ევროპის 11 საუკეთესო სამთო-სათხილამურო კურორტი

დროა ქუდი და შარფი მოძებნოთ და თოვლში ჯადოსნური დროის გასატარებლად მთებს ეწვიოთ. გთავაზობთ ჩვენს მიმოხილვას ევროპის საუკეთესო სამთო-სათხილამურო კურორტების შესახებ.

გრინდელვალდი, შვეიცარია

გრინდელვალდი, შვეიცარია

გრინდელვალდი, რომელიც ეიგერის მთების ძირშია მიმალული, შვეიცარიის ერთ-ერთი საოცრად ლამაზი სოფელია. თხილამურებით სრიალი აქ უსასრულოდ შეგიძლიათ, რადგან კურორტი აღჭურვილია იუნგფრაუს რეგიონში უდიდესი, 155 კილომეტრიანი სათხილამურო ტრასითა და 27 საბაგიროთი. ფერდობების დაპყრობაში გატარებული გრძელი დღის შემდეგ, ცხელი შოკოლადის დასალევად თვალწარმტაცი ისტორიული სოფლისკენ გაემართეთ, ვახშმამდე კი თოვლში ფეხით გაისეირნეთ და ულამაზესი ხედებით დატკბით.

ზაკოპანე, პოლონეთი

ტატრებისა და გუბალოვკას მთას შორის ხეობაში მდებარე ზაკოპანე პოლონეთის ზამთრის დედაქალაქი და, რა თქმა უნდა, ევროპის ერთ-ერთი საუკეთესო სამთო-სათხილამურო კურორტია. ეს კურორტი 20 საბაგიროთი და 16 ტრასითაა აღჭურვილი და იდეალურია დამწყებ მოთხილამურეთა ჯგუფისთვის, მოვლილი ფერდობებითა და ხელმისაწვდომი ფასით. თავად სოფელი კი, რომელსაც თავისი უნიკალური კულტურით შეუძლია დაიკვეხნოს, კრაკოვის აეროპორტიდან მხოლოდ ორი საათის სავალ მანძილზე მდებარეობს.

სიერა-ნევადა, ესპანეთი

სიერა-ნევადას ფერდობები, რომლებიც ექვს სათხილამურო ზონადაა დაყოფილი, ევროპის ყველაზე სამხრეთ სამთო-სათხილამურო კურორტს წარმოადგენს და პენიბეტიკის ქედზე მდებარეობს. შეგიძლიათ ფერდობზე სრიალისგან დაისვენოთ და გრანადის პროვინციაში მდებარე ისტორიული ქალაქისკენ გაემართოთ, სადაც ალჰამბრას სასახლეს ექსკურსიით ეწვევით და ადგილობრივ კულტურას გაეცნობით. 2100 მეტრის სიმაღლეზე მდებარე კურორტზე გრძელი სეზონია, ასე რომ ისიამოვნეთ თოვლში სრიალით ნოემბრის ბოლოდან მაისის დასაწყისამდე.

ოტაკამი, საფრანგეთი

ზემო პირენეებში მდებარე კურორტი, რომელიც მთელი სეზონის განმავლობაში შთამბეჭდავი პირობებით გამოირჩევა, იდეალური ადგილია იმისათვის, რომ ერთი კვირა თოვლიან მთის ფერდობებზე სრიალში გაატაროთ. ალპური კურორტი, რომელიც შესაფერისია ყველა დონის მოთხილამურეებისთვის, 20 კილომეტრიან ტრასებსა და ყველა კუთხიდან ბუნებრივი, ხელუხლებელი ლანდშაფტის პანორამულ ხედებს გვთავაზობს.

ვიტოშა, ბულგარეთი

სოფიადან ხელის გაწვდენის მანძილზე მდებარე ვიტოშას მთა ზღვის დონიდან 1800 მეტრის სიმაღლეზეა განლაგებული და ბულგარეთის ყველაზე მაღალი სამთო-სათხილამურო კურორტია. ეს კურორტი შესანიშნავი ვარიანტია ოჯახებისთვის, რომლებსაც ფერდობების დიდ არჩევანსა და სათხილამურო სკოლებს სთავაზობს, ასე რომ, ბავშვები არ მოიწყენენ, სანამ თქვენ ციცაბო ფერდობების ტრასებს იპყრობთ. განთავსდით მთის შალეებში და სასტუმროებში ან გაემგზავრეთ ახლომდებარე სიმეონოროსა და დრაგალევცის რაიონებში, რათა განთავსების მეტი ვარიანტი იპოვოთ.

ალპ დუეზი, საფრანგეთი

გრენობლის სამხრეთ-აღმოსავლეთით მდებარე ალპ დუეზს მსოფლიოს ყველაზე მაღალი სათხილამურო ტრასითა და, ეჭვგარეშეა, ევროპის ერთ-ერთი საუკეთესო სამთო-სათხილამურო კურორტით შეუძლია დაიკვეხნოს. კურორტი დიდ არჩევანს სთავაზობს ყველა დონის მოთხილამურეებს და საფრანგეთის სიდიდით მეხუთე სამთო-სათხილამურო კურორტად ითვლება. მზიან პლატოზე მდებარე სოფელი ბურ-დუაზანის ხეობას გადაჰყურებს, რომელიც გრენობლის აეროპორტიდან 90 წუთის სავალ მანძილზე მდებარეობს.

ალპ დუეზში ჩატარდა 2018 წლის პირველი ზამთრის ფესტივალი Tomorrowland 2019 წლის სეზონზეც იგეგმება იგივე ფესტივალის ჩატარება.

პრედიალი, რუმინეთი

პრედიალის მთების უღელტეხილი ქვეყნის ერთ-ერთი ყველაზე ცნობილი სათხილამურო ტრასის განთავსების ადგილია. პრაჰობის ხეობაში (Valea Prahovei) მდებარეობის გამო, სათხილამურო მოგზაურობა მარტივად შეგიძლიათ შეათავსოთ ექსკურსიასთან ახლომდებარე სინაიას პელეშის სასახლეში და თვალწარმტაც ბრაშოვში. პრედიალის, რუმინეთის ყველაზე მაღალმთიანი ქალაქის, მრავალ სათხილამურო ტრასაზე სრიალის შემდეგ, გეძლევათ შესანიშნავი შესაძლებლობა აზუფანისა და პოიანა ბრაშოვის მეზობელი ფერდობები შეისწავლოთ.

ზელ ამ სეე, ავსტრია

ზელ ამ სეე, რომელიც სამი ცნობილი სათხილამურო ზონისგან შედგება, სამოთხეა ბიუჯეტური მოგზაურთათვის მრავალი იაფი კერძით, განთავსების ობიექტითა და სათხილამურო ტრასით, რომელთა ფასები საკმაოდ ხელმისაწვდომია. ავსტრიის ქალაქი ზელის ტბაზე მდებარეობს, სადაც შთამბეჭდავი კიტცშტაინჰორნის მყინვარია განლაგებული. ჯილდოთი აღნიშნულ კურორტ ზალბახთან იგი გონდოლის ტიპის საბაგიროთია დაკავშირებული, სადაც თქვენი ფულიდან მაქსიმალური სარგებლის მიიღებას შეძლებთ ევროპის საუკეთესო სათხილამურო ტრასებზე წვდომის მიღებით, თქვენი ბიუჯეტისთვის ზიანის მიყენების გარეშე.

პინცოლო, იტალია

ტრენტინოს რეგიონში მდებარე კურორტი, რომელიც უფრო მეტად გამოცდილ მოთხილამურეებსა და სნოუბორდისტებს შეეფერება, 1300 მეტრის სიმაღლეზე ვერტიკალური ვარდნის სუნთქვისშემკვრელ ტრასას სთავაზობს. გამოცდილ მოთხილამურეებს შეუძლიათ 20 კილომეტრიან ტრასებზე ბარის თხილამურობით ისიამოვნონ, ბრენტას ალპების ულამაზესი ხედების გარემოცვაში. ხოლო მათ, ვინც თხილამურებით სრიალით არ არის გატაცებული, ვურჩევთ თვალწარმტაც ქალაქ პინცოლოს ეწვიონ, სადაც მრავალი ღირსშესანიშნაობაა: ეკლესიები, დახვეწილი ბუტიკები და ტრადიციული სასაუზმეები.

იასნა დაბალი ტატრები, სლოვაკეთი

49 კილომეტრიანი მარკირებული ტრასის მქონე იასნა სლოვაკეთის უდიდესი სამთო-სათხილამურო კურორტი და დაბალი ტატრების სიმაღლით მეორე მწვერვალია. იგი პოპულარულია როგორც სამთო თხილამურობით, ისე ჩვეულებრივ ფერდობებზე სრიალით. ეს ადგილი იდეალურია ყველა დონის სირთულისთვის, რომელიც ფრისტაილერებსაც კი თოვლის პარკებსა და ფრირაიდის ზონებს სთავაზობს. ეს თვალწარმტაცი ადგილი, სადაც რეგულარულად იმართება საერთაშორისო შეჯიბრებები, ნამდვილად ღირს სანახავად და უდავოდ ევროპის ერთ-ერთი საუკეთესო ადგილია თხილამურებით სრიალისთვის.

ორონი, საფრანგეთი

დაეშვით ფერდობზე ხმელთაშუა ზღვის ხედის ფონზე ნიცასთან ახლომდებარე კურორტ ორონში და მიიღეთ განსხვავებული სათხილამურო გამოცდილება. მაღალმთიანი სოფელი გთავაზობთ კომფორტსა და ტრადიციას ზღვისპირა ალპების განსაცვიფრებელი ხედებით. ტინეეს ხეობის ზემოთ მდებარე კურორტი იმდენივე გასართობ საშუალებას სთავაზობს მათ, ვინც თხილამურებით სრიალით არ არის გატაცებული, რამდენიც ფერდობებია, ამიტომ აქ ნებისმიერი ადამიანი აუცილებლად იპოვის მისთვის საინტერესო გასართობს.

Posted in ბლოგი, იდეები მოგზაურობისთვის, კრებულები and tagged , , , , .