ფრენა და ორსულობა: რჩევები მოგზაური ქალბატონებისთვის

გავფრინდეთ თუ არა? ეს საკითხი ყველა იმ ორსულ ქალბატონს აწუხებს, რომელიც საზღვარგარეთ დასვენების ან მივლინების შესახებ ფიქრობს. ჩვენს მასალაში გაეცნობით მოგზაურობის ყველაზე ხელსაყრელი პერიოდების, ავიაკომპანიის დებულებაში ქალთა მიმართ არსებული მოთხოვნებისა და იმის შესახებ, თუ როგორ უნდა გახადოთ ფრენა მაქსიმალურად კომფორტული მომავალი დედისთვის.

როდის შეიძლება ფრენა ორსულებისთვის?

მოგზაურობის დაგეგმვისას გაითვალისწინეთ თქვენი ჯანმრთელობის მდგომარეობა და ორსულობის ტრიმესტრი.

მაგალითად, 1-დან 13 კვირის ჩათვლით, რეკომენდებულია ფრენისგან თავის შეკავება. თუ ძალიან გჭირდებათ, იმოგზაურეთ მე-7 ან მე-8 კვირას. ეს პერიოდი პირველ ტრიმესტრში ყველაზე უსაფრთხოდ ითვლება.

მეორე ტრიმესტრი (14-27 კვირა) ფრენისთვის ყველაზე ხელსაყრელია. მაგრამ ამავდროულად, ზოგიერთი სპეციალისტი არ გირჩევთ 18-დან 22 კვირამდე მოგზაურობას გვიანი თვითნებითი აბორტის შესაძლო რისკის გამო. თუმცა თუ გართულებები არ გაქვთ, შეგიძლიათ დაგეგმოთ დასვენება.

მესამე ტრიმესტრის განმავლობაში მოგზაურობა (28-დან 40 კვირის ჩათვლით) არც ისე მარტივია. ორსულობის გვიან ვადაზე ქალბატონებს ბორტზე ასვლის უფლებას ავიაკომპანიების უმეტესობა აძლევს მხოლოდ შესაბამისი სამედიცინო ცნობის წარდგენის შემთხვევაში, ხოლო ზოგიერთი გადამზიდავი ითხოვს დოკუმენტს ავიაკომპანიის სამედიცინო ცენტრიდან.

ისინი ასევე ითხოვენ იმ დოკუმენტის შევსებას, რომელიც ადასტურებს, რომ ორსული აცნობიერებს ყველა რისკს და ავიაკომპანია არ არის პასუხისმგებელი შესაძლო შედეგებზე.

ექიმის მიერ გაცემული ცნობა უნდა შეიცავდეს შემდეგ ინფორმაციას:

  • ორსულობის ვადა;
  • ნაყოფის რაოდენობა (ერთნაყოფიანი თუ ორნაყოფიანი (მრავალნაყოფიანი) ორსულობა);
  • დასტური იმისა, რომ ორსულობა გართულებების გარეშე მიმდინარეობს;

როგორია ავიაკომპანიების მოთხოვნები ორსულების მიმართ?

ავიაბილეთის შეძენამდე წაიკითხეთ ავიაკომპანიის წესები, რომლითაც აპირებთ ფრენას. თითოეულ გადამზიდავს საკუთარი მოთხოვნები და პირობები აქვს.

Wizz Air

მაგალითად, უნგრული დაბალბიუჯეტიანი ავიაკომპანიით ორსულობის 34-ე კვირამდე შეგიძლიათ ფრენა (მრავალნაყოფიანი ორსულობის შემთხვევაში – 32-ე კვირამდე).

თუ ორსულობის ვადა 28 კვირაზე მეტია, სამედიცინო ცნობა უნდა წარადგინოთ. Wizz Air იღებს ექიმის მიერ გაცემულ დოკუმენტს, რომელიც გაცემულია ფრენის თარიღამდე არაუადრეს 6 დღისა.

Ryanair

28 კვირამდე ცნობა არ არის საჭირო. თუ ვადა უფრო მეტია, აუცილებელია ექიმის მიერ გაცემული დოკუმენტის ჩვენება (რომელიც ხელმოწერილია ფრენამდე არაუმეტეს ორი კვირით ადრე).

Ryanair-ით ორსულებს შეუძლიათ ფრენა მაქსიმუმ 36-ე კვირის ბოლომდე (ტყუპებით ან სამტყუპით ორსულები – 32-ე კვირის ბოლომდე).

UIA

თუ თქვენი ორსულობის ვადა 28 კვირას აღემატება, საერთაშორისო უკრაინული ავიახაზები ექიმის ცნობის წარდგენას მოგთხოვთ. იგი უნდა იყოს დათარიღებული გამგზავრების აეროპორტიდან ფრენამდე მაქსიმუმ 7 დღით ადრე. ექიმის მიერ შესავსები UIA-ს ფორმა აქ შეგიძლიათ ჩამოტვირთოთ.

UIA-ს ბორტზე არ დაიშვება ქალები, რომელთა ორსულობის ვადა 35 კვირაზე მეტია (ან 32 კვირაზე მეტი მრავალნაყოფიანი ორსულობის შემთხვევაში).

Turkish Airlines

ორსულობის 28 კვირამდე მგზავრებს სამედიცინო ცნობის გარეშე მგზავრობა შეუძლიათ. მათ, ვინც ერთ შვილს ელოდება და ფრენას გეგმავს ორსულობის 28-ე კვირის დასაწყისიდან 35-ე კვირის ბოლომდე, უკუჩვენებების არარსებობის დამადასტურებელი ცნობა უნდა წარმოადგინონ. ასეთივე ცნობა უნდა წარმოადგინონ ტყუპებით ან სამტყუპით ორსულებმა, რომლებიც ფრენას გეგმავენ პერიოდში ორსულობის 28-ე კვირის დასაწყისიდან 31-ე კვირის ბოლომდე.

სამედიცინო ჩვენებების მიუხედავად, ბორტზე არ დაიშვებიან 36 და მეტი კვირის ორსულები, რომლებიც ერთ შვილს ელოდებიან, ხოლო ისინი, ვინც ორ ან მეტ ბავშვს ელოდება – ორსულობის 32-ე კვირაზე.

Lufthansa

ამ ავიაკომპანიით მგზავრობა 36-ე კვირის ბოლომდე შეგიძლიათ (ან მშობიარობის სავარაუდო თარიღამდე ოთხი კვირით ადრე) ცნობის წარმოდგენის გარეშე. 36-ე კვირის შემდეგ, ორსულმა Lufthansa-ს სამედიცინო ცენტრს უნდა მიმართოს. მრავალნაყოფიანი ორსულობის დროს ფრენა აკრძალულია 28-ე კვირის შემდეგ.

Alitalia

ავიაკომპანია Alitalia-ს რეისზე რეგისტრაციის დროს ორსულობის 36-ე კვირის შემდეგ ან მრავალნაყოფიანი ორსულობის შემთხვევაში, ორსულმა უნდა წარმოადგინოს შევსებული სპეციალური სამედიცინო ფორმა (MEDIF), რომელიც ხელმოწერილი და ბეჭდით დამოწმებულია მკურნალი ექიმის მიერ.

Air France

Air France-ით ფრენისთვის ექიმის ოფიციალური თანხმობა არ გჭირდებათ. „მიუხედავად ამისა, მგზავრობის წინ გირჩევთ თქვენი გინეკოლოგის აზრი გაითვალისწინოთ,” – მითითებულია გადამზიდავის ვებ-გვერდზე.

რჩევები ორსულებს ფრენის დროს

ავიაბილეთების შეძენამდე გაიარეთ კონსულტაცია თქვენს ექიმთან. ძლიერი ტოქსიკოზი, ანემია და ჰიპერტონია ნამდვილად არ არის მოგზაურობის საუკეთესო თანამგზავრი. თუ თავს მშვენივრად გრძნობთ, ექიმმა ფრენის ნება დაგრთოთ და ბილეთები უკვე ფოსტაზე გაქვთ მიღებული, მოგზაურობისთვის მზადება დაიწყეთ. გთავაზობთ რამდენიმე რჩევას, რომლებიც გართულებების რისკის მინიმუმამდე შემცირებაში დაგეხმარებათ და ფრენას უბრალოდ უფრო კომფორტულს გახდის.

  • გააფორმეთ სამოგზაურო დაზღვევა ორსულთათვის.
  • თუ გაქვთ შესაძლებლობა, ბიზნეს-კლასით იფრინეთ. აქ უფრო ფართო სავარძლები და უფრო დიდი მანძილია ადგილებს შორის.
  • ეკონომ-კლასში ადგილი პირველ რიგში ან გასასავლელთან დაიკავეთ (თქვენი ფეხები მადლობელი იქნება და ტუალეტის გამოყენებაც უფრო მოსახერხებელია). ადგილები, რა თქმა უნდა, წინასწარ უნდა დაჯავშნოთ ავიაბილეთების შეძენის დროს.
  • ჩაიცვით ელასტიური კოლგოტი ორსულთათვის, რომელიც ხელს უწყობს სისხლის ნორმალურად მიმოქცევას.
  • შეიკარით უსაფრთხოების ღვედი მუცლის ქვემოთ.
  • არ დაგავიწყდებთ ორთოპედიული ბალიში ზურგისა და კისრისთვის.
  • ფრენის დროს სავარძლის საზურგე გადაწიეთ, რათა თქვენი ხერხემლის ხვედრი შეამსუბუქოთ.
  • რეგულარულად ადექით ადგილიდან და სალონში იარეთ.
  • არ მიირთვათ ჭარბი საკვები.
  • დალიეთ საათში დაახლოებით ნახევარი ლიტრი სითხე (უარი თქვით გაზიან სასმელებზე, ჩაისა და ყავაზე).
  • იმოგზაურეთ თანხმლებ პირთან ერთად და მიეცით მას თქვენი ექიმის საკონტაქტო ინფორმაცია.
  • ინგლისურად თარგმნეთ თქვენი გინეკოლოგის მიერ მოწოდებული ყველა დოკუმენტი და თან იქონიეთ. გამგზავრებამდე იპოვეთ თქვენს სასტუმროსთან ყველაზე ახლომდებარე სამედიცინო ცენტრი და ჩაიწერეთ მისი საკონტაქტო ინფორმაცია.
Posted in ბლოგი, ლაიფჰაკი and tagged , .