კოპენჰაგენი

კოპენჰაგენი

მთელ მსოფლიოში, კოპენჰაგენი ცნობილია, როგორც ჰანს ქრისტიან ანდერსენის ქალაქი, ამიტომ დანიის დედაქალაქის მთავარი სიმბოლო – ქალთევზას ქანდაკებაა. ეს არის არა მხოლოდ დანიის, არამედ მთელი სკანდინავიის ყველაზე მონახულებადი ქალაქი. იგი ყურეზე მდებარეობს, საიდანაც მარტივია მგზავრობა სტოკჰოლმში, ოსლოში, ისევე როგორც გერმანიაში, ნიდერლანდებსა და პოლონეთში.

კოპენჰაგენი ძალიან კომპაქტური და მყუდრო ქალაქია, აქ თითქმის არ არის ცათამბჯენები, სამგიეროდ უამრავი ძველი სახლი, პარკი და სანაპიროა. ქალაქის ცენტრში ევროპის ერთ-ერთი ყველაზე გრძელი საფეხმავლო ქუჩაა – სტროგეტი. კოპენჰაგენში თავს კომფორტულად გრძნობენ როგორც  ქვეითი ტურისტები, ისე ველოსიპედისტები: მოსახლეობის ნახევარი ორ ბორბალზე გადაადგილდება, ველობილიკების საერთო სიგრძე კი 400 კმ  აღემატება. კულტურული ღონისძიებების უმრავლესობა გაზაფხულზე და ზაფხულში იმართება: ღამის კინოფესტივალი, ჯაზ ფესტივალი და ცნობილი კოპენჰაგენის კარნავალი.

როგორ ვიმგზავროთ კოპენჰაგენამდე

საქართველოს მაცხოვრებლები ძირითადად დანიის დედაქალაქს უკავშირდებიან საჰაერო მიმოსვლოთ: ეს არის ყველაზე სწრაფი და იაფი ვარიანტი. თბილისიდან ყოველდღიურად დაახლოებით 8 ტრანზიტული რეისი სრულდება, პირველი აგვოსტდან ქუთაისის აეროპორტიდან 6 ახალი მიმართულება დაემატა რომლიდანაც ერთ-ერთი კოპენჰაგენია. ყველა რეისი ფრინდება კოპენჰაგენის ცენტრალურ აეროპორტში CPH.

ავიაბილეთები ამ თვეში Tbilisi-დან Copenhagen-მდე

გაფრენის თარიღი დაბრუნების თარიღი გაჩერება ავიაკომპანია ბილეთების მოძებნა

25.08.2019

29.08.2019

1 stop

ფასი 1 759

26.08.2019

30.08.2019

1 stop

ფასი 1 218

27.08.2019

03.09.2019

1 stop

ფასი 1 463

28.08.2019

04.09.2019

1 stop

ფასი 1 502

29.08.2019

05.09.2019

1 stop

ფასი 1 444

პირდაპირი ფრენები Kutaisi-დან Copenhagen-მდე

გაფრენის თარიღი დაბრუნების თარიღი ავიაკომპანია ბილეთების მოძებნა

27.09.2019

30.09.2019

ფასი 279

11.10.2019

18.10.2019

ფასი 202

კოპენჰაგენის უბნები

ქალაქი უბნებადაა დაყოფილი, რომელთაგან ტურისტებს პირველ რიგში აინტერესებთ ძველი კოპენჰაგენი (ინდრე-ბაი, შუასაუკუნოვანი ქალაქი ან უბრალოდ ცენტრი) თავისი ეკლესიის შპილებით, ისტორიული შენობებითა და ვიწრო გამზირებით. ქრისტიანშავნი თავდაპირველად სამუშაო უბანი იყო, ახლა კი განთქმულია თავისი არხებითა და ქრისტიანიით – თავისუფალი ქალაქით, რომელიც მის აღმოსავლეთ ნაწილში მდებარეობს, მოდური ჰოლმენის მახლობლად.

კოპენჰაგენის ყველაზე კოლორიტული უბანია – ნიუჰავნი (ახალი ნავსაყუდელი) – მხატვრების, მწერლების, ჟურნალისტებისა და ტურისტების საყვარელი ადგილი.

ვესტერბრო – ერთ-ერთი ჰიპური ადგილია უამრავი კაფითა და ბარით,  რომლებიც მის მთავარ არტერიაზეა მიმოფანტული – ისტედგადზე. ფრიდერიკსბერგს  იმავე სახელწოდების ციხე აკრავს გარს; ნორერბრო – კოპენჰაგენის საკმაოდ ცოცხალი ნაწილია (აქ ცხოვრობენ სტუდენტები, ემიგრანტები და სამუშაო კლასი). ოსტერბრო აღსანიშნავია სახელგანთქმული ქალთევზას „სახლის“, კასტელეტის ციტადელისა და საკრუიზო გემებისა და იახტების მრავალრიცხოვანი პირსის წყალობით.

ტრანსპორტი

გარკვეული მიზეზების გამო დანიის დედაქალაქში არ არის ევროპაში პოპულარული ტრამვაი, მაგრამ სხვა სახის საზოგადოებრივ ტრანსპორტთან დაკავშირებით სრული წესრიგია. იგი წარმოდგენილია მეტროთი, ავტობუსით, წყლის ავტობუსითა და S-tog სარკინიგზო ქსელით. მგზავრობის ღირებულება  ზონებსა და მანძილებზეა დამოკიდებული. ქალაქში ერთიანი ბილეთების სისტემა მოქმედებს: მეტროში შეძენილი ტალონი ავტობუსში ან ელექტრომატარებელში მოქმედებს. შეგიძლიათ ყველა სახის ტრანსპორტში მოქმედი 24-საათიანი აბონემენტი City Pass  შეიძინოთ, რომელიც მოზრდილთათვის 80 DKK ღირს. თუ საზოგადოებრივი ტრანსპორტის აქტიურ გამოყენებას არ აპირებთ, უმჯობესია ერთჯერადი ბილეთები შეიძინოთ. ერთი ან ორი ზონის ფარგლებში მგზავრობის ღირებულებაა 24 DKK. ტრანსპორტში შეგიძლიათ საბანკო ბარათით ან მონეტებით გადაიხადოთ – მძღოლები კუპიურებს არ იღებენ. უბილეთო მგზავრებისთვის კოლოსალური ჯარიმაა დაწესებული – 750 DKK (100 აშშ დოლარი).

ავტობუსი

ქალაქის ცენტრალური ავტოსადგური  რატუშის მოედანზე მდებარეობს. ავტობუსის გაჩერება ყვითელი ნიშნითაა აღნიშნული, ამიტომ მისი პოვნა არ გაგიჭირდებათ.  სატრანსპორტო კომპანია Movia-ს კუთვნილი ავტობუსები, ძირითადად ფერითა და სამუშაო გრაფიკით განსხვავდებიან. 5 საათიდან 1 საათამდე მოძრავი დღის ავტობუსები ყვითელი ფერისაა. მათ შორისაა წითელი ნიშნულის მქონე მანქანები, რომლებითაც მგზავრები ცენტრში და შემოგარენში მგზავრობენ (A-bus) და ლურჯი ნიშნულის მქონე – გარეუბნებში (S-bus). ღამის ავტობუსი 1:00 საათზე იწყებს მუშაობას და 5:00 საათამდე მოძრაობს. მათ ნაცრისფერი შეფერილობითა და მარშრუტის დასახელებაში N ასოთი იცნობთ.


წყლის ტრამვაი

„წყლის ავტობუსებს“ მგზავრები ქალაქის მთავარი ნავსაყუდელის ფარგლებში გადაჰყავთ. მეტროდან ან ავტობუსიდან ასეთ ბორანზე გადაჯდომა უფასოა. ტრამვაი შეგიძლიათ გამოიყენოთ როგორც ძვირადღირებული ექსკურსიების ალტერნატივა: მაგალითად, ახალი ნავსაყუდელიდან Nordre Toldbod ნავმისადგომამდე გაისეირნოთ, რომლის გვერდით ქალთევზას ქანდაკება მდებარეობს.

მეტრო

კოპენჰაგენის მიწისქვეშა ტრანსპორტი მსოფლიოში ერთ-ერთი ყველაზე ახალგაზრდაა, იგი 2002 წელს გაიხსნა და უკვე 6 წლის შემდეგ ევროპაში საუკეთესოდ იქნა აღიარებული. ეს არის ქვეყნის პირველი და ერთადერთი მეტროპოლიტენი. იგი 24 საათის განმავლობაში მუშაობს, მატარებლებს კი ავტოპილოტი მართავს. ორი ხაზისგან შემდგარი ქსელი კოპენჰაგენის უბნებს-კომუნებს აკავშირებს – ტერნბიუსა და ფრედერიკსენბურგს. დღისით მატარებლები საშუალოდ 5 წუთის ინტერვალით მოძრაობენ, ღამით – 15-20.

S-tog საგარეუბნო მატარებლები

ეს მატარებლები ადგილობრივ მოსახლეობაში პოპულარობით სარგებლობენ და ტრამვაის ანაცვლებენ. მატარებელი ცენტრალურ რკინიგზაშიც შედის  და  ქალაქის ცენტრს და მიმდებარე ტერიტორიას ემსახურება. სამუშაო საათებია – 5:00-დან 0:30 საათამდე. პარასკევსა და შაბათს S-tog ღამითაც, საათში ერთხელ მოძრაობს.

ტაქსი

კოპენჰაგენის ტაქსი ევროპაში ყველაზე ძვირადღირებულად ითვლება. ტარიფიკაცია მრიცხველის მიხედვით წარმოებს.  1 კმ  22 DKK ღირს. თუ ავტომობილს ტელეფონით შეუკვეთავთ, ჩასხდომა 37 DKK ღირს, ხოლო თუ ქუჩაში გააჩერებთ – 24 DKK. თავისუფალი ავტომობილის განსაზღვრას განათებული Taxi-ს ნიშნით შეძლებთ. საბანკო ბარათით მგზავრობის ღირებულების გადახდას ტაქსოპარკის ყველა ავტომობილში შეძლებთ.

ველოსიპედის ქირაობა

კოპენჰაგენში ტრანსპორტის ყველაზე პოპულარული სახეობა ველოსიპედია. ქალაქში 10-ზე მეტი ველოსიპედების გასაქირავებელი პუნქტია, ყველაზე მეტი პოპულარობით სარგებლობს Copenhagen City Bike, რომელიც 24 საათის განმავლობაში მუშაობს (ოფიციალური ვებ-გვერდი  ინგლისურ ენაზე). ეს არის ქალაქის სავიზიტო ბარათი: 1997 წელს სწორედ ამ ბიურომ შექმნა ველოსიპედის კონსტრუქცია, რომელიც  ქალაქის ხელისუფლებამ ბილ კლინტონს აჩუქა თავისი ვიზიტის დროს. თუ ქალაქს რამდენიმე დღით ეწვიეთ და იშვიათად გეგმავთ ორი ბორბალზე გადაადგილებას, უფრო ეკონომიურია „წინასწარ გადახდით“ ვარიანტი. ერთი საათის ქირაობის ღირებულება – 25 DKK. შეგიძლიათ ერთთვიანი აბონემენტი შეიძინოთ 70 DKK. ველოსიპედის დაბრუნება გასაქირავებელი პუნქტის ნებისმიერ სადგურზე შეგიძლიათ.

დანიის ველოსიპედისტებისთვის წესები მოქმედებს: აკრძალულია „ხელების გარეშე“ მოძრაობა, ერთი ველოსიპედით ორი ადამიანის გადაადგილება, მობილურზე საუბარი, საქვეითო გზების გადაკვეთა. დამრღვევებს ჯარიმა ემუქრებათ 700-დან 1000 DKK-მდე.

კავშირი და WiFi

თუ კოპენჰაგენს რამდენიმე დღით ეწვიეთ, ადგილობრივი სიმ-ბარათის შეძენას აზრი არ აქვს. უფრო ხანგრძლივი მოგზაურობის დაგეგმვისას, გირჩევთ ევროპის მობილური კავშირის ოპერატორების სიმ-ბარათი შეიძინოთ. ყველაზე პოპულარულია Telenor და Lebara ბარათები, ისინი ბევრ მაღაზიაში იყიდება. მინიმალური პაკეტის საშუალო ღირებულებაა 100 DKK, ეს თანხა უკვე ანგარიშზე იქნება დარიცხული. საქართველოს ოპერატორის აბონენტთან საუბრის ერთი წუთის ღირებულებაა დაახლოებით 1 DKK,, SMS შეტყობინება – 2 DKK, რაც უფრო ეკონომიურია, ვიდრე როუმინგული კავშირი.

სასტარტო პაკეტების უმრავლესობა 1 გბ ტრაფიკს შეიცავს, რაც საშუალებას მოგცემთ გაზიაროთ ფოტოები სოციალურ ქსელებში. ამისათვის ასევე შეგიძლიათ გამოიყენოთ უფასო Wi-Fi, რომელიც ხელმისაწვდომია სასტუმროებსა და კაფეებში.

Copenhagen Card

Copenhagen Card (ოფიციალური ვებ-გვერდი ინგლისურ ენაზე) გაძლევთ ავტობუსით, მატარებლითა და მეტროთი მგზავრობის უფლებას  დედაქალაქის მთელს რეგიონში. გარდა ამისა, ეს ბარათი  60-ზე მეტ მუზეუმსა და ღირსშესანიშნავ ადგილზე შესვლის შესაძლებლობას უზრუნველყოფს, აგრეთვე ფასდაკლებებს დანიასა და შვედეთს შორის გემით მიმოსვლის მარშრუტებზე.

ბარათის შეძენისას,  მისი მოქმედების დაწყების თარიღსა და დროს აღნიშნავენ. ამ ინფორმაციის გარეშე, ბარათი არ მოქმედებს. უკანა მხარეს მფლობელის ხელმოწერა უნდა იყოს. ბარათები იყიდება სასტუმროებში, რკინიგზის სადგურებსა და ტურისტულ საინფორმაციო ცენტრებში.

ხელმისაწვდომია 24, 48, 72 და 120 საათის განმავლობაში მოქმედი Copenhagen Card, მოზრდილთათვის და ბავშვებისთვის (10 დან 15 წლის ჩათვლით).  24 საათის განმავლობაში მოქმედი ბარათის  ღირებულება (მოზრდილი/ბავშვი): 379/200 DKK; 48 საათის განმავლობაში – 528/267 DKK, 72 საათის განმავლობაში – 632/319 DKK, 120 საათის განმავლობაში – 840/424 DKK.

კოპენჰაგენის პლაჟები

ზაფხულში კოპენჰაგენში რამდენიმე უფასო საცურაო ზონა იხსნება. ქალაქის მთავარი და ყველაზე პოპულარული პლაჟია – „ამაგერი“, რომელიც ცენტრიდან მხოლოდ 10 წუთის სავალ გზაზეა. იგი  ერთ ბუნებრივ და რამდენიმე ხელოვნურ კუნძულზე მდებარეობს. ჩრდილოეთ ნაწილი – 4 კმ თოვლივით თეთრი ქვიშა – განკუთვნილია ბანაობისთვის, ხოლო სამხრეთ ნაწილი – პიკნიკებისა და თამაშებისთვის. ბავშვებისა და მოზრდილებისთვის ცალ-ცალკე ზონებიც არსებობს. ეს პლაჟი რეგულარულად იღებს იუნესკოს  ჯილდოს „ცისფერი ალამი“.

კოპენჰაგენის უახლესი პლაჟია – „Svanemølle“, ან „გედების წისქვილი“. „ნორდჰავნის“ სადგურიდან აქ ფეხით შეგიძლიათ მოხვიდეთ. სანაპირო ზოლი წყალმცირეა და ბავშვებისთვის შესაფერისია. მათთვის, ვისაც ღრმა წყალში ბანაობა უყვარს, ხელმისაწვდომია 130 მეტრიანი პირსი.

უძველესი საცურაო ზონა ისლანდს ბრიუგეს უბნის სანაპირო ზოლზე მდებარეობს. აუზის კომპლექსი ერთდროულად 600 ადამიანს იტევს.

ექსტრიმის მოყვარულთათვის უფრო შესაფერისი პლაჟია „კოპენკაბანა“. აქ  1.2-დან 3 მ-მდე სიმაღლის სამი ტრამპლინია მოწყობილი. ბავშვებისათვის მოწყობილია საბანაო თბილი წყლით.

ასევე პოპულარული პლაჟებია „Stranden“ და „Halvandet“. არცერთ მათგანს არ აქვს წვდომა წყალთან, მაგრამ შესანიშნავია შეზლონგზე მზის აბაზანების მისაღებად, კოქტეილების მისართმევად, ცოცხალი მუსიკის მოსასმენად და ფრენბურთის სათამაშოდ.

კოპენჰაგენის სასტუმროები

მსხვილი ქალაქების უმრალვესობის მსგავსად, კოპენჰაგენის მრავალი სასტუმრო რკინიგზის სადგურის უბანში მდებარეობს. ისეთ მინუსებს, როგორიცაა მატარებლების ხმაური, შეეცადეთ ყურადღება არ მიაქციოთ, რადგან ნომრები აქ უფრო იაფია, ვიდრე ისტორიულ ცენტრში, ინფრასტრუქტურა კარგად განვითარებულია, მაღაზიები კი უფრო დიდხანს მუშაობენ. სტანდარტული ნომრის ღირებულება ორვარსკვლავიან სასტუმროში 600 DKK-დან იწყება. 3* ვარსკვლავიან სასტუმროში განთავსების ღირებულება შეადგენს 900-1200 DKK დღეში. ოთხ და ხუთვარსკვლავიან სასტუმროებში ფასები 1600 DKK-დან იწყება.

კოპენჰაგენის მეორე ყველაზე პოპულარული განთავსების ვარიანტია – ბინები. ცენტრში მდებარე ბინის ღირებულება საკუთარი სამზარეულოთი და აბაზანით 800 DKK-დან იწყება ორი ადამიანისთვის.

ჰოსტელები  ცენტრიდან მოშორებით მდებარე ნორებროსა და ვესტერბროს უბნებშია თავმოყრილი. საერთო ნომერში საწოლის ღირებულებაა 130-260 DKK. უფრო ძვირადღირებული განთავსების ვარიანტის ფასში საუზმეც შედის – შვედური მაგიდა.

არ არის რეკომენდებული განთავსება თავისუფალ ქალაქში ქრისტიანია. 70-იან წლებში იგი ჰიპის კომუნად გამოცხადდა, ახლა კი კოპენჰაგენის ერთ-ერთ არახელსაყრელ უბნად ითვლება.

რა ვადაგემოვნოთ

დანიური სამზარეულოს ნამდვილი მეფეა – ბუტერბროდი, რომელსაც „სმერებრედს“ უწოდებენ. მისი მომზადების 700-ზე მეტი რეცეპტი არსებობს. ყველაზე პოპულარული ინგრედიენტებია: კარაქწასმული ჭვავის პური, თევზის ან ხორცის ნაჭრები, ბოსტნეული და სახლის მაიონეზი.  როგორც წესი, ბუტერბროდები მრავალფენიანია, ამიტომ მას სადილზე როგორც ცალკე კერძს მიირთმევენ.

დანიური სამზარეულო გერმანიისა და სკანდინავიის გავლენის ქვეშ ჩამოყალიბდა, ამიტომ ტრადიციული კერძები მაღალკალორიური, მარტივი და ნოყიერია: შემწვარი ღორის ხორცი წითელი კომბოსტოთი, ქაშაყი საწებლით, ბოსტნეულის სალათები, სქელი კენკრის კისელი.

ერთხელ სამეფოში გამოკითხვა ჩატარდა იმ მიზნით, რომ მოსახლეობას აერჩია ყველაზე პოპულარული ეროვნული კერძი. შედეგი ყველასთვის შოკისმომგვრელი იყო: უმრავლესობამ ხმა მისცა ხორცის გუფთას კარის სოუსში.

დესერტად გირჩევთ დააგემოვნოთ დანიური ფუნთუშები, რომლებსაც ადგილობრივი მოსახლეობა „ვენურ პურს“ უწოდებს უცხოელი პურის მცხობელების საპატივცემულოდ, რომლებმაც კოპენჰაგენში ეს პური პირველად 100 წლის წინ გამოაცხვეს.

დანიელებს ძალიან უყვართ ლუდი, განსაკუთრებით ეროვნული ბრენდები – Carlsberg და Tuborg. მაგარი სასმელებიდან პოპულარულია ლიქიორი Cherry Heering. საშობაო დღესასწაულებზე სანელებლიან ღვინოს ამზადებენ – გერმანული გლინტვეინის ანალოგს.

გართობა და ღირსშესანიშნაობები

კოპენჰაგენის ყველაზე ცნობილი ღირსშესანიშნაობები ცენტრში მდებარეობს. ტურისტთა უმრავლესობის მარშრუტი ჩვეულებრივ „ქალთევზას“ ქანდაკებიდან იწყება, რომელიც კოპენჰაგენის ნავსაყუდელის შესასვლელთან მდებარეობს. მოქანდაკე ედვარდ ერიქსენის მოდელი მე-20 საუკუნის დასაწყისის დანიის სახელგანთქმული  ბალერინა იყო. თუ ქანდაკებას ზურგს მიაქცევთ, თქვენს წინ კასტელეტის ციხის ხედი გადაიშლება, რომელიც ხუთქიმიანი ვარსკვლავის ფორმის კუნძულზე მდებარეობს. იგი მე-17 საუკუნეში აშენდა, მაგრამ ჯერ კიდევ დანიის თავდაცვის სამინისტროს ექვემდებარება: ციხეს  ჯარისკაცები იცავენ, მიწაყრილზე უძველესი ქვემეხები დგას, რომლებიც საუკუნეზე მეტი არავის გამოუყენებია. ციხის მახლობლად გეფიონის შადრევანი მდებარეობს, რომელიც სკანდინავიის ნაყოფიერების ქალღმერთს ეძღვნება. თქმულების თანახმად, მისი წყალობით გაჩნდა კუნძული ზელანდია, რომელიც თანამედროვე დანიის შემადგენლობაში შედის.

სანაპიროზე სასახლე ანსამბლი ამალიენბორგი მდებარეობს – დანიის სავიზიტო ბარათი და მონარქების ოფიციალური რეზიდენცია. კომპლექსში შედის მოედანი მეფე ფრედერიკ V ძეგლითა და 4 ერთნაირი სასახლით, რომლებიც ერთმანეთის მოპირდაპირედ მდებარეობს. აქვეა განთავსებული მუზეუმები: ქრისტიან VII და ქრისტიან VIII-ს სასახლეებში. ყოველდღე 11:30 საათზე როზენბორგის სასახლიდან სამეფო გვარდიელები გამოდიან  ყარაულის შეცვლის საზეიმო ცერემონიის ჩასატარებლად.

კოპენჰაგენის ერთ-ერთი ყველაზე რომანტიკული ფეხით სასეირნო ადგილია – ახალი ნავსაყუდელი. სანაპიროს მე-17 საუკუნის ნაირფერი სახლები ამშვენებს. ზოგიერთ მათგანში  ჰანს ქრისტიან ანდერსენი ცხოვრობდა. სანაპირო ზოლი სავსეა კაფეებითა და რესტორნებით, თუმცა ფასები საკმაოდ მაღალია.

შეუძლებელია მე-17 საუკუნის ძეგლის – მრგვალი კოშკის გვერდის ავლა. 36 მეტრის სიმაღლიდან ძველი კოპენჰაგენის პანორამა იშლება.

ეს შენობა 400 წლის წინ ობსერვატორიის ფუნქციას ასრულებდა, სადაც ტიხო ბრაგე მეცნიერებით იყო დაკავებული. ძეგლი ნახსენებია ანდერსენის ზღაპარში „ტალ-კვესი“: მწერალმა ძაღლის თვალების სიდიდე მრგვალი კოშკის ზომას შეადარა.

კოპენჰაგენის ისტორიულ ცენტრში რატუშის მოედანი მდებარეობს, რომელზეც დანიის  მთავარი მეზღაპრისადმი მიძღვნილი ძეგლია განთავსებული. ანდერსენის ძეგლის მუხლები მუდამ ბრწყინავს, რადგან მის მუხლებზე ბავშვები სხდებიან ხოლმე ფოტოსურათის გადასაღებლად, თუმცა სიცოცხლეში მწერალს ბავშვები არ უყვარდა.

Posted in ავიაბილეთები, დანია and tagged .

მობილური აპლიკაცია

მოიძიეთ და დაჯავშნეთ იაფი ავიაბილეთები პირდაპირ თქვენი სმარტფონებიდან, მიიღეთ უფრო მეტი სიამოვნება თქვენი მომავალი დასვენებისთვის.

გადმოწერა