ტოსკანა: 5 საინტერესო ქალაქი, რომელსაც აუცილებლად უნდა ეწვიოთ

ტოსკანა მდიდარია თავისი ულამაზესი პეიზაჟებით, უგემრიელესი სამზარეულოთი, ღვინოთი და მრავალი შესანიშნავი დასასვენებელი ადგილით – ვილებითა და ძველი მამულებით დაწყებული,  ფერმებით, მეღვინეობით და აგროტურიზმის მოყვარულთათვის სხვა ადგილებით დამთავრებული. გარდა ამისა, აქ არქიტექტურისა და ისტორიის თვალსაზრისით არაერთი საინტერესო ადგილი მდებარეობს.

ჩვენ უკვე ვისაუბრეთ ტოსკანის საუკეთესო დასასვენებელი ადგილების შესახებ, მაგრამ თუ ამ ადგილებში ისვენებთ, თქვენ უთუოდ შეეცდებით, რომ არ გამოგრჩეთ რაიმე საინტერესო. ამჯერად გადავწყვიტეთ  დიდ ქალაქებს გვერდი ავუაროთ და  პატარა, მაგრამ არანაკლებ საინტერესო ქალაქების შესახებ ვისაუბროთ. მაშ ასე, რომელ ქალაქებში უნდა დაგეგმოთ თქვენი მარშრუტი?

სან-ჯიმინიანო

ტოსკანის ერთ-ერთი ყველაზე დათვალიერებადი ადგილია – მათ, ვისაც ხალხმრავლობის ატანა უძნელდებათ, უმჯობესია ამ ადგილს სეზონზე არ ეწვიონ.

აქ უამრავი რამაა სანახავი:

  • 4 კოშკი – „შუა საუკუნეების ცათამბრჯენები“;
  • სასახლეები Palazzo Nuovo del Podesta და Palazzo del Popolo. ამ უკანასკნელში ამჟამად ხელოვნების გალერეა მუშაობს, სადაც ფლორენციელი ოსტატების ნამუშევრებია წარმოდგენილი;
  • კათედრალური ტაძარი (1148 წ.);
  • წმინდა აგოსტინოს ეკლესია, სადაც უნიკალური ფრესკებია შემორჩენილი (1298 წ.).

ივლისის ბოლო შაბათ-კვირას, ქალაქი  Dentro e Fuori le Mura ხელოვნების ფესტივალს მასპინძლობს, რომლის პროგრამა მოიცავს კონცერტებს, კინოჩვენებებს და თეატრალურ წარმოდგენებს. ღონისძიებათა უმრავლესობა ციხესიმაგრის ტერიტორიაზე იმართება.

როგორ ვიმგზავროთ ფლორენციიდან: მანქანით (1 საათი) ან მატარებლით ჩერტალდომდე (Certaldo) და შემდეგ ავტობუსით (1.5 საათი, მატარებლის ბილეთის საფასურია 6 ევროდან ერთი გზა).

ვოლტერა

შუა საუკუნეების ქალაქი სან-ჯიმინიანოდან 29 კილომეტრის მანძილზე. მის ცენტრალურ მოედანს Piazzo dei Priori ამშვენებს ქალაქის საბჭოს გოტიკური შენობა Palazzo dei Priori – უძველესი შენობა ტოსკანაში.

შენარჩუნებულია ეტრუსკების მიერ ჩვ.წ.აღ-მდე მე-4 საუკუნეში აგებული კარიბჭე Porta all′Arco. აქედან შეგიძლიათ ფეხით გაისეირნოთ ჩვ.წ.აღ-მდე მე-10 საუკუნის რომაული ამფითეატრისკენ. (მისამართი: Via Francesco Ferrucci, შესვლის საფასურია 5 ევრო მოზრდილთათვის, 3 ევრო ბავშვებისთვის 6-12 წლამდე). კიდევ ერთი საინტერესო ღირსშესანიშნაობაა — მედიჩების ციხესიმაგრე (Rampa di Castello 4), რომელიც 1474 წელს, აშენდა ფლორენციის მიერ ვოლტერის დაპყრობის შემდეგ.

ვოლტერა ნახსენებია სტეფანი მაიერის  რომანში „ახალი მთვარე“ ვამპირული საგიდან, მაგრამ ფილმი მონტეპულჩანოში გადაიღეს. ამიტომ,  ნაცნობი შენობებისა და მოედნების პოვნას სამწუხაროდ ვერ შეძლებთ.

სამაგიეროდ აქედან დიდებული ხედი იშლება მიმდებარე მინდვრებსა და გორაკებზე, განსაკუთრებით მზის ჩასვლის დროს. სათვალიერებელ მოედანს  საღამოს ეწვიეთ – ეს დაუვიწყარი სანახაობაა!

როგორ ვიმგზავროთ ფლორენციიდან: მანქანით (1.5 საათი) ან მატარებლით ერთი გადაჯდომით (3 საათი, ბილეთის საფასურია 14 ევროდან ერთი გზა).

ლუკა

რომის იმპერიის დროინდელი მნიშვნელოვანი სამხედრო ბანაკი,  კოშკებისა და ეკლესიების ქალაქი, პუჩინისა და პაგანინის მშობლიური მხარე.

ქალაქი გარშემორტყმულია 11 ბასტიონისგან შემდგარი ციხე-სიმაგრის კედლით, რომელიც  XVI საუკუნეშია აშენებული. დღეისათვის მხოლოდ 2 ბასტიონია შემორჩენილი. ყველა საინტერესო ღირსშესანიშნაობა შიგნითაა თავმოყრილი, ისტორიული ცენტრი კომპაქტურია, ამ რეგიონისთვის დამახასიათებელი ტიპიური ფერადი სახლებით.

აქ დღესაც მოქმედი უამრავი უძველესი ტაძარია შემორჩენილი. მათ გარდა, ინტერესს იმსახურებს საგუშაგო კოშკი (მისამართი:Via Fillungo 20, შესვლის საფასურია 4 ევრო) და ვილა Bottini (Via Elisa 9) საუცხოო პარკით.

თუ გსურთ უფრო მეტი შეიტყოთ ლუკას ისტორიის შესახებ და გაიგოთ, თუ რატომ არის აგებული 100-მდე ეკლესია ასეთ პატარა ქალაქში, გირჩევთ ექსკურსიაზე გაემგზავროთ ადგილობრივ გიდთან ერთად.

როგორ ვიმგზავროთ ფლორენციიდან: მანქანით (1 საათი) ან მატარებლით (1.5-2 საათი, ბილეთის საფასურია 7.5 ევროდან ერთი გზა).

არეცო

ერთ-ერთი მთავარი ეტრუსკული ქალაქი-სახელმწიფო, რომელიც  ეგვიპტის ალექსანდრიამდეა აშენებული. ქალაქს მაცხოვრებლებმა გაუთქვეს სახელი: აქედან არიან წარმოშობით იტალიელი პოეტი პეტრარკა და მხატვარი ჯორჯო ვაზარი. არეცოს ბედმა გაუღიმა და ფილმშიც კი არის გადაღებული – რობერტო ბენინიმ აქ გადაიღო ფილმი „ცხოვრება მშვენიერია“, რომელმაც „კანის ლომი“ და 3 ოსკარი მიიღო.

არეცოს ღირსშესანიშნაობები შუა საუკუნეების ცენტრშია თავმოყრილი. აუცილებლად ეწვიეთ კათედრალურ ტაძარს (XIII-XV საუკუნეები), რომლის სიამაყეც კარგად შემონახული ფრესკებია, ასევე პალაცო-დელე-ლოჯე-ვაზარიანეს (XVI ს.) ვაზარის ნამუშევრებს, ძველ რომაულ ამფითეატრს და მასთან არსებულ მუზეუმს.

ადგილობრივი მაცხოვრებლები ტრადიციებს სცემენ პატივს – ყოველწლიურად, ივნისის მესამე კვირას და სექტემბრის პირველ კვირას აქ სარაცინების რაინდთა ტურნირი (Giostra del Saracino) იმართება. მონაწილეები კოლორიტულ სამოსში ეწყობიან, ხოლო მხედრები, რომლებიც ქალაქის ყველა უბანს წარმოადგენენ, ერთმანეთს ხის ნიშანში სროლაში ეჯიბრებიან.

თუ არეცოს ეწვიეთ, მეზობლად მდებარე კორტონის მონახულებაც ღირს.  2000 წელზე მეტი ხნის წინ (ზოგიერთი წყაროს თანახმად ის რომზე ძველია!) დაარსებული ქალაქი მდებარეობს მთაზე Giostra del Saracino. ტოსკანისა და უმბრიის საზღვარზე. აქ ჰოლივუდური ფილმის „ტოსკანის მზის ქვეშ“  – მოვლენები ვითარდება, რომლის გამოსვლის შემდეგ კორტონში ცხოვრების სურვილის მქონე ადამიანთა რაოდენობა მკვეთრად გაიზარდა.

ეტრუსკების მიერ აღმართული ციხე-სიმაგრის კედლის უკან, ვიწრო ქუჩების ლაბირინთი, უძველესი ეკლესიები და მყუდრო სახლებია მიმალული,  ამ იდილიურ პეიზაჟს თანამედროვე ნაგებობებიც კი ვერ აფუჭებს. გასაკვირი არ არის, რომ ქალაქს უწოდებენ მუზეუმს ღია ცის ქვეშ!

როგორ ვიმგზავროთ ფლორენციიდან: მანქანით (1-1.5 საათი) ან მატარებლით (დაახლოებით ერთი საათი, ბილეთის საფასურია 8.5 ევროდან ერთი გზა).

სიენა

შუა საუკუნეების ქალაქი, რომლის შენობების დიდი ნაწილი  თავდაპირველი სახითაა შემორჩენილი და  მეორე მსოფლიო ომის დროს დაბომბვას გადაურჩა.

ცენტრალურ მოედანს Piazza del Campo ნიჟარის ორიგინალური ფორმა აქვს, ყველა შენობა ისეა განლაგებული, რომ მისი კონტური არ დაირღვეს. ძირითადი შენობა არის კომუნის სასახლე (XIV საუკუნე), რომელშიც ამჟამად მერია, ქალაქის მუზეუმი და თეატრია განთავსებული. მის მიმდებარე ტერიტორიაზე მდებარეობს შუა საუკუნეების ერთ-ერთი ყველაზე მაღალი კოშკი Torre del Mangia, სადაც სათვალიერებელი მოედანია მოწყობილი 88 მეტრის სიმაღლეზე. ქალაქის სილამაზით რომ სიმაღლიდან დატკბეთ, 400 საფეხურის გადალახვა მოგიწევთ.

სიენაში უამრავი მრავალფეროვანი მუზეუმია, ზოგიერთ მათგანში ერთიანი ბილეთი მოქმედებს, რაც ცოტაოდენი ეკონომიის გაკეთების საშუალებას მოგცემთ. გთავაზობთ მათგან ყველაზე საინტერესოს:

  • ქალაქის მუზეუმი (Il Campo 1). აქ თქვენ იხილავთ ძველი რატუშის შენობებს, მათ შორის გლობუსის დარბაზს და ცხრათა დარბაზს, სადაც სიენის რესპუბლიკის მთავრობის წევრები იკრიბებოდნენ. ყურადღება მიაქციეთ იმ ფრესკებს, რომლებითაც შენობის კედლებია მორთული – ისინი გვიამბობენ, თუ როგორ უნდა ვმართოთ ქალაქი, რათა კეთილდღეობას მიაღწიოს. ბილეთის საფასურია 9 ევრო მოზრდილთათვის და  8 ევრო 9-11 წლის ბავშვებისთვის;
  • ეროვნული პინაკოთეკა (Via S. Pietro 29). აქ უმთავრესად რელიგიური თემების ტილოებია წარმოდგენილი – გალერეა იმ ნახატების შეგროვებით დაიწყო, რომლებიც აბატ ჯუზეპე ჩაკერის ეკუთვნოდა. ბილეთის საფასურია 9 ევრო მოზრდილთათვის,  8 ევრო ბავშვებისთვის, ყოველი თვის პირველ კვირას შესვლა უფასოა.

როგორ ვიმგზავროთ ფლორენციიდან: მანქანით (1-1.5 საათი) ან მატარებლით (დაახლოებით1.5 საათი, ბილეთის საფასურია 9 ევროდან ერთი გზა).

იაფი ორმხრივი ავიაბილეთები თბილისიდან ფლორენცია-ში

გამგზავრებადაბრუნებაგაჩერებაავიაკომპანიაფასი
7 ოქტ 202416 ოქტ 2024პირდაპირიAustrian Airlines465 -დან

პირდაპირი ფრენა ქუთაისიდან მილანი-ში

გამგზავრებადაბრუნებაავიაკომპანიაფასი
23 მარ 202424 მარ 2024Wizz Airფასი 487
9 აპრ 202418 აპრ 2024Wizz Airფასი 471
7 მაი 202421 მაი 2024Wizz Airფასი 531

პირდაპირი ფრენა ქუთაისიდან რომი-ში

გამგზავრებადაბრუნებაავიაკომპანიაფასი
23 მარ 202428 მარ 2024Wizz Airფასი 501
7 აპრ 202413 აპრ 2024Wizz Airფასი 469
18 მაი 202421 მაი 2024Wizz Airფასი 628

 

 

თეგები: , , ,

მოძებნე ავიაბილეთი

შენთვის სასურველი მიმართულებით საუკეთესო ფასად

Leave a Comment

მობილური აპლიკაცია

მოიძიეთ და დაჯავშნეთ იაფი ავიაბილეთები პირდაპირ თქვენი სმარტფონებიდან, მიიღეთ უფრო მეტი სიამოვნება თქვენი მომავალი დასვენებისთვის.

გადმოწერა