eidnhovenis aeroporti

როგორ შეიცვალა აეროპორტები და ავიაკომპანიები კორონავირუსის ეპიდემიის შედეგად

მოგზაურობის ეტაპობრივ აღდგენასთან ერთად, აეროპორტები და ავიაკომპანიები გულმოდგინედ ზრუნავენ თავიანთი მგზავრების უსაფრთხოების შესახებ. ჩვენ გიამბობთ იმ პოპულარული ზომების შესახებ, რომლებიც დაგეხმარებათ თქვენი მგზავრობა უსაფრთხო და კომფორტული გახადოთ.

თერმული კამერები და დეზინფექცია აეროპორტებში

თერმული გამოსახულების კამერების გამოყენება ვირუსის გავრცელების დასაწყისშივე დაიწყეს. ამჟამად მათი გამოყენების შეწყვეტა არ იგეგმება. მაგალითად, ვაშინგტონის საერთაშორისო აეროპორტში მოწყობილობა უკონტაქტოდ გაზომავს მგზავრების სხეულის ტემპერატურას გამგზავრების ზონაში. თუ მონაცემები შეშფოთებას გამოიწვევს, მგზავრს შემოწმების ხელმეორედ გავლა მოუწევს, რის შემდეგაც მიიღება გადაწყვეტილება, შეუძლია თუ არა მას მგზავრობის გაგრძელება.

აეროპორტში ასევე გამოიყენებენ ულტრაიისფერ სხივებზე დაფუძნებულ დეზინფექციის ახალ ტექნოლოგიას.

თერმული გამოსახულების კამერა თერმულ გამოსხივებას კითხულობს. რაც უფრო მაღალია მგზავრის ტემპერატურა, მით უფრო ინტენსიურია გამოსხივება.

ტესტირება თვითმფრინავში ჩასხდომამდე

Emirates Airlines“ ყველა მგზავრისთვის სწრაფ ტესტებს იყენებს 2020 წლის 15 აპრილიდან. ეს არის პირველი მსხვილი ავიაკომპანია, რომელმაც ტესტირება თვითმფრინავში ჩასხდომამდე შემოიღო. ისინი სისხლის ანალიზს იღებენ, რომლის პუსუხიც 10 წუთშია მზად.

11 მაისიდან „Air France“-იც ამოწმებს მგზავრებს ჩასხდომამდე, მაგრამ მხოლოდ თერმოსკრინინგით. თუ ტემპერატურა 38 გრადუსს აღემატება, მგზავრს ბორტზე არ უშვებენ, მაგრამ მას შეუძლია უფასოდ გადაცვალოს ბილეთი სხვა თარიღზე.

თუ მოგზაურობას აპირებთ, აუცილებლად შეამოწმეთ უახლესი ინფორმაცია რეგიონებისა და ქვეყნების მიხედვით აქ.

ჩასხდომა მცირე ჯგუფებად

ყველამ ვიცით თვითმფრინავში ჩასხდომის წინ შექმნილი რიგები, რომლებიც ზოგჯერ ჩასხდომის გამოცხადებამდეც კი იქმნება. ცხადია, პანდემიის შემდეგ მთავარი პრობლმება გახდება სოციალური დისტანცირება.

ავიახაზები „Southern Airlines“ და „Delta“ მგზავრებს 10-კაციან ჯგუფებად ყოფენ და ბორტზე ნაწილ-ნაწილ უშვებენ. „Southwest Airlines“-მა უკვე სთხოვა თავის მგზავრებს წინასწარ ჩატვირთონ ჩასასხდომი ბარათები სმარტფონებში და აეროპორტში დროზე ადრე მივიდნენ.

ბორტზე ნიღბების ტარება მოგიწევთ

ავიახაზებმა United, American, Delta, JetBlue, Hawaiian, AirAsia, KLM, Lufthansa, Austrian Airlines, Swiss International Airlines, Brussels Airlines და Eurowings თავიანთ მგზავრებს ფრენის დროს ნიღბების ტარება მოსთხოვეს. ადრე მათი ტარება მხოლოდ ეკიპაჟს ევალებოდა, ახლა კი ეს მოთხოვნა მგზავრებზეც ვრცელდება. ნიღაბი ჩასხდომისას უნდა გაიკეთოთ.

მიუხედავად იმისა, რომ სალონში ჰაერი რამდენიმე წუთში ერთხელ იწმინდება სპეციალური ფილტრებით და კარგად ცირკულირებს, თვითმფრინავში პატარა სივრცეა და სხვა მგზავრებთან ახლოს ჯდომა მოგიწევთ, რის გამოც ავიაკომპანიები ფიქრობენ, რომ ნიღბები ტყუილად არ დაიხარჯება.

რამდენად უსაფრთხოა თვითმფრინავის სალონი?

IATA-ს ექსპერტებმა ჩაატარეს არაოფიციალური გამოკვლევა, რომლის თანახმად, 2020 წლის იანვრიდან მარტამდე პერიოდში მხოლოდ სამი ეპიზოდი დარეგისტრირდა, როდესაც ბორტზე შესაძლებელი იყო ვირუსის გადაცემა – მგზავრებიდან ეკიპაჟზე, მაგრამ არა მგზავრიდან მგზავრზე.

ექსპერტების აზრით, მგზავრების დაინფიცირების რისკი ძალიან დაბალია, ვინაიდან ისინი ყველანი სახით ერთი მიმართულებით სხედან და სავარძლების ზურგი ბარიერს ქმნის. ასევე ეხმარება ჰაერის ცირკულაცია: იგი ჭერიდან იატაკზე გადადის და შემდეგ ხელახლა ცირკულირებს.

IATA ხაზგასმით აღნიშნავს, რომ ნიღბების ტარება მაინც აუცილებელია, თუმცა შუა ადგილების გაყიდვის დაბლოკვას აზრი არ აქვს.

დაიწყებენ ანტისეპტიკური საშუალებების დარიგებას

აი რას აპირებს „Air Canada“: ბორტზე თითოეული მგზავრისთვის გადასაცემი პაკეტი შეიცავს ანტიბაქტერიულ გელს. „American Airlines“ და „United Airlines“ ასევე გეგმავენ ანტიბაქტერიული ხელსახოცებისა და ნიღბების დარიგებას, თუ არ იქნება მომარაგების შეფერხება.

ბორტზე ნიღბების ტარება მოგიწევთ, ზოგიერთი ავიაკომპანია კი ანტისეპტიკური საშუალებების დარიგებს გეგმავს.

ტესტირება თვითმფრინავის დაჯდომის შემდეგ

2020 წლის 4 მაისიდან ვენის აეროპორტში ტესტირება უტარდება ავსტრიაში ჩამოსულ ყველა მგზავრს. ამის წყალობით, მათ აღარ სჭირდებათ ორკვირიანი კარანტინის გავლა. ადრე, კარანტინის თავიდან ასაცილებლად, მგზავრებს ტესტის შედეგების წარდგენა უწევდათ, მაგრამ ყველას არ ჰქონდა შესაძლებლობა წინასწარ ჩაეტარებინა ტესტი, ამიტომ მათ თვითიზოლაცია მოეთხოვებოდათ. ტესტის შედეგები ორ-სამ საათში იქნება მზად, მაგრამ მომსახურების ღირებულება 190 ევროს შეადგენს .

ისლანდიაში, რომელმაც საზღვრები 15 ივნისს გახსნა, ასევე შემოაქვთ ტესტირება ქვეყანაში ჩამოსული ყველა მგზავრისთვის. ტესტი უშუალოდ კეფლავიკის საერთაშორისო აეროპორტის ტერმინალში კეთდება, მაგრამ შედეგებს შეგიძლიათ თქვენს საცხოვრებელში დაელოდოთ – ისინი მზად იმავე დღეს იქნება.

საფრანგეთში იმ ქვეყნებიდან ჩასულმა მგზავრებმა, რომლებშიც კორონავირუსი ფართოდ არის გავრცელებული, ტესტი საფრანგეთის აეროპორტში ჩასვლისთანავე უნდა ჩაიტარონ.

მიუხედავად იმისა, რომ აეროპორტები და ავიაკომპანიები ყველაფერს აკეთებენ მაქსიმალური კომფორტისა და უსაფრთხოების უზრუნველსაყოფად, ბევრი რამ დამოკიდებულია თავად მგზავრებზე: გახსოვდეთ ჰიგიენის ძირითადი წესების შესახებ, შეძლებისდაგვარად დაიცავით სოციალური დისტანცია და მოგზაურობის დაგეგმვისას შეამოწმეთ ქვეყანაში არსებული ეპიდემიოლოგიური ვითარება.

Posted in პირადი გამოცდილება and tagged , , , , , .