რაც უფრო მაღლა ვარ, მით უფრო შორს ვხედავ: 10 საუკეთესო ბარი ბანგკოკის სახურავებზე

ნებისმიერი მოგზაურისთვის Rooftop-ბარებში ვიზიტი ბანგკოკის შემსწავლელი მარშრუტის განუყოფელი ნაწილი გახდა. უბრალოდ წარმოიდგინეთ: მიირთმევთ საავტორო კოქტეილებს, ტკბებით ქალაქისა და მდინარე ჩაო ფრაიას პანორამული ხედებით, შესანიშნავი ბუდისტური ტაძრებითა და ცათამბრჯენებით, ხოლო თქვენს ზურგს უკან მზე აალებულ ჰორიზონტს მიღმა ჩადის. ამ სტატიაში გთავაზობთ საუცხოო მეგაპოლისს შეხედოთ სრულიად განსხვავებული კუთხით და გაეცნოთ მის საიდუმლო ადგილებს.

1. Sky Bar & Distil

ჩვენს სიაში პირველ ადგილზე აღმოჩნდა ყველაზე პოპულარული და უცხოელთა მიერ ყველაზე მონახულებადი ბარი – Sky Bar & Distil სასტუმრო Lebua-ს 63-ე სართულზე State Tower-ში. სწორედ ამ ბარიდან დაიწყო ბანგკოკის სახურავებზე მდებარე ბარების მონახულების მთელი ეპოქა და კულტურა. ამ ადგილს განსაკუთრებული პოპულარობა მოუტანა ფილმმა „წვეულება ბანგკოკში“. ადგილობრივი მაცხოვრებლები და გამოცდილი მოგზაურები ამ open space ბარში იმისათვის მოდიან, რომ ღამის ქალაქისა და მდინარე ჩაო ფრაიას გასაოცარი ფოტოები გადაიღონ, შემდეგ კი ბარის დახლთან სასმელები შეუკვეთონ მყუდრო და გლამურულ ბარში Distil. ეს დაგეხმარებათ თავი აარიდოთ რიგში დგომას და შეამციროთ ხანგრძლივი მოლოდინი ბარის ტერასაზე დასხდომის იმედით.

კოქტეილის საშუალო ფასი 15 დოლარია.

მისამართი: The Dome at Lebua, Silom Road, Bangrak, Bangkok

სამუშაო საათებია: 17:00 – 1:00

2. Vertigo & Moon Bar

სახურავის სივრცის გამოყენების მეორე „პიონერი“ – რომანტიკული რესტორანი სასტუმრო Banyan Tree-ის შენობაში (61-ე სართული). ეს უდავოდ საუკეთესო ვარიანტია რომანტიკული ვახშმის მოსაწყობად ან ბანგკოკის საუკეთესო ხედების ფონზე მზის ჩასვლის სანახავად.

კოქტეილის საშუალო ფასი 15 დოლარია.

მისამართი: South Sathorn Road 21/100, Bangkok

სამუშაო საათებია: 7:00 – 1:00

3. ZOOM at Sathorn Sky Bar & Restaurant

ეს ბარი მდიდრული სასტუმრო Anantara-ს მე-40 სართულზე მდებარეობს. ეს არის ერთ-ერთი ყველაზე ახალი და ცნობადი Instagram-ბარი, რომელიც არა მხოლოდ Sathorn, Sukhumvit, Chao Praya-ს მშვენიერ ხედებს გთავაზობთ ჩიტის ფრენის სიმაღლიდან, არამედ ამაღელვებელ მუსიკასაც ყველაზე ცნობილი DJ-ების შესრულებით. მათ, ვისაც ხარისხიანი აზიური სამზარეულოს კერძების დაგემოვნება სურს – მომღიმარი ტაილანდელები უგემრიელესი კერძების ფართო არჩევანს შესთავაზებენ. მენიუში საუკეთესო კერძებიდან, გირჩევთ ყურადღება მიაქციოთ იხვის მკერდს; თბილ სალათს კიბორჩხალის ხორცით, საზამთროს, ავოკადოსა და ისპანახის ნაჭრებით, მოლუსკებს „ჰოკაიდო“ ავოკადოთი და თინუსისგან მომზადებულ კერძებს.

ძირითადი კერძის ღირებულება 17 დოლარიდან იწყება, კოქტეილების – 10 დოლარიდან.

მისამართი: 36 Naradhiwat Rajanagarindra Rd, Yan Nawa, Sathon, Bangkok 10120, Thailand

სამუშაო საათებია: 17:30 – 01:00

4. Above Eleven

ეჭვგარეშეა, რომ ეს ერთ-ერთი ყველაზე მოდური ბარია 33-ე სართულის სახურავზე. მისი ინტერიერის შემქმნელებისთვის მთავარი შთაგონების წყარო ნიუ-იორკის ცენტრალური პარკი გახდა. ამიტომ, ბარის 33-ე სართულიდან 35-ე სართულზე ასვლისას თქვენ ახვალთ კიბეზე, რომელიც სიმწვანეშია ჩაფლული და აუჩქარებლად ულტრათანამედროვე ფოიეში გადახვალთ.

ამ ურბანისტულ ბარში ფასები არ არის მაღალი, მენიუში შედის როგორც აზიური, ისე ევროპული სამზარეულოს მრავალი კერძი. ამ დაწესებულების მარგალიტია პერუელი შეფ-მზარეულის კერძები. ეს არის პირველი დაწესებულება სამხრეთ-აღმოსავლეთ აზიაში და ერთადერთი ბანგკოკში, სადაც წარმოდგენილია Nikkei პერუანული სამზარეულოს კერძები. ამ ბარში აუცილებლად უნდა დააგემოვნოთ შემდეგი კერძები: Cebiche Above Eleven და Tiradito (უმი თევზისა და ზღვის პროდუქტებისგან მომზადებული ნაციონალური პერუანული კერძები, რომლებიც ფორთოხლის მარინადში იდება). კერძების უმთავრესი კომპონენტია სოუსი Leche de tigre, რაც ითარგმნება, როგორც „ვეფხვის რძე“).

კოქტეილის საშუალო ფასი 10 დოლარია; ძირითადი კერძების – 13 დოლარიდან.

მისამართი: 38/8 Fraser Suites Soi Sukhumvit 11, Khlong Toei Nuea, Bangkok 10110, Thailand, Thailand

სამუშაო საათებია: 18:00 – 02:00

5. Red Sky bar

ეს არის ერთ-ერთი ყველაზე პოპულარული ბარი თავისი ხმაურიანი წვეულებებისა და მრავალი ვიზიტორის მიერ ადვილად ცნობადი წითელი თაღის გამო (საღამოს თაღის განათება რამდენიმე წუთში ერთხელ იცვლება). ბარი მდებარეობს ცნობილი ქსელური სასტუმროს Centara Grand-ის 55-ე სართულზე, Central World-ის სავაჭრო ცენტრის შენობაში. სწორედ აქ იშლება 360 გრადუსიანი პანორამულ ხედი. ნანახი პეიზაჟებისგან დამატებითი შთაბეჭდილების მიღების მიზნით არქიტექტორმა შექმნა გამჭვირვალე დაბალი პანორამული ფანჯრები, რომლებიც ხელს არ შეგიშლით დიდებული მეგაპოლისის პეიზაჟების ტკბობაში დღისითა თუ ღამით. ეს დასვენების შესანიშნავი ვარიანტია მათთვის, ვისაც დღის განმავლობაში სავაჭრო ცენტრში სეირნობა სურს, საღამოს – მზის ჩასვლის ხილვა, ღამით კი – სახურავზე ერთ-ერთ პოპულარულ წვეულებაზე ვიზიტი. ამ დაწესებულების სასიამოვნო სიურპრიზია – happy hour time (16.00-17.00): 1 კოქტეილის შეკვეთისას, მეორეს უფასოდ მიიღებთ.

კოქტეილის საშუალო ფასი 13 დოლარია.

მისამართი: 999 99 ถนน พระรามที่ ๑ Pathum Wan, Pathum Wan District, Bangkok 10330, Thailand

სამუშაო საათებია: ყოველდღე 11:30 – 01:00; კვირაობით 16:00 – 01:00

6. The Speakeasy

ბარი მდებარეობს 25-ე სართულზე, ბუტიკ-სასტუმრო Hôtel Muse-ის ტერიტორიაზე. ეს ატმოსფერული ბარი ვიზიტორებს 1920-იან წლებში აბრუნებს. ამ ატმოსფეროს შეგრძნებას ხელს უწყობს სასტუმროს სტილი და მომხიბლავი გოგონები, რომლებიც სტუმრებს შესასვლელში ეგებებიან. აქ ყველაფერი იმ დროის კლასიკის სტილსა და ელეგანტურობაზე მეტყველებს.

კოქტეილის საშუალო ფასი 14 დოლარია.

მისამართი: โฮเทล มิวส์ แบงค็อก 55/555 ถนน หลังสวน 10330, Thailand

სამუშაო საათებია: 17:30 – 01:00

7. Nest rooftop bar

არ ელოდოთ ამ ბარისგან უცნაურობას, გლამურს ან სასმელების მაღალ ფასებს. ეს ძალიან უბრალო, მაგრამ მყუდრო დაწესებულება ჰიპების საყვარელ ადგილად იქცა. რესტორნის თავისებურება იმაში მდგომარეობს, რომ აქ ყველგან ქვიშაა, ამიტომ იქმნება პლაჟზე დასვენების შთაბეჭდილება, დიზაინერული ორიგინალური დივნებითა და გემრიელი კოქტეილებით. დააგემოვნეთ Mojito Tower – ეს სტანდარტულ ბოკალში უბრალო კოქტეილი კი არა, გამაგრილებელი სასმელის მთელი მინის კოშკია, რომელიც დამზადებულია ლაიმის, პიტნის, ლერწმის შაქრისა და ბაკარდისგან, ხოლი მისაყოლებლად შეგიძლიათ კალმარი შეუკვეთოთ (რომლის ფასი 4 დოლარზე ნაკლებია).

ვინაიდან ბარი სასტუმრო Le Fenix Sukhumit Hotel-ის მე-9 სართულზე მდებარეობს, ქალაქის პანორამა სრულად არ იშლება ვიზიტორებისთვის (როგორც ყველა ზემოხსენებულ დაწესებულებაში, რომლებიც 25 სართულის ზემოთ მდებარეობს), მაგრამ ეს ადგილი შესაფერისია მეგობრების მხიარული კომპანიისთვის, რომელთაც სურთ როგორც გემრიელი სასმელების დაგემოვნება, ისე ქვიშაზე ფეხშიშველა ცეკვა, თანაც დიდი თანხის დახარჯვის გარეშე. ძირითადი დატვირთვა მზის ჩასვლის დროსაა – 17.30-19.00.

კოქტეილის ფასი 7 დოლარია.

მისამართი: Khlong Toei Nuea, Watthana, Bangkok 10110, Thailand

სამუშაო საათებია: 18:00 – 02:00

8. Cloud 47

კიდევ ერთი პოპულარული ბარი ღამის ცხოვრების წყალობით. მდებარეობს United Center office tower-ის 47-ე სართულზე. თუ გსურთ შთაბეჭდილება მოახდინოთ თქვენს პარტნიორზე ხარისხიანი ცოცხალი მუსიკით, თანამედროვე საცეკვაო რიტმითა და სრული რელაქსის ატმოსფეროთი – ეს საუკეთესო არჩევანია. საღამოს დასვენების ეს ვარიანტი შესაფერისია ახალგაზრდებისთვის, რომელთაც სურთ იცეკვონ „ღრუბლებს ზემოთ“, ალკოჰოლურ სასმელებზე დიდი თანხის დახარჯვის გარეშე. ლუდის შეკვეთა 4-7 დოლარად შეგიძლიათ, წახემსება – 10-15 დოლარად.

მისამართი: 47 Floor, United Center Building, 323, Silom Road., Bangkok

სამუშაო საათებია: 17:00 – 24:00

9. Park Society

სიმწვანისა და ფუფუნების ეს ოაზისი განთავსებულია სასტუმრო Sofitel So Bangkok-ის ტერიტორიაზე (29-ე სართული). ეს არის ერთადერთი ბარი, საიდანაც ცნობილი Lumpini Park-ის ხედი იშლება. ბარი შესაფერისია სიმწვანის, ტროპიკებისა და ველური ბუნების მოყვარულთათვის. ფრანგული სამზარეულოს კერძების დასაგემოვნებლად პერსონალი შემოგვთავაზებთ ეწვიოთ მეზობლად მდებარე მაღალი სამზარეულოს მყუდრო რესტორანს. ხოლო თუ თქვენ დღესასწაულის აღნიშვნას პატარა კომპანიაში ამჯობინებთ, შეგიძლიათ ცალკე ზონა იქირავოთ Hi-So დაწესებულებაში, რომელიც ერთი სართულით ზემოთ მდებარეობს. თუ შესაძლებლობა გაქვთ რესტორანში შეუკვეთეთ ლანგუსტი, რომელსაც მოლუსკებითა და შამპანურის ქაფით მოგართმევენ; ასევე წიწაკის მარინადში ჩადებული ქორჭილა ან დესერტი ბანოფი.

ძირითადი კერძის ფასი 25 დოლარიდან იწყება.

მისამართი: 2 North Sathorn Road Bangrak, Bangkok

სამუშაო საათებია: 17:00 – 01:30

10. Breeze restaurant

აქ თქვენ უმაღლესი კლასის მომსახურების ატმოსფეროში ჩაეფლობით. ეჭვგარეშეა, რომ ეს არის ზემოთ ჩამოთვლილ დაწესებულებებს შორის ყველაზე ძვირადღირებული რესტორანი, მაგრამ ჩვენ არ შეგვეძლო მისი სიიდან გამოტოვება. წლის დასაწყისში ამ რესტორანს ჟურნალმა USA Today უწოდა „თანამედროვეობის ერთ-ერთი საუკეთესო რესტორანი“. პოდიუმზე გავლისას, რომელიც თქვენ ფეხქვეშ ფერს იცვლის, საავტორო მიქსოლოგიის ხელოვნებას შეიგრძნობთ – ექსპერიმენტებს, რომლებიც კონკრეტული სტუმრის გემოვნების იდეალურ ბალანსს ემყარება. რესტორანს საკმაოდ ღვარჭნილი სტილი აქვს, ძალიან ორიგინალური და დინამიკური დიზაინით. შესანიშნავია რომანტიკული ვახშმისთვის, დღესასწაულის აღნიშვნისთვის ფუფუნების, სიმშვიდისა და გულითადი საუბრების გარემოში. ვახშმისთვის ადგილის არჩევისას, გაითვალისწინეთ, რომ ძირითადი კერძის ღირებულება 30 დოლარიდან იწყება. მაგრამ მრავალი ვიზიტორი ამ ბარში იმისათვის მოდის, რომ მიქსოლოგიის ხელოვნება შეიგრძნოს.

ექსპერიმენტის ღირებულება საავტორი კოქტეილების მიქსით 17 დოლარია (ამ ექსპერიმენტის დროს თქვენ თავად არ ირჩევთ ინგრედიენტებს – ამ საქმის პროფესიონალები თითოეული ადამიანისთვის საავტორო პროდუქტის შექმნაში დაგეხმარებიან).

მისამართი: 1055 Si Lom, Silom, Bang Rak, Bangkok 10500, Thailand

სამუშაო საათებია: 18:00 – 00:00

მნიშვნელოვანი ნიუანსი

ტაილანდის რომელიმე ბარში ან რესტორანში ვიზიტისას მზად იყავით იმისათვის, რომ მენიუში ფასები ყოველთვის არ შეიცავს გადასახადებს. ამიტომ, ანგარიშის წარდგენისას მთლიან თანხას შესაძლოა 17-18% დაემატოს (7% – სახელმწიფო გადასახადი, 10-11% – მომსახურება, ეგრეთ წოდებული service charge).