უცნობი ევროპა: 11 პატარა ქალაქი, რომელთა შესახებაც ტურისტებმა არ იციან - Aviabiletebi.org
მთავარი » ბლოგი » კრებულები » უცნობი ევროპა: 11 პატარა ქალაქი, რომელთა შესახებაც ტურისტებმა არ იციან
baxarax

უცნობი ევროპა: 11 პატარა ქალაქი, რომელთა შესახებაც ტურისტებმა არ იციან

ევროპის პატარა ქალაქები განსაკუთრებული სიმყუდროვით გამოირჩევიან, ზოგჯერ კი კიდევ უფრო მეტი ხიბლით არიან დაჯილდოვებული, ვიდრე ზოგიერთი რეკლამირებული დედაქალაქი. ამ სტატიაში ჩვენ ვისაუბრებთ უცნობ ევროპაზე, მის საიდუმლო არატრიავიალურ კუთხეებზე.

ოდენსე, დანია

მხოლოდ ასეთ ზღაპრულად ლამაზ ქალაქში შეიძლება დაბადებულიყო ყველა დროისა და ხალხის საუკეთესო მეზღაპრე ჰანს კრისტიან ანდერსენი. სავარაუდოდ თავის ნამუშევრებში იგი სწორედ ოდენსეს აღწერდა, სადაც მან ბავშვობა გაატარა. პატარა სახლები, ვიწრო ქუჩები და შუასაუკუნეების ციხე-სიმაგრეები – თითქოს ქუჩის კუთხიდან საკვამურის მწმენდელი და მწყემსი გოგო გამოვა. დღეს მოგზაურები (უნდა ვაღიაროთ, რომ საკმაოდ იშვიათად) ოდენსეში ჩამოდიან იმისათვის, რომ პატივი მიაგონ სახელოვან მწერალს და ჰანს კრისტიან ანდერსენის ბაღში გაისეირნონ. აქვე შეგიძლიათ მოინახულოთ მეზღაპრის სახლ-მუზეუმი და ნიუბორგისა და ეგესკოვის შესანინიშნავად შემონახული ციხე-სიმაგრეები.

ქუთაისი-კოპენჰაგენის მიმართულებით ფრენის ღირებულება – 200 ლარიდან იწყება (ორი გზა).

ბახარახი, გერმანია

ოდესღაც ვიქტორ ჰიუგომ ამ ქალაქს „მსოფლიოში ყველაზე მომხიბვლელი“ უწოდა და დღესაც კი ძნელია არ დავეთანხმოთ მწერალს. აქ ახლაც კი შუა საუკუნეების სულისკვეთება ტრიალებს: განსაკუთრებულ ატმოსფეროს ქმნის ფიჭვის კოჭებით მორთული ხითა და აგურით ნაშენი სახლები, უძველესი ეკლესიები და ქვაფენილით მოკირწყლული ქუჩები.

აქ ჩამოსვლა ნამდვილად ღირს, რომ ამ ყველაფრით დატკბეთ, დააგემოვნოთ ტრადიციული გერმანული ძეხვეული კომბოსტოს მწნილით და დალიოთ ადგილობრივი ღვინო, რომელიც ქალაქის სავიზიტო ბარათია.

ქუთაისი-ფრანკფურტის მიმართულებით ფრენის ღირებულება – 388 ლარიდან იწყება (ორი გზა).

გენტი, ბელგია

ევროპელთა შორის საკმაოდ ცნობილი, მაგრამ ჩვენი მოგზაურთათვის ფაქტობრივად უცნობი, პატარა ქალაქ გენტს თამამად შეგვიძლია ვუწოდოთ ბელგიური ვენეცია. იგი მდინარე ლისის არხებით არის დაქსაქსული, რომლებშიც ლამაზი ნავები დაცურავენ. აქ არცთუ ისე ბევრი ღირსშესანიშნაობაა, მაგრამ არქიტექტურა შთამბეჭდავია. ჯერ კიდევ მე-16 საუკუნიდან შემორჩენილი შენობები თავისი სილამაზით გაგაოცებთ.

ქუთაისი-ბრიუსელის მიმართულებით ფრენის ღირებულება – 219 ლარიდან იწყება (ორი გზა).

ალბარასინი, ესპანეთი

ტყუილად როდი ითვლება ეს ქალაქი ესპანეთის ეროვნულ საგანძურად და ქვეყნის ყველაზე ლამაზ ქალაქად. არ გსმენიათ მის შესახებ? სასწრაფოდ გამოასწორეთ ეს გაუგებრობა!

ალბარასინი განთქმულია უძველესი ისტორიით (იგი სათავეს ჯერ კიდევ ჩვ.წ.აღ.-მდე იღებს), ბუნებრივი სიმდიდრეებით (უახლოეს ფერდობებზე მწვანე ტყეში პატარა თვალწარმტაცი მდინარეები და ჩანჩქერები იმალება) და… კარის სახელურებით. ქალაქის თითოეული სახლის თითოეული კარი ადგილობრივი ხელოსნების მიერაა დამზადებული და თავისი განუმეორებელი თავისებურება აქვს.

ქუთაისი-ბარსელონას მიმართულებით ფრენის ღირებულება – 363 ლარიდან იწყება (ორი გზა).

მოსტარი, ბოსნია და ჰერცეგოვინა

ტურისტები დიდ ყურადღებას არ უთმობენ ამ ქვეყანას, მით უმეტეს ისეთ პატარა ქალაქს, როგორიცაა მოსტარი. და სრულიად ამაოდ! კოლორიტული და მყუდრო მოსტარი მე-15 საუკუნეში აშენდა მდინარე ნერეტვას ნაპირზე. მას შემდეგ ქალაქმა მრავალი ბრძოლა გადაიტანა, თუმცა რაღაც სასწაულით ისტორიული ცენტრი შეინარჩუნა. მოსტარის სავიზიტო ბარათია ძველი ხიდი, რომელიც ორივე კლდოვან ნაპირს ერთმანეთთან აკავშირებს. მიუხედავად იმისა, რომ ამ ქალაქს ერთ დღეშიც მოინახულებთ, მასზე დახარჯული დრო ნამდვილად არ დაგენანებათ.

თბილისი-სარაევოს მიმართულებით ფრენის ღირებულება (გადაჯდომით) – 900 ლარიდან იწყება (ორი გზა).

ტორუნი, პოლონეთი

პოლონეთმაც იცის, თუ როგორ უნდა გააკვირვოს ის მოგზაურები, რომლებიც სტანდარტული მარშრუტებიდან გადახვევას და არა მხოლოდ კრაკოვისა და ვარშავას მონახულებას გეგმავენ.

ტორუნი ქვეყნის ჩრდილოეთით მდებარეობს და თავად პოლონელების საყვარელი ადგილია. ისინი აქ ჩამოდიან, რათა უკეთ გაიცნონ თავიანთი ისტორია და კულტურა, რადგან ეს ქალაქი ჯერ კიდევ შუა საუკუნეების საიდუმლოებებს ინახავს.

ქუთაისი-ვარშავას მიმართულებით ფრენის ღირებულება – 158 ლარიდან იწყება (ორი გზა).

ოლომოუცი, ჩეხეთი

ეს ჩეხური ქალაქი, რომელსაც მრავალსაუკუნოვანი ისტორია აქვს, აქტიურ კულტურულ ცხოვრებას ეწევა. ოლომოუცი ღია ცის ქვეშ მუზეუმს ჰგავს და ამიტომაც აქ უბრალო გასეირნება უკვე შთამბეჭდავი სანახაობაა.

ქუთაისიპრაღას მიმართულებით ფრენის ღირებულება334 ლარიდან (ორი გზა).

გიტჰორნი, ნიდერლანდები

ამ დასახლების პეწი იმაში მდგომარეობს, რომ აქ არც ავტომობილები და არც გზებია. მათ ნაცვლად არხები და ნავებია. ადგილობრივი მოსახლეობა კი ნავებს მწვანე უბნების გვერდით სადგომზე „აყენებს“.

აქ ყველა სახლი კერძოა, დამახასიათებელი ჩალის სახურავით გადახურული, გაშენებულია აყვავებული ბაღები, ირგვლივ კი სიმშვიდე სუფევს. აქ ცხოვრება ალბათ ცოტათი მოსაწყენია, მაგრამ ერთი-ორი დღით ვიზიტი ნამდვილად ღირს.

ქუთაისიეინდჰოვენის მიმართულებით ფრენის ღირებულება267 ლარიდან (ორი გზა).

ბლედი, სლოვენია

საკურორტო ქალაქი ბლედი ნამდვილი სამოთხეა მათთვის, ვისაც სურს ბუნებით დატკბეს, მთებში ისეირნოს, კრისტალურად სუფთა ტბაში იბანაოს და სუფთა ჰაერი ისუნთქოს. ეს მყუდრო ქალაქი განთქმულია არა მხოლოდ თავისი ბუნებრივი სიმდიდრეებით, არამედ უჩვეულო ეკლესიითაც, რომელიც მწვანე ტბის შუაგულში პატარა კუნძულზე მდებარეობს.

 თბილისი-ლუბლიანას მიმართულებით ფრენის ღირებულება (გადაჯდომით) – 825 ლარიდან იწყება (ორი გზა).

ჰარლემი, ნიდერლანდები

ზეპოპულარული ამსტერდამიდან თხუთმეტი წუთის სავალ გზაზე, პრაქტიკულად „ფუნთუშების“იმავე ნაკრების მქონე ჰარლემი იმალება.

სურათი ნამდვილად მსგავსია, მაგრამ აქ ტურისტების იმავე რაოდენობას ვერ ნახავთ. მაგრამ გაითვალისწინეთ: თუ ნიდერლანდებში „ამსტერდამის ცნობილი სიამეებისთვის“ მიემგზავრებით, მაშინ უმჯობესია დედაქალაქში დარჩეთ.

ხოლო მათთვის, ვისაც სურს ჰოლანდიურ კულტურას ეზიაროს, პატარა შოპინგ-ტური მოიწყოს, დამატებით ცივილიზებული ევროპული დასვენებით ისიამოვნოს ან ქალაქის პლაჟზე დაისვენოს, ჰარლემი იდეალური ადგილია.

ეს ქალაქი ერთ-ერთი ყველაზე მნიშვნელოვანია ქვეყნის ჩრდილოეთ ნაწილში, სადაც მჭიდროდ დასახლებული ქალაქები საკმაოდ იშვიათობაა, ჰარლემი კი თავისი მოკრძალებული 150 ათასი მოსახლით ერთ-ერთ ყველაზე მსხვილ ქალაქად ითვლება. ამასთან იგი უამრავი საინტერესო სანახაობებით არის დატვირთული. აქ შეგიძლიათ მოინახულოთ ტეილორისა და ფრანსის წარმტაცი მუზეუმები, ასევე კათოლიკური ტაძრები და შთამბეჭდავი არქიტექტურული ბრწყინვალების ნაგებობები.

ამსტერდამის აეროპორტიდან ჰარლემამდე ყველაზე იაფი მგზავრობის საშუალებაა მატარებლით (გამგზავრება ყოველ 15-20 წუთში) მგზავრობა, მაგრამ გადაჯდომა მოგიწევთ სლოტერდაიკის (Sloterdijk) სადგურზე ან ამსტერდამ ცენტრალში (Amsterdam Centraal). აეროპორტიდან ჰარლემამდე მგზავრობის ხანგრძლივობა დაახლოებით 30-40 წუთია. თუ ტაქსით იმგზავრებთ (50-70 ევრო), მგზავრობის ხანრგძლივობა არაუმეტეს 15 წუთია.

კაბო-დე-გატა, ესპანეთი

საოცრად სუფთა ქვიშა, ფირუზისფერი ზღვა, სულისშემკვრელი ციცაბო კლდეები, ქარისგან მიმალული ყურეები. ეს კაბო-დე-გატაა – ულამაზესი ეროვნული პარკი ალმერიის მახლობლად.

შორეული პროვინცია, სადაც ნაკრძალი მდებარეობს, ცნობილია თავისი გრძელი უკაცრიელი პლაჟებით. გირჩევთ ეწვიოთ საიდუმლო ენმედიოსა და კარნაჰეს ძალიან სუფთა სანაპირო ზოლსა და თეთრ ქათქათა ქვიშას.

გაითვალისწინეთ, რომ აქ ყველა პლაჟი არ არის ბანაობისთვის შესაფერისი, რადგან სანაპირო ზონაში დიდი მარჯნის რიფებია. სამაგიეროდ დაივერები აღფრთოვანებული იქნებიან. აქ არაერთხელ უპოვიათ ჭურჭლისა და ამფორების, ასევე გემების ფრაგმენტებიც კი, რომლებიც ამ მიწების მდიდარ ისტორიულ წარსულს მოგვაგონებს.

მიუხედავად იმისა, რომ პარკს ყოველწლიურად უამრავი ტურისტი სტუმრობს, მისი უზარმაზარი ტერიტორია და საოცარი ლანდშაფტი საშუალებას მოგცემთ ბუნებასთან ერთიანობა შეიგრძნოთ. აქ პრაქტიკულად არ არის ზამთარი, რის გამოც კარბო-დე-გატას უნიკალური ფლორისა და ფაუნის დათვალიერება ყოველთვის კომფორტულია.

Posted in ბლოგი, კრებულები and tagged , , , , , , , , , , , , , , , , , , .

მობილური აპლიკაცია

მოიძიეთ და დაჯავშნეთ იაფი ავიაბილეთები პირდაპირ თქვენი სმარტფონებიდან, მიიღეთ უფრო მეტი სიამოვნება თქვენი მომავალი დასვენებისთვის.

გადმოწერა