თქვენი ბარგი დაკარგული ან დაზიანებულია: როგორ მივიღოთ კომპენსაცია?

თქვენ ჩამოფრინდით, მაგრამ ბარგი ჯერ კიდევ არა. ან ჩამოფრინდა, მაგრამ სრულად არა. ვინ არის დამნაშავე, როგორ უნდა ვიმოქმედოთ და რეალურად რის მიღწევას შევძლებთ? ჩვენ დეტალური ინსტრუქცია მოგიმზადეთ ბარგის დაკარგვის, დაზიანების ან ნივთების დანაკლისის შემთხვევაში. შეინახეთ და ისწავლეთ თქვენი უფლებების დაცვა!

სტატისტიკის წუთი

SITA-ს მონაცემების თანახმად, 2018 წელს ყოველ 1000 მგზავრზე 5,7 ბარგისპრობლემური“ ერთეული დაფიქსირდა. მათგან:

  • 77% დაგვიანებით მიეწოდა;
  • 18% დაზიანდა;
  • 5% გაუჩინარდა: მოპარული ან დაკარგულია.

SITA 2019 წლის ანგარიშის „Baggage IT insights“ მონაცემები

ბარგთან დაკავშირებული პრობლემების ყველაზე ხშირი მიზეზებია:

  • მარცხი დატვირთვისას: ვერ მოასწრეს გადატვირთვა ან არასწორი რეისით გაგზავნეს. რაც უფრო მოკლე პერიოდია გადაჯდომით რეისებს შორის/რაც უფრი გვიან მიხვალთ რეგისტრაციაზე, მით უფრო მაღალია რისკი, რომ დანიშნულების აეროპორტში მბრუნავ ბილიკზე თქვენს ჩემოდანს ვერ დაინახავთ;
  • შეცდომა გამგზავრების აეროპორტში ბარგის გაფორმებისას;
  • ბარგის ზედმეტი იარლიყები. თუ მათ ჩემოდანზე ტოვებთ, ერთ დღეს იგი სხვა მიმართულებით შეიძლება გაფრინდეს;
  • უყურადღებობა: თუ ჩემოდანი სტანდარტულია და განსაკუთრებული ნიშნების გარეშე, შესაძლოა ვინმემ შეცდომით აიღოს;
  • დაუდევარი დამოკიდებულება. ვფიქრობთ, რომ ერთხელ მაინც გინახავთ, თუ როგორ აგდებენ მტვირთავები ბარგს, რის გამოც ზიანდება გორგოლაჭები, სახელურები, ზოგჯერ კი ჩანთა ტყდება კიდეც.

რა გავაკეთოთ, თუ ბარგი დაზიანებულია?

ჩემოდნის ბილიკიდან აღების შემდეგ, ყურადღებით შეამოწმეთ დაზიანებულია თუ არა იგი. პრეტენზიის წაყენება მხოლოდ აეროპორტის საკონტროლო ზონის დატოვებამდეა შესაძლებელი!

რაიმე პრობლემაა? მოქმედებების თანმიმდევრობა:

  1. დაკარგული და ნაპოვნი ბარგის საძიებო სამსახურის დახლთან მიბრძანდით – მას შეიძლება ეწოდებოდეს Lost and Found, Lost luggage, Baggage Claim ან Passenger Service. ვერ იპოვეთ? აეროპორტის ნებისმიერ თანამშრომელს ჰკითხეთ ვის უნდა მიმართოთ.
  2. დახლთან უამბეთ, რა მოხდა, რის შემდეგაც შეადგენენ აქტს ბარგის დაზიანების ან ქურდობის შესახებ (Damage and Pilferage Report). თქვენ გადმოგეცემათ დოკუმენტი უნიკალური ნომრით, რომელიც ავიაკომპანიასთან ნებისმიერი კონტაქტის დროს უნდა მიუთითოთ.
  3. 7 დღის (ან 21 დღის განმავლობაში, თუ ბარგის გადაზიდვა შეფერხდა) განმავლობაში, თქვენ უნდა დაწეროთ პრეტენზია და ავიაკომპანიის ვებ-გვერდზე მითითებული ელექტრონული ფოსტით გააგზავნოთ. წერილში მიუთითეთ კომპენსაციის სასურველი ოდენობა, თან დაურთეთ აეროპორტში შედგენილი აქტის, ბილეთის, ბარგის იარლიყის ასლები და დაზიანებული ბარგის ფოტო.
  4. პრეტენზიის განხილვის შემდეგ თქვენ დაგიკავშირდებათ მომხმარებლებთან ურთიერთობის სამსახურის წარმომადგენელი და მიღებული გადაწყვეტილების შესახებ გაცნობებთ. როგორც წესი, აღნიშნული განსახორციელებლად ავიაკომპანიას 3-6 თვე აქვს.

ჩვენმა ავტორმა ეკატერინემ, რომელიც თბილისიდან პრაღაში ჩაფრინდა ავიაკომპანია უკრაინის ავიახაზებით, მიიღო ჩანთა მოგლეჯილი გორგოლაჭით და ავიაკომპანიისგან კომპენსაცია მიიღო. ვთხოვეთ თავისი გამოცდილება გაეზიარებინა:

დახლთან გააფორმეს აქტი ბარგის დაზიანების შესახებ.

იმავე დღეს იგი ავიაკომპანიას გაუგზავნეს ვებ-გვერდზე მითითებული ელექტრონული ფოსტით, თან დაურთეს ფოტო და ყველა საჭირო დოკუმენტი.

გამომგზავნი:

გაგზავნილია: 2018 წლის 11 ნოემბერი, 15:32

მიმღები: Customerrelations

თემა: დაზიანებული ბარგი – პრეტენზია

მოგესალმებით! დღეს, 2018 წლის 11 ნოემბერს თბილისი-პრაღის მიმართულებით ფრენის დროს დაზიანდა ჩვენი ჩანთა, რომლის ტრანსპორტირება რეგისტრირებული ბარგის სახით ხორციელდებოდა. პრაღის აეროპორტში იგი მივიღეთ ფაქტობრივად მოგლეჯილი გორგოლაჭით, რაც დაფიქსირდა აქტით Damage Report № (ნომერი)

ბარგი ჩემს მეუღლეზე იყო გაფორმებული, საკონტაქტო ტელეფონის ნომერი: საკონტაქტო ელექტრონული ფოსტის მისამართი: ის, რომლითაც გამოგზავნილია წერილი.

წერილს თანდართული აქვს:

  1. ჩანთისა და დაზიანების ახლოდან გადაღებული ფოტო
  2. ბილეთი
  3. ორივე რეისის ჩასასხდომი ბარათები
  4. პრაღის აეროპორტში შედგენილი ბარგის დაზიანების შესახებ აქტის ასლი
  5. ბარგის საიდენტიფიკაციო იარლიყის მოსახევი ტალონის ასლი.

ჩანთის საორიენტაციო ღირებულება შეძენის დროს – დაახლოებით 120 ლარი.

გთხოვთ აგვინაზღაუროთ ზიანი.

შემდგომ მოვლენები ამგვარად განვითარდა:

– 21 ნოემბერს, პრეტენზიის გაგზავნიდან 10 დღის შემდეგ, მათ უპასუხეს, რომ პრეტენზია დაკმაყოფილდა და კომპენსაციის გადმორიცხვის მიზნით საბანკო რეკვიტები მოითხოვეს;

– დეკემბრის შუა რიცხვებში, ანგარიშზე თანხა დაირიცხა.

კომპენსაციას ყველას არ უხდიან. ავიაკომპანიას შეუძლია უარი თქვას მოთხოვნების დაკმაყოფილებაზე, თუ აღმოჩნდება, რომ:

– ჩანთა იყო ძველი, ჰქონდა დეფექტები და არ იყო შესაფერისი ტრანსპორტირებისთვის;

– ჩანთაში ძალიან ბევრი ნივთი იყო მოთავსებული, რაც დაზიანების მიზეზი გახდა;

– თქვენ გადაგქონდათ მსხვრევადი ან არასწორად შეფუთული ნივთები. მათი დაზიანებისთვის, მაგალითად, გატეხილი ლეპტოპისთვის ან ფოტოაპარატისთვის, ავიაკომპანია პასუხისმგებლობას არ იღებს.

ბარგს რაღაც აკლია: როგორ ვიმოქმედოთ?

იგივე, რაც დაზიანებული ბარგის შემთხვევაში. აეროპორტიდან გაუსვლელად, შეადგინეთ აქტი, 7 დღის განმვალობაში გაგზავნეთ პრეტენზია ავიაკომპანიაში თანდართული საჭირო დოკუმენტაციით. აუცილებელია რაც შეიძლება დეტალურად აღწეროთ თუ რა დაიკარგა და თითოეული ნივთის ღირებულება მიუთითოთ (იდეალში – ჩეკებით დაადასტუროთ).

თითოეულ ავიაკომპანიას აქვს ჩამონათვალი, თუ რისი ტრასპორტირება იკრძალება რეგისტრირებული ბარგით. თუ რაიმე აკრძალული სიიდან დაიკარგა, კომპენსაციას ვერ მიიღებთ.

ბარგი დაიკარგა: რა გავაკეთოთ?

ჩემოდანი დაიკარგა? პანიკის გარეშე! შემთხვევების 79%-ში ბარგს პოულობენ და მფლობელს 72 საათის განმავლობაში უბრუნებენ.

პირველ რიგში, დარწმუნდით, რომ თქვენ მას შესაბამის ბილიკთან ელოდებით (მის ზემოთ უნდა იყოს ტაბლო, რომელზეც თქვენი რეისის ნომერი იქნება მითითებული), შემდეგ კი იმაში, რომ იგი, პრინციპში, ამ ბილიკზე უნდა იყოს. თხილამურები, სნოუბორდები და სხვა სპორტული ინვენტარი, ასევე საბავშვო ეტლები არაგაბარიტული ბარგის დახლთან გაიცემა, რომელიც იმავე დარბაზში მდებარეობს.

ვერ იპოვეთ? იმოქმედეთ შემდეგნაირად:

  1. მიმართეთ დაკარგული და ნაპოვნი ბარგის საძიებო სამსახურს.
  2. შეადგინეთ აქტი ბარგის არასათანადო ტრანსპორტირების შესახებ (Property Irregularity Report).
  3. ბარგის რეგისტრაცია ხდება WorldTracer საერთაშორისო სისტემაში, მას ენიჭება ნომერი, რომლითაც დამოუკიდებლად შეგიძლიათ შეამოწმოთ განაცხადის სტატუსი.
  4. თუ იმ ქვეყანაში ჩაფრინდით, სადაც მუდმივად არ ცხოვრობთ, გეკუთვნით კომპენსაცია პირველადი მოხმარების ნივთების შესაძენად. ზოგჯერ Lost and Found დახლთან გაიცემა ნაკრები კბილის პასტით, ჯაგრისით, სავარცხლით, სამართებლით, შამპუნით და ა.შ., მაგრამ უფრო ხშირად ავიაკომპანიები მათი შეძენისთვის დაახლოებით 50 აშშ დოლარს იხდიან. თუ ამ თანხაზე მეტს დახარჯავთ, შეაგროვეთ ჩეკები – ბარგის დაბრუნების დღიდან 21 დღის განმავლობაში, შეგიძლიათ გაგზავნოთ პრეტენზია და ხარჯების ანაზღაურება მოითხოვოთ.
  5. როგორც კი ბარგს იპოვიან, იგი უფასოდ უნდა მოგაწოდონ.

ბარგის საპოვნელად ავიაკომპანიას 21 დღე აქვს, რის შემდეგაც იგი დაკარგულად ითვლება. მისი ღირებულების კომპენსაციის ანაზღაურება შეგიძლიათ მოითხოვოთ რეისის ჩამოფრენის თარიღიდან ორი წლის განმავლობაში, ამისათვის ავიაკომპანიას პრეტენზია უნდა გაუგზავნოთ, რომელსაც თან დაურთავთ აქტის, ბილეთის, ბარგის იარლიყის, ზედმეტი ბარგის გადახდის ქვითრისა და თქვენი დაკარგული ნივთების მფლობელობის დამადასტურებელი სხვა დოკუმენტების ასლებს.

კომპენსაციის ოდენობა დამოკიდებულია იმაზე, თუ რომელი კონვენცია აქვს რატიფიცირებული ქვეყანას, სადაც რეგისტრირებულია „დამნაშავე“ ავიაკომპანია: ვარშავის თუ მონრეალის. პირველ შემთხვევაში, უნდა დაკმაყოფილდეთ 20 აშშ დოლარით თითო კილოგრამზე, მეორე შემთხვევაში კი შეგიძლიათ მიიღოთ 1 131 SDR (Special Drawing Rights/სპეციალური სასეხო უფლებები), ამჟამად 1 SDR = 1 აშშ დოლარია. თუ გაქვთ ჩემოდანში არსებული ნივთების ღირებულების დამადასტურებელი ჩეკები, თან დაურთეთ პრეტენზიას – ეს უფრო მეტი კომპენსაციის მიღებაში დაგეხმარებათ.

რისკის მინიმიზაცია: 5 რჩევა მოგზაურთათვის

  1. ყოველი მოგზაურობის შემდეგ, ჩემოდანს ბარგის იარლიყები მოხსენით.
  2. შეიძინეთ მისამართის იარლიყი, ჩაწერეთ თქვენი საკონტაქტო ინფორმაცია და თქვენს ჩემოდანზე ჩამოკიდეთ. თუ ვინმე შეცდომით წაიღებს თქვენს ბარგს, ნივთები უფრო სწრაფად დაგიბრუნდებათ.
  3. ჩემოდანი სტიკერებით მორთეთ ან შეიძინეთ მკვეთრი ფერების ჩანთა. ეს შეამცირებს მბრუნავ ბილიკზე არევის რისკს და გაამარტივებს დაკარგვის შემთხვევაში „განსაკუთრებული ნიშნების“ აღწერას.
  4. თუ გადაჯდომით მიფრინავთ, მაგრამ ერთი და იმავე ავიაკომპანიის რეისებით, ბარგი პირდაპირ დანიშნულების ადგილადმე გააფორმეთ.
  5. აეროპორტში რეგისტრაციის დაწყების დროს მიბრძანდით.

გარდა საბუთების, ფულისა და ძვირადღირებული ტექნიკისა, გირჩევთ ხელბარგში ჩაალაგოთ წამლები, ტელეფონის დამტენი მოწყობილობა და გამოსაცვლელი ტანსაცმელი. ეს გამოდაგებათ როგორც რეისის დაგვიანების შემთხვევაში, ისე ბარგის დაკარგვის შემთხვევაში.

Posted in ბლოგი, ლაიფჰაკი and tagged , , .