ბუქარესტი ავიაბილეთები

ბუქარესტი – რუმინეთის მთავარი ქალაქი და ქვეყნის კულტურული ცენტრია . იგი ტურისტებს იზიდავს მდიდარი ისტორიით, კოლორიტული ატმოსფეროთი და უჩვეულო ღირსშესანიშნაობებით – აქ აქვთ საკუთარი ტრიუმფალური თაღი და მსოფლიოში ყველაზე დიდი პარლამენტის შენობა . მთავარი საკვირველება კი ძველი ბუქარესტია ვიწრო ქუჩებით, ეკლესიებითა და ისტორიული ძეგლებით.

თვითმფრინავით

თბილისიდან ბუქარესტის მიმართულებით პირდაპირი რეისები არ სრულდება . შეგიძლიათ გადაჯდომით იმგზავროთ სხვადასხვა ავიაკომპანებით, ძირითადად გადაჯდომთ დაფრინავენ: პეგასუსი, პოლონეთის ავიახაზები, აჯეტი, და ეგეოსის ავიახაზები.

თანამედროვე რუმინეთის დედაქალაქი – იმ უამრავი ინფრასტრუქტურული პროექტის აყვავებული ქალაქია, რომლებმაც უკვე საგრძნობლად შეცვალეს მისი იერსახე . ადრე მას „პატარა პარიზს“ უწოდებდნენ, დღეს კი იგი ძველისა და ახლის საინტერესო მიქსია . აქ გვერდიგვერდ მდებარეობს სამსაუკუნოვანი ეკლესია, შემინული საოფისე შენობები და კომუნისტური ეპოქის ბეტონის საცხოვრებელი კოშმარი . თუმცა ბოლო წლებში ევროკავშირის გრანტების წყალობით ბუქარესტი ევროპიზაციის გზას დაადგა, უფრო მოდური გახდა და პოსტსაბჭოთა საშინელი რაიონები განაახლა.

აეროპორტიდან ქალაქის ცენტრამდე მატარებელი, ავტობუსი და ტაქსი მოძრაობს . რკინიგზის სადგური 2 კილომეტრში მდებარეობს, რომელშიც უფასო შატლი ჩაგიყვანთ (ბილეთი 6 რუმინული ლეი ღირს, მგზავრობის ხანგრძლივობა – დაახლოებით 40 წუთი) . აეროპორტსა და მთავარ რკინიგზის სადგურს შორის # 7780 და 783 ავტობუსი კურსირებს . ბილეთები გაჩერებებზე იყიდება 3,5 ლეიდ, აუცილებელია მათი სალონში კომპოსტირება .

ღამის რეისების მგზავრები ცენტრში ჩასვლას მხოლოდ ტაქსით შეძლებენ, მგზავრობის ღირებულებაა – 60-80 RON.

ბუქარესტის რაიონები

ქალაქის შუაგულია – ლიპსკანის ისტორიული რაიონი ამავე სახელწოდების საფეხმავლო ქუჩით . ადრე ეს იყო სავაჭრო-სახელოსნო კვარტალი, დღეს კი ქალაქის ყველაზე პრესტიჟული უბანია – ტურისტებისა და ქალაქის მკვიდრების საყვარელი დასასვენებელი ზონა . აქ მდებარეობს უძველესი ადგილი – კურტია-ვეკე, სადაც ოდესღაც ლეგენდარული თავადის ვლად ცეპეშის რეზიდენცია იყო აღმართული . თუმცა ამ სასახლის შესახებ დღეს სულ რამდენიმე აგური თუ გაგახსენებთ, სამაგიეროდ აქვე მდებარე ტაძარი ბუქარესტის ყველაზე ძველ შენობად ითვლება . შორიახლოს მდებარეობს რუმინეთის ისტორიის ეროვნული მუზეუმი, სამხრეთ-დასავლეთით კი – სახელგანთქმული პარლამენტის სასახლე.

ბუქარესტი, რომისა და მოსკოვის მსგავსად, 7 ბორცვზე დგას.

დედაქალაქის ჩრდილოეთ რაიონებში ტბების ნაპირებთან ლამაზი პარკებია გაშენებული, მათგან ყველაზე ცნობილია „ტეი“, „ფლორიასკა“ და „ჰერასტრაუ“ . ქალაქის ეს ნაწილი გამოირჩევა ფართო მწვანე ბულვარებით, დიდებული შენობებითა და ვილებით.

აღსანიშნავია პრიმევერიის რაიონი . სოციალიზმის დროს იგი დახურული იყო – აქ მხოლოდ სახელმწიფო აპარატის წარმომადგენლები ცხოვრობდნენ, ამიტომ მისი შენობები დიდ ციხე-სიმაგრეებს მოგაგონებთ . აქაური მთავარი ღირსშესანიშნაობაა გაზაფხულის სასახლე, ყოფილი მმართველის ნიკოლაე ჩაუშესკუს რეზიდენცია . ბუქარესტის გარეუბანში მდებარე ფერენტარის რაიონი ჯურღმულების არასახარბიელო დიდებით სარგებლობს . ამბობენ, რომ აქ მცხოვრები ბოშები ასე თუ ისე კრიმინალთან არიან კავშირში . ამიტომ ტურისტებს ვურჩევთ ამ რაიონის მონახულებისგან თავი შეიკავონ .

https://www.youtube.com/watch?v=IxJjI2euqIU

ტრანსპორტი

საქალაქო ტრანსპორტი წარმოდგენილია თანამედროვე ავტობუსებით, ტროლეიბუსებით, ტრამვაითა და მეტროთი (3 ხაზი, სამუშაო საათებია: 5:00-23:30) . მაგნიტური ბარათები შესასვლელში მდებარე ჯიხურებში იყიდება, ფასი: 2 მგზავრობა – 5 RON, 10 მგზავრობა – 20 RON, ერთდღიანი ბილეთი ულიმიტო მგზავრობით – 7 RON . სადგურების დასახელება ყოველთვის კარგად არ ჩანს – ისინი ჩვეულებრივ ცალკე ფირფიტაზე იწერება და საკმაოდ მოუხერხებლად არის განთავსებული.

მიწისზედა ტრანსპორტით ერთი მგზავრობა 1,30 რუმინული ლეი ღირს, ერთდღიანი ბილეთი – 8 RON, ერთკვირიანი – 17 RON . საქალაქო ტრანსპორტის ოფიციალური ვებ-გვერდი მგზავრობის დაგეგმარებაში დაგეხმარებათ . ბილეთებს ან სამგზავრო ბარათებს ნებისმიერ ჯიხურში შეიძენთ, რომელზეც RATB ლოგოტიპია გამოსახული.

უბილეთო მგზავრობისთვის ჯარიმა – 50 რუმინული ლეია.

მიუხედავად იმისა, რომ ბუქარესტში ველოსიპედით მოძრაობა ჯერ კიდევ ვითარდება, ქალაქში შესანიშნავი ველობილიკებია მოწყობილი მარკირებით და ზოგიერთ ადგილზე ველოშუქნიშნებით . ველოსიპედის ქირაობა შესაძლებელია პარკებში, გაქირავების პუნქტები ზამთარშიც კი მუშაობს . ღირებულება: 20 RON 2 საათის განმავლობაში . ზოგიერთი სასტუმრო ველოსიპედის ქირაობას უფასოდ შემოგთავაზებთ.

ტაქსი, როგორც წესი, მრიცხველებითაა აღჭურვილი . თუ მრიცხველი არ არის, ფასზე წინასწარ უნდა შეთანხმდეთ . სახელმწიფო ტაქსს გვერდზე გამოსახული ჭადრაკის უჯრებით გამოარჩევთ . კერძო ტაქსის სახურავზე განთავსებულია ასოები „P“ და „РO“ . ისინი მრიცხველის გარეშე მუშაობენ და უფრო ძვირია, მაგრამ მათ უფრო ადვილად გააჩერებთ . ტარიფი შესაძლოა მერყეობდეს 1,4-დან 3,5 რუმინულ ლეიმდე 1 კმ-ზე .

ბუქარესტის სასტუმროები

ბუქარესტში არსებობს როგორც თანამედროვე სასტუმროები, ისე ის სასტუმროები, რომლებმაც კომუნისტური წარსულის ნიშნები შეინარჩუნეს . განთავსების ფასები დამოკიდებულია არა მხოლოდ სასტუმროს დონეზე, არამედ ცენტრიდან დაშორებაზე: 3* კატეგორიის ორადგილიანი ნომრის ღირებულებაა – 300 ლეიდან, 4* – 400 ლეიდან, 5* – 800 ლეიდან დღე-ღამეში . ტრადიციული სასტუმროების გარდა შეგიძლიათ განთავსდეთ სასტუმრო სახლებში – ეს არის საოჯახო ტიპის მინი-სასტუმროები, გულითადი ატმოსფეროთი და ყველანაირად კეთილმოწყობილი.

ბუქარესტის უძველესი სასტუმროა Hanul lui Manuс . სწორედ აქ დაიდო „ბუქარესტის ტრაქტატი“ – კუტუზოვმა და აჰმედ-ფაშამ ხელი მოაწერეს საზავო ხელშეკრულებას, რომლის თანახმად ბესარაბია რუსეთის იმპერიის შემადგენლობაში შევიდა .

დედაქალაქის გარეუბანში გვხვდება სასტუმრო სახლები ან სოფლის პანსიონები, სადაც ძალიან უბრალო საცხოვრებელი პირობებია . გარდა დაბალი ფასებისა, ეს ვარიანტი საშუალებას მოგცემთ გაეცნოთ ადგილობრივი მაცხოვრებლების ცხოვრების წესს . ავტომოყვარულებს მოტელები ელოდებათ ბუქარესტის შესასვლელთან და ყველა საავტომობილო გზაზე – ღამისთევის ღირებულებაა 80-120 RON . ყველაზე ბიუჯეტური განთავსების ვარიანტია (100 ლეიდან დღე-ღამეში) – ჰოსტელები, რომლებიც ბუქარესტის ნებისმიერ რაიონში მდებარეობს.

რა ჩამოვიტანოთ

ბუქარესტიდან გემრიელი საჩუქრის სახით რუმინული ღვინოები და „ცუიკა“ – ქლიავის ნაყენი ჩამოაქვთ . პოპულარობით სარგებლობს ყველი „კაშკავალი“ და უჩვეულო ყველი „ბურდუფი“ – იგი ცხვრის რძისგან მზადდება და ფიჭვის ქერქში ინახება, რის გამოც სპეციფიკურ წიწვოვან სურნელს იძენს . საფირმო ტკბილეულია – Poiana ბრენდის შოკოლადი და „კულიჩი-კოზუნაკი“.

რუმინელი ოსტატების მიერ ნაქარგი ნამდვილი შინნაქსოვი ნივთები, თოჯინები ერვონულ სამოსში და სხვა ხალხური სუვენირები უმჯობესია შეიძინოთ სოფლის ეროვნულ მუზეუმში „დიმიტრიე გუსტი“ (ოფიციალური ვებ-გვერდი ინგლისურ ენაზე) და რუმინეთის ხელოვნების მუზეუმში (ოფიციალური ვებ-გვერდი ინგლისურ ენაზე) . რუმინული კოსმეტიკური საშუალებები Ana Aslana და Jerovital მაღაზიებსა და აფთიაქებში იყიდება.

მთავარი სავაჭრო ქუჩებია კალია ვიქტორიე, კალია მოშილორი, კალია დორობანცი და რომის მოედნის გადამკვეთი ბულვარები . პროდუქტების მთავარი ბაზარი ამზეის მოედანზე მდებარეობს, ასევე არსებობს ბაზრები ობორისა და დორობანცილორის მოედნებზე . შაბათ-კვირას ობორი ძველმანების ბაზრობად იქცევა ხოლმე.

ლიფსკანის კვარტალში შემონახულია მინამბერთა სახელოსნოები . ძველი ტექნოლოგიის მიხედვით მზადდება ვაზა Gale . მათი განსხვავებული რელიეფური დეკორი ყვავილოვანი მოტივებით მიიღება ფერთა რამდენიმე ფენის თანმიმდევრული დატანებით . კიდევ ერთი საფირმო რუმინული სუვენირია – ადგილობრივი ფაიფურისგან დამზადებული მოწნული კალათები, ჭურჭელი, ზანზალაკი და სხვა ნაკეთობები . და, რა თქმა უნდა, ბუქარესტში, ისევე როგორც მთელ რუმინეთში, ყველგან არის ტირაჟირებული დრაკულას თემა.

ბუქარესტის სამზარეულო და რესტორნები

რუმინული სამზარეულოსთვის დამახასიათებელია უბრალო და ნოყიერი კერძები . „მამალიგა“ – მისი სავიზიტო ბარათია . ამ სიმინდის ფქვილისგან დამზადებულ შესქელებულ ფაფას გარნირად ხორცთან მოგართმევენ . პოპულარული კერძებია – წვნიანი „ჩორბა“, შემწვარი ძეხვი „მიტიტეი“, მწვადი „მიჩი“, დესერტი „პაპანაში“ . ამ ყველაფრის დაგემოვნება შეგიძლიათ საფირმო რესტორნების ქსელში La Mama.

რესტორანი Cara cu Bere ძველი ბუქარესტის საფეხმავლო ზონაში მდებარეობს . მას 150-წლიანი ისტორიითა და აუთენტური ინტერიერით შეუძლია დაიკვეხნოს . სტუმრებს აქ ნაციონალურ კერძებს, საკუთარი წარმოების ლუდსა და ხალხურ მუსიკას სთავაზობენ . რესტორანი ძალიან დიდი პოპულარობით სარგებლობს, ამიტომ მაგიდა წინასწარ უნდა დაჯავშნოთ.

გარდა კაფეებისა ადგილობრივი კერძების მენიუთი, იტალიური სამზარეულოს უამრავი დაწესებულება მუშაობს, სადაც ყოველთვის არის სპაგეტი, რავიოლი, პიცა და რიზოტო . გარდა ამისა, ბუქარესტში წარმოდგენილია ფრანგული, უნგრული, ბერძნული, ესპანური, მექსიკური, თურქული და ჩინური სამზარეულო . არცთუ ისე ძვირ კაფეში სადილი 30 რუმინული ლეი დაგიჯდებათ, ვახშამი ორ პერსონაზე ალკოჰოლით – 100 ლეიდან . წახემსება გზადაც შეგიძლიათ – ქუჩაში იყიდება ფუნთუშეული, ბლინები, ცომში გახვეული სოსისი (ყავა 8 ლეიდან) ან „მაკდონალდსში“, KFS და „საბვეიში“ (ბიგ-მაკის მენიუ კარტოფილითა და კოკა-კოლით 20 ლეი ღირს).

გირჩევთ აუცილებლად დააგემოვნოთ ბუქარესტული „ბლითები“ – ახალგამომცხვარი ფუნთუშეული სხვადასხვა შიგთავსით, იყიდება საფირმო სასაუზმოში „კოვრიგი“ .