ახალი უკრაინული ავიაკომპანია Bees Airlines იმუშავებს როგორც დაბალბიუჯეტიანი და ჩარტერული გადამზიდველი.
ავიაკომპანია რეისების დაწყებას 2020 წლის ბოლოს გეგმავს. Bees Airlines-ის სასტარტო ფლოტი ორი Boeing 737-800 თვითმფრინავისგან შედგება, რომლებიც ადრე ავიაკომპანია „უკრაინის საერთაშორისო ავიახაზებს“ ეკუთვნოდა.
„მომავალ წელს კიდევ ორი საჰაერო ხომალდის აღება გვსურს. 2022 წლისთვის ჩვენ ვვარაუდობთ, რომ ჩვენს პარკში უკვე ექვსი თვითმფრინავი იქნება“, – ამბობს Bees Airline-ის აქციონერის წარმომადგენელი ევგენი ხაინაცკი mintrans.news-თან ინტერვიუში, რომელიც ადრე ავიაკომპანია SkyUp Airlines-ს ხელმძღვანელობდა.
ცნობილია, რომ ავიაკომპანიის ბაზა კიევის ი. სიკორსკის სახელობის აეროპორტში გაიხსნება. პირველ რეისებს Bees Airlines ეგვიპტის მიმართულებით შეასრულებს და მუშაობას ჩარტერული გადამზიდველის სახით დაიწყებს. კომპანიამ უკვე ხელი მოაწერა ხელშეკრულებებს ორ ტურ-ოპერატორთან (ერთ-ერთი მათგანია Tez Tour Ukraine).
რეგულარული დაბალფასიანი რეისების შესრულება დაგეგმილია 2021 წლის აპრილში. ამჟამად ავიაგადამზიდველი ფრენების პროგრამას შეიმუშავებს.
„ჯერ კონკრეტულ მიმართულებებს ვერ დავასახელებ. მაგალითისთვის ვიტყვი, რომ განვიხილავთ ბათუმს – აქ ფრენა არა მხოლოდ ტურისტებს, არამედ იმ უკრაინელებსაც შეუძლიათ, რომლებიც საქართველოში უძრავ ქონებას ფლობენ,“ – კომენტარს აკეთებს ხაინაცკი.
ავიაბილეთების საორიენტაციო ფასები ჯერ არ არის გამოცხადებული. ცნობილია, რომ ამჟამად კომპანიის შტატში 50 ადამიანია, ხოლო ექსპლუატანტის სერტიფიკატის მიღების შემდეგ იგი 100 თანამშრომლამდე გაიზრდება.