„DELTA“-ს პილოტი უშუალოდ აფრენის წინ დააპატიმრეს. ეჭვობენ, რომ იგი მთვრალი იყო

30 ივლისს, ავიაკომპანია „Delta“-ს პილოტი მინეაპოლის-სენტ-პოლის საერთაშორისო აეროპორტში დააპატიმრეს. ეჭვობენ, რომ მამაკაცი  თვითმფრინავის მართვას არაფხიზელ მდგომარეობაში აპირებდა.

37 წლის გაბრიელ ლაილ შრედერი როუზმაუნთიდან, მინესოტას შტატი, ადგილობრივი დროით 11:00 საათზე დააპატიმრეს მას შემდეგ, რაც აეროპორტის პოლიციამ  მისი მდგომარეობა გამოიკვლია, წერს CNN.

აეროპორტის თანამშრომლებმა შეამჩნიეს, რომ შრედერმა ეკიპაჟის წევრებისთვის უსაფრთხოების შემოწმების რიგი დატოვა, როდესაც დაინახა, რომ ჩვეულებრივი შემოწმების გარდა დამატებითიც ტარდებოდა.

მოგვიანებით შრედერი კვლავ ჩადგა რიგში, მაგრამ რიგის ხანმოკლე დატოვებით მან ეჭვი აღძრა. საბოლოო ჯამში შრედერმა შემოწმება გაიარა და თვითმფრინავის ბორტზე ავიდა.

პოლიციელებმა შრედერი უშუალოდ აფრენის წინ დააკავეს, ჩხრეკის დროს მას თან აღმოაჩნდა ალკოჰოლიანი სასმელის ჭურჭელი. არ არის დაზუსტებული თუ რა სახის ალკოჰოლი იყო ეს.

შრედერისთვის ოფიციალური ბრალდება ჯერ არ წაუყენებიათ, გამომძიებლები ტოქსიკოლოგიური ტესტის შედეგებს ელოდებიან. პილოტი დაკავებიდან რამდენიმე საათის შემდეგ გაანთავისუფლეს  საქმის შემდგომ განხილვამდე. მან უარი განაცხადა კომენტარის გაკეთებაზე.

Delta“-ს პრეს-მდივანმა ქეით მოდოლომ განაცხადა, რომ ავიაკომპანია  სამართალდამცავ ორგანოებთან თანამშრომლობს. „Delta“-ს  ალკოჰოლური პოლიტიკა ერთ-ერთი ყველაზე მკაცრია დარგში და მის დარღვევას ჩვენ არ მოვითმენთ,” – ნათქვამია განცხადებაში. ავიაკომპანიამ უარი განაცხადა  პილოტის შრომის სტაჟის შესახებ ინფორმაციის გამხელაზე, ასევე იმის შესახებ,  დაურღვევია თუ არა ადრე თანამშრომელს წესები.

როდესაც შრედერი დააპატიმრეს, თვითმფრინავი მზად იყო ასაფრენად, თუმცა ჯერ გეითი არ ჰქონდა დატოვებული. #1728 რეისის მგზავრებს, რომლებიც სან-დიეგოში (კალიფორნია) მიემგზავრებოდნენ, ბორტის დატოვება მოუწიათ მას შემდეგ, რაც შრედერი პოლიციამ წაიყვანა. რეისი დაგვიანებით შესრულდა.

Posted in ბლოგი, სიახლეები and tagged .