუნძული, რომელიც შემზარავი, ცარიელი თვალის ბუდის მქონე თოჯინებითაა სავსე.
ყველაფერი სამოცი წლის წინ დაიწყო, როდესაც აქ პატარა გოგონა დაიღუპა. ადგილობრივმა მაცხოვრებელმა ჯულიან სანტანა ბარერამ კუნძულის სანაპიროზე თოჯინა იპოვა, რომელიც, როგორც ჩანს, ბავშვს დაეკარგა. მექსიკელებს სჯერათ, რომ ბავშვებსა და თოჯინებს შორის განუყოფელი კავშირი არსებობს, ამიტომ ჯულიანმა სათამაშო იქ დატოვა, სადაც დაღუპულ ბავშვს დაუვარდა.


ამ შემთხვევის, ფსიქოტროპული კაქტუსების თუ ალკოჰოლის გადაჭარბებული დოზის მიღების გამო ჯულიანი ჭკუიდან შეიშალა. მას კუნძულზე მიჰქონდა ყველა ქუჩაში ნაპოვნი თოჯინა, მათ ხეებსა და რამდენიმე შენობაზე ჰკიდებდა. შემდეგ კი თავად დაიწყო ამ თოჯინებს შორის ცხოვრება.

არავინ იცოდა ამ მისტიკური ადგილის არსებობის შესახებ, სანამ ადგილობრივმა მოსახლეობამ არხის გაწმენდა არ დაიწყო. მათ წინაშე გადაშლილი სანახაობა შოკისმომგვრელი იყო: ყველა მხრიდან მათ დაახლოებით ათასი დამახინჯებული თოჯინა უცქერდა. მაგრამ მექსიკელები არ დაიბნენ – ნაცვლად იმისა, რომ შეშინებულიყვნენ, მათ … ბიზნესის გაკეთება გადაწყვიტეს. 2001 წელს ჯულიანის სიკვდილის შემდეგ, ყოველწლიურად ათასობით ტურისტი ჩამოდის ამ საშინელი კუნძულის მოსანახულებლად.

 

ლუკოვა (ჩეხეთი)

მიტოვებული ეკლესია ჩეხეთის პატარა სოფელ ლუკოვაში რეალური სალოცავი ადგილია ტურისტებისა და … მოჩვენებებისთვის. საქმე იმაშია, რომ წმინდა გიორგის ტაძარში, რომელიც ჯერ კიდევ 1968 წელს დაიხურა, ამჟამად უჩვეულო ინსტალაციაა განლაგებული – მომლოცველი სულები, რომლებიც გრძელი თეთრი სამოსითაა დაფარული. ეს სულისშემძვრელი ადგილი მხატვარი იაკუბ ხადრავას მიერაა გაფორმებული, რომელმაც ამგვარად სიმბოლურად გამოსახა გადაშენების პირას მყოფი სოფლები, სადაც წირვას უკვე მხოლოდ გარდაცვლილები ესწრებიან.

ფსიქიატრიული საავადმყოფო პარმაში

იტალიურ ქალაქ პარმაში მიტოვებული ფსიქიატრიული საავადმყოფო მდებარეობს ფსიქიკურად დაავადებული ადამიანებისთვის. რა თქმა უნდა, ის უკვე დიდი ხანია იზიდავს მძაფრი შეგრძნებების მოყვარულ ადგილობრივ მოსახლეობას, მაგრამ ამ ადგილს უკვე ტურისტებიც საგანგებოდ სტუმრობენ.

საქმე იმაშია, რომ ფსიქიატრიული საავადმყოფოს კედლებზე ათასობით შავი „აჩრდილი“ გამოჩნდა, რომელიც ყველაზე გაბედულ ადამიანსაც კი შეაძრწუნებს. ეს აჩრდილები – ბრაზილიელი ქუჩის მხატვრის ჰერბერტ ბაგლიონეს ნამუშევარია, რომელმაც უკვე დიდი ხანია თავისი არასტანდარტული არტ-პროექტებით გაითქვა სახელი. ალბათ არ ღირს ამ ადგილის საგანგებოდ მონახულება, მაგრამ თუ შორიახლოს იმყოფებით – ეწვიეთ მას, სანამ საავადმყოფოს შენობა არ დაანგრიეს. უბრალოდ ვერსად იპოვით უკეთეს დეკორაციას საშინელებათა ფილმისთვის!

 

გარდაცვლილთა ქალაქი (ჩრდილოეთ ოსეთი)

გარდაცვლილთა ქალაქი არ არის ამ სოფლის ხატოვანი დასახელება, ამ სოფლის ყველა მკვიდრი უკვე გარდაცვლილია, ცოცხლებს შორის – მხოლოდ ექსკურსიის გიდები და ტურისტებია. ეს მისტიკური ადგილი ჩრდილოეთ ოსეთში, დაბა დარგავსთან ახლოს მდებარეობს.

შორიდან ყველაფერი მშვენიერ მძინარე სოფელს ჰგავს, მაგრამ როგორც კი პატარა თეთრ სახლებს მიუახლოვდებით და დააკვირდებით, მიხვდებით, რომ ეს სამარხებია. ამგვარი დასახლებების პოვნა მთელს ოსეთშია შესაძლებელი, მაგრამ დარგავსის ნეკროპოლი მათ შორის ყველაზე დიდი და კარგად შემონახულია.
საქმე იმაშია, რომ XVIII საუკუნის ბოლომდე ოსები არ კრძალავდნენ გარდაცვლილებს, მათ „მკვდარ სახლებში“ ათავსებდნენ, რომლებიც კარგად ნიავდებოდა. სხეული მუმიფიკაციას განიცდიდა და არ იხრწნებოდა – ადგილობრივი მაცხოვრებლები მიიჩნევდნენ, რომ ამგვარად ისინი არ შეურაცხყოფდნენ იმ ნაყოფიერ მიწას, სადაც ცხოვრობდნენ. დღეს 95 საგვარეულო სამარხია შემორჩენილი და ადგილობრივი ექსკურსიის გიდები მათგან რამდენიმე ძირითადს აჩვენებენ, სადაც ოდესაღაც დარგვასის უმდიდრესი მკვიდრები განისვენებდნენ.

 

საგადა (ფილიპინები)

ფილიპინები თავისი უცნაური შეხედულებებითა და ტრადიციებითაა ცნობილი. მაგრამ ის რაც საგადას მუნიციპალიტეტში შეიძლება ნახოთ, არ შეესაბამება ჩვენს მოსაზრებებს სიცოცხლისა და სიკვდილის შესახებ.

წარმოიდგინეთ რომ ციცაბო კლდეზე დაკიდულია … კუბოები, ასობით კუბო მიცვალებულებთან ერთად. ამასთან ხშირად თავად გარდაცვლილები ამზადებენ ხის აკლდამებს და მიაქვთ კლდესთან – უბრალოდ ისინი სიცოცხლეშივე ზრუნავენ ამის შესახებ, იმისათვის, რომ ხსოვნა მიაგონ memento mori-ს.

ტრადიციის მიხედვით, გარდაცვლილის ნათესავები სხეულს წინასწარ მომზადებულ კუბოში ემბრიონის პოზაში ათავსებენ და კლდეზე ამაგრებენ. და რაც უფრო მაღლა განათავსებენ – მით უფრო დიდია ალბათობა იმისა, რომ გარდაცვლილი ზეცაში ამაღლდება. ყველაფერი ეს მხოლოდ ჩვენთვისაა უჩვეულო, ადგილობრივი მოსახლეობა კი ხშირად მიდის კლდესთან – მათთვის ეს ადგილი წმინდაა.

 

sastumroebi
Posted in ბლოგი and tagged , .

მალხაზ კევლიშვილი